ಕುಲಾಲ ಸಂಘ  ಬೊಳ್ಳಿ ಪರ್ಬ

ಬೆಳಗಾವಿ ಮೂಲ್ಯ ಯಾನೆ ಕುಲಾಲರ ಸಂಘಗ್ ರಜತ ಮಹೋತ್ಸವ ಸಂಭ್ರಮ

ತುಳುನಾಡುದ  ಕುಲಾಲೆರು ಅತ್ತುಂಡ  ಮೂಲ್ಯೆರು ಕರಾವಳಿ ಜಿಲ್ಲೆ ದಕ್ಷಿಣ ಕನ್ನಡ, ಉಡುಪಿ ಬೊಕ್ಕ ಕಾಸರಗೋಡು ಕಡೆಟ್ ಉಪ್ಪುನಕುಲು. 20 ನೇ ಶತಮಾನಡ್  ಆಯಿನ  ಬದಲಾವಣೆಡ್ ಬೊಕ್ಕ ಈ ಸಮಾಜದ ಜನ ಮುಂಬೈ, ಬೆಂಗಳೂರು,ಹುಬ್ಬಳ್ಳಿ-ಧಾರವಾಡ, ಬೆಳಗಾವಿ ಸೇರಿನಂಚ ಬೇತೆ ಬೇತೆ ಕಡೆಕ್  ಪೋದ್ ನೆಲೆ ಆತೆರ್.ಬಾರೀ ಕಷ್ಟ ಸಹಿಷ್ಣು ಬೊಕ್ಕ ಪ್ರಾಮಾಣಿಕ ಸಮುದಾಯದಕುಲಾಯಿನ ಮೊಕುಲು ಪರಿಶ್ರಮ ಜೀವಿಲು. ಒಲ್ಪ  ಪೋಂಡಲಾ   ಸುರುಡ್ದಿಂಚಿಲಾ  ಅನುಸರಿಸಾವೊಂದ್  ಬತ್ತಿನ ಸಂಪ್ರದಾಯ, ನಿಷ್ಠೆ ಬೊಕ್ಕ ಪ್ರಾಮಾಣಿಕತೆನ್ ಬುಡ್ದ್ ಕೊರ್ಪಿನಕುಲತ್ತ್. ಆ ರೀತಿಡ್ ಈ ಸಮಾಜ ಇನಿಕುಲಾ ತನ್ನ ಸಮಾಜದ ಶ್ರೇಷ್ಠತೆನ್  ಒರಿಪಾವೊಂದ್ ಬರೊಂದುಂಡ್.

ಅಂಚಿನ ಹಿನ್ನೆಲೆದ ಈ ಸಮಾಜ ಬಾಂಧವೆರು ಉದ್ಯೋಗ ನಿಮಿತ್ತ ಐನ್ ದಶಕದ ಪಿರಾಕುಡೇ ಬೆಳಗಾವಿಗ್ ಪೋದ್ ನೆಲೆ ಆತೆರ್. ತಮ್ಮ ಸಮಾಜದ ಜನ ಹೆಚ್ಚಿನ ಸಂಖ್ಯೆಡ್ ಉಪ್ಪುನೆಡ್ದಾವರ ತಮ್ಮದೇ ಆಯಿನ  ಮೂಲ್ಯ ಯಾನೆ ಕುಲಾಲರ ಸಂಘನ್ ಕಟ್ಟುನ ಮೂಲಕ ಪ್ರತಿ ವರ್ಷ ವಾರ್ಷಿಕೋತ್ಸವದ ಪುದರುಡ್ ಒಂಜಾವರೆಗ್ ಅಜೆಕಾರು ಮೂಲದ ಟಿ.ಕೆ.ಮೂಲ್ಯರು ದುಂಬಾತೆರ್.

ಇಡೀ ದಿನ ಅರ್ಥಪೂರ್ಣ ಕಾರ್ಯಕ್ರಮಲೆನ್ ಆಯೋಜನೆ ಮಲ್ಪುನ ಮೂಲಕ  ಕರಾವಳಿಡ್ ಅನುಸರಿಸಾವೊಂದ್ ಬತ್ತಿನ  ಮೂಲ ಆಚರಣೆನ್  ಕರಾವಳಿದಂಚಿಲಾ  ಇತ್ತುದ್ ತಮ್ಮ ಮುಂದಿನ ಪೀಳಿಗೆಗುಲಾ ಧಾರೆ ಎರೆಯೊಂದುಪ್ಪುನವ್ ಪ್ರತಿಯೊಂಜಿ ಸಮಾಜಗುಲಾ ಮಾದರಿ ಆತುಂಡ್.

ಟಿ.ಕೆ. ಮೂಲ್ಯ ಅರೆನ  ಕನಸುದ ಫಲವಾದ್ ಪುಟ್ಟಿನ ಮೂಲ್ಯ ಯಾನೆ ಕುಲಾಲರ ಸಂಘ 1999ಡ್ ಉದಯ ಆತುಂಡ್. ಈ ಸಂಘಗ್ ಇತ್ತೆ  25 ವರ್ಷದ ಸಂಭ್ರಮ. ಮೂಲ್ಯ ಯಾನೆ ಕುಲಾಲರ ಸಂಘದ 25 ನೇ ವಾರ್ಷಿಕೋತ್ಸವ ಫೆ.9  ಬೆಳಗಾವಿಡ್ ನಡಪರೆಗುಂಡ್. ಕ್ರೀಡಾಕೂಟ ಸಂದರ್ಭಡ್ ವಿಜೇತೆರಾಯಿನ ಸಾಧಕರೆಗ್ ಪ್ರಶಸ್ತಿ ಪ್ರಧಾನ ಸಮಾರಂಭನ್ ಅದ್ದೂರಿಯಾದ್ ಏರ್ಪಡಿಸಾವುಂಡ್..

ಒಟ್ಟಾರೆ ಬೆಳಗಾವಿ ಮೂಲ್ಯ ಯಾನೇ ಕುಲಾಲರ ಸಂಘಗ್ 25 ವರ್ಷ ಆತುಂಡ್. ದುಂಬುದ ದಿನೊಟ್ ಅರ್ಥಪೂರ್ಣ ಕಾರ್ಯಕ್ರಮಲೆನ್ ಮಲ್ಪುನ ಮೂಲಕ ಈ ಸಮಾಜ ಬಾಕಿದ ಸಮಾಜಗ್ಮಾದರಿಯಾಪಿನ ಯೋಜನೆ ಉಂಡು ಪಂಡುದ್ ಬೆಳಗಾವಿ ಕುಲಾಲರ ಯಾನೆ ಮೂಲ್ಯರ ಸಂಘದ ಸ್ಥಾಪಕ ಅಧ್ಯಕ್ಷ ಟಿ.ಕೆ. ಮೂಲ್ಯ ಆರು ತೆರಿಪಾದೆರ್.