ಕ್ಷಿತಿ ಕೆ ರೈ ಧರ್ಮಸ್ಥಳ

2005 ಏಪ್ರಿಲ್ 10ನಾನಿ ಕಿಶೋರ್ ರೈ ಬೊಕ್ಕ ಜಯಭಾರತಿ ದಂಪತಿಲ್ನ ಮಗಲಾದ್ ಪುಟ್ಟಿನ ಕ್ಷಿತಿಗ್ ಮುದ್ದು ಮೆಗ್ಯೆ ಕ್ಷೌನಿಶ್ ಪಂಡ ಮಸ್ತ್ ಮೋಕೆ.

ತನ್ನ ಆಜಿನೇ ಪ್ರಾಯೊಡೇ ಸಂಗೀತಾಭ್ಯಾಸ ಸುರು ಮಲ್ತಿ ಕ್ಷಿತಿ ಸಂಗೀತ ಬೊಕ್ಕ ಏಕಪತ್ರಾಭಿನಯ ಪಂತೊಲೆಡ್ ತಾಲೂಕು, ಜಿಲ್ಲಾ ಬೊಕ್ಕ ರಾಜ್ಯಮಟ್ಟಡ್ ಪಾಲ್ ಪಡೆದ್ ಪ್ರತಿವರ್ಷ ಸುರುತ ಇನಾಮುನೇ ಪಡೆವೊಂದು ತನ್ನ ಶಾಲೆದ ಕೀರ್ತಿ ಪತಾಕೆನ್ ರಾಪಾಯಿನ ಪೆರ್ಮೆ ಪಡೆವೊಂದಿನಾರ್. ಅಂಚಾದ್ ಕಲ್ಪಾದಿಲೆಗ್ಲಾ ಕ್ಷಿತಿ ಪಂಡ ಒಂತೆ ಎಚ್ಚನೇ ಮೋಕೆ.

2017ಡ್ ಜೀಕನ್ನಡ ಚಾನೆಲ್ಡ್ ನಡತೊಂದಿತ್ತಿ ಸರಿಗಮಪ ಲಿಟ್ಲ್ ಚಾಂಪ್ಸ್ ಪಂತೊಡು ಪಾಲ್ ಪಡೆತಿ ಸಾರಗಟ್ಟಲೆ ಜೋಕುಲೆಡ್ ಮೆಗಾ ಅಡಿಷನ್ಡ್ ಅಜಪ್ಪವೊಂದು, ಕಡೆಕ್ ಸ್ಪರ್ಧೆಗ್ ಆಯ್ಕೆ ಆಯೆರ್. ಮಾತಾ 22 ಎಪಿಸೋಡ್‌ನ್ ಯಶಸ್ವಿಯಾದ್ ಮುಗಿತ್ತ್ ಸೆಮಿಫೈನಲ್ಗ್ ಆಯ್ಕೆ ಆದ್, ಜಡ್ಜಸ್‌ಲೆಡ್ದ್ ಶಹಬ್ಬಾಸ್ ಪನ್ಪವೊಂದೆರ್. ಹಂಸಲೇಖ ಸರ್ ಇಂಬೆರೆಗ್ ಸೌಂದರ್ಯ ಸರಸ್ವತಿ ಬಿರ್ದ್ ಕೊರ್ದ್ ಮೆಚ್ಚಿಗೆ ತೆರಿಪಾಯೆರ್. ಅವೆಡ್ದ್ ಬೊಕ್ಕ ಜೀಕನ್ನಡ ಡಾನ್ಸ್ ಕರ್ನಾಟಕ ಡಾನ್ಸ್ ರಿಯಾಲಿಟಿ ಶೋಡು ಪಾಲ್ ಪಡೆದ್ ಸೆಮಿಫೈನಲಿಸ್ಟ್ ಆದ್ ಆಯ್ಕೆ ಆಯೆರ್. ಅವೆಡ್ದ್ ಬೊಕ್ಕ ಜೀ ಸೂಪರ್ ಸ್ಟಾರ್‌ಡ್ ಪಾಲ್ ಪಡೆದ್ ರನ್ನರ್ ಅಪ್ ಟ್ರೋಫಿ ಪಡೆವೊಂಡೆರ್.

ಕ್ಷಿತಿನ ಪ್ರತಿಭೆಗ್ ಜಿಲ್ಲೆ ಬೊಕ್ಕ ರಾಜ್ಯಮಟ್ಟಡ್ ಗೌರವ, ತಮ್ಮನ ಬಲ್ಮನ ತಿಕುನ ಒಟ್ಟುಡು ಇಂಬೆರ್ ಅಂತರಾಜ್ಯಮಟ್ಟಡ್ಲಾ ಸಂಗೀತ ಕಾರ್ಯಕ್ರಮ ಕೊರ್ತೆರ್. 2019ಡ್ ಕರುನಾಡ ರಾಜ್ಯೋತ್ಸವ ಪ್ರಶಸ್ತಿ ಬೊಕ್ಕ ಕರ್ನಾಟಕ ಪ್ರತಿಭಾ ರತ್ನ ಪ್ರಶಸ್ತಿ, 2020ಡ್ ಸಪ್ತಸಂಭ್ರಮ ಜೆಸಿ, 2021ಡ್ ಸ್ವಸ್ತಿಕ್ ಸಂಭ್ರಮ ಅಂಚನೇ 2022ಡ್ ಕರ್ನಾಟಕ ರಾಜ್ಯ ಮಟ್ಟದ ಚಿಣ್ಣರ ಲೋಕ ರಾಜ್ಯಪ್ರಶಸ್ತಿ ಸೇರಿನಂಚ ಮಸ್ತ್ ಪ್ರಶಸ್ತಿಲ್ ಒಲಿದ್ ಬೈದ್ಂಡ್.

ಬೊಂಬಾಯಿದ ಕಲಾಜಗತ್ತು ಸಂಸ್ಥೆದ ಸಂಘಟಕೆ ತೋನ್ಸೆ ವಿಜಯ ಕುಮಾರ್ ಶೆಟ್ಟಿ ಮುತಾಲಿಕೆಡ್ ಮಸ್ತ್ ಕಾರ್ಯಕ್ರಮ ಕೊರ್ನ ಕ್ಷಿತಿ ಪೆನ್ಸಿಲ್ ಬಾಕ್ಸ್, ಸ್ಕೂಲ್ ಲೀಡರ್ ಸಿನೆಮಾಲೆಗ್ ಹಿನ್ನಲೆ ಗಾಯಕಿ ಆದ್ ಬೆನ್ತೆರ್. ಸುಮಾರ್ ಕಿರುಚಿತ್ರಲೆಗ್ ಪದ ಪನ್ತಿನ ಒಟ್ಟುಡು 14 ಧಾರ್ಮಿಕ ಕ್ಷೇತ್ರಲೆನ ಭಕ್ತಿಗೀತೆಲೆಗ್ ಸೊರೊ ಕೊರ್ತೆರ್. ಅತ್ತಂದೆ 15 ಪದೊಕ್ಲೆಗ್ ರಾಗ ಸಂಯೋಜನೆ ಮಲ್ದೆರ್.

ಶಾಸ್ತ್ರೀಯ ಸಂಗೀತನ್ ಕವಿತಾ ಕೊರ್ನಾಯ ಬೊಕ್ಕ ವಿದುಷಿ ಅನಸೂಯ ಪಾಠಕ್‌ರೆಡ ಕಲ್ತೊಂದು ಡಿಸ್ಟಿಂಕ್ಷನ್‌ಡ್ ಪಾಸ್ ಆತೆರ್. ಪ್ರಸ್ತುತ ನಾಗೇಂದ್ರ ನಾಯಕ್ ಬೆಳ್ತಂಗಡಿ ಮಾರ್ಗದರ್ಶನಡ್ ಹಿಂದೂಸ್ತಾನಿ ಸಂಗೀತ ಕಲ್ತೊಂದುಲ್ಲೆರ್..

ತೋನ್ಸೆ ವಿಜಯ ಕುಮಾರ್ ಶೆಟ್ಟರೆನ ಮುತಲಿಕೇಡ್ ಬೊಂಬಾಯಿ ಡ್ ನಡತಿನ “ಬೊಂಬಾಯಿಡ್ ತುಳುನಾಡ್” ಪನ್ಪಿನ ವಿಶ್ವ ಮಟ್ಟದ ಕಾರ್ಯಕ್ರಮೊಡು “”ತೌಳವ ಸಿರಿ “” ಬಿರುದುನು ಕೊರ್ದು ತರೆಕ್ಕ್ ಮುಟ್ಟಲೆ,
ತಡ್ಪೆಡ್ ಬಚ್ಚಿರೆ ಬಜ್ಜೆಯಿ, ಮಣ್ಣಿ, ಕಜ್ಜಾಯ ಕೊರ್ದು ಹಿರಿಯೆರ್ನ ಸೇರಿಕೆಡ್ ಬಾರಿ ಮಲ್ಲ ಮಟ್ಟ್ ದ ತಮ್ಮನ ಮಲ್ತೆರ್..
ಧರ್ಮಸ್ಥಳ ದ ದೇವೆರ್ನ ಅನುಗ್ರಹ , ಪೂಜ್ಯ ಖಾವಂದೆರ್ನ ಆಶೀರ್ವಾದ ಅಂಚೆನೇ ಅಪ್ಪೆ ಅಮ್ಮೆರ್ನ ಪ್ರೋತ್ಸಹ ಡ್ ಎಂಕ್ ಇಂಚಿನ ಸಾಧನೆ ಮಲ್ಪೆರೆ ಸಾಧ್ಯ ಂದು ಪನೊಂದು ಮಾತೆರೆಗ್ಲಾ ಉಡಲ್ ದಿಂಜಿನ ಸೊಲ್ಮೆಲು ನ್ ಸಂದಾಯಿತ ಮಲತ್ತೊಂದುಲ್ಲೆರ್ ಕ್ಷಿತಿ…

ಎಸ್‌ಡಿಎಂ ಕಾಲೇಜ್ ಉಜಿರೆಡ್ ಬಿಕಾಮ್ ಕಲ್ತೊಂದುಪ್ಪುನ ಕ್ಷಿತಿನ ಭವಿಷ್ಯ ಎಡ್ಡೆಡ್ ಬೆಳಗೊಂದು ಆರ್ ಸ್ವರಸಾಮ್ರಾಜ್ಯದ ಸರಸ್ವತಿಯಾದ್ ಮೆರೆವೊಂದುಪ್ಪಡ್ ಪನ್ಪಿನ ಉಡಲ ಅರಿಕೆ ನಮ್ಮವು.