ಸಂಚಾರಿ ನಿಯಮ ಉಲ್ಲಂಘನೆ ಮಲ್ತುಂಡ ಕಠಿಣ ಕ್ರಮ: ಎಸ್.ಟಿ.ಸಿದ್ದಲಿಂಗಪ್ಪ.

ಉಡುಪಿ ನಗರದುಲಾಯಿ ಸರ್ವೀಸ್ ಬಸ್, ಸಿಟಿ ಬಸ್ ಲು ಸಂಚಾರ ನಿಯಮೊಲೆನ್ ಉಲ್ಲಂಘನೆ ಮಲ್ತೊಂದಿತ್ತುದ್, ಸೆ.30 ಮುಟ್ಟ ಬದಲಾವಣೆಗ್ ಅವಕಾಶ ಕೊರ್ಪುಂಡ್. ಅ.1 ಡ್ದ್ ಕಠಿಣ ಕ್ರಮ ಮಲ್ಪುಂಡ್ ಪಂಡುದ್ ಹೆಚ್ಚುವರಿ ಎಸ್ಪಿ ಎಸ್.ಟಿ. ಸಿದ್ದಲಿಂಗಪ್ಪ ಎಚ್ಚರಿಕೆ ಕೊರ್ತೆರ್.

ಆರು ಮಂಗಳವಾರ ನಗರದ ಜಗನ್ನಾಥ ಸಭಾಭವನಡ್ ನಡತಿನ ಪೋಲಿಸ್ ಇಲಾಖೆ ಬೊಕ್ಕ ಬಸ್ ಮಾಲಕೆರು,ಏಜಂಟರುಲೆನ ಸಭೆಟ್ ಪಾತೆರಿಯೆರು.

ನಗರದುಲಾಯಿ ಬಸ್ ಲು ಸಂಚಾರ ನಿಯಮನ್ ಉಲ್ಲಂಘನೆ ಮಲ್ಪುನವ್ವೆನ್ ಕರಿನ 15 ದಿನೊಡ್ದಿಂಚಿ ಪೋಲಿಸ್ ವರಿಷ್ಠಾಧಿಕಾರಿಲೆನ ಸೂಚನೆದಂಚ ಟ್ರಾಫಿಕ್ ಪೋಲಿಸೆರು ವಿಡಿಯೋ ಚಿತ್ರೀಕರಣ ಮಲ್ತುದೆರ್. ಖಾಸಗಿ ಬಸ್ ಮಾಲಕೆರು ಅಕ್ಲೆನ ಬಸ್ಸುದ ಚಾಲಕೆರು ಬೊಕ್ಕ ನಿವಾರ್ಹಕೆರು ಕಡ್ಡಾಯವಾದ್ ಸಮವಸ್ತ್ರ ಪಾಡೊಡ್. ಒಟ್ಟುಡ್ ಪರವಾನಿಗೆಲಾ ಉಪ್ಪುಲೆಕ್ಕ ತೂವೊನೊಡ್. ಮದ್ಯಪಾನ ಮಲ್ಪುನ ಚಾಲಕೆರೆಗ್ ಕರ್ತವ್ಯ ಮಲ್ಪರೆಗ್ ಬುಡರೆ ಬಲ್ಲಿ ಪಂಡೆರ್.

ಉಡುಪಿ ಬಸ್ ನಿಲ್ದಾಣಡ್ದ್ ಕುಂದಾಪುರ, ಕಾರ್ಕಳ ದಂಚಿ ಬಸ್ ಲು ನಿಲ್ದಾಣಡ್ದ್ ಪಿದಾಡಿಬೊಕ್ಕ ಅಲ್ಪಲ್ಪ ಬಸ್ ಉಂತಾವಂದೆ , ನೇರವಾದ್ ದುಂಬುದ ನಿಲ್ದಾಣಡೇ ಉಂತಾವೊಡ್ ಕುಂದಾಪುರಡ್ದ್ ಉಡುಪಿಗ್ ಬರ್ಪಿನ ಬಸ್ ಲು ಕರಾವಳಿ ಜಂಕ್ಷನ್ ದ ಸರ್ವೀಸ್ ರಸ್ತೆಡೇ ಉಂತಾವೊಡ್, ಬನ್ನಂಜೆ ರಸ್ತೆಗ್ ತಿರುಗಿನೆಡ್ ಬೊಕ್ಕ ಉಂತಾವರೆಗ್ ಬಲ್ಲಿ ಪಂಡೆರ್. ಮಾತಾ ಬಸ್ ಲು ಹೈಡ್ರೋಲಿಕ್ ಡೋರ್ ಅಳವಡಿಸಾವೊಡ್ ಪಂಡುದ್ ಸಲಹೆ ಕೊರಿಯೆರ್.

ಚಾಲನೆದ ಪೊರ್ತುಡ್ ಮೊಬೈಲ್ ಬಳಕೆ ಮಲ್ಪರೆಗ್ ಬಲ್ಲಿ ಪಂಡೆರ್.

ಬಸ್ ದ ಚಾಲಕೆರು ಚಾಲನೆದ ಪೊರ್ತುಡ್ ಮೊಬೈಲ್ ಬಳಕೆ ಮಲ್ಪುನ ಗಮನೊಗ್ ಬೈದುಂಡ್. ಇಯರ್ ಪೋನ್ ಪಾಡೊಂದ್ ಪದ ಪನೊಂದ್ ಚಾಲನೆ ಮಲ್ಪುನಕ್ಲೆನ್ ಗುರುತು ಮಲ್ದಿತ್ತುದ್ ದುಂಬುದ ದಿನೊಟ್ ಕುಡೊರ ಪುನಾರವರ್ತನೆ ಆಂಡ ಕಠಿಣ ಕ್ರಮದೆತೊನುವ, ಅಂಚೆನೇ ಕರ್ಕಶ ಹಾರ್ನ್ ಲೆನ್ ದೆತ್ತುದ್ ಪಾಡೊಡ್ ಪಂಡೆರ್..

ಈ ಸಂದರ್ಭಡ್ ಉಡುಪಿ ನಗರ ಠಾಣಾ ನಿರೀಕ್ಷಕೆರಾಯಿನ ಪ್ರಮೋದ್ ಕುಮಾರ್, ಉಡುಪಿ ಸಂಚಾರಿ ಠಾಣಾ ನಿರೀಕ್ಷಕ ಅಬ್ದುಲ್ ಖಾದರ್, ಆರ್.ಟಿ.ಓ ಶಾಂತರಾಜು ಉಪಸ್ಥಿತರಿತ್ತೆರ್.

ಸಭೆಟ್ ಬಸ್ ದಕುಲು ಉಲ್ಲಂಘನೆ ಮಲ್ದಿನ ಸಂಚಾರಿ ನಿಯಮೊಲೆನ್ ವಿಡಿಯೋ ಮುಖೇನ ತೋಜಾಯೆರ್. ಈ ಮಾತಾ ಸಮಸ್ಯೆಲೆನ್ ಸೆ.30 ದುಲಾಯಿ ಸರಿಮಲ್ಪುವಾ ಪಂಡುದ್ ಬಸ್ ದ ಮಾಲಕೆರು ತೆರಿಪಾದೆರ್.