ಸೊತಂತ್ರ ಭಾರತದ ಇನಿತ ಪಾಡ್..

| ‘ಸೊತಂತ್ರ’ ಬಾರತದ ಇನಿತ ಪಾಡ್ | ಸಾರತ್ತ ಒಂರ್ಬನೂತ್ತ ನಲ್ಪತ್ತೇಲ್ನೇ ಇಸವಿದ ಅಗೋಸ್ಟು ತಿಂಗೊಲ್ದ ಪದಿನೈನನೆ ತಾರೀಕ್ ಆನಿದ ಪಗೆಲ್ ದೇವೆರ್ನ ಪುಲ್ಯಕಾಂಡೆದ ಕದಿರ್ ದ ಒಟ್ಟಿಗೆ ಕೇಂಡಿನ‌ ಸೊರ , ಸೊತಂತ್ರ....ಸೊತಂತ್ರ...ಸೊತಂತ್ರ..

ಇಂಚ ನಾಲ್ ಮೈಡ್ದ್ ಲಾ………, ಊರೊರ್ಮೆಲಾ ಸೊತಂತ್ರದ ಗೌಜಿ .ಹೆಚ್ಚಿಕಡಮೆ ಮುನ್ನೂದು ವರ್ಸ ನಮ್ಮ ನೆಲಟ್ , ನಮ್ಮ ದೇಶೊಡು ನಮ ಸೊತಂತ್ರ ದಾಂತೆ ಬದುಕೊಂದು ಇತ್ತ . ಇಜ್ಜಾಂದಿನ ಸೊತಂತ್ರ ಒದಗಿನ ಎಡ್ಡೆ ದಿನ . ನಾಲೀಸ್ ದ ,ನಾಕುಸಿದ ಬಾಳ್ ಬಾಳಿನ ಅಪ್ಪೆ ಬಾರತಿನ ಜೋಕುಲೆಗ್ ಮರತ್ ದೇ ಪೋದಿತ್ತಿ ‘ಸೊತಂತ್ರ’ ಆನಿ ಒದಗ್ ದ್ ಬತ್ತಂಡ್.
ದೇಶದ ಪ್ರತಿ ಕುಟುಮೊಡು ನಾಲ್ ಐನ್ ತರೆ ಮಾಜ್ ದ್ ಪೋದುಪ್ಪು‌ ,ಅಂಚಾದ್ ಸೊತಂತ್ರ ಇಜ್ಜಾಂದೆ ಬದುಕುನನೇ ಅಬ್ಯಾಸ್ ಆದ್ ,ಉಂದುವೆ
ಬದ್ ಕ್ ಪನ್ಪಿನ ಗೇನ ಅಜ್ಜ ಪಿಜ್ಜ ಕಾಲೊಡ್ದು ನೆತ್ತೆರ್ಡೆ ಬತ್ತಿದಿಪ್ಪು. ಪಂಡ ಆತ್ ವರ್ಸೊಡ್ದು ನಮ ಬೊಲ್ದು ಮೋರೆದಾಯನ ಆಲ್ತನೊಟು ಬದುಕೊಡಾಂಡ್. ಸರಿ ಆಲೋಚನೆ ಮಲ್ಪುಗ… ದೇಸೊಗು ಸೊತಂತ್ರ ಬತ್ತ್ ದ್ ಎಲ್ಪತ್ತಾಜಿ ವರ್ಸ ಕರಿಂಡಲಾ ನಮ ದೇಸೊಡು ಏತ್ ಇಚ್ಚಾನುಸಾರೊಡು ಬದ್ ಕೊಂದುಲ್ಲ. ಏತ್ ಜನೊಕು ನಮ ಸೊತಂತ್ರೆರ್ ಪನ್ಪಿನ ಗೇನ ಉಂಡು ?

ಈ ದೇಸೊಡು ,ಮುಲ್ತ‌ ಜನಮಂದೆಡ್ ನೆಗತ್ತ್ ತೋಜೊಂದಿತ್ತಿನ ಒಕ್ಕಟ್ಟ್ , ಈ ಮಣ್ಣ್ ದ ಸಂಸ್ಕೃತಿ ,
ಆಚಾರ – ಇಚಾರ, ನಂಬೊಲಿಗೆ – ನಡವಳಿ‌ ಇಂದೆನ್ ಪೂರ ತೂನಗ ನಮನ್ ಆಳ್ಯರೆ ಬಂಗವುಂಡು ಇಂಚ ಎಣ್ಣಿನ‌ ಪರದೇಸಿಲು ಸುರುಟು ನಮಡ ಇತ್ತಿನ ಒಕ್ಕಟ್ಟ್ ನಿ ದರ್ತ್ ದ್ ಪೊಡಿಮಲ್ತೆರ್ .ಎಂಚ ಪೊಡಿ ಮಲ್ತೆರ್ ಕೇಂಡ ‘ಕಯಿಮೋಸ’ ಮಲ್ತೆರ್ ; ಮರೆ ಮೋಸ’ ಸಾದಿಯೆರ್. ನೆಟ್ಟ್ ಅಕುಲು ಗೆಂದಿಯೆರ್.

. ಅಂದ್…. ಬೇರೊಗೂಂದ್ ತ್ರಾಸ್ ಪಸೊಂದು ಬತ್ತಿನ ಪರದೇಸಿಲು ನಮ ದೇಸೊಡು ಉಪ್ಪುನ‌ ,ವಾ ಕಾಲೊಗುಲಾ ಕುಂದು ಬರಂದೆ ಪೊಲಿತ ಲೆಕ್ಕ ನೆಲೆ ಆತಿ ಸಂಪೊತ್ತುನು ತೂದು ಮರ್ಲ್ ಯೆರ್. ಬ್ಯಾರದಾಯನ ಬುದ್ದಿ ಬಲಿಪರೆ ಸುರುವಾಂಡ್, ಓಡೆ ಮುಟ್ಟ ಬಲಿತ್ಂಡ್ ಪಂಡ ಇಡೀ ದೇಸೊನು ವಶ ಮಲ್ತೊಂಡೆರ್ . ಬೀರ ಬಿರ್ಸಾದಿಗೆದ ಜನಕುಲೆನ್ ಅಂದ್ ಮಲ್ತೊಂದು ಅಕಲೆಡನೇ ಬರಿತ ನಮ ದೇಸದ ಬೊಕ್ಕೊರಿ ಅರಸುಡ ಅಂಕ‌ಕಾದಿ‌ಲೆಕ್ಕ ಮಲ್ತೆರ್ . ಇಡೀ ದೇಸೊಡು ಇಂಚೆನೆ ಉಲಸಂಚಿ ಮಲ್ತ್ ದ್ ಅಕಲೆನ ‘ಕೊಡಿನ್’ ನಮ್ಮ ದೇಸದ ಕೊಡಿಮರಕ್ ಏರ್ತೆರ್ ‘.

ಇಂಚಿನ ಒಂಜಿ ಮೋಸದ ,ನಂಬೊಲಿಗೆಗ್ ದ್ರೋಹ ಮಲ್ತಿನ ಕೆಲಸ ಮೂಜಿನೂದು ವರ್ಸ ನಡತ್ಂಡ್ .ಅಂಚಾದ್ ನಮ – ನಮ ನಡುಟೆ ಬೆಂಗ್ ಅರ್ಲ್ಂಡ್ ಆ ಬೆಚ್ಚೊಡು ಅಕುಲು ಅಕಲೆನ ಸಲಿ ಕಾಯಿತೆರ್. ದೇಸೊನು ಸೂರೆ ಮಲ್ತೆರ್. ಒಕ್ಕಟ್ಟ್ ಇಜ್ಜಾಂದಿನ ನಮ ; ಆ ಊರುಡು ನಡತಿನ‌ ಅನ್ಯಾಯೊಗು ಬರಿತ ಊರುದಾಯೆ ಮನಿಪಂದೆ ಕುದ್ದೆ , ಎಂಕ್ ದಾಯೆಗ್ ಪಂಡ್ ದ್ ಉದಾಸೀನೊಡು ಇತ್ತೆ . ಉಂದು ಸೊತಂತ್ರ ಕಳರವೊಂಡಿನ ಕತೆ .

ಸೊತಂತ್ರ ತಿಕ್ಕೊಡ್ಡ ದುಂಬುದ ಕತೆ ಉಂದು. ಇತ್ತೆ ಒಂತೆ ಆಲೋಚನೆ ಮಲ್ಪುಗ ….ಸೊತಂತ್ರ
ತಿಕ್ ದ್ ಎಲ್ಪತ್ತ ನಾಲ್ ವರ್ಸ ಕರಿದ್ ಪೋಂಡ್ ,
ಇತ್ತೆಲಾ ನಮ ರಾಜ್ಯೊಲು ಒಕ್ಕಟ್ಟ್ ಡ್ ಉಂಡಾ ?
ನಮವುಲು ನೂದು ಕಟ್ಲೆಡ್ ಪಾರ್ಟಿಲು, ಮಾತ ಪಾರ್ಟಿಗ್ ಲಾ ರಾಜ್ಯ ಆಲ್ಯೊಡು, ದೇಸ ಆಲ್ಯೊಡು ,
ಎಂಕಲೆಗ್ ದೊಡ್ಡು ಆವೊಡು , ಮಲ್ಲ ಮದಿಪುದ ಜಾಗೆಡ್ ಕುಲ್ಲುದು ಮೆರೆವೊಡು ಪನ್ಪಿನ ಅಂಗಲಾಪು ಅತ್ತಾಂದೆ ಬೇತೆ ದಾಲ ಆಲೋಚನೆ ಉಂಡಾ..?
ರಡ್ಡ್ ಸಾರತ್ತ ಇರುವತ್ತ ಒಂಜಿನೇ ಇಸವಿಡ್ ಲಾ ಈ ಪಾತೆರ ಸತ್ಯನೇ ಆದುಂಡು .ದಿನೊಡ್ದು ದಿನ ಈ‌ ಅಂಗಲಾಪು ಎಚ್ಚೊಂದೇ ಉಂಡು ಕಡಮೆ ಆವೊಂದಿಜ್ಜಿ . ಆನಿ ಪರದೇಸಿಲು ನಮ್ಮ ದೇಸೊನು ಸೂರೆ ಮಲ್ತೆರ್ ,ಇತ್ತೆ ನಮ ಜನಕುಲು ದೇಸ ಸೂರೆ ಮಲ್ತೊಂದುಲ್ಲೆರ್ .ಉಂದು ಸೊತಂತ್ರ ಬಾರತದ ಎತೆದ ಕತೆ .

“ದೇಸ ಸೂರೆ ಆವಡ್ , ಸಂಸ್ಕೃತಿ ಮುದಿತ್ ಪೋವಡ್ , ದೈವ – ದೇವೆರ್ ಬೊಡ್ಚಿ ,ಅನಾದಿದ ನಂಬೊಲಿಗೆಗ್ ಬಿಲೆ ಇಜ್ಜಿ ” ಉಂದು ನಮ ನಿಚ್ಚ ತೂಪಿನ ಸತ್ಯೊಲು. ಆಂಡಲಾ ಒಕ್ಕಟ್ಟ್ ಡ್ ಉಪ್ಪಯ ಪಂಡ್ ದ್ ಪಂತ ಪಾಡಿಲೆಕ್ಕ ನಮ
ಬದ್ಕೊಂದುಲ್ಲ. ‘ನಮ ದೇಸದ ಗುಟ್ಟುಲೆನ್ ಪಿದಯಿ ಪನಯೆ’ ಇಂಚ ಅಧಿಕಾರದ ಜವಾಬ್ದಾರಿ ಗೆತೊನ್ನಗ ಮಲ್ಪುನ ಪ್ರಮಾಣದ ಪಾತೆರ ಅದಗನೇ ‌ಮದಪುವೆರ್ ,ಅಲ್ಕ್ ಇಜ್ಜಾಂದೆ ,ಮರ್ಯಾದಿದ ಗುರ್ತನೇ ದಾಂತಿಲೆಕ್ಕ ಅಧಿಕಾರೊಗಾದ್ , ದೊಡ್ಡುಗಾದ್ ನಮ ದೇಸೊಗು ,ಸತ್ಯ ಧರ್ಮೊಗು ವಂಚನೆ ಮಲ್ತೊಂದುಲ್ಲ.
ಇಂಚ ಪ್ರಜೆಕುಳೆಗ್ ಒದಗಿನ ಸೊತಂತ್ರದ ಪ್ರೇಜನ ಪ್ರಜೆಕುಳೆಗ್ ತಿಕೊಂದುಂಡಾ……….?
ಗೊತ್ತುಜ್ಜಿ , ಸರಿಯಾದ್ ಪ್ರಜೆಕುಳೆಗ್ ರಚ್ಚಣೆ ಉಂಡಾ , ಕಾನೂನುಡು ಸೊತಂತ್ರ ಬಾರತದ ಪ್ರತಿ ಒರಿಯಗ್ ಲಾ ರಚ್ಚಣೆ ಕೊರೊಡು ಪಂಡ್ ದ್ ಉಂಡು .ಆಂಡ ನಮನ್ ಅಲ್ಯುನಾಕಲೆಗ್ ಬೋಡಾಯಿಲೆಕ್ಕ ಇತ್ತ್ ಜಡ ಆಯಡ ಬೆಂಗ್ ಸಾದಿವೆರ್ , ಅಯನ ಸರ್ವಲಾ ನಾಶ ಮಲ್ತ್ ದ್ ಬುಡ್ಪೆರ್ .ಉಂದು ವಾ ಸೊತಂತ್ರ……? ‘ನೆಡ್ದ್ ಬೊಲ್ದು ಮೋರೆದಾಯನ ಕಾಲ ಆವು’ ಇಂಚ ಒರಿ ದೇಸೊದ ಪ್ರಜೆ ಎನ್ನಿಯೆಡ ತಪ್ಪಾವ ?

ಬೊಲ್ದು ಮೋರೆ ದಾಕುಲು ನಮಡ ಎದುರಾ ಎದುರು ಉಂತುದು ಅಂಕ ಕಾದೂಜೆರ್ ,
ನಮ ನಮನ್ ತಾಗದ್ ಪೊರ್ಲು ತೂಯೆರ್ .‌
ಕಾರ್ಯ ಸಾದಿತ್ ದ್ ದೇಸ ಆಲ್ಯೆರ್…
ಬೊಕ ಇತ್ತೆಎಂಚಿನಾವೊಂದುಂಡು ….
ಮಣ್ಣ್(ದೇಸ)ದ ಮಿತ್ತ್ ಅಭಿಮಾನ ಇಜ್ಜಿ , ಸಂಸ್ಕೃತಿದ ಗೇನನೆ ಇಜ್ಜಿ , ದಾದನಾ ಸಾದಿಪುಗ ಪಂಡ್ ದ್ ಒರಿ ಏರ್ಲ ಮಿತ್ತ್ ಮಿತರುವೆಡ ಆಯನ ಕಾರ್ ಒಯಿಪುನೆನ್ ನಮ ಸೊತಂತ್ರ ಬಾರತದೊಡು ತೂವೊಂದುಲ್ಲ. ಅಧಿಕಾರ ಬೋಡು ,ಯಾನ್ ಮಲ್ತಿನ ಅನ್ಯಾಯ , ಕೂಡಾಯಿನ ಸಂಪೊತ್ತು ಓಲು ಪಿದಾಯಿ ಗೊತ್ತಾವ…ಪನ್ಪಿನ ಪೋಡಿಗೆಡ್ ಪರದೇಸಿಲೆಗ್ ಬೆರಿಸಾಯ ಕೊರ್ಪಿನೆನ್ ನಮ ತೂವೊಂದುಲ್ಲ. ವುಂದು ಸೊತಂತ್ರ ಬಾರತದ ಇತ್ತೆದ ಸ್ಥಿತಿ .

ಸೊತಂತ್ರ ತಿಕ್ಕೊಡ್ಡ , ನಮ ನೆಲಟ್ ನಮ ಬಿಸಾತ್ ಇಜ್ಜಾಂದ ಬದ್ ಕ್ಯರೆ ,ಆಲ್ಯುನಾಕಲೆನ ರಚ್ಚಣೆಡ್ ಉಪ್ಪೊಡ್ಡ ಏತ್ ಸಾರ ಜನ ತನ್ಕುಳೆ ಪೆರಣ ಕೊರಿಯೆರ್, ಏತ್ ಜನ ಬದ್ ಕ್ – ಆಸ್ತಿ – ಬಂಗಾರ್ ಕಳೆವೊಂಡೆರ್ , ಏತ್ ಬೀರ ಬಿರ್ಸಾದಿಗೆದ – ಮಣ್ಣ್ ನಿ ಮೋಕೆ ಮಲ್ಪನ ಬಗ್ಗೆರ್ ( ವೀರೆರ್) ಪಾಸಿದ ಉರ್ಲುಗು ತರೆ ಕೊರ್ತೆರ್, ಏತ್ ಮುತ್ತೇಸಿ ಅಪ್ಪೆಲ್ನ ಮುತ್ತೇಸಿ ಐತ ಮಾಜಿದ್ ಪೋತುಂಡು , ಉಂದು ಪೂರ ದೇಸದ ಚರಿತ್ರೆದ ಅಲಕೆಡ್ ಮಾತ್ರ ಒರಿದ್ಂಡ್ .ಒಡೆಮುಟ್ಟ ದೇಸೊದ ಮನಸ್ಸುಲು ಹಾಳಾತ ಪಂಡ ಇಂಚಿನ ಬಗ್ಗೆರ್ನ,ತ್ಯಾಗಿಲೆನ ಚರಿತ್ರೆ ಒರ ಓದುಗ ,ಸತ್ಯ ಕತೆ ಒವು ಪಂಡ್ ದ್ ಪಿನ್ಕಾಂದ್ ಒರಿ ಪಿದಾಡಿಯೆಡ ಆಯಗ್ ವಿರೋಧ ಮಲ್ಪುನ ಚಿಲ್ಪಟ್ ಕೆಲಸ ಮಲ್ತೊಂದು ನಮ ಬದ್ ಕೊಂದುಲ್ಲ .ಉಂದು ಸೊತಂತ್ರ ಬಾರತದ ಇನಿತ ಪಾಡ್.

ಒಂಜಿ ದಿನ ಬರೊಡು , ಆ ದಿನ ಅಗೋಸ್ಟ್ ಪದಿನೈನನೆ ತಾರೀಕ್ ಆದಿಪ್ಪೊಡು .ದೇಸದ ಒರ್ಮೆ ಆನಿ ಬೆನ್ನಿ ಬೆನ್ಪಿನ ಬೆನ್ನಿದಾಯೆ , ಪಜಿರ್ ಕೊಯ್ಯೊಂದುಪ್ಪುನ ಪೊಂಜೊವು ,ದಿನಕೂಲಿದ ಆಳ್ ,ಬಡವ ಮಲ್ಲಾಯೆ , ಆ ಜಾತಿ ಈ ಜಾತಿ ಪಂಡ್ ದ್ ಜಾತಿದ ಲೆಕ್ಕ ಇಜ್ಜಾಂದೆ ಸರ್ವೆರ್ಲ ದೇಸದ ಕೊಡಿ ಅರಲ್ನಗ ಬತ್ತ್ ದ್ ಕೊಡಿತ ಅಡಿಟ್ ಉಂತುದು ಒಂಜಿ ಮಾನದಿಗೆ ಸಂದಾವುನ ದಿನಬರೊಡು .ಆನಿ ದೇಸ ಸೊತಂತ್ರ ಆಂಡ್ ಪಂಡ್ ದ್ ಎನ್ನೊಲಿ. • ಕೆ.ಎಲ್.ಕುಂಡಂತಾಯ ~~~~~~~~~~~~~~~~