ಕಾಲ ಬದಲಾವೊಂದಿತ್ತಿಲೆಕ್ಕನೇ ನರಮಾನಿಲಾ ತನ್ನ ಆಚಾರ ವಿಚಾರೊಲೆನ್ ಬದಲ್ ಮಲ್ತೊಂದು ಪೋವೊಂದುಪ್ಪುನವ್ವೆನ್ ಇತ್ತೆದ ಕಾಲೊಡ್ ತೂವೊಂದುಲ್ಲ.ತುತ್ತುನ ಕುಂಟು ಆದುಪ್ಪು,ಅತ್ತುಂಡ ತಿನ್ಪಿನ ವನಸ್ ತೆನಸ್ ಆದುಪ್ಪು ಅತ್ತುಂದಾಂಡ ಬದುಕುಡ್ ನಡಪುನಂಚಿನ ಕೆಲವೊಂಜಿ ಆಚರಣೆಲಾದಿಪ್ಪು ಪ್ರತಿಯೊಂಜೆನ್ಲಾ ಆಡಂಬರದಂಚಿ ಕೊನೊದ್ ತನ್ನ ನೆಲತ್ತ ಮೂಲ ಸಂಸ್ಕೃತಿ ಸಂಪ್ರದಾಯೊಲೆನ್ ಮದತ್ ಪೋವೊಂದುಪ್ಪುನವ್ವ್ ಬಾರೀ ಬೇಜಾರುದ ಸಂಗತಿ.
ಆಂಡ ಇತ್ತೆಗುಲಾ ಕೆಲವೆರ್ ತುಳುನಾಡ್ದ ಸಂಸ್ಕೃತಿ ಸಂಪ್ರದಾಯೊಲೆನ್ ಒರಿತೊನೊಡ್ ಪನ್ಪಿನ ದಿಟ್ಟಿಡ್ ತನ್ನ ಇಲ್ಲದ ಆಚರಣೆಲೆನ್ ಸಂಪ್ರದಾಯಬದ್ಧವದ್ ನಡಪಾವೊಂದ್ ಬರೊಂದುಲ್ಲೆರ್ ಪನ್ಪಿನೇಕ್ ಉಡುಪಿ ಪೆರಂಪಳ್ಳಿ ಬೊಬ್ಬರ್ಯಕಟ್ಟೆದ ನಿವಾಸಿ ಕೃಷಿ ಸಂಘ ಪೆರಂಪಳ್ಳಿ ವಲಯ ಸಮಿತಿದ ಅಧ್ಯಕ್ಷೆರಾಯಿನ ಸುಬ್ರಹ್ಮಣ್ಯ ಶ್ರೀಯಾನ್ ಮೇರು ಸಾಕ್ಷಿಯಾತೆರ್.
ತನ್ನ ಬುಡೆದಿ ನೇತ್ರಾವತಿ ಮೆರೆನ ಬಯಕೆದ ಕಜ್ಜೊನ್ ವಿಶೇಷ ರೀತಿಡ್ ಆಚರಣೆ ಮಲ್ತುದ್ ಯುವಜನತೆಗ್ ಮಾದರಿಯಾತೆರ್.
ಬಯಕೆದ ಕಜ್ಜೊಡ್ ಸಿರಿತುಳುಚಾವಡಿ ಒಡಿಪುದ ಗೈಮೆದ ಗುರ್ಕಾರೆರಾಯಿನ ಈಶ್ವರ್ ಶೆಟ್ಟಿ ಚಿಟ್ಪಾಡಿ ಮೆರೆನ ಮುತಾಲಿಕೆಡ್ ತುಳುನಾಡುಡ್ ಬಯಕೆನ್ ವಾ ರೀತಿಡ್ ಆಚರಣೆ ಮಲ್ತೊಂದಿತ್ತೆರ್ ಪನ್ಪಿನ ವಿಚಾರದ ಬಗೆಟ್ ಪಾತೆರಕತೆ ನಡಪಾದಿತ್ತೆರ್.ತುಳುನಾಡುಡ್ ದುಂಬು ಎಂಚ ಬಯಕೆದ ಕ್ರಮ ನಡತೊಂದಿತ್ತುಂಡ್ ಇತ್ತೆ ವಾ ರೀತಿಡ್ ಬದಲಾತುಂಡ್ ಪನ್ಪಿನವ್ವೆನ್ ಪಾತೆರಕತೆಟ್ ತೆರಿಪಾಯೆರ್.
ಕಜ್ಜೊಡ್ ತುಳು ಸಂಸ್ಕೃತಿದ ಬುಲೆಚ್ಚಿಲ್ ಗಾದ್ ಸಿರಿ ತುಳುಚಾವಡಿದ ಮುಖೇನ ಇಲ್ಲ ಇಲ್ಲಗ್ ಪೋದ್ ಸುಮಾರ್ ನೂದೆಕುಲಾ ಮಿತ್ತ್ ಮುಂದಿಲ್ದ ಕೂಟ ಆಯೋಜನೆ ಮಲ್ದಿನ ಈಶ್ವರ್ ಚಿಟ್ಪಾಡಿ ಮೆರೆಗ್ ಊರುದ ಗಣ್ಯೆರ್ ಸೇರ್ದ್ ಮಾನಾದಿಗೆ ಮಲ್ತೆರ್.
ಬಯಕೆಗ್ ಬತ್ತಿ ಬಿನ್ನೆರೆಗ್ ರಕ್ತಚಂದನ ಗಿಡ ಕೊರ್ದ್ ಅವ್ವೆನ್ ವಾ ರೀತಿಡ್ ಬುಲೆಪಾವೊಡ್ ಪನ್ಪಿನ ಮಾಹಿತಿನ್ ಕೃಷಿ ವಿಜ್ಞಾನ ಕೇಂದ್ರ ಬ್ರಹ್ಮಾವರದ ಮುಖ್ಯಸ್ಥೆರಾಯಿನ ಡಾ.ಧನಂಜಯ್ ಮೇರ್ ಕೊರಿಯೆರ್.
ಒಟ್ಟಾರೆಯಾದ್ ಪನೊಡಾಂಡ ಕೃಷಿಬದುಕ್ ಬೊಕ್ಕ ತುಳುಸಂಸ್ಕೃತಿದ ಬಗ್ಗೆ ಒಲವು ಉಪ್ಪುನ ಶ್ರೀಯಾನ್ ಕುಟುಂಬದಕುಲು ನಮ್ಮ ಆಚರಣೆಲು ಆಡಂಬರ ಆವಂದೆ ಸಮಾಜೊಗ್ ಎಡ್ಡೆಪ್ಪು ಬಯಕುನ ಆಚರಣೆ ಆವೊಡುಂದು ಬಾಕಿದಕ್ಲೆಗ್ ತೆರಿಪಾದ್ ಕೊರಿನ ಈ ಕಜ್ಜೊ ಸಮಾಜೊಗ್ ಮಾದರಿಯಾತುಂಡ್.
ಈ ಸಂದಭರ್ೊಡ್ ವಾರಂಬಳ್ಳಿ ಪಂಚಾಯತ್ ಅಧ್ಯಕ್ಷೆರಾಯಿನ ಸದಾನಂದ ಪೂಜಾರಿ,ಕೆ.ಎಮ್.ಸಿ.ವಿದ್ಯುತ್ ವಿಭಾಗದ ಸಹಾಯಕ ಇಂಜಿನಿಯರ್ ಮೆಹಬೂಬ್ ಅಲಿ,ಸುಬ್ರಹ್ಮಣ್ಯ ಶ್ರೀಯಾನ್ ಮೆರೆನ ಜನ್ಮದಾತೆರಾಯಿನ ಪಾರ್ವತಿ ಬೊಕ್ಕ ಶಂಕರ್ ಪೂಜಾರಿ,ಮಾಮ ಮಾಮಿ ಆಯಿನ ರತ್ನಾವತಿ ಬೊಕ್ಕ ಗುರುಸ್ವಾಮಿ ಸದಾನಂದ ಪೂಜಾರಿ,ಸಿರಿತುಳುಚಾವಡಿದ ಪದುಕೆರಾಯಿನ ಶ್ರೀಧರ್ ಕಲ್ಮಾಡಿ,ಗಿರೀಶ್ ಉಪಸ್ಥಿತರಿತ್ತೆರ್.
by 