ಉಡುಪಿ, ಆ.11: ಸ್ವಾತಂತ್ರ್ಯೋತ್ಸವದ ಅಮೃತ ಮಹೋಚ್ಚಯದ ಅಂಗವಾದ್ ಹರ್ ಘರ್ ತಿರಂಗಾ ಅಭಿಯಾನದ ಯಶಸ್ಸುಗಾದ್ ಉಡುಪಿ ಅಂಚೆ ವಿಭಾಗ ತ್ರಿವರ್ಣ ಕೊಡಿತ್ತ ಬಗ್ಗೆ ಜನಜಾಗೃತಿ ಜಾಥೊನ್ ಉಡುಪಿ ನಗರಡ್ ಶುಕ್ರವಾರ ಆಯೋಜನೆ ಮಲ್ದಿತ್ತುಂಡ್.
ಉಡುಪಿ ಪ್ರಧಾನ ಅಂಚೆ ಕಚೇರಿದ ಅಂಗಣೊಡ್ ಜಾಥಾಗ್ ಚಾಲನೆ ಕೊರಿನ ಉಡುಪಿ ವಿಭಾಗದ ಅಂಚೆ ಅಧೀಕ್ಷಕ ರಮೇಶ್ ಪ್ರಭು ಪಾತೆರ್ದ್ , ಕರಿನ ಸರ್ತಿ ಸ್ವಾತಂತ್ರ್ಯ ಉಚ್ಚಯದ ಅಮೃತ ಮಹೋಚ್ಚಯದ ಪ್ರಯುಕ್ತ ಮಾತೆರೆನ ಇಲ್ಲಡ್ ತ್ವಿವರ್ಣ ಧ್ವಜ ರಾಪಾವುನ ಕಾರ್ಯಕ್ರಮ ಯಶಸ್ವಿ ಯಾವರೆಗ್ ಭಾರತೀಯ ಅಂಚೆ ಇಲಾಖೆದ ಪಾತ್ರ ಬಾರೀ ಮಹತ್ತರವಾದಿತ್ತುಂಡ್. ಆ ಸಂದರ್ಭಡ್ ಕಮ್ಮಿ ಕ್ರಯೊಗ್ ಪ್ರತಿಯೊಂಜಿ ಇಲ್ಲಗ್ ತ್ರಿವರ್ಣ ಧ್ವಜನ್ ಮುಟ್ಟಾವುನ ಕಾರ್ಯ ಮಲ್ದಿತ್ತುಂಡ್. ಉಡುಪಿ ಅಂಚೆ ವಿಭಾಗಡ್ದ್ 20ಸಾವಿರಕುಲಾ ಜಾಸ್ತಿ ತ್ರಿವರ್ಣ ಧ್ವಜೊನ್ ತಲುಪಿಸಾವರೆಗ್ ಯಶಸ್ವಿಯಾತ.ಪಂಡೆರು.
ಅಂಚೆನೆ ಈ ಸರ್ತಿಲಾ ಸ್ವಾತಂತ್ರ್ಯ ಉಚ್ಚಯನ್ ಮೂಜಿ ದಿನ ಗೌಜಿಡ್ ಆಚರಣೆ ಮಲ್ಪರೆಗ್ ಇಲಾಖೆಗ್ ಸೂಚನೆ ಬೈದುಂಡ್.. ಅಂಚಾದ್ ಇಲಾಖೆಗ್ ಒಟ್ಟು 22ಸಾವಿರ ತ್ರಿವರ್ಣ ಧ್ವಜ ಬೈದುಂಡ್. ಅವ್ವೆನ್ ಜನಕ್ಲೆಗ್ ತಲುಪಿಸಾವುನ ಬೇಲೆನ್ ಇಲಾಖೆ ಮಲ್ತೊಂದುಂಡ್. ಅಯಿತ್ತೊಟ್ಟುಗ್ ಈ ಬಗ್ಗೆ ಜನ ಜಾಗೃತಿ ಪುಟ್ಟಾವರೆಗ್ ಜಾಥನ್ ಆಯೋಜನೆ ಮಲ್ದುಂಡ್ ಪಂಡುದ್ ತೆರಿಪಾಯೆರು.
ಆ.13 ಐತಾರದಾನಿ ಕಾಂಡೆಡ್ದ್ ಮಧ್ಯಾಹ್ನಮುಟ್ಟ ಜಿಲ್ಲೆದ ಮಾತಾ ಅಂಚೆ ಕಚೇರಿಲೆಡ್ ವಿಶೇಷ ಕೌಂಟರ್ ಲೆಡ್ ತ್ರಿವರ್ಣ ಧ್ವಜ ದೆತೊನರೆಗ್ ಅವಕಾಶ ಉಂಡು. ಧ್ವಜವೊಂಜೆತ್ತ ಬಿಲೆ 25ರೂ.. ಅಂಚೆನೇ ಅಂಚೆ ಇಲಾಖೆದ ವೆಬ್‌ಸೈಟ್‌ ಡ್ದ್ ಆನ್‌ಲೈನ್ ಮೂಲಕಲಾ ತ್ರಿವರ್ಣ ಧ್ವಜೊನ್ ದೆತೊನೊಲಿ ಪಂಡುದು ಆರು ಮಾಯಿತಿ ಕೊರಿಯೆರು.
ಈ ಸಂದರ್ಭಡ್ ಉಡುಪಿ ಸಹಾಯಕ ಅಂಚೆ ಅಧೀಕ್ಷಕೆರಾಯಿನ ಕೃಷ್ಣರಾಜ್ ವಿಠಲ ಭಟ್, ವಸಂತ್, ದಯಾನಂದ ದೇವಾಡಿಗ, ಅಂಚೆ ನಿರೀಕ್ಷಕೆರಾಯಿನ ಶಂಕರ ಲಮಾಣಿ, ಶಶಿಕುಮಾರ್ ಹೀರೆಮಠ, ಉಡುಪಿ ಪ್ರಧಾನ ಅಂಚೆ ಕಚೇರಿದ ಅಂಚೆ ಪಾಲಕ ಗುರುಪ್ರಸಾದ್, ಉಡುಪಿ ಅಂಚೆ ವಿಭಾಗದ ಅಂಚೆ ಸಿಬ್ಬಂದಿ ಉಪಸ್ಥಿತರಿತ್ತೆರು.
ಉಡುಪಿ ಅಂಚೆ ಕಚೇರಿಡ್ದ್ ಪಿದಾಡಿನ ಜಾಥ ಪರತ್ತ್ ಪೋಸ್ಟ್ ಆಫೀಸ್ ರಸ್ತೆದ ಮೂಲಕ ಸಾಗುದ್ ಪರತ್ ಡಯಾನಾ ವೃತ್ತಡುದ್ ತಿರ್ಗುದ್ ಕವಿ ಮುದ್ದಣ್ಣ ಮಾರ್ಗವಾದ್ ವಾಪಾಸು ಉಡುಪಿ ಅಂಚೆ ಕಚೇರಿದ ಕೈತಲು ಸಮಾಪನ ಆಂಡ್.
by 