ಛದಿ ಕಟ್ಟುನಾಯಗ್ ದಡಿ ಪಾತೆರದ ನುಡಿ..

ಛದಿ ಕಟ್ಟುನಾಯಗ್ ದಡಿ ಪಾತೆರದ ನುಡಿ.
( ನ್ಯಾಯ ತಿಕ್ಕುಂಡ್ ದೈವದ ಕೊಡಿಯಡಿಟ್)

ಬರವು : ನೀತು ಬೆದ್ರ.

ತುಳುವನಾಡು ಪನ್ನಗ ಪ್ರಪಂಚಡ್ ಒಲ್ಪಲಾ ತಿಕ್ಕಂದಿನ ಸಂಪ್ರದಾಯ,ಸಂಸ್ಕೃತಿ,ಆಚರಣೆನುಲು ತೂವರೆ ತಿಕ್ಕುಂಡುಗೆ. ಆಂಡ ಆ ಆಚರಣೆಲು ಇನಿತ ಈ ಕಾಲಘಟ್ಟಡುಲಾ, ವಿಸ್ಮಯ ಪಂದ್ ಪನೋಲಿ ಇಜ್ಜಾಂಡ ಉಂದೆ ಸತ್ಯ ಪಂದುಲಾ ಪನೋಲಿ. ವಿಜ್ಞಾನಗ್ ಸವಾಲ್ ಪಾರ್ದ್ ಉಂತುದಿನ ಪಂದುಲಾ ಪನೋಲಿ. ಈ ಪಾತೆರ ದಾಯೆ ಪಂಡ,ಕಾಟ್ ಕಲ್ಲುಡ್ ತುಳುವೆರ್ ಸತ್ಯ ಅತ್ತುಂಡ ದೈವ,ಭೂತ ಪನ್ಪಿನಂಚಿನ ಕೆಲವೊಂಜಿ ಪುದರ್ ಪುರಪು ಲೆತ್ತೊಂದು ಬೈದೆರ್. ಈ ಪದ ಬಳಕೆದ ಮೂಲನ್ ಒಕ್ಕರೆ ಬಲ್ಲಿ,ಒಕ್ಕುಂಡ ಒಂಜಿ ಒಂಜಿ ವಿದ್ವಾಂಸೆರೆರ್ದ್ ಒಂಜಿ ಒಂಜಿ ಉತ್ತರ ತಿಕ್ಕುಂಡೆ ಹೊರತು ನೆಕ್ಕ್ ಸಮರ್ಪಕವಾಯಿನ ಕಡೆಕೊಡಿ ಪನ್ಪಿನ ತಿಕ್ಕುಜಿ ಪನ್ಪುನ ಆತೆ ಸತ್ಯ. ತುಳುವೆರೆಗ್ ದೇವೆರೆರ್ದ್ ಮಿತ್ತ್ ದೈವೊಲು ಪಂದೆ ಕೆಲವೆರ್ ಪಂಡೆರುಡ, ದೇವೆರೆನ ದೂತೆರ್,ದೇವೆರೆನ ಸೃಷ್ಟಿಯೇ ದೈವೊಲು ಪನ್ಪಿನಂಚಿನವು ಕೆಲವೆರೆನ ವಾದ. ಅವ್ ದಾದನೆ ಇಪ್ಪಡ್. ತುಳುವೆರೆಗ್ ದೈವೊಲುಲಾ ಪ್ರಧಾನನೇ.

ಈ ಮಾತ ಸಂಗತಿದ ನಡುಟ್ ನ್ಯಾಯ ಅನ್ಯಾಯ ಸತ್ಯ ಧರ್ಮ ಒರಿಪುಗಾದ್ ತುಳುವೆರ್, ದಾದ ಮಲ್ತೊಂದಿತ್ತೆರ್ ಪನ್ಪಿನಂಚಿನ ಪಶ್ನೆ ಬರ್ಪುಂಡು,ಅಯಿಕ್ ಉತ್ತರಲಾ ಕೆಲವೆರೆಗ್ ಖಂಡಿತವಾದ್ ಗೊತ್ತೆ ಉಂಡು.ಇತ್ತೆ ನ್ಯಾಯಲಯ ಇತ್ತಿಲೆಕ ಆನೀದ ಕಾಲಾಮಾನಡ್ ನ್ಯಾಯಪೀಠ ಇತ್ತುಂಡು,ಇಜ್ಜಾ ದೈವದ ಕೊಡಿಯಡಿಟ್ ನ್ಯಾಯ ತಿಕ್ಕೊಂದಿತ್ತುಡುಗೆ ಪನ್ಪಿನಂಚಿನ ಸತ್ಯ.

ಕೆಲವು ದಿನತ ಪಿರವು ಒಂಜಿ ಬರವು ತೂಯೆ ಖ್ಯಾತ ವಾಗ್ಮಿಲಾಯಿನ ಶ್ರೀಕಾಂತ್ ಶೆಟ್ರೆನ. ಒಲುಲಾ ತಿಕ್ಕಂದಿ ನ್ಯಾಯಗ್ ಕೊಡಿಯಡಿಟ್ ನ್ಯಾಯ ತಿಕ್ಕಿನ, ಅಯಿರ್ದುಂಬು ಆರ್ ಪಾತೆರದ ಒರುಟೆ ಪಂದಿತ್ತೆರ್,ಕೊಡಿಯಡಿತ ನ್ಯಾಯದ ಬಗ್ಗೆಲಾ. ಒರಿ ನರಮಾನಿ ಮಲ್ಲ ಮುಂಡಾಸುದಕುಲೆನ ಕುಟುಂಬಗ್ ನ್ಯಾಯ ಕೊರ್ದು ಆಯೆ ತನ್ನ ಕೋಲ ಅತ್ತುಂಡ ನೇಮ ಪಿರಿದಾಯಿಬೊಕ್ಕ ತನ್ಕ್ ಜಾಗೆದ ಪತ್ರಗಾದ್ ಆ ಇಲ್ಲದ ಗುರ್ಕಾರಡ ಕೇನುನಂಚಿನ ಸನ್ನಿವೇಶ. ದೈವ ಕೊಡಿಟ್ ಇಪ್ಪುನಂಚಿನ ಇಸಮಕ್ಕಲೆ ಆಯೆ ನರಮಾನಿಯತ್ತ್ ಆಯೆ ಅಲ್ಪ ದೈವ,ಕೋಲ‌ ಪಿರಿಬೊಕ್ಕ ಆಯೆ ನರಮಾನಿ.

ಇಂಚಿನನೇ ಒಂಜಿ ಘಟನೆ ದೈವದ ಕೊಡಿಯಡಿಟ್ ಎಂಕ್ ತೂವರೆ ತಿಕ್ಕುದಿತ್ತುಂಡು. ಇಲ್ಲದ ಧರ್ಮ ದೈವೊಲೆಗ್ ಕೋಲ ಆವಂದೆ ಏತೋ ವರ್ಷ ಆದಿತ್ತುಂಡುಗೆ, ಮೆಗ್ಯೆ ಪಲಯೆ ಜಾಗ್ ಜಾಗ್ ಪನೊಂದು ಪೊರ್ಬೊಂದಿತ್ತೇರ್. ಜಾಗೆದ ನ್ಯಾಯ ಓಲು ಆವೊಡು. ಕೋರ್ಟ್ ಪಾಡುಂಡ ಇಲ್ಲಗ್ ಪುದರಾವು ಪಂಡುದ್ ಮನಿಪಂದೆ ಕುಲ್ದಿತೆರುಡಲಾ, ಇಸ ದಿಂಜಿನ ಉಚ್ಚುದಲೆಕ ಸುಯಿತೊಂದೆ ಇತ್ತೆರ್. ಏರೆಗ ಒರಿಯಗ್ ತೋಜಿಂಡು ಬಲಿಮೆದ ಬಲ್ಯಾಯನಲ್ಪ ಇಲ್ಲದ ದೈವಗ್ ಕೋಲ ಕೊರ್ಲ ಮೆಗ್ಯೆ ಪಲಯೆ ಒಂಜಾದ್ ಉಂತೊಡು ಅಲ್ಪ ದೈವ ಮದಿಪುಂಡ್ ನ್ಯಾಯ ತಿಕ್ಕ್ ಪಂದ್. ಪಲಯೆ ಮೆಗ್ಯನಕುಲು ಬತ್ತೆರ್ ಕೋಲ ಕೊರಿಯೆರ್. ಸಕನಂದ ಬೆಡಿ ಪಯನತ್ತ ಕೊಂಬು, ಊರೆ ದಿಬ್ಬಣ ಆಂಡ್, ಮದಿಮಾಯೆ ಮಯ್ಕಾರೆ ದೈವದ ಗಗ್ಗರ ಬೂಲ್ಯ, ಬದಿಕಾರದ ಬಲಿ ಆಂಡ್ ದೈವ ನುಡಿ ಕೊರ್ರೆ ಸುರು ಮಲ್ತುಂಡು.
ಮದ್ಯೆಸ್ಥೆರೆ ನರಮಾನಿ ಪಾತೆರಗ್ ಪೋಡಿಜೆರ್,ಉಜ್ಜಾಲ್ಡಿತ್ತಿನ ಎಂಕ್ ತರೆ ಬಗ್ಗಾಯಿಜೆರ್, ಜಾಗೆ ಜಾಗೆ ಪಂದ್ ತನ್ಕುಲೆ ಛದಿ ಗಟ್ಟಿ ಮಲ್ತೊಂಡೆರ್. ಆ ಛದಿ ಕಟ್ಟ್ ಆದೆ ಉಂಡು ಬುಡ್ಪಾವೊಡ ಅತ್ತ್ ಎನ್ನ ಬೆನ್ನಿ ಬೆನೊಡ ಪಂದ್ ಕೇಂಡುಗೆ. ಅಪಗ ಮದ್ಯಸ್ಥೆರ್ ಸತ್ಯ ನ್ಯಾಯಗಾದೇ ಈ ಸೇವೆ, ನಿನ್ನ ನುಡಿ ಕೊರ್ಲ ಸಂಸಾರ ನಿನ್ನ ಒಂಜಿ ಮೋನೆ ಅಂಚಿ ಒಂಜಿ ಮೋನೆ ಇಂಚಿ ಪಂದು ಉಂಡು ಒಂಜೆ ಮಲ್ಪುಲಾ ಪಂದ್ ಪಂಡೆರ್.
ದೈವದ ನುಡಿ ಸುರಾಂಡ್ ತನ್ಕುಲೆ ತಪ್ಪು ಒತ್ತೊನುಜೆರ್ ಬೊಕ್ಕೊರಿಯನ ತಪ್ಪುನು ದೆರ್ತ್ ಪತ್ತೊಂದುಲ್ಲೆರ್. ದೈವ ನಿನಡಪ್ಪ ಇಪ್ಪಡ್ ಜಾಗೆ ಬುರ್ದ್ ಕೊರು ಪಂದ್ ಒರಿ ಪಂಡೆಡ ಕುಡೊರಿ ನಿನಡಪ್ಪ ಇಪ್ಪಡ್ ಜಾಗೆ ಪಾಲ್ ಮಲ್ಪುಗ, ದೈವ ಎರೆಡಪ್ಪ ಇಪ್ಪುವೆಂದ್ ಪನ್ಪುಂಡ ಅಲ್ಪ ದೈವನು ಈ ತೂಲಾ. ಉಡ್ಡ ಪಟ್ಟ. ಆಂಡ ತೀರ್ಮಾನ ಆವೊಂದಿಜ್ಜಿ.
ಅಪಗ ದೈವ ಪಂಡು. ಒಂಜೆ ಅಪ್ಪೆ ಗರ್ಬೊಡು ಒಂಜೆ ಸಾದಿಡ್ ನಿಕುಲು ಬತ್ತಿನಕುಲು ಇನಿತ ದಿನ ಆಯೆ ಇಂಬೆ ಪಂದ್ ತುಚ್ಚೊಂದುಲ್ಲರ್. ಯಾನ್ ನಿಕುಲೆಡ ಇ ತೂಪನ ಆಯೆ ತೂಪನ ಪಂದ್ ಕೇನರೆ ಉಂಡಾತಿನೆ ಅತ್ತ್, ಒಟ್ಟುಗಾದ್ ಇಪ್ಪುವರಾ ಅತ್ತ್ ಇಂಚೆನೆ ಆ ಜಾಗೆ ಈ ಜಾಗೆ ಎಂಕ್ ಬೋಡು ಪನ್ಪರಾ. ಯಾನ್ ಎರೆಗ್ ಒವ್ವ್ ಜಾಗೆಂದ್ ಪನುವೆ. ಯಾನ್ ಗುಂಡರ್ದ್ ಪಿದಡುವೆ. ಬರ್ಪಿನಂಚಿನ ದೋಷಗ್ ಎಂಕ್ ಬಿಲೆ ಕಟ್ಟರೆ ಬಲ್ಲಿ ಎಂಕುಲೆನ ಧರ್ಮದೈವ ಎಂಕುಲೆಗ್ ಸಾರಥಿಯಾದ್ ಉಂತಿಜಿ ಪಂದ್ .ಎಂಚಗೆ ಮದ್ಯಸ್ಥೆರೆ ಮೊಕುಲೆಗ್ ಜಾಗೆನೆ ಬೋಡ ಅತ್ತ್ ಒಂಜಾಂದ್ ಇಪ್ಪುವೆರುಗೆನ..?

ಅಪಗ ಕುಡ ಅಕುಲು ಅಣ್ಣೆ ಮಲ್ತಿನ ಸರಿಯತ್ತ್ ,ಎಲ್ಯಣ್ಣೆ ಮಲ್ತಿನ ಸರಿಯತ್ತ್ ,ಮಗ್ಯೆ ಮಲ್ತಿನ ಸರಿಯತ್ತ್ ಪನ್ಪಿ ಸರಿ ತಪ್ಪು ಪನೊಂದುಲ್ಲೆರ್. ಅಪಗ ದೈವ ಛದಿ ಬುಡಂದಿ ನರಮಾನಿಗ್ ದಡಿತನೇ ನುಡಿ ಕೊರುಂಡು. ಎರ್ನ ಸರಿ ಎರ್ನ ತಪ್ಪು ಪಂದೆ ಪಾತೆರುಲೇ ಯಾನ್ ಪತಿಮಾನಿ ಬುಡ್ಪೆ ,ಆಂಡ, ತಿಂಗೊಲುಗ್ ಒಂಜಿ ಪಜೆಟ್ ಪೊರೆಡುನಗ ಎನನ್ ಲೆಪ್ಪಂಡೆ, ? ಎನ್ನ ಪಾತೆರಗ್ ಬಿಲೆ ಕೊರ್ದ್ ಒಂಜಾಪರ ಇಜ್ಜಾ ಅವ್ವ ಪನ್ಲೆ. ಬೊಕ್ಕ ಎನನ್ ದುರೊರ್ಚಿ ಪನ್ಪುಡುಗೆ. ದಿನ ಕರಿಯಿಜಿ,ಒಂಜಿ ದಡಿ ಪಾತೆರಗ್ ಪೊಡ್ಯೆರ್ ಅಣ್ಣೆ ಮಗ್ಯೆ ಎಂಕುಲು ಒಂಜಾಪ ನಿನ್ನ ಕಜ್ಜನು ಒಟ್ಟಾದ್ ಮಲ್ಪುವ ಪನ್ಪೆರುಗೆ. ಉಂದು ಛದಿ ಕಟ್ಟಿನಾಯಗ್ ದಡಿ ಕೊರ್ದ್ ನುಡಿ ಕೊರ್ನ ಕಥೆ.

ಆಡ ಆ ದಡಿ ಕೊರ್ದ್ ನುಡಿ ಕೊರ್ದ್ ದೈವ ಕಟ್ಟಿನಾರ್,ಕೋಲ ಪಿರಿತುದು ಆ ಇಲ್ಲದ ಯಜಮಾನನಡೆ ಬತ್ತುದು, ದನಿಕುಲೆ, ಎನ್ನ ಬುಡರ ಮಗುರರೇ ಆತುಂಡು, ಒಂತೆ ಗಾರ್ಮೆಟ್ ದಕುಲೆಡ ಪಾತೆರುದ್ ಪನವು ತಿಕ್ಕುಲೆಕ ಮಲ್ಪುಲೆ ಪಂದ್ ಕಡೆ ಕಣ್ಣಡ್ ಕೊಡಿ ದುಃಖ ಬುಡ್ಪೆರ್. ಬಡವೆ ಪತುದ್ ಮಲ್ಯಾಯನ ಮುಟ್ಟದಕುಲೆಗುಲಾ, ಒರಿ ಪಾಪದಾಯೆ ದೈವ ಆದ್ ನುಡಿ ಕೊರ್ಪೆ. ನೇಮ,ಕೋಲ ಮುಗ್ಗಿನೆ ಆಯೆ ಅಲ್ಪ ಸಾದಾರಣ ನರಮಾನಿಯೇ. ಉಂದು ತುಳುವನೆಲತ ಶಕ್ತಿ.

ಉಂದು ತುಳುವನಾಡುದ ದೈವರಾದನೆ. ಎನ್ನಿಲ್ಲದ ಸತ್ಯ ಜೀವ ದೆಪ್ಪರೆ ಇಪ್ಪುನತ್ತ್ ಜೀವ ಕಾಪರೆ ಇಪ್ಪುನಪು ಪನ್ಪಿನ ಸತ್ಯನು ನಂಬುಲೆ. ತಪ್ಪು ಮಲ್ಪುನಗ ಬೆಚ್ಚ ಪುಟ್ಟಾದ್ ಒಂಜಿ ಮಲ್ಪರೆ ಇಪ್ಪುನವು.ಕೋರ್ಟ್ ಡ್ ಇಲೆವಾರಿ ಆವಂದಿನ ಇಚಾರ ಒಂಜಿರೆ ಗಂಧಡ್ ,ಪಾತೆರಡ್ ಇಲೆವಾರಿ ಆಪುಂಡು. ಗುಣ ಆವಂದಿ ಸೀಕುಗ್ ಒಂಜಿರೆ ಗಂದ ಮರ್ದಾದ್ ಪಲಿಪುಂಡು.