ವಿಶ್ವದ ಎತ್ತರದ ಜಾಗೆಡ್ ತುಳುನಾಡ್ದ ಕೊಡಿ ರಾಪಾಯಿನ ತುಳುವಪ್ಪೆ ಮಗೆ..

ಉಡುಪಿ: ಎಡ್ಡೆ ಸಂಬಳ ಬರೊಂದಿತ್ತಿನ ಸಾಫ್ಟ್ ವೇರ್ ಕೆಲಸೊನ್ ಬುಡುದ್ ಸುಮಾರು 18000ಗುಲಾ ಜಾಸ್ತಿ ಕಿಮೀ ಪ್ರಯಾಣೊನ್‌ ತನ್ನ ಬೈಕ್ ಡೇ ಒರಿಯೇ ಮಲ್ತುದ್ ತುಳುನಾಡುದ ಕೊಡಿನ್ ವಿಶ್ವದ ಅತೀ ಎತ್ತರದ ಉಮ್ಲಿಂಗ್ ಲಾ ಬೊಕ್ಕ ಮೌಂಟ್ ಎವರೆಸ್ಟ್ ಬೇಸ್ ಕ್ಯಾಂಪ್ ದ ಮಿತ್ತ್ ರಾಪಾಯಿನ ತುಲುವಪ್ಪೆ ಮಗೆ.
28 ವರ್ಷದ ಸಿದ್ಧ್ವೀನ್ ಶೆಟ್ಟಿ ಉಡುಪಿದ ಜವ್ವನೆ. ಆರ್ ಒರಿ ಟ್ರೆಕ್ಕಿಂಗ್ ಪ್ರೇಮಿ. 2023 ರ ಮೇ 6 ಗ್ ಉಡುಪಿಡ್ದ್ ತನ್ನ ಹಿಮಾಲಯನ್ ಬೈಕ್ ಡ್ ಪ್ರಯಾಣ ಸುರು ಮಲ್ತುದ್ ಭಾರತ, ನೇಪಾಳ ಬೊಕ್ಕ ಭೂತಾನ್ ದೇಶೊನ್ ಸುತ್ತುದ್, ಭಾರತದ 21 ರಾಜ್ಯೊಲು, 5 ಕೇಂದ್ರಾಡಳಿತ ಪ್ರದೇಶಲೆನ್ ಸುತ್ತುದ್ ಜುಲೈ 19ಗ್ ಉಡುಪಿಗ್ ವಾಪಾಸಾತೆರ್. ನೆತ್ತೊಟ್ಟುಗ್ ವಿಶ್ವದ ಅತೀ ಎತ್ತರದ ಪ್ರದೇಶವಾಯಿನ ಉಮ್ಲಿಂಗ್ ಲಾ (19,024ಫೀಟ್), ಮೌಂಟ್ ಎವರೆಸ್ಟ್ ಬೇಸ್ ಕ್ಯಾಂಪ್ (17598 ಫೀಟ್ ಎತ್ತರ) ಬೊಕ್ಕ ವಿಶ್ವದ ಅತೀ ಎತ್ತರದ ಶಿವ ದೇವಾಲಯ ತುಂಗನಾಥ್ ನ್ ಲಾ ಸ್ಪರ್ಶಿಸಾದ್ ಬೈದೆರ್.
ಉಡುಪಿದ ಸುರೇಶ್ ಕೃಷ್ಣ ಶೆಟ್ಟಿ ಬೊಕ್ಕ ಸುಜಯ ಎಸ್ ಶೆಟ್ಟಿ ಅರೆನ ಮಗೆ ಸಿಧ್ವೀನ್ ಶೆಟ್ಟಿ ಮೇರು ತನ್ನ ಪ್ರಾಥಮಿಕ ಬೊಕ್ಕ ಹೈಸ್ಕೂಲ್ ಶಿಕ್ಷಣೊನ್ ಉಡುಪಿದ ಸೈಂಟ್ ಮೇರಿಸ್ ಶಾಲೆಡ್ ಮುಗಿತುದ್ ಪಿಯು ಶಿಕ್ಷಣ ಬ್ರಹ್ಮಾವರದ ಜಿಎಮ್ ವಿದ್ಯಾನಿಕೇತನಡ್ ಮಲ್ದೆರ್. ಬೊಕ್ಕ ಕಂಪ್ಯೂಟರ್ ಸೈನ್ಸ್ ಡ್ ಎಂಜಿನಿಯರಿಂಗ್ ಪದವಿನ್ ನಿಟ್ಟೆ ಕಾಲೇಜಿಡ್ದ ಪಡೆತುದ್ ಎಲ್ಯ ಪ್ರಾಯೊಡೇ ಚಾರಣದ ಬಗ್ಗೆ ವಿಶೇಷ ಆಸಕ್ತಿ ಪಡೆದೆರ್. ಚಾರಣದೊಟ್ಟುಗ್ ಇಡೀ ದೇಶೊನ್ ಸುತ್ತುದ್ ಅಲ್ಪದ ಶಿವ ದೇವಾಲಯಲೆನ್ ಸಂದರ್ಶನ ಮಲ್ಪೊಡುಂದ್ ಅರೆನ ಆಸೆಯಾದಿತ್ತುಂಡ್.ಅಯಿತೊಟ್ಟುಡ್ ತುಳುನಾಡುದ ಕೊಡಿನ್ ವಿಶ್ವದ ಎತ್ತರದ ಪ್ರದೇಶಡ್ ಇದಮುಟ ಉಡುಪಿದ ಒವ್ವೇ ಚಾರಣಿಗೆರು ರಾಪಾದುಜೆರ್ ಈ ಸಾಧನೆನ್ ತಾನು ಮಲ್ಪೊಡ್ ಪಂಡುದ್ ಆಸೆಡ್ ಕಠಿಣ ಪರಿಶ್ರಮದೊಟ್ಟುಗ್ ತನ್ನ ಕನಸುನ್ ನನಸು ಮಲ್ದೆರ್.
ಈ ಬಗ್ಗೆ ಪಾತೆರಿನ ಸಿದ್ವಿನ್ ಶೆಟ್ಟಿ “ಯಾನು ಎನ್ನ ಪ್ರಯಾಣೊನ್ ಒವ್ವೇ ರೀತಿದ ಸುದ್ದಿ ಮಲ್ಪಂದೆ ಕೇವಲ ಎನ್ನ ಪೊಪ್ಪ ಅಮ್ಮ ಬೊಕ್ಕ ಸಹೋದರಿಗ್ ತೆರಿಪಾವುನ ಮೂಲಕ ಮೌನವಾದ್ ಆರಂಭ ಮಲ್ದೆ. ದಾಯೆಗ್ ಪಂಡ 18000 ಕಿಮೀ ಪ್ರಯಾಣ ಮಲ್ಪುನಾ ಏತ್ ಕಷ್ಟ ಸಾಧ್ಯ ಪನ್ಪಿನ ಅರಿವು ಎಂಕಿತ್ತುಂಡ್. ಆಂಡಬ ಎನ್ನ ಇಲ್ಲದಕ್ಲೆನ ಬೆಂಬಲ ಎನ್ನೊಟ್ಟುಗ್ ಇತ್ತಿನ ಕಾರಣ ಯಾನು ಅವ್ವೆನ್ ಕ್ರಮಿಸಾವರೆಗ್ ಸಾಧ್ಯ ಆಂಡ್. ಎನ್ನ ಬೈಕ್ ಸವಾರಿದ ಸಮಯಡ್ ಕೆಲವ್ ಸೇತುವೆಲು, ಭೂಕುಸಿತೊಲು, ಬೊಲ್ಲದ ಪ್ರದೇಶಲು, ತುದೆಕುಲು, ಸಿಮತ್ತ ಪ್ರದೇಶೊಲು, ಪೊಯ್ಯ , ಕಲ್ಲುಲು, ಪರ್ವತೊಲು, ದಟ್ಟವಾಯಿನ ಕಾಡುಲೆನ್ ದಾಂಟುದ್ ದುಂಬರಿತುದೆ. ಎನ್ನ ಕ್ರೀಡಾ ಟೀ ಶರ್ಟ್ನ್ ಡ್ +50 ಡಿಗ್ರಿಡ್ದ್ -16 ಮುಟ್ಟ ತಾಪಮಾನೊನ್ ತಡೆತೊಂದ್ ಪ್ರಯಾಣ ಮಲ್ತುದೆ. ಒವ್ವೇ ಚರ್ಮ ರಕ್ಷ ಕ್ರೀಮ್ ಲು ಅತ್ತುಂಡ ಥರ್ಮಲ್ ಉಪ್ಪಂದೆ ಪ್ರಯಾಣ ಮಲ್ತುದ್ ಇಲ್ಲ್ ಬುಡಿನೇಡಿಂಚಿ ಕಡೇಮುಟ್ಟ ಒವ್ವೇ ರೀತಿದ ಮಾತ್ರೆಲೆನ್ ಉಪಯೋಗ ಮಲ್ಪಂದೆ ಇತ್ತಿನವ್ಲಾ ಒಂಜಿ ವಿಶೇಷವಾದುಂಡ್. ಕೆಲವೊಂಜಿ ದಿನಕ್ ಒಂಜೆ ಸರ್ತಿ ವನಸ್ ಮಲ್ತೊಂದಿತ್ತೆ.. ಈ ಮಾತಾ ಪರೀಕ್ಷೆಲೆನ್ ಯಾನು ಉದ್ದೇಶಪೂರ್ವಕವಾದ್ ಮಲ್ದಿತ್ತುದ್ ಯಾನು ಈ ಪ್ರಯಾಣಗ್ ಏತೊಂಜಿ ಸಮರ್ಥವಾದುಲ್ಲೆ ಬೊಕ್ಕ ಎಂಚ ನಿಭಾಯಿಸೊವುಂದುಲ್ಲೆ ಪನ್ಪಿನವ್ವೆನ್ ತೆರಿಯೊಂಬಿನ ನಿಟ್ಟುಡ್ ಪಿದಾಡುದಿತ್ತುದ್ ಅಯಿಟ್ ಯಾನು ಪಾಸಾತೆ ಪನ್ಪಿನ ಪೆರ್ಮೆ ಉಂಡು” ಪಂಡೆರ್.

ಎನ್ನ ಬೈಕ್ ಪ್ರಯಾಣಡ್ 100ಕ್ ಲಾ ಜಾಸ್ತಿ ದೇವಸ್ಥಾನೊಲ್, ಗುರುದ್ವಾರ, ಚರ್ಚ್ ಬೊಕ್ಕ ಮಸೀದಿಲೆನ ವಾಸ್ತು ಶಿಲ್ಪನ್ ಅನುಭವಿಸಾವುನ ಅವಕಾಶ ತಿಕ್ಕುಂಡ್. ಈ ಪೊರ್ತುಡ್ ಬಹುತೇಕ ಮಾತಾ ಧರ್ಮದ ಜನಕ್ಲೆನೊಟ್ಟುಗ್ ಬೆರೆಯುನ ಅಕ್ಲೆನೊಟ್ಟುಗ್ ಸಂವಾದ ಮಲ್ಪುನೊಟ್ಡುಗ್ ಅಕ್ಲೆನ ಸಂಸ್ಕೃತಿ ಆಚಾರ ವಿಚಾರಲೆನ್ ತೆರಿಯೊನರೆಗ್ ಸಾಧ್ಯ ಆಂಡ್. ನೆತ್ತ ಒಟ್ಟುಗ್ ಭಾರತ, ನೇಪಾಳ, ಭೂತಾನ್ ದೇಶಗಳ ಸಶಸ್ತ್ರ ಪಡೆಕುಲೆನ ಅಧಿಕಾರಿಲೆನ್ ಭೇಟಿಯಾದಿತ್ತುದ್ ಕುಡೊಂಜಿ ವಿಶೇಷತೆ ಆತುಂಡ್. ಎನ್ನ ಪ್ರಯಾಣದ ಉದ್ದಗುಲಾ ಮಾತಾ ರೀತಿದ ಸಹಕಾರ ಪ್ರತಿ ಭಾಗದ ಜನಕುಲ್ ಕೊರ್ತೆರು.
ಎನ್ನ ಪ್ರಯಾಣದ ಮುಖ್ಯವಾಯಿನ ಸಾಧನೆ ಪಂಡ ಸುಮಾರು 17,598 ಅಡಿ ಎತ್ತರ ಮೌಂಟ್ ಎವರೆಸ್ಟ್ ಬೇಸ್ ಕ್ಯಾಂಪನ್ ಕೇವಲ 6 ದಿನೊಟ್ ಒವ್ವೇ ರೀತಿ ಮಾರ್ಗದರ್ಶಕೆರ್ ಉಪ್ಪಂದೆ ಆರೋಹಣ ಮಲ್ತುದ್ ಪೂರ್ಣ ಮಲ್ದೆ. ಈ ಎತ್ತರದ ಪ್ರದೇಶಗ್ ಪೋದ್ ಅಲ್ಪ ತುಳುನಾಡುದ ಕೊಡಿನ್ ರಾಪಾದೆ ಪನ್ಪಿನ ಪೆರ್ಮೆ ಎಂಕುಂಡ್. ಒಂಜಿ ವರ್ಷದ ಪಿರಾವುಡ್ ಅಪಘಾತಡಾದ್ ಎನ್ನ ಮಂಡಿದ ಚಿಪ್ಪು ಪೊಲ್ಲಿದಿತ್ತುದ್ ನೆತ್ತ ನಡುಟುಲಾ ಈ ಚಾರಣ ಮಲ್ಪುನ ಅದೃಷ್ಠ ಎಂಕ್ ಸಿಕ್ಕುದುಂಡ್. ಈ ಎನ್ನ ಸಾಧನೆಗ್ ಅಲ್ಪದ ಅಧಿಕಾರಿಲು ಪ್ರಶಂಸಾ ಪತ್ರೊನ್ ಕೊರ್ತೆರ್ ಪಂಡುದ್ ತೆರಿಪಾಯೆರ್..