ಲೇಖನಿ: ತುಳು ಬರವುದ ಆನ್ಲೈನ್ ಲೇಖನಿ..

ಲೇಖನಿ – ಉಂದು ಬರೆಪುನ ಓದುನ ನಿಕ್ಲೆನನೇ ಮಿತ್ತರ್ಮೆ
ಪುಣ್ಣಮೆ, ರಕ್ಷಾಬಂಧನದಾನಿ ಉದಿತ್ತ್ಂಡ್ ಆನ್ಲೈನ್ ಲೇಖನಿ

ತುಳು ಬರವುದ ಬಿದೆಕ್ಲೆಗ್ ಒಂಜಿ ಕೊಸಿತ್ತ ಸಂಗತಿ,

ಸಾಹಿತ್ಯ ಲೋಕೊಗೊಂಜಿ ಪೊಸ ಆನ್ಲೈನ್ ಮಿತ್ತರ್ಮೆ ತಯಾರಾದ್ ಬರವುದಕ್ಲೆನ್ ತನ್ನೊಲಯಿ ಒಯ್ತ್ ಪತ್ತುನ ಬೇಲೆಗ್ ಪಿದಡೊಂದು ಇತ್ತ್‌ದ್ ತುಳುವ ಬರವುದ ಬಿರ್ಸೆರೆ ಬರವುಲೆಗ್ ಸುರುತ ಮಿತ್ತರ್ಮೆ ಆದ್ ಬರ್ಯರೆ ಅಟ್ಟಣೆ ಮಲ್ತೊಂದಿತ್ತ್‌ದ್ ರಕ್ಷಾಬಂಧನ ಬೊಕ್ಕ ಪುಣ್ಣಮೆದ ಪೊರ್ಲ ದಿನ ನಮ್ಮ ಕೈಕ್ ತಿಕ್‌ದ್ಂಡ್. ಇತ್ತೆನೇ ಕನ್ನಡ ಬೊಕ್ಕ ಇಂಗ್ಲೀಷ್ ಬರವುದಕ್ಲೆಗ್ ಎಡ್ಡೆ ಅವ್ಕಾಸೊ ಒದಗಾದ್ ಗೆಲ್ಮೆಡ್ ದುಂಬು ಪೋವೊಂದು, ಬರವುಲೆಗ್ ಪೊಸ ದೇಕಿ ಕೊರ್‌ದ್ ಓದುನಕ್ಲೆಗ್ಲಾ ಮನಸಿರ್ಮೆನ ಮಲ್ತ್‌ನ ಲೇಖನಿ ಡಿಜಿಟಲ್ ಬರವುದ ವೇದಿಕೆಡ್ ಬರವುದ ಬಗೆಟ್ ಚರ್ಚೆ, ಬೇತೆ ಬೇತೆ ವಿಷಯದ ಬರವುದೊರುತ್ತ ಪಾತೆರಕತೆಕ್ಲಾ ಅನುವು ಮಲ್ತ್ ಕೊರ್ತೆರ್.

ಸಾಹಿತ್ಯಾತ್ಮಕ ವಿಚಾರೊಲೆನ್ ಎಚ್ಚಿನ ಜನೊಕ್ಕು ಮುಟ್ಟವುನ ‘ಲೇಖನಿ’ ಅಪ್ಲಿಕೇಶನ್‌ಡ್ ಕತೆ, ಕಬಿತೆ, ಲೇಖನ, ಕಾದಂಬರಿ ಸೇರಿನಂಚ ಒವ್ವೇ ಪ್ರಕಾರದ ಸಾಹಿತ್ಯ, ಬರವುಲೆನ್ ಬರೆಪುನ ಒಟ್ಟುಡು ಈ ಅಪ್ಲಿಕೇಶನ್ ಪ್ಲೇಸ್ಟೋರ್‌ಡ್ ಧರ್ಮಾರ್ತವಾದ್ ತಿಕುಂಡು. ಬರವುಲೆನ್ ಪ್ರಕಟ ಮಲ್ಪುನ ಒಟ್ಟುಡು ನೆಟ್ಟ್ ಓದುನ ಬೊಕ್ಕ ಓದಿ ಬರವುಲೆಗ್ ಅಭಿಪ್ರಾಯ ಪಟ್ಟೊನುನ ಬೊಕ್ಕ ಸ್ನೇಹ ಕೂಟನ್ ಎಚ್ಚವೊನುನ ಸಾಧ್ಯತೆಲಾ ಉಂಡು.

ಕಟ್ಟೆ ಪಟ್ಟಾಂಗಡ್ ದಿನೊಲಾ ಕೊರ್ಪಿ ವಿಚಾರೊದ ಬಗೆಟ್ ಚರ್ಚೆ ಮಲ್ಪೊಲಿ. ನಿಚ್ಚೊ ಪುರ್ಪೊ ಪನ್ಪಿ ಪುದರ್‌ಡ್ ಕೊರ್ಪಿ ವಿಷಯೊಡು ಕತೆ ಕಬಿತೆ ಬರೆವೊಲಿ. ಲೇಖನಿಡ್ ಮೋಕೆ, ಹಾರರ್, ಬಾಲೆ ಬರವು/ಶಿಶು ಸಾಹಿತ್ಯ, ಕುಸೆಲ್, ಅನುಭವ, ಬದ್ಕ್ ಬಲ್ಕಟ್ಟ್, ಅಟ್ಟಿಲ್ ಅರಗಣೆ, ಸಾಮಾಜಿಕ ಸೇರಿನಂಚ ಅವ್ವೇತೋ ಪಾಲ್‌ಲ್ ಮಲ್ತ್ ಬರೆಪಿ ಬರವುಲೆಗ್ ಬೊಕ್ಕ ಓದುನ ಆಸಕ್ತಿಗ್ ಅಕ್ಲಕ್ಲೆನ ಇಸ್ಟದ ಬರವು ಓದೆರೆ, ಬರೆಯೆರೆ ಪೊರ್ಲುದ ಮಿತ್ತರ್ಮೆ ಉಂಡು. ತುಳು ಕಲ್ಪಿ ಬೇತೆ ಬಾಸೆದಕ್ಲೆಗ್ ಕಲ್ಪವುನ ಮನಸ್ ಇತ್ತಿನಕ್ಲೆಗ್ ಕಲ್ಪವುನ, ಬೊಕ್ಕ ಕಲ್ಪುನ ಅವಕಾಶ ಉಂಡು. ಕನ್ನಡ, ಇಂಗ್ಲೀಷ್‌ಡ್ 5000ಡ್ದ್ ಎಚ್ಚ ಸಾಹಿತ್ಯಾಸಕ್ತೆರ್ ಇತ್ತ್‌ದ್ ಪ್ರತಿ ದಿನ ನೂದೆಡ್ದ್ ಎಚ್ಚ ಬರವುಲು ಅಚ್ಚಿ ಆವೊಂದುಂಡು. ಲೇಖನಿ ತುಳುತ್ತ ಸಂಪಾದಕೀಯ ವಲಯಡ್ ಜೋಡಿ ತುಳು ಲಿಪಿ ಕಲ್ಪಾದಿಲ್ ಬೊಕ್ಕ ಸಾಹಿತಿಲ್ ಆದುಪ್ಪುನ ಶ್ರೀಶಾವಾಸವಿ ತುಳುನಾಡ್ ಬೊಕ್ಕ ಗೀತಾ ಲಕ್ಷ್ಮೀಶ್ ಇನೆಯಾದ್ ಇತ್ತ್‌ದ್, ಚೆನ್ನೈಡ್ ಇಪ್ಪುನ ತುಳುವೆದಿ ಅಪರ್ಣಾ ಹರೀಶ್ ಬೊಕ್ಕ ಬೆಂಗಳೂರುದ ರೂಪಾ ನಾಗರಾಜ್ ಲೇಖನಿ ಡಿಜಿಟಲ್ ಮಿತ್ತರ್ಮೆದ ಉದಿಪುದ ಪಿರವುದ ಕರ್ತುಲು.

ತುಳುತ್ತ ಬೆರಿಕ್ಕ್ ಲೇಖನಿಡ್ ತಮಿಳ್, ತೆಲುಗು, ಮಲಯಾಳಂ, ಹಿಂದಿ ಸೇರಿನಂಚ ಭಾರತಡ್ ಸಾಂವಿಧಾನಿಕ ಅಂಗೀಕಾರ ಪಡೆತಿ ಮಾತ ಬಾಸೆಲೆಡ್ ಬರ್ಪುನ ಅಂದಾಜಿ ಮಲ್ತೊಂದು ಉಂಡು. ಈ ನಿಲೆಟ್ ಪ್ರತ್ಯೇಕ ಕೂಟೊಲೆನ್ ಕಟ್ಟೊಂದು ದುಂಬು ಪೋವೊಂದು ಉಲ್ಲೆರ್ ಲೇಖನಿ ಕೂಟೊದಕ್ಲ್.

ಪ್ರಸ್ತುತ ಸಾಹಿತ್ಯ ವಿಮರ್ಶೆಲೆಗ್ ಮಿತ್ತರ್ಮೆ ಆದಿಪ್ಪುನ ಲೇಖನಿಡ್ ಓದುನಕ್ಲ್, ಬರೆಪುನಕ್ಲ್ ಆಸಕ್ತಿ ತೋಜಂಡ ಇ-ಪುಸ್ತಕ, ಯೂಟ್ಯೂಬ್, ತುಳು ಲಿಪಿ ಕಜ್ಜಕೊಟ್ಯಲೆನ್ ಮಲ್ಪುನ ಆಲೋಚನೆಡ್ ಉಲ್ಲ ಪನ್ಪೆರ್ ಲೇಖಕಿ ಬೊಕ್ಕ ಅಪ್ಲಿಕೇಶನ್ ಉದಿಪುದಾರ್ ಆಯಿನ ಅಪರ್ಣಾ ಹರೀಶ್.

• ಶ್ರೀಶಾವಾಸವಿ ತುಳುನಾಡ್