ಎಲ್ಯ ಕತೆ

ಎಲ್ಯ ಕತೆ

ಕಾಂತಪಣ್ಣೆ ಪಿರ ಬರುವೆರಾ…? ಬಯ್ಯದ ಪೊರ್ತು, ಕಾಂತಪಣ್ಣೆ ಇಲ್ಲ ಜಗಲಿದ ಮಿತ್ತ್ ಕುಲ್ಲೊಂದು ಕಣ್ಣ್‌ಡ್ ಕನನೀರ್ ಜಪುಡಾವೊಂದುಲ್ಲೆರ್.ಇತ್ತಿ ರಡ್ಡ್ ಆನ್ ಜೋಕ್ಲೆಗ್ ಎಡ್ಡೆ ಇದ್ಯೆ -ಬುದ್ಧಿ ಕಲ್ಪಾದ್ ಮಲ್ಲೆ ಮಲ್ತೆರ್. ಎಡ್ಡೆ ಕೋಡಿದ ಪೊಣ್ಣು ಜೋಕ್ಲೆನ್ ತೂದು ಮದಿಮೆಲಾ ಮಲ್ತ್ ಬುಡಿಯೆರ್. ಆಂಡ ಬತ್ತಿ ಪೊಣ್ಣುಲು ವರ್ಸ ಒಂಜಿ ಆವೊಡಾಂಡ ಇಲ್ಲಡ್ ಕಾರ್ಬಾರ್ ಮಲ್ಪೆರೆ ಸುರು ಮಲ್ತೆರ್. ರಂಗ್‌ದ ಪಾತೆರೊಡು ಕಂಡಲ್ಯಲ್ಲೆನ್ ಮರ್ಲ್ ಕಟ್ಟಾದ್ ಮಾಮಣ್ಣನ್ ಪಿದಾಯಿ ಪಾಡೈರೆ ಕುಸೆಲ್ ಮಲ್ತೆರ್.ಜೋಕುಲುಲಾ ಉಂದೆಕ್ ಒತ್ತೊಂಡೆರ್.ಈ ಇಸಯ ಕಾಂತಪ್ಪಣ್ಣಗ್ ಗೊತ್ತಾಯಿನೆ ಆರೆಗ್ ಲೋಕ ಇಜ್ಜಂಡ್. ಕಡೆ ಕಾಲೊಡು ತೂವೊಡಾಯಿನ ಜೋಕ್ಲೆ ಪಿದಾಯಿ ನೂಕಿವೆರ್ ಪಂದಾಂಡ ಬೊಕ ಎಂಕ್ ಗತಿ ಏರ್ ಪಂದ್ ಬುಲಿಪೆರೆ ಸುರು ಪತ್ತಿಯೆರ್. ಜೋಕುಲು ಎಲ್ಯೆ ಇಪ್ಪುನಗನೇ ಜೀವನೊಡು ಕುಸ್ಕುದಿತ್ತಿ ಕಾಂತಪ್ಪಣ್ಣೆ ಬೊಕ್ಕಲಾ ಆಸ್ಕ್‌ದ್ ಪೋಯೆರ್.

ತಾನ್ ಬೆಂದ್ ಸೊಂದುದು ಕಟ್ಟಾಯಿ ಇಲ್ಲ್, ಉಂಡು ಮಲ್ತಿ ಬಂಗಾರ್ ಬುಳೆ ಸೆಳೆತ ಕಂಡ ತೋಟೊಲೆನ್ ಬುಡ್ದು ಪೋವೆರೆ ಮನಸಿಜ್ಜಿಡಲ, ಪೋಪುನುಂದಾಂಡ ಈ ಲೋಕೊನೇ ಬುಡ್ದು ಬೊಡೆದಿ ಲಚ್ಚಿಮಿನಾಡೆಗೆಂದ್ ಗಟ್ಟಿ ನಿರ್ಧಾರ ಮಲ್ತೊಂದು ಕತ್ತಲೆದ ಪೊರ್ತುಡು ತಡ್ಯ ಜತ್ತ್‌ದ್ ಪೋಯೆರ್.

ರವೀಂದ್ರ ಕುಲಾಲ್ ವರ್ಕಾಡಿ
ತುಲುವೆರೆ ಕಲ