ಅಯೋಧ್ಯೆ ರಾಮಜನ್ಮಭೂಮಿ ತೀರ್ಥಕ್ಷೇತ್ರ ಟ್ರಸ್ಟ್ ದ ವಿಶ್ವಸ್ಥರೂ ಆದುಪ್ಪುನ ಶ್ರೀ ಪೇಜಾವರ ಮಠಾಧೀಶ ಶ್ರೀ ಶ್ರೀ ವಿಶ್ವಪ್ರಸನ್ನತೀರ್ಥ ಶ್ರೀಪಾದೆರು ನವದೆಹಲಿಡ್ ಸೋಮವಾರ ಬೈಯಗ್ ಪ್ರಧಾನ ಮಂತ್ರಿ ಶ್ರೀ ನರೇಂದ್ರ ಮೋದಿಜಿನ್ ಭೇಟಿ ಮಲ್ತೆರ್.
ತನ್ನ ಗುರುಕುಲಾಯಿನ ಕೀರ್ತಿಶೇಷ ಶ್ರೀ ವಿಶ್ವೇಶತೀರ್ಥ ಶ್ರೀಪಾದೆರೆಗ್ ಭಾರತ ಸರ್ಕಾರ ಮರಣೋತ್ತರವಾದ್ ಘೋಷಣೆ ಮಲ್ದಿನ ಪದ್ಮವಿಭೂಷಣ ಪ್ರಶಸ್ತಿನ್ ಸ್ವೀಕಾರ ಮಲ್ಪರೆಗ್ ನವದೆಹಲಿಗೆ ಪೋಯಿನ ಸಂದರ್ಭೊಡ್ ಮೋದೀಜಿನ್ ಭೇಟಿ ಮಲ್ತೆರ್.
ಈ ಸಂದರ್ಭೊಡ್ ಶ್ರೀಕ್ಲೆನೊಟ್ಟುಗ್ ಕುಶಲೋಪರಿ ನಡಪಾಯಿನ ಮೋದಿಜಿ ಶ್ರೀ ವಿಶ್ವೇಶತೀರ್ಥರೆನ್ ವಿಶೇಷವಾದ್ ನೆನೆತೆರ್.
ರಾಮಮಂದಿರ ನಿರ್ಮಾಣ ಕಾರ್ಯೊಲೆನ ಪ್ರಗತಿದ ಬಗ್ಗೆ ಇರುವೆರ್ಲಾ ಸಮಾಲೋಚನೆ ಮಲ್ತೆರ್.
ನರೇಂದ್ರ ಮೋದೀಜಿಗ್ ಯಕ್ಷಗಾನದ ಕೇದಗೆ ಮುಂಡಾಸುದ ಕಿರೀಟ ದೀದ್ ಜರತಾರಿ ಶಾಲು, ಬೊಳ್ಳಿದ ತಟ್ಟೆಡ್ ಉಡುಪಿ ಶ್ರೀ ಕೃಷ್ಣನ ಗಂಧ , ನಿರ್ಮಾಲ್ಯ ತುಳಸಿ ಕೊರ್ದ್ ಆಶೀರ್ವಾದ ಮಲ್ತೆರ್. ಉಡುಪಿದ ಚಿತ್ರಕಲಾವಿದೆ ವಸಂತಲಕ್ಷ್ಮೀ ಹೆಬ್ಬಾರ್ ಮೇರು ರಚನೆ ಮಲ್ತಿನ ಮೋದೀಜಿ ಉಡುಪಿ ಕೃಷ್ಣಗ್ ಕೈಮುಗಿದ್ ಉಸುದಿನ ಭಂಗಿದ ಪೊರ್ಲುದ ತೈಲಚಿತ್ರ ಬೊಕ್ಕ ಸಂಸ್ಕೃತ , ಕನ್ನಡ , ತುಳು ಲಿಪಿಟ್ ನರೇಂದ್ರ ಮೋದೀಜಿನ ಪುದರ್ ಬರೆತಿನ ಸ್ಮರಣಿಕೆನ್ ಶ್ರೀಕುಲು ಪ್ರಧಾನಮಂತ್ರಿ‌ಗ್ ಕೊರಿಯೆರ್.
ಶೀಘ್ರ ಕೃಷ್ಣ ದರ್ಶನೊಗ್ ಬರ್ರೆಗ್ ಶ್ರೀಕ್ಲೆನ ಲೆಪ್ಪು
ಈ ( ಪ್ರಧಾನ ಮಂತ್ರಿ ಅಧಿಕಾರದ) ಅವಧಿಡೇ ಉಡುಪಿ ಕೃಷ್ಣ ದರ್ಶನೊಗ್ ಬರಿಯರೆಗ್ ಶ್ರೀಕುಲ್ ಲೆಪ್ಪು ಕೊರಿಯೆರ್. ಖಂಡಿತ ಬರ್ಪೆ ಪಂಡುದ್ ಮೋದೀಜಿ ಬಾರೀ ಕುಷಿಟ್ ತೆರಿಪಾಯೆರ್.
ಈ ಪೊರ್ತುಡ್ , 1 . ದೇಶೊಡ್ ಗೋಹತ್ಯಾ ನಿಷೇಧ ಕಾನೂನು ಜಾರಿ ಕನಾವೊಡ್, 2 ದೇಶಾದ್ಯಂತ ಹಿಂದೂ ಶ್ರದ್ಧಾಕೇಂದ್ರೊಲೆನ್ ಸರ್ಕಾರಿ ವ್ಯವಸ್ಥೆಡ್ದ್ ಸ್ವಾಯತ್ತ ಮಲ್ಪೊಡ್ , 3 . ಮಹರ್ಷಿ ವೇದವ್ಯಾಸೆರೆನ ಜಯಂತಿನ್ (ಆಷಾಢ ಪೂರ್ಣಿಮಾ ಅತ್ತುಂಡ ಒಂಜಿ ನಿರ್ದಿಷ್ಟ ತಾರೀಕುನ್ ) ” ತತ್ತ್ವಜ್ಞಾನ ದಿನ ” ಅತ್ತುಂಡ” ಅಧ್ಯಾತ್ಮ ದಿನ ” ಪಂಡುದ್ ಘೋಷಣೆ ಮಲ್ತುದ್ ಸರ್ಕಾರಿ ಆಚರಣೆಗ್ ವ್ಯವಸ್ಥೆ ಮಲ್ಪೊಡ್, ಅಂಚೆನೇ ತುಳು ಭಾಷೆನ್ ಸಂವಿಧಾನದ 8 ನೇ ಪರಿಚ್ಛೇದೊಗ್ ಸೇರ್ಪಡೆ ಮಲ್ಪೊಡ್ ಪಂಡುದ್ ನಾಲ್ ಅಪೇಕ್ಷೆಲೆನ್ ಲಿಖಿತವಾದ್ ಕೊರಿಯೆರ್. ಈ ಬಗ್ಗೆಲಾ ಗಮನ ಕೊರ್ಪೆ ಪಂಡುದ್ ಮೋದೀಜಿ ತೆರಿಪಾಯೆರ್ .
ಶ್ರೀ ಪೇಜಾವರ ಮಠದ ದಿವಾನರಾಯಿನ ಎಂ ರಘುರಾಮಾಚಾರ್ಯ , ಡಿ ಪಿ ಅನಂತ್ , ಸಾಮಾಜಿಕ ಕಾರ್ಯಕರ್ತ ಶ್ರೀಗಳ ಆಪ್ತೆರಾಯಿನ ವಾಸುದೇವ ಭಟ್ ಪೆರಂಪಳ್ಳಿ ಉಪಸ್ಥಿತ್ತೆರ್.
by 