ತುಳು ಬಾಸೆದ ಬುಲೆಚ್ಚಿಲ್ ಗ್ ತುಳುಕೃತಿಕುಲ್ ರಚನೆ ಆವೊಡ್: ಪ್ರೊ.ಯಡಪಡಿತ್ತಾಯ

ಲೇಖಕಿ,ಕವಯತ್ರಿ,ಆಕಾಶವಾಣಿ ಉದ್ಘೋಶಕೆರಾಯಿನ ಅಕ್ಷತಾರಾಜ್ ಪೆರ್ಲ ಮೆರೆನ ಪ್ರಶಸ್ತಿ ವಿಜೇತ “ಬೇಲಿ”ಬೊಕ್ಕ “ಸಾಪೊದ ಕಣ್ಣ್” ತುಳು ನಾಟಕ ಕೃತಿಲೆನ್ ಮಂಗಳೂರು ವಿಶ್ವವಿದ್ಯಾಲಯದ ಕುಲಪತಿ ಪ್ರೊ.ಪಿ.ಎಸ್.ಯಡಪಡಿತ್ತಾಯ ಲೋಕಾರ್ಪಣೆ ಮಲ್ತೆರ್.
ಮಂಗಳೂರು ವಿಶ್ವವಿದ್ಯಾಲಯದ ಶ್ರೀ ಧರ್ಮಸ್ಥಳ ಮಂಜುನಾಥೇಶ್ವರ ತುಳು ಪೀಠ ಬೊಕ್ಕ ನಂದಾದೀಪ ಪ್ರಕಾಶನ ಕನ್ಯಾನದ ಒತ್ತುಸೇರಿಗೆಡ್ ಮಂಗಳೂರು ವಿವಿಕಾಲೇಜಿದ ಶಿವರಾಮ ಕಾರಂತ ಸಭಾಂಗಣೊಡ್ ಗುರುವಾರದಾನಿ ಕೃತಿ ಬುಡುಗಡೆ ಕಜ್ಜೊದ ಆಯೋಜನೆ ಮಲ್ದಿತ್ತೆರ್.
ಕೃತಿ ಲೋಕಾರ್ಪಣೆ ಮಲ್ತಿನ ಕುಲಪತಿಲು ಪಾತೆರ್ದ್ ಸಾಹಿತ್ಯದೊಟ್ಟುಗ್ ಬಾಸೆಲಾ ಬುಲೆಯುಂಡ್.ಮಾತಾ ಬಾಸೆಡೆಲೆಡ್ ಸಾಹಿತ್ಯದ ರಚನೆ ಆವೊಡ್.ಸಾಮಾಜಿಕ ಜಾಲತಾಣೊಡ್ ತುಳುಬಾಸೆದ ಬಳಕೆ ಆವೊಂದಿತ್ತುಂಡಲಾ ಬಾಸೆದ ದಾಖಲಾತಿಗ್ ತುಳುಕೃತಿಕುಲೆನ ರಚನೆ ಆವೊಡ್.ನಾಟಕೊಲೆಡ್ ಮಾನವೀಯತೆಗ್ ಒತ್ತು ಕೊರಿನ ಲೇಖಕಿನ್ ಕಜ್ಜೊಡ್ ಪುಗಾರಿಯೆರ್.
ಮಂಗಳುರು ವಿ.ವಿ.ದ ಬ್ರಹ್ಮಶ್ರೀ ನಾರಾಯಣಗುರು ಪೀಠದ ಸಂಯೋಜಕೆರಾಯಿನ ಡಾ.ಗಣೇಶ್ ಅಮೀನ್ ಸಂಕಮಾರ್ ಪಾತೆರ್ದ್ ಸೂಕ್ಷ್ಮವಾದ್ ಲೋಕೊನ್ ತಿದ್ದುನ ಶಕ್ತಿ ನಾಟಕಡುಂಡ್.ಪುರಾಣದ ಪಾತ್ರೊಲೆನ್ ಇತ್ತೆದ ಸಾಮಾಜಿಕ ಪರಿಸ್ಥಿತಿಗ್ ಅನ್ವಯಿಸಾವುನವ್ ಸುಲಭ ಅತ್ತ್.ಸಾಹಿತಿಲು ನಿರ್ಲಕ್ಷ್ಯ ಮಲ್ದಿನ ಶಿಖಂಡಿ ಪಾತ್ರೊಗ್ ಒತ್ತು ಕೊರ್ತಿನವ್ ಲೇಖಕಿನ ಮಲ್ಲ ಮನಸ್ಸುನ್ ದೆರ್ತ್ ತೋಜಾವುಂಡ್ ಪಂಡೆರ್.
ನ್ಯಾಯವಾದಿ,ರಂಗನಿದರ್ೇಶಕೆರಾಯಿನ ಶಶಿರಾಜ್ ಕಾವೂರು ನಾಟಕದ ಪರಿಚಯ ಮಲ್ತುದ್ ನಾಟಕಕಾರಗ್ ಉಪ್ಪೊಡಾಯಿನ ವಿವೇಚನಾಶಕ್ತಿ ಬೊಕ್ಕ ತರ್ಕ ಈ ರಡ್ಡ್ ನಾಟಕೊಲೆಡ್ ಉಂಡು ಪಂಡೆರ್.
ಕಾರ್ಯಕ್ರಮದ ಅಧ್ಯಕ್ಷತೆಡಿತ್ತಿನ ಮಂಗಳೂರು ವಿ.ವಿ.ಕಾಲೇಜಿದ ಮುಖ್ಯಸ್ಥೆರಾಯಿನ ಡಾ.ಅನುಸೂಯ ರೈ ಮೇರು ಲೇಖಕಿ ಅಕ್ಷತಾರಾಜ್ ಮೆರೆಗ್ ಮಾನಾದಿಗೆ ಮಲ್ತೆರ್.
ಎಮ್.ಆರ್.ಪಿ.ಎಲ್.ಪ್ರಶಿಕ್ಷಣ ವಿಭಾಗದ ಉಪಮಹಾಪ್ರಬಂಧಕಿ ವೀಣಾ ಟಿ.ಶೆಟ್ಟಿ, ರಾಮಕೃಷ್ಣ ಮಿಶನ್ ದ “ಸ್ವಚ್ಚ ಮನಸ್” ರೂವಾರಿ ರಂಜನ್ ಬೆಳ್ಳಾರ್ಪಾಡಿ ವೇದಿಕೆಡ್ ಉಪಸ್ಥಿತರಿತ್ತೆರ್.ಡಾ.ಮಾಧವ ಎಮ್.ಕೆ.ಸ್ವಾಗತ ಮಲ್ತುದ್ ಗೀತಾ ಜೈನ್ ಕಜ್ಜೊದ ಮದಿಪು ಕೊರಿಯೆರ್.