ತೆಂಕನಿಡಿಯೂರುಡ್ ಸಂಜೀವಿನಿ ಸ್ವಸಹಾಯ ಸಂಘದಕ್ಲೆನ ವಾರದ ಸಂತೆ

ಗ್ರಾಮ ಪಂಚಾಯತ್ ಮಟ್ಟದ ಸಂಜೀವಿನಿ ಯೋಜನೆದ ಮಹಿಳಾ ಒಕ್ಕೂಟದ ವಾರದ ಸಂತೆ ಸೆಪ್ಟೆಂಬರ್ 21 ತಾರೀಕುದಾನಿ ತೆಂಕನಿಡಿಯೂರು ಗ್ರಾಮ ಪಂಚಾಯತ್ ಸಮುದಾಯ ಭವನೊಡ್ ಸುರು ಆವರೆಗುಂಡ್.
ಪೊಂಜೊವುಲೆನ ಸ್ವಸಹಾಯ ಗುಂಪುಲೆನ ಆರ್ಥಿಕ ಬುಲೆಚ್ಚಿಲ್ ಆವರೆಗ್ ಕೇಂದ್ರ ಸರಕಾರ ಪುರಸ್ಕೃತ ನೇಶನಲ್ ರೂರಲ್ ಲೈವ್ಲಿಹುಡ್ ಮಿಷನ್ ಯೋಜನೆನ್ ಜಾರಿ ಮಲ್ತುದ್ ಕೇಂದ್ರದ ಸಹಕಾರದೊಟ್ಟುಡ್ ರಾಜ್ಯ ಸರಕಾರ ಸಂಜೀವಿನಿದ ಪುದರುಡ್ ಸ್ವಸಹಾಯ ಸಂಘದ ಅಭಿವ್ರದ್ಧಿಗ್ ದುಂಬು ಬೈದುಂಡ್.

ಈ ನಿಟ್ಟುಡ್ ಉಡುಪಿ ತಾಲೂಕುದ ತೆಂಕನಿಡಿಯೂರು,ಬಡಾನಿಡಿಯೂರು,ತೋನ್ಸೆ ಕೆಮ್ಮಣ್ಣು ಬೊಕ್ಕ ಕಲ್ಯಾಣಪುರ ಗ್ರಾಮ ಪಂಚಾಯತ್ ವ್ಯಾಪ್ತಿದ ಪೊಂಜೊವುನಕ್ಲೆನ ಸ್ವಸಹಾಯ ಸಂಘದ ಸಂಜೀವಿನಿ ಒಕ್ಕೂಟ ಈ ಸಂತೆಡ್ ಇಲ್ಲಡೇ ತಯಾರ್ ಮಲ್ದಿನ ಮಸಾಲ ಪೌಡರ್,ಸಾಂಬಾರು ಪುಡಿ,ಪೇರುದ ಪೊಡಿ,ಉಪ್ಪಡ್,ನುಂಗೆಲ್ ಮೀನ್,ಅಲಂಕಾರದ ವಸ್ತುಲ್, ತಾರಾಯಿ, ಮೈಪುಸೂಡಿ, ಕುಂಟುಲು ಇಂಚ ಇಲ್ಲಗ್ ಬೋಡಾಪಿನ ಮಾತಾ ಸಾಮಗ್ರಿಲು ಮಾರಾಟ ಮಲ್ಪುವೆರ್.ನನ ದುಂಬಗ್ ವಾರದ ಪ್ರತೀ ಮಂಗಳವಾರ ಈ ಸಂತೆ ನಡಪರೆಗುಂಡ್.

ಈ ಸಂತೆಡ್ ಮಾರಾಟ ಆಪಿನ ಇಲ್ಲಡೇ ತಯಾರ್ ಮಲ್ದಿನ ಸಾಮಗ್ರಿಲೆನ್ ಸಾರ್ವಜನಿಕೆರ್ ದೆತೊನೊಂದ್ ಪೊಂಜೊವುನಕ್ಲೆನ ಆರ್ಥಿಕ   ಅಭಿವ್ರದ್ಧಿಗ್ ಸಹಕಾರ ಕೊರೊಡು ಪಂಡುದ್ ಸಂಜೀವಿನಿ ಒಕ್ಕೂಟದ ಮಾತಾ ಸದಸ್ಯೆರ್ ಬಿನ್ನಪ ಮಲ್ದೆರ್