ಜೈ ತುಳುನಾಡ್.

ಬೆಂಗಳೂರು:ಜೈ ತುಲುನಾಡ್(ರಿ.) – “ಪಿಂಗಾರ” ತುಲು ಲಿಪಿ ತಂತ್ರಾಂಶ ಬುಡುಗಡೆ.
ಬಲೆ ತುಲು ಲಿಪಿ ಕಲ್ಪುಗ ಕಜ್ಜಕೊಟ್ಯ ಉದಿಪನ.

ಜನವರಿ 19 : ಸೌಂದರ್ಯ ಎಜ್ಯುಕೇಶನಲ್ ಟ್ರಸ್ಟ್(ರಿ.) ಮುಕುಲೆನ ಸಹಕಾರೊಡು,ಕರ್ನಾಟಕ ಕರಾವಳಿ ಮಿತ್ರ ಮಂಡಲಿ(ರಿ.) ಒಟ್ಟು ಸೇರಿಗೆಡ್,ಜೈ ತುಲುನಾಡ್(ರಿ.) ಮುಕುಲೆನ ಆಶ್ರಯೊಡು,ನಾಗಸಂದ್ರ ಕೈತಲ್ ಉಪ್ಪುನ ಹಾವನೂರು ಬಡಾವಣೆದ ಸೌಂದರ್ಯ ಶಾಲೆದ ಸಭಾಂಗಣೊಡು
ಜೈ ತುಲುನಾಡ್ ಸಂಘಟನೆದ ಹರ್ಷಿತ್ ಕುಮಾರ್ ಅಭಿವೃದ್ದಿ ಮಲ್ತಿನ ಪಿಂಗಾರ ತುಲು ಲಿಪಿ ತಂತ್ರಾಂಶ ಬಿಡುಗಡೆ ಅಂಚನೆ ಬಲೆ ತುಲು ಲಿಪಿ ಕಲ್ಪುಗ ಪನ್ಪುನ ಕಜ್ಜ ನಡತ್ತ್ಂಡ್.

ಕರ್ನಾಟಕ ಕರಾವಳಿ ಮಿತ್ರ ಮಂಡಲಿದ ಮಾನಾದಿಗೆ ದ ಗುರ್ಕಾರ್ಲಾಯಿನ ಕೃಷ್ಣ ಕೆ ಶೆಟ್ಟಿ ಲೇಸ್ನ್ ತುಡರ್ ಅರ್ಲಾದ್ ಉದಿಪನ ಮಲ್ತೆರ್.

ಜೈ ತುಲುನಾಡ್(ರಿ.) ಸಂಘಟನೆದ ತುಲು ಭಾಷಾ ಸಮಿತಿದ ಮೇಲ್ವಿಚಾರಕೆರಾಯಿನ ಜಯಪ್ರಸಾದ್ ಪಾತೆರೊಂದು ಜೈ ತುಲುನಾಡ್ ಸಂಘಟನೆ ಮಲ್ತಿನ ತುಳು ಪರ ಬೇಲೆಲೆನ ಬಗ್ಗೆ ಪ್ರಸ್ತಾವಿಕವಾದ್ ಪಂಡೆರ್.ತುಲು ಬಾರಿ ಪಿರಾಕ್ದ ಭಾಸೆ ಉಂದೆಕ್ ಸರಿಯಾಯಿನ ಬುಲೆಚ್ಚಿಲ್ ಬೊಕ್ಕ ಅಧ್ಯಯನಗಾದ್ ಸರಕಾರದ ಸಗಾಯ ಮಾತ್ರ ಅತ್ತಂದೆ,ತುಲುವೆರ್ ಲಾ ಜಾಗೃತಿಯಾಪುನ ಅಗತ್ಯ ಬೋಡಾತ್ಂಡ್ ಪಂಡೆರ್.

ಕರ್ನಾಟಕ ಕರಾವಳಿ ಮಿತ್ರ ಮಂಡಲಿದ ಗುರ್ಕಾರ್ಲಾಯಿನ ರವಿಪ್ರಸಾದ್ ಶೆಟ್ಟಿ ಪಾತೆರ್ದ್ ತುಳು ಭಾಷೆದ ಬಗೆತ ತುಲುವೆರೆನ ಉದಾಸೀನ ಬುದ್ಧಿದ ಬಗೆಟ್ ಬಾರಿ ಬೇಜಾರ್ ತೋಜಾಯೆರ್,ಅಂಚನೆ ಜೈ ತುಲುನಾಡ್ ಸಂಘಟನೆದ ತುಳು ಪೊಂರ್ಬಾಟೊಗು ನನ ದುಂಬಗ್ ಎಂಕುಲು ಲಾ ಬೆರಿಸಾಯ ಆದ್ ಉಂತುವ ಪಂಡೆರ್.ತುಳುಕ್ ಸ್ಥಾನಮಾನ ಇಜ್ಜಂದೆ ಆಯೆರೆ ತುಳುವೆರೆ ಕಾರಣ ಪಂದ್ ಬೇನೆಡ್ ಪಂಡೆರ್.

ಹರ್ಷಿತ್ ಕುಮಾರ್ ಅಭಿವೃದ್ಧಿ ಮಲ್ತಿನ ಪಿಂಗಾರ ತುಳು ಲಿಪಿ ತಂತ್ರಾಂಶದ(ಫಾಂಟ್) ಬಗೆಟ್ ಮಾಹಿತಿ ಕೊರ್ನ ಜೈ ತುಲುನಾಡ್(ರಿ.) ಸಂಘಟನೆದ ತಾಂತ್ರಿಕ ವಿಭಾಗದ ಮುಖ್ಯಸ್ಥೆರ್ ಬೊಕ್ಕ ಸಂಸ್ಥಾಪಕ ಸಮಿತಿದ ಪದುಕೆರಾಯಿನ ಸುಮಂತ್ ಪೂಜಾರಿ ಹೆಬ್ರಿ ಪಿಂಗಾರ ತುಳು ಫಾಂಟ್ ಎಂಚ ಗಲಸೊಲಿ ಪಂದ್ ಪೊರ್ಲುಡು ತೋಜಾದ್ ಕೊರ್ಯೆರ್.

ಸೌಂದರ್ಯ ವಿದ್ಯಾಸಂಸ್ಥೆದ C.E.O ಆಯಿನಂಚಿನ ಮಾನ್ಯ ಶ್ರೀ ಕೀರ್ತನ್ M ಸೌಂದರ್ಯ ಇಂಬೆರ್ ಜೈ ತುಲುನಾಡ್(ರಿ.) ಸಂಘಟನೆ ಭಾರಿ ಪ್ರಾಮಾಣಿಕವಾದ್ ತುಳು ಭಾಷೆ ಮತ್ತು ಲಿಪಿತ ಬೇಲೆಲೆನ್ ಮಲ್ತೊಂದುಂಡು.ಕೆಲವಾತ್ ಮಾಹಿತಿಲು ಈ ಕಾರ್ಯಕ್ರಮರ್ದ್ ಎಂಕುಲೆಗ್ ತೆರಿಂಡ್,ಉಂದು ನಿಜವಾದ್ ಮೆಚ್ಚೊಡಾಯಿನ ಬೇಲೆ ಪಂದ್ ಪಂಡೆರ್.ಮಾತ್ರ ಅತ್ತಂದೆ ಸೌಂದರ್ಯ ವಿದ್ಯಾಸಂಸ್ಥೆಡ್ ತುಳು ಭಾಸೆದ ನನಲಾತ್ ಅಧ್ಯಯನಗಾತ್ರ ತುಳು ಅಧ್ಯಯನ ಕೇಂದ್ರ ಉಂಡು ಮಲ್ಪುನ ಬಗೆಟ್ ತೆರಿಪಾಯೆರ್ ಬೊಕ್ಕ ನೆತ್ತ ಬಗೆತ ದುಂಬುದ ಬೇಲೆಲೆದ ಬಗೆಟ್ ಆಯಿನಾತ್ ಬೇಗ ತೆರಿಪಾವ ಅಂಚೆನೆ ತುಳು ಜನಪದ ವಿದ್ವಾಂಸೆರ್ ಬೊಕ ತಾಂತ್ರಿಕ ವಲಯದ ತಜ್ಞೆರೆನ ಸಹಕಾರ ಬೋಡೂಂದು ಪಂಡೆರ್.

ಸಂಸ್ಥೆದ ಕುಡೊರಿ ಮುಖ್ಯಸ್ಥೆರಾಯಿನ ಮಾನ್ಯೆರಾಯಿನ ಶ್ರೀಮತಿ ಸುನೀತ ಮೇರ್ ಬಲೆ ತುಲು ಲಿಪಿ ಕಲ್ಪುಗ ಕಜ್ಜ ಕೊಟ್ಯನ್ ತುಲು ಲಿಪಿಟ್ ಓಂಕಾರ ಬರೆಪುನ ಮೂಲಕ ಉದಿಪನ ಮಲ್ತೆರ್. ಸಂಸ್ಥೆಯ ಬಾಕಿದ ಮುಖ್ಯಸ್ಥೆರಾಯಿನ ವರುಣ್ ಕುಮಾರ್ M ಸೌಂದರ್ಯ ಬೊಕ್ಕ ಶ್ರೀಮತಿ ನಿಶ್ಮಿತ ವರುಣ್ ಕುಮಾರ್ ಮೊಕುಲೆನ ಉಪಸ್ಥಿತಿನ್ ಮಾನಾಯೆರ್.

ತುಳುನಾಡ ಜವನೆರ್(ರಿ.) ಬೆಂಗಳೂರು ಸಂಘಟನೆದ ಮುಖಂಡೆರಾಯಿನ ರಂಜಿತ್ ಇರಾ ಮೇರ್ ಪಾತೆರ್ದ್,ಜೈ ತುಳುನಾಡ್(ರಿ.) ಸಂಘಟನೆ ಬೊಕ ತುಲುನಾಡ ಜವನೆರ್ ಬೆಂಗಳೂರು ಸಂಘಟನೆ(ರಿ.) ದುಂಬುಲಾ ಒಟ್ಟಾದ್ ತುಲುಕ್ಕಾದ್ ಹೋರಾಟ ಮಲ್ತಿತ್ತ,ನನ ದುಂಬುಲಾ ಒಟ್ಟಾದ್ ಉಪ್ಪುವ ಪನ್ಪಿನ ಮೂಲಕ ಸಂಘಟನೆದ ಬೇಲೆಗ್ ಎಡ್ಡೆಪ್ಪುಲೆನ್ ಬಯಕಿಯೆರ್.

ಅಮೇರಿಕದ ಪ್ರಜೆಯಾಯಿನ ಸಾಮ್ಯುಯೆಲ್ ಡ್ರಾಗೊಮಿರೆ ಮೇರ್ ತುಲು ಬಾಸೆಡೇ ಪಾತೆರ್ದ್ ಎಂಕ್ ತುಳು ಬಾಸೆ ಮಸ್ತ್ ಇಷ್ಟ ಪಂಡೆರ್. ಮೊಕುಲೆನ ಒಟ್ಟುಗು ಬ್ರೆಜಿಲ್ ದೇಶದ ಲುವಾನ್ ಮೇರ್ ಲ ಈ ಕಜ್ಜೊಡು ಪಾಲ್ ಪಡೆದಿತ್ತೆರ್.
ಕಲ್ಪಾದಿಲಾಯಿನ(ಶಿಕ್ಷಕೆರ್) ಪ್ರಗತಿ ಯಸ್,ರಂಜನ್ S.Y,ಅನುದೀಪ್ ಶೆಟ್ಟಿ ಮೊಕುಲು ತುಳು ಲಿಪಿನ್ ಕಲ್ಪಾಯೆರ್.

ಜೈ ತುಳುನಾಡ್(ರಿ.) ಸಂಘಟನೆ ಬೆಂಗಳೂರು ಎಗ್ಗೆದ ಗುರ್ಕಾರ್ಲಾಯಿನ ಧನಂಜಯ ಆಚಾರ್ಯ ಲೇಸ್ ದ ಗುರ್ಕಾರ್ಮೆನ್ ಒಯಿಸ್ ದಿತ್ತೆರ್. ಅಕ್ಷತಾ ಸಾಲ್ಯಾನ್ ಲೇಸ್ ಗ್ ಬಿನ್ನೆರೆನ್ ಎದ್ಕೊಂಡೆರ್,ಅಕ್ಷಯ್ ಆಚಾರ್ಯ ಸೊಲ್ಮೆ ಸಂದೈತ ಮಲ್ತೆರ್ .ಶ್ರೀಮತಿ ಗೀತಾ ಜಯಪ್ರಸಾದ್ ಲೇಸ್ ಸುದಾರಿಕೆ ಮಲ್ತೆರ್.