ಎಣ್ಣೆಹೊಳೆತ್ತ ಪ್ರೇಮಾನಂದ ನಾಯಕ್ ಕರಿನ 41ವರ್ಷೋಡಿಂಚಿ ಗಣಪತಿ ವಿಗ್ರಹ ಮಲ್ಪುನ ಕಜ್ಜೊಡ್ ತೊಡಗಿಸಾವೊಂದ್ ಈ ಸರ್ತಿ ಸುಮಾರು 226 ವಿಗ್ರಹೊಲೆನ್ ಮಲ್ತುದೆರ್. ಐಟ್ 62 ಮೂರ್ತಿಲು ಸಾರ್ವಜನಿಕ ಗಣೇಶೋತ್ಸವದ ಮೂರ್ತಿಲಾದಿತುದು ಬಾಕಿದವ್ ಇಲ್ಲಡ್ ಬೊಕ್ಕ ಕಚೇರಿಲೆಡ್ ದೀಪಿನ ಮೂರ್ತಿಲು. ಪ್ರೇಮಾನಂದ ನಾಯಕ್ ಮೆರೆನ ಅಜ್ಜೆರ್ ಮಂಜುನಾಥ್ ನಾಯಕ್ ಗಣಪತಿ ವಿಗ್ರಹೊಲೆನ್ ಮಲ್ತೊಂದಿತ್ತೆರೆಡೆಲಾ ರೆನ ಮಗೆ ನರಸಿಂಹ ನಾಯಕ್ ಮಾತ್ರ ಈ ಕಲೆನ್ ದುಂಬರಿತೊಂದ್ ಪೋತುಜೆರ್. ಆಂಡ ಪ್ರೇಮಾನಂದ ನಾಯಕ್ ಅಜ್ಜನ ಕಲೆನ್ ತಾನೇ ಸ್ವತಃ ಕಲ್ತುದ್ ದುಂಬರಿತೊಂದ್ ಪೋಯೆರ್.
ಅಂಚಾದ್ ಮೆರೆನ ಈ ಕಲಾರಾಧನೆನ್ ಮೆಚ್ಚಿದ್ ಊರುದಕುಲ್ ಮೆರೆನ್ ಪ್ರೇಮಾನಂದ ನಾಯಕ್ ನ ಬದಲುಗ್ ಗಣೇಶ್ ನಾಯಕ್ ಪಂಡುದ್ ಮೋಕೆಡ್ ಲೆಪ್ಪರೆಗ್ ಸುರು ಮಲ್ತೆರ್.
ಬ್ರಾಂಚ್ ಪೋಸ್ಟ್ ಮಾಸ್ಟ್ರ್ ಆಯಿನ ಗಣೇಶ್ ನಾಯಕ್ 1980ನೇ ಇಸವಿಡ್ ಕ್ರಷ್ಣಮೂರ್ತಿ ಭಟ್ ಮೆರೆನ ಒತ್ತಾಯೊಡ್ ಒಂಜಿ ಗಣಪತಿ ಮೂರ್ತಿನ್ ಮಲ್ತಿನಾರ್, ಅವ್ವನೇ ದುಂಬರಿತೊಂದ್ ಇದಮುಟ್ಟ 6500 ಗಣಪತಿ ವಿಗ್ರಹ ಮಲ್ದೆರ್. ಇತ್ತೆದ ಕಾಲೊಡ್ ಹೆಚ್ಚಾದ್ ರಾಸಾಯನಿಕ ವಸ್ತುಲೆನ್ ಗಳಸುದ್ ಗಣಪತಿ ವಿಗ್ರಹೊನ್ ಮಲ್ಪುವೆರ್ ಅವ್ವ್ ಪರಿಸರೊನ್ ಹಾನಿ ಮಲ್ಪುಂಡ್. ಆಂಡ ಮೇರ್ ಆವೆಮಣ್ಣುಡೇ ವಿಗ್ರಹೊಲೆನ್ ಮಲ್ಪುನವ್ವ್ ವಿಶೇಷ.ಆವೆಮಣ್ಣ್ ಇತ್ತೆ ಒಲ್ಪಲಾ ತಿಕ್ಕುನವ್ ಕಮ್ಮಿ.ಅಂಚಾದ್ ಆವೆಮಣ್ಣುಡ್ ಮಲ್ತಿನ ಗಣಪತಿಗ್ ಬಾರೀ ಬೇಡಿಕೆ ಉಂಡು.ಒಂತೆ ರೇಟ್ ಲಾ ಜಾಸ್ತಿ.ಆಂಡ ಮೇರ್ ಮಾತ್ರ ಹೆಚ್ಚ ಕ್ರಯ ಪಾಡಂದೆ,ಬಂಗದಕ್ಲೆಗ್ ಧರ್ಮಾರ್ಥವಾದ್ ಕೊರ್ತಿನಲಾ ಉಂಡು. ತುಳುನಾಡೊರ್ಮೆ ಮೆರೆನ ವಿಗ್ರಹೊಲೆಗ್ ಬೇಡಿಕೆ ಇತ್ತುದ್ ಮೇ ತಿಂಗೊಲುಡೇ ನೆತ್ತ ಬೇಲೆನ್ ಸುರು ಮಲ್ಪುವೆರ್.ಕಾರ್ಕಳದ ಎಣ್ಣೆಹೊಳೆಡ್ ವಿಗ್ರಹೊಲೆನ್ ತಯಾರ್ ಮಲ್ತೊಂದಿತ್ತುದ್ ಸುದರ್ಶನ ಗುಡಿಗಾರ್, ಈರಣ್ಣ ಬೊಕ್ಕ ಗಾಯತ್ರಿ ಮೆರೆಗ್ ಸಾಕಾರ ಕೊರೊಂದುಲ್ಲೆರ್.
ಸಾಮಾಜಿಕ ಕಳಕಳಿ ದೀಯೊಂದ್ ಕರಿನ 41 ವರ್ಷೋಡಿಂಚಿ ವಿಗ್ರಹ ತಯಾರ್ ಮಲ್ಪುನ ಗಣೇಶ್ ನಾಯಕ್ ಒವ್ವೇ ಪ್ರಶಸ್ತಿದ ಪಿರಾವುಡ್ ಪೋತಿನಾರ್ ಅತ್ತ್.ಮೆರೆನ ಈ ಕಲಾಸಾಧನೆನ್ ಗುರುತಿಸಾವುನ ಬೇಲೆ ಸರಕಾರೊಡ್ದ್ ಆವೊಡ್ ಪಂಡುದ್ ಊರುದಕ್ಲೆನ ಆಶಯ.
by 