ನ. 15 ಗ್ ಒಡಿಪುಡ್ ಸಹಕಾರಿ ಸಪ್ತಾಹ:‌‌ಎಮ್.ಎನ್.ರಾಜೇಂದ್ರಕುಮಾರ್..

ಕರ್ನಾಟಕ ರಾಜ್ಯ ಸಹಕಾರಿ ಮಹಾಮಂಡಲ ದ.ಕ.,ಕೇಂದ್ರ ಸಹಕಾರಿ ಬ್ಯಾಂಕ್ ಬೊಕ್ಕ ಅವಿಭಜಿತ ದ.ಕ.ಜಿಲ್ಲೆದ ಮಾತಾ ಸಹಕಾರಿ ಸಂಸ್ಥೆಲೆನ ಸಂಯುಕ್ತಾಶ್ರಯೊಡ್ ಉಡುಪಿ ಜಿಲ್ಲಾ ಸಹಕಾರಿ ಯೂನಿಯನ್ ನೇತ್ರತ್ವೊಡ್ ನವೆಂಬರ್ ತಿಂಗೊಲ್ದ 15 ತಾರೀಕುದಾನಿ ರಾಜ್ಯ ಮಟ್ಟದ ಸಹಕಾರಿ ಸಪ್ತಾಹ ಒಡಿಪುಡ್‌ ನಡಪರೆಗುಂಡ್ ಪಂಡುದ್ ದ.ಕ.ಕೇಂದ್ರ ಸಹಕಾರಿ ಬ್ಯಾಂಕ್ ಅಧ್ಯಕ್ಷೆರಾಯಿನ ಡಾ| ಎಮ್.ಎನ್.ರಾಜೇಂದ್ರ ಕುಮಾರ್ ತೆರಿಪಾದೆರ್.

ಮಂಗಳವಾರ ಉಡುಪಿ ಡಯಾನ ಹೋಟೆಲ್ ದ ಸಭಾಂಗಣೊಡ್ ಕಾರ್ಯಕ್ರಮದ ಪೂರ್ವ ಭಾವಿ ಸಭೆ ಆಯಿ ಬೊಕ್ಕ ನಡತಿನ ಪತ್ರಿಕಾಗೋಷ್ಠಿಡ್ ಆರು ಪಾತೆರಿಯೆರ್.ಒಡಿಪುದ ಅಮ್ಮಣ್ಣಿ ರಾಮಣ್ಣ ಶೆಟ್ಟಿ ಸಭಾಂಗಣೊಡ್ ಈ ಕಾರ್ಯಕ್ರಮ ನಡಪರೆಗಿತ್ತುದ್ ರಾಜ್ಯ ಸಹಕಾರಿ ಸಚಿವೆರಾಯಿನ ಎಸ್.ಡಿ.ಸೋಮಶೇಖರ್ ಕಜ್ಜೊದ ಉದಿಪನ ಮಲ್ಪರೆಗುಲ್ಲೆರ್.

ಕಾರ್ಯಕ್ರಮೊಡ್ ಸಚಿವೆರಾಯಿನ ವಿ.ಸುನಿಲ್ ಕುಮಾರ್,ಕೋಟ ಶ್ರೀನಿವಾಸ ಪೂಜಾರಿ,ಎಸ್.ಅಂಗಾರ,ಹಿಂದುಳಿದ ವರ್ಗಗಳ ಆಯೋಗದ ಅಧ್ಯಕ್ಷೆರಾಯಿನ ಜಯಪ್ರಕಾಶ್ ಹೆಗ್ಡೆ,ಸಂಸದೆರಾಯಿನ ಶೋಭಾ ಕರಂದ್ಲಾಜೆ,ಬಿ.ವೈ.ರಾಘವೇಂದ್ರ, ನಳಿನ್ ಕುಮಾರ್ ಕಟೀಲು,ರಾಜ್ಯ ಸಹಕಾರಿ ಮಂಡಲದ ಅಧ್ಯಕ್ಷೆರಾಯಿನ ಜಿ.ಟಿ.ದೇವೆಗೌಡ ಅಂಚೆನೇ ಒಡಿಪು ಬೊಕ್ಕ ದ.ಕ.ಜಿಲ್ಲೆದ ಶಾಸಕೆರ್, ಗಣ್ಯೆರ್ ನಕುಲ್ ಪಾಲ್ ಪಡೆಯರೆಗುಲ್ಲೆರ್.

ಕಾರ್ಯಕ್ರಮದಾನಿ ಸುರುಕ್ ಉಡುಪಿ ಬೋರ್ಡ್ ಹೈಸ್ಕೂಲ್ ಡ್ದ್ ಸಹಕಾರಿ ಜಾಥಾ ನಡಪರೆಗುಂಡ್.ಜಾಥೊಡ್ 5000‌ಜನ ಪಾಲ್ ಪಡೆಯರಗಿತ್ತುದ್,ಟ್ಯಾಬ್ಲೊ,500 ಬೈಕ್ ರ್ಯಾಲಿ ಉಪ್ಪುಂಡ್.ಜಾಥೊಡ್ ಶಿಸ್ತುಡ್ ಬರ್ಪಿನ ಬೊಕ್ಕ ಎಡ್ಡೆ ಟ್ಯಾಬ್ಲೊಗ್ ಇನಾಮು ಕೊರ್ಪುಂಡ್ ಪಂಡುದ್ ಈ ಪೊರ್ತುಡ್ ತೆರಿಪಾಯೆರ್. ಸಹಕಾರಿಯಾಯಿನ ಸಾಸ್ತಾನದ ಶ್ರೀಧರ್ ಮೇರು ಕಾರ್ಯಕ್ರಮದ 2 ದಿನ ದುಂಬು ಸಹಕಾರಿ ರಥೊಟ್ 2 ದಿನ ದುಂಬು ಉಡುಪಿ ಜಿಲ್ಲೆಡ್ ಸಂಚಾರ ಮಲ್ಪರೆಗುಲ್ಲೆರ್.10,000 ಜನ ಕಾರ್ಯಕ್ರಮೊಡ್ ಪಾಲ್ ಪಡೆಯರೆಗಿತ್ತುದ್,ನವೋದಯ ಸ್ವಸಹಾಯ ಸಂಘದಕುಲು ಸೇರ್ದ್, ಸ್ವಸಹಾಯ ಸಂಘದ ಪೊಂಜೊವುನಕುಲೆಗ್ ಸ್ವ ಉದ್ಯೋಗ ಮಲ್ಪರೆಗ್ ಕಮ್ಮಿ ಬಡ್ಡಿಡ್ ಸಾಲ ಕೊರ್ಪಿನ ಯೋಜನೆ ಉಂಡು ಪಂಡೆರ್.

ಕೆ.ಎಮ್.ಎಫ್.ದಕುಲು ಪ್ರತೀ ವರ್ಷ ನಂದಿನಿದ ಪೊಸ ಉತ್ಪನ್ನೊಲೆನ್ ಬುಡುಗಡೆ ಮಲ್ತೊಂದಿತ್ತುದ್ ಈ ಸರ್ತಿ ಪೊಸತ್ತಾದ್ ಚಿಕ್ಕಿ ಲಾಡು ಆನಿದ ಕಾರ್ಯಕ್ರಮೊಡ್ ಬುಡುಗಡೆ ಮಲ್ಪರೆಗುಲ್ಲೆರ್.

ಕಾರ್ಯಕ್ರಮೊಡ್ ಜಿಲ್ಲೆದ ಸಹಕಾರಿ ಸಂಸ್ಥೆಡ್ದ್ ಒಂಜೊಂಜಿ ಸಂಸ್ಥೆಲೆನ್ ಗುರುತಿಸಾದ್ ಮಾನಾದಿಗೆ ಮಲ್ಪರೆಗುಲ್ಲೆರ್.ಪಂಡುದ್ ಸುದ್ದಿಗೋಷ್ಠಿಡ್ ಪಂಡೆರ್.ಉಡುಪಿ ಜಿಲ್ಲಾ ಸಹಕಾರಿ ಯೂನಿಯನ್ ಅಧ್ಯಕ್ಷೆ ಬೊಕ್ಕ ಕರ್ನಾಟಕ ಸಹಕಾರಿ ಮಹಾಮಂಡಲದ ನಿರ್ದೇಶಕೆರಾಯಿನ ಬಿ.ಜಯಕರ ಶೆಟ್ಟಿ ಇಂದ್ರಾಳಿ,ದ.ಕ.ಕೇಂದ್ರ ಸಹಕಾರಿ ಬ್ಯಾಂಕ್ ನಿರ್ದೇಶಕೆರಾಯಿನ ಡಾ| ದೇವಿಪ್ರಸಾದ್ ಶೆಟ್ಟಿ, ರಾಜು ಪೂಜಾರಿ,ಅಶೋಕ್ ಕುಮಾರ್ ಶೆಟ್ಟಿ, ಮಹೇಶ್ ಶೆಟ್ಟಿ, ರಾಜೇಶ್,ಮಂಜುನಾಥ ಎಸ್.ಕೆ.,ದ.ಕ.& ಉಡುಪಿ ಮೀನುಗಾರ ಫೆಡರೇಶನ್ ದ ಅಧ್ಯಕ್ಷೆ ಯಶ್ ಪಾಲ್ ಸುವರ್ಣ,ದ.ಕ.ಹಾಲು ಉತ್ಪಾದಕ ಸಹಕಾರಿ ಒಕ್ಕೂಟದ ಅಧ್ಯಕ್ಷೆ ರವಿರಾಜ್ ಹೆಗ್ಡೆ,ದಿವಾಕರ್ ಹೆಗ್ಡೆ ಸುದ್ದಿಗೋಷ್ಠಿಡ್ ಉಪಸ್ಥಿತರಿತ್ತೆರ್.

ಪೂರ್ವಭಾವಿ ಸಭೆಟ್ ದ.ಕ.ಕೇಂದ್ರ ಸಹಕಾರಿ ಮಂಡಲದ ಅಧ್ಯಕ್ಷೆರಾಯಿನ ಎಮ್.ಎನ್.ರಾಜೇಂದ್ರ ಕುಮಾರ್ ಮೆರೆಗ್ ಒಡಿಪುದ ವತಿಡ್ದ್ ಮಾನಾದಿಗೆ ಮಲ್ತೆರ್.