ತುಳುಭಾವಗೀತೆ ಪಂತೊ

ಭಾವಗೀತೆ ಕೇವಲ ಪದ್ಯ ಮಾತ್ರ ಅತ್ತ್, ಮನಸ್ಸು, ಹೃದಯದ ಆಳಡ್ದ್ ಬರ್ಪಿನ ತುಡಿತದ ಆನಂದ. ಭಾವಗೀತೆಡ್ ನಮ್ಮ ಸಂಬಂಧದ ವೈಶಿಷ್ಟೊನ್ ಅರ್ಥ ಮಲ್ತ್ ಕೊರ್ಪುಂಡ್. ಪಂಡುದ್ ಒಡಿಪುದ ಪೆರಿಯ ವಕೀಲೆರಾಯಿನ ಶ್ರೀ ಶಾಂತಾರಾಮ್ ಶೆಟ್ಟಿ. ಪಂಡೆರ್. ಆರು  ಉಡುಪಿದ ಕ್ರಿಶ್ಚಿಯನ್ ಹೈಸ್ಕೂಲ್ ದ ಅಂಗಣೊಡ್ ನ. 24 ತಾರೀಕುದಾನಿ ಒಡಿಪು ತುಳುಕೂಟ ಬೊಕ್ಕ ಕನ್ನಡ ಬೊಕ್ಕ ಸಂಸ್ಕ್ರತಿ ಇಲಾಖೆದ ಒತ್ತುಸೇರಿಗೆಡ್ ನಡತಿನ ತುಳುಭಾವಗೀತೆನ್ ಉದಿಪನ ಮಲ್ತುದ್ ಪಾತೆರಿಯೆರ್. ಅಪ್ಪೆ ಬಾಸೆದ ಪಾತೆರ ಮನಸ್ಸುಗ್ ಮುಟ್ಟುನವ್. ನಮ್ಮ ತುಳುಬಾಸೆಡ್ ಭಾವಗೀತೆದ ಪೊರ್ಲುನ್ ಜಗತ್ತುಗ್ ತೋಜಾಲೆ ಪಂಡುದ್ ಈ ಪೊರ್ತುಡ್ ಆರ್ ಎಡ್ಡೆಪ್ಪು ಬಯಕಿಯೆರ್.ಕಜ್ಜೊಡ್ ಪುಗಾರ್ತೆದ ಸಂಗೀತಗಾರೆ ಕರ್ನಾಟಕ ಗಾನ ಕೋಗಿಲೆ ಪ್ರಶಸ್ತಿ ವಿಜೇತೆರಾಯಿನ ಡಾ. ಗಣೇಶ್ ಗಂಗೊಳ್ಳಿ ಮೆರೆಗ್ ಮಾನಾದಿಗೆ ನಡತುಂಡ್. ತುಳುಕೂಟದ ಗುರ್ಕಾರೆರಾಯಿನ ಬಿ. ಜಯಕರ ಶೆಟ್ಟಿ ಇಂದ್ರಾಳಿ ಗುರ್ಕಾರ್ಮೆಡಿತ್ತುದ್, ಜೋಕ್ಲೆಗ್ ತುಳುಸಂಸ್ಸ್ರತಿದ ಬಗೆಟ್ ಎಡ್ಡೆ ಮಾಯಿತಿ ಕೊರಿಯೆರ್. ಕಜ್ಜೊಡ್ ಮಲ್ಲ ಬಿನ್ನೆರಾದಿತ್ತಿನ ಉಡುಪಿ ಬಿ. ಜೆ. ಪಿ. ಮಹಿಳಾ ಮೋರ್ಚಾದ ಮಾಜಿ ಗುರ್ಕಾರ್ದಿ ತುಳು ಬಾಸೆನ್ ಬುಲೆಪಾವುನ ನಿಟ್ಟುಡ್ ತುಳುಕೂಟ ಮಲ್ಪುನ ಬೇಲೆ ಶ್ಲಾಘನೀಯ ಪಂಡೆರು. ತುಳುಭಾವಗೀತೆ ಪಂತೊದ ಸಂಚಾಲಕೆರಾಯಿನ ಜಯರಾಮ್ ಶೆಟ್ಟಿಗಾರ್ ಮಣಿಪಾಲ್ ಪ್ರಾಸ್ತವಿಕ ಪಾತೆರ್ದ್, ಪ್ರಕಾಶ್ ಸುವರ್ಣ ಕಟಪಾಡಿ ಬಿನ್ನೆರೆನ್ ಎದ್ಕೊಂಡೆರ್. ಸಂಘಟನಾ ಕಾರ್ಯಂತೆರಾಯಿನ ವಿದ್ಯಾ ಸರಸ್ವತಿ ಮಾನಾದಿಗೆದ ಓಲೆ ಓದಿಯೆರ್. ತುಳುಕೂಟದ ಪ್ರಧಾನ ಕಾರ್ಯಂತೆರಾಯಿನ ಗಂಗಾಧರ ಕಿದಿಯೂರು ಸೊಲ್ಮೆಸಂದಾಯ್ತ ಮಲ್ತೆರ್. ಒಳಕಾಡು ಶಾಲೆದ ಜೋಕುಲು ಸುಗಿತೆರ್.ತುಳುಕೂಟದ  ಒತ್ತು ಗುರ್ಕಾರೆರಾಯಿನ ಭುವನಪ್ರಸಾದ್ ಹೆಗ್ಡೆ, ಪಣವುದ ಪಾಲವೆರಾಯಿನ ಚೈತನ್ಯ ಎಮ್. ಜಿ.,, ಮುಂಬಯಿ ಕರ್ನಾಟಕ ಸಂಘದ ಗುರ್ಕಾರೆರಾಯಿನ ಭರತ್ ಕುಮಾರ್ ಪೊಲಿಪು ವೇದಿಕೆಡ್ ಉಪಸ್ಥಿತರಿತ್ತೆರ್.