ಹಿಂದೂ ಧರ್ಮೀಯೆರ್ ಆಚರಣೆ ಮಲ್ಪುನ ತುಡರ ಪರ್ಬದ ಮಹತ್ವನ್ ದುಂಬುದ ಪೀಳಿಗೆಗ್ ತೆರಿಪಾದ್ ಕೊರ್ಪಿನ ಅಗತ್ಯ ಉಂಡು ಪಂಡುದ್ ಉಡುಪಿ ವಿಧಾನಸಭಾ ಕ್ಷೇತ್ರದ ಶಾಸಕೆರಾಯಿನ ಯಶ್ಪಾಲ್ ಸುವರ್ಣ ತೆರಿಪಾಯೆರ್. ಆರು ಮೂಡುಬೆಟ್ಟು ಶ್ರೀ ಸಾಯಿಬಾಬಾ ಮಂದಿರಡ್ ಅಕ್ಟೋಬರ್ 27 ತಾರೀಕುದಾನಿ ಶಬರಿ ಮಲೆ ಅಯ್ಯಪ್ಪ ಸಮಾಜಂ ಉಡುಪಿ ಜಿಲ್ಲೆ, ಶಬರಿ ಮಲೆ ಅಯ್ಯಪ್ಪ ಸಮಾಜಂ ಉಡುಪಿ ಮಹಿಳಾ ಘಟಕ, ಎ. ಪಿ. ಎಮ್. ಸಿ. ರಕ್ಷಣಾ ಸಮಿತಿ, ಉಡುಪಿ ಬೊಕ್ಕ ಮೂಡುಬೆಟ್ಟು ಸಾಯಿಬಾಬಾ ಮಂದಿರದ ಒತ್ತು ಸೇರಿಗೆಡ್ ನಡತಿನ ಗೂಡುದೀಪ ಪಂತೊನ್ ತುಡರ್ ಅರ್ಲಾದ್ ಉದಿಪನ ಮಲ್ತುದ್ ಪಾತೆರಿಯೆರ್. ತುಡರ ಪರ್ಬೊನ್ ನಮ್ಮ ಹಿರಿಯೆರ್ ಬಾರೀ ಶ್ರದ್ಧಾಭಕ್ತಿಡ್ ಸಂಪ್ರದಾಯಬದ್ಧವಾದ್ ಆಚರಣೆ ಮಲ್ತೊಂದಿತ್ತೆರ್. ಆಂಡ ಇತ್ತೆದ ಜವನೆರ್ ಪಾಶ್ಚಾತ್ಯ ಸಂಸ್ಕ್ರತಿಗ್ ಒಗ್ಗುದ್ ಪೋದು ನಮ್ಮ ಸಂಸ್ಕ್ರತಿ, ಸಂಪ್ರದಾಯನ್ ಮದತ್ ಪೋವೊಂದುಲ್ಲೆರ್. ಅವ್ವೆನ್ ಈ ಗೂಡುದೀಪ ಪಂತೊದ ಮುಖೇನ ಸಂಪ್ರದಾಯದ ಅರಿವು ಪುಟ್ಟಾವುನವ್ ಮೆಚ್ಚೊಡಾಯಿನ ಬೇಲೆ ಪಂಡುದ್ ಕಜ್ಜೊ ಆಯೋಜನೆ ಮಲ್ದಿನ ಸಂಘಟಕೆರೆಗ್ ಎಡ್ಡೆಪ್ಪು ಬಯಕೀಯೆರ್.
ಕಜ್ಜೊಡ್ ಶಬರಿಮಲೆ ಅಯ್ಯಪ್ಪ ಸಮಾಜಂ ದ ಗೌರವಾಧ್ಯಕ್ಷೆರಾಯಿನ ಶ್ರೀ ಹರಿಯಪ್ಪ ಕೋಟ್ಯಾನ್,ಶ್ರೀ ಸಾಯಿಬಾಬಾ ಮಂದಿರ ತೋಟದಮನೆ ಮೂಡುಬೆಟ್ಟುದ ಧರ್ಮದರ್ಶಿಲಾಯಿನ ಶ್ರೀ ದಿವಾಕರ ಶೆಟ್ಟಿ, ಉಡುಪಿ ನಗರಸಭಾಧ್ಯಕ್ಷೆರಾಯಿನ ಶ್ರೀ ಪ್ರಭಾಕರ ಪೂಜಾರಿ, ಸಿರಿತುಳುವ ಚಾವಡಿದ ಕಾರ್ಯಾಧ್ಯಕ್ಷೆರಾಯಿನ ಶ್ರೀ ಈಶ್ವರ್ ಶೆಟ್ಟಿ ಚಿಟ್ಪಾಡಿ ಕಜ್ಜೊಗ್ ಎಡ್ಡೆಪ್ಪು ಬಯಕಿಯೆರ್. ಕಜ್ಜೊದ ಸಂಯೋಜಕೆರಾಯಿನ ಉಡುಪಿ ನಗರಸಭಾ ಸದಸ್ಯೆರಾಯಿನ ಶ್ರೀ ವಿಜಯ ಕೊಡವೂರು ಪ್ರಾಸ್ತವಿಕ ಪಾತೆರಿಯೆರ್. ಶಬರಿಮಲೆ ಅಯ್ಯಪ್ಪ ಸಮಾಜಂ ದ ಅಧ್ಯಕ್ಷೆರಾಯಿನ ಶ್ರೀ ರಾಧಾಕೃಷ್ಣ ಮೆಂಡನ್ ಸ್ವಾಗತ ಮಲ್ತುದ್, ಕಾರ್ಯದರ್ಶಿ ರಂಜಿತ್ ಶೆಟ್ಟಿ ಸೊಲ್ಮೆ ಸಂದಾಯ್ತ ಮಲ್ತೆರ್. ಜ್ಯೋತಿ ಎಸ್. ದೇವಾಡಿಗ ಸುಗಿತೆರು. ಕನ್ನಡ ಉಪನ್ಯಾಸಕೆರಾಯಿನ ರಾಮಾಂಜಿ ಉಡುಪಿ ಕಜ್ಜೊದ ನಿರೂಪಣೆ ಮಲ್ತೆರ್.ವೇದಿಕೆಡ್ ಶಬರಿಮಲೆ ಅಯ್ಯಪ್ಪ ಸಮಾಜಂ ದ ಉಪಾಧ್ಯಕ್ಷೆರಾಯಿನ ಶ್ರೀ ಗೋಪಾಲ್ ಗುರುಸ್ವಾಮಿ,ಎ. ಪಿ. ಎಮ್. ಸಿ. ದ ವಿರೂಪಾಕ್ಷ, ಸಮಾಜಸೇವಕೆರಾಯಿನ ಶ್ರೀ ಸುಭಾಷಿತ್, ಶಬರಿಮಲೆ ಅಯ್ಯಪ್ಪ ಸಮಾಜಂ ಕಾಪು ವಲಯಾಧ್ಯಕ್ಷೆರಾಯಿನ ಶ್ರೀ ರಘರಾಮ ಶೆಟ್ಟಿ, ಮಾಧ್ಯಮ ಸಂಚಾಲಕಿ ಶ್ರೀಮತಿ ಯಶೋದ ಕೇಶವ್ ಉಪಸ್ಥಿತರಿತ್ತೆರ್.
ಗೂಡುದೀಪ ಪಂತೊಡ್ ಸುಮಾರು 50 ಗುಲಾ ಜಾಸ್ತಿ ಪಂತಾರ್ಥಿಲು ಪಾಲ್ ಪಡೆದಿತ್ತುದ್, ಪಾಲ್ ಪಡೆಯಿನ ಮಾತೆರೆಗುಲಾ ಪ್ರಮಾಣಪತ್ರ ಕೊರ್ದ್ ಮಾನಾದಿಗೆ ಮಲ್ತೆರ್. ಪಂತೊಡ್ ಗೆಂದಿನಕ್ಲೆಗ್ ಮುಗಿತಲದ ಲೇಸ್ ಡ್ ಇನಾಮು ಕೊರ್ದು ಮಾನಾದಿಗೆ ಮಲ್ತೆರ್.
by 