ಮಣಿಪಾಲ್ ಇನ್ ವತಿಡ್ದ್ ಪ್ರತಿಭಾವಂತ ವಿದ್ಯಾರ್ಥಿಲೆಗ್, ಸಾಧಕೆರೆಗ್ ಮಾನಾದಿಗೆ..

, ಜೂ.20: ಮಣಿಪಾಲ ಇನ್ ಹೊಟೇಲ್ ಬೊಕ್ಕ ಕನ್ವೆನ್ಷನ್ ಸೆಂಟರ್ ವತಿಡ್ದ್ ಸಾಧಕೆರೆಗ್ ಸನ್ಮಾನ ಸಮಾರಂಭನ್ ಐತಾರದಾನಿ ಹೊಟೇಲ್ ದ ಸಭಾಂಗಣಡ್ ಆಯೋಜನೆ ಮಲ್ದಿತ್ತೆರ್.
 
ಕಾರ್ಯಕ್ರಮನ್ ಉದಿಪನ ಮಲ್ತಿನ ಉಡುಪಿ ಶಾಸಕಕೆ.ರಘುಪತಿ ಭಟ್ ಪಾತೆರ್ದ್ ,ಉಡುಪಿ ಜಿಲ್ಲೆ ಶಿಕ್ಷಣ ಕ್ಷೇತ್ರಡ್ ಪ್ರಗತಿ ಸಾಧನೆ ಮಲ್ಪರೆಗ್ ಮುಲ್ಪದ ಶಿಕ್ಷಕೆರೆನ ಬದ್ಧತೆನೇ ಕಾರಣ. ಶಿಕ್ಷಕ ವೃತ್ತಿಡ್ದ್ ಸೇವೆ ಪನ್ಪಿನ ಭಾವನೆಡ್ ಅಕುಲು ಕಾರ್ಯನಿರ್ವಹಣೆ ಮಲ್ತೊಂದುಲ್ಲೆರ್. ನೆತ್ತ ಪರಿಣಾಮವಾದ್ ಸರಕಾರಿ ಶಾಲೆಲು ಗುಣಮಟ್ಟದ ಶಿಕ್ಷಣಡ್ ಖಾಸಗಿ ಶಾಲೆಡ್ದ್ ದುಂಬು ಉಂಡು ಪಂಡುದ್ ಪಂಡೆರ್. .
 
ಮಂಗಳೂರು ಶಾಸಕ ಯು.ಟಿ.ಖಾದರ್ ಪಾತೆರ್ದ್ , ಪ್ರತಿಭಾವಂತ ವಿದ್ಯಾರ್ಥಿಲು ಕೇವಲ ಅಪ್ಪೆ ಅಮ್ಮನ ಆಸ್ತಿ ಮಾತ್ರ ಅತ್ತ್ ಅಕುಲು ದೇಶದಸಂಪತ್ತು ಆವೊಡ್. ಆ ನಿಟ್ಟುಡ್ ಉನ್ನತ ಸ್ಥಾನೊಗ್ ಪೋದ್ ಜನಕ್ಲೆನ ಪ್ರೀತಿನ್ ಪಡೆತೊನೊಡ್. . ಮಾತಾ ಧರ್ಮದ ಸಾರ ಒಂಜೇ ಆದಿತ್ತುದ್, ಪ್ರೀತಿ, ವಿಶ್ವಾಸ, ಸಹೋ ದರತ್ವನ್ ಪ್ರತಿಯೊರಿಲಾ ಮೈಗೂಡಿಸಾವೊಡ್. ಈ ನಿಟ್ಟುಡ್ ಇಂಚಿನ ಕಾರ್ಯಕ್ರಮೊಲು ಮಾದರಿಯಾತುಂಡ್ ಪಂಡುದ್ ತೆರಿಪಾಯೆರ್.
 
ಈ ಸಂದರ್ಭಡ್ ಎಸೆಸೆಲ್ಸಿ ಪರೀಕ್ಷೆಡ್ ಅತ್ಯಧಿಕ ಅಂಕೊ ಪಡೆದಿನ ಉಡುಪಿ ಜಿಲ್ಲೆದ ವಿದ್ಯಾರ್ಥಿಲಾಯಿನ ಪುನೀತ್ ನಾಯಕ್, ಆಯೇಷಾ ಅಜ್ವಾ, ನೇಹಾ ನೆಲರಿಯ ಕೋತ ಬೊಕ್ಕ ನೇತ್ರ ವಿಜ್ಞಾನ ಕ್ಷೇತ್ರದ ಸಾಧಕ ಡಾ.ರೋಹಿತ್ ಶೆಟ್ಟಿ ಬೊಕ್ಕ ಮಣಿಪಾಲ ಕೆಎಂಸಿಡ್ 2019ಡ್ ಬಂಗಾರ್ದ ಪದಕ ವಿಜೇತ ಡಾ. ಸೂಫಿಯನ್ ಇಬ್ರಾಹಿಂ ಮೆರೆನ್ ಮಾನಾದಿಗೆ ಮಲ್ತೆರ್.
 
ಮಣಿಪಾಲ ಕೆಎಂಸಿಯ ಡೀನ್ ಡಾ.ಶರತ್ ರಾವ್, ರಾಜ್ಯ ಸರಕಾರಿ ನೌಕರರ ಸಂಘದ ಜಿಲ್ಲಾಧ್ಯಕ್ಷ ಸುಬ್ರಹ್ಮಣ್ಯ ಶೇರಿಗಾರ್, ಹೊಟೇಲ್ ದ ಜನರಲ್ ಮೆನೇಜರ್ ಡಾ.ರಾಮದಾಸ್ ಪ್ರಭು, ವಿದ್ಯಾರ್ಥಿನಿ ಪ್ರಜ್ಞಾ ಪ್ರಶಾಂತ್ ಮೊಕ್ಲೆನ್ ಮಾನದಿಗೆ ಮಲ್ತೆರ್.
 
ಅಧ್ಯಕ್ಷತೆಡ್ ಉದ್ಯಮಿ ಗುರ್ಮೆ ಸುರೇಶ್ ಶೆಟ್ಟಿ ಇತ್ತೆರ್. ಮುಖ್ಯ ಅತಿಥಿಲದ್ ಮಾಜಿ ಸಚಿವ ವಿನಯ ಕುಮಾರ್ ಸೊರಕೆ . ಇತ್ತೆರ್ .ಮಣಿಪಾಲ ಇನ್ ನೆತ್ತ ಆಡಳಿತ ನಿರ್ದೇಶಕ ಇಬ್ರಾಹಿಂ ಮೌಲಾನ ಸ್ವಾಗತ ಮಲ್ತೆರ್. ಮಾರುಕಟ್ಟೆ ವಿಭಾಗದ ಇಲ್ಯಾಸ್ ಕಾಪು ವಂದಿಸಾದ್,. ಪ್ರಶಾಂತ್ ಶೆಟ್ಟಿ ಕಾರ್ಯಕ್ರಮ ನಿರೂಪಣೆ ಮಲ್ತೆರ್.