ಮಾನಿನಿ ಪಾತೆರೊಗು ಬೆಲೆ ಕೊರಂದಿನಾಯೇ,ಮಾಯದ ಕಾರ್ಣಿಕ ತೆರಿನ ಕಥೆ.

ಬರವು : ನೀತು ಬೆದ್ರ.

ನೀತಿದ ಪಾತೆರಗ್ ನ್ಯಾಯದ ಉತ್ತರ, ಎಡ್ಡೆಪುದ ಸಾದಿಗ್ ಧರ್ಮದ ಪಾತೆರ. ಒಂಜಿ ತೆರಿಂಡ ನೂದ್ ತೆರಿಯಂದಿನ ನರಮಾನಿನ ಪಾರ್ತೆದ ಪಾತೆರಗ್, ಕಡೆ ಕೊಡಿ ತತ್ತಿನ ಇಚಾರಲಾ ನಿಜವಾಯಿನ. ಧರ್ಮ ತಪ್ಪಂದೆ ,ಅದರ್ಮದ ತಾದಿ ದೊಂಕಂದೆ ಬುಲೆಯಿನ ನರಮಾನಿನ ಪಾತೆರ ಮಾಯದ ಪಾತೆರವಾದ್ ತೊಜಿದಿನಲಾ ಉಂಡುಂಗೆ. ಪಾತೆರದ ಬರಸುಡು ನಿನನ್ ಆಯೆ ತೂಯೆಡ ಯಾವು ಪನ್ಪಿ ಪಾತೆರಲಾ ಪಲಿತುದುಂಡು.

ಸುಮಾರು ವರ್ಷದ ಪಿರಾವು. ದಿಂಜಿ ಕುಟುಂಬದ ಇಲ್ಲಡೊರಿ, ಏಪಲಾ ತನ್ನನೇ ಸರಿ ಪನ್ಪಿ ವಾದ ಮಲ್ತೊಂದು,ಕೆಲವೊಂಜಿ ತಪ್ಪು ಮಲ್ತೊಂದಿತ್ತಿನಾಯೇ. ವಾ ಪೆರಿಯಾಯನ ಬುದ್ದಿದ ಪಾತೆರಗ್ ಮಂಡೆ ಕೊನವುನ ತೋಜೊಂದಿಜ್ಜಿ. ಆನಿ ಇಲ್ಲದ ಮಹಾಮಲ್ಲ ಸತ್ಯಗ್ ಸೋಣ ಸಂಕ್ರಾತಿ ದಿನಮಾನೊಡ್ ಮಾನೆಚ್ಚಿಲ್ ದ ಕಜ್ಜ. ದೈವದ ಮಾನಿ ಪಿದಾಯಿದಾರ್ ಅತ್ತ್ ಆ ಇಲ್ಲದ ಒಂಜಿ ಪೆರಿಯಾ ಅಜ್ಜೆರ್. ಗುತ್ತುದ ಇಲ್ಲದಕುಲು ಬತ್ತೆರ್. ಬಲಿಮೆದ ಬಲ್ಯಾಯೆ ಬತ್ತ್ ಸೇರಿಯೇರ್. ಕೈಟ್ ಕರ್ಸಲೆ ,ಕೆಕಿಲ್ಡ್ ಪೂ ಮಾಲೆ ಪಾರ್ದಿನ ಆನಿದ ಮಾನಿನ ಎದುರು.ಗುತ್ತುದಿಲ್ಲದಾರ್ ಮದಿಪರೆ ಸುರು ಮಲ್ತೆರ್. ಆಕಾಸ ಬುಡ್ಲಾ ಬೂಮಿಡಾವೊನ್ಲಾ .ಭೂಮಿ ಬುರ್ದ್ ಮನೆಮಂಚಾವು ಆವೊಂದು,ಮನೆಮಂಚಾವು ಬುರ್ದ್ ಮಾನಿಡಾವೊನ್ಲಾ ಪಂಡೆರ್. ಮಾನೆಚ್ಚಿಲು ಸುರು ಆಂಡ್.
ದೈವ ಮದಿಪರೆ ಸುರು ಮಲ್ತುಂಡು. ” ಕಾರ್ಗ್ ಎಕ್ಕುಂಡ ತರೆಕ್ ಎಕ್ಕುಜಿ.ತರೆಕ್ ಎಕ್ಕುಂಡ ಕಾರುಗ್ ಎಕ್ಕುಜಿ. ಸಂಸಾರ ನಿಕುಲೆನ. ಆನಿ ನಿಕುಲೆನ ಪೆರಿಯಾಕುಲೆನ ಭಕ್ತಿದ ಮದಿಪುಗ್ ಓ ಕೊರ್ದ್ ಕಾಟು ಕಲ್ಲುಡು ,ಮರತ ಅಡಿನೆರೆಲುಡ್ ನೆಲೆಯೂರಿಯೆ. ಎಂಕ್ ಬೋಡಾಪುನ ಮಲ್ಪಾವೊಂದು ಬತ್ತೆ,ನಿಕುಲೆಗ್ ಕೊರ್ಪುನ ಕೊರೊಂದು ಬತ್ತೆ. ಎನನ್ ಉಂಡು ಮಲ್ತಿನ ಕಾರಣ ದಾದ”. ಪಂದು ಕೇನ್ನಗ ಬೊಕ್ಕೊಂಜಿ ಪೆರಿಯ ಜೀವ ಪಂಡರುಗೇ. “ಪೊಯ್ಯೆದ ಪುದೆನ್ ಪೂ ತ ಪುದೆಯಾದ್ ತುಂಬಾಯ .ಮಾಯಡ್ ಕಾರ್ನಿಕ ಮೆರೆಯಾ. ಒಂಜಿ ಲೆಪ್ಪುನಗ ಒರುಂಬ ಓ ಕೊರೊಂದು ಬತ್ತ. ಇನಿತ ದಿನಮಾನಗ ನಿನ್ನ ಇಲ್ಲದ ಈ ಬಾಲೆ ಪಂಡಿನ ಕೇನುಜೆ‌ .ಅಜೆ ತತ್ತುದ್ ಪಾತೆರಿಯರೆ ಕಲ್ತುದೆ. ನಿನ್ನ ಮನೆ ಮಂಚಾವುನ್ ಪಿದಾಯಿ ದಕ್ಕುವೆ ಪನ್ಪಿ ಪಿರ ಜವಾಬು ಕೊರ್ಪೆ. ಪನ್ಪೆರುಗೆ. ಬರಿಟಿತ್ತಿನ ಗುತ್ತುದಾರ್. ಸಂಸಾರ ನಿನ್ನನೇ ತಪ್ಪು ಪನ್ನಗ ಮೊನೆ ಪರಂಕದೆ , ಬುದ್ದಿ ಕೊರ್ದ್ ಬೆರಿ ಪೂಜುನ ಸತ್ಯ ಈ. ಸಂಸಾರದ ಅಭಯದ ಅರಿಕೆಗ್ .ನ್ಯಾಯದ ಪಾತೆರ ಕೊರೊಡು ಪನ್ಪೆರುಗೆ. ಅಪಗ ದೈವ, ಮಾಯೆ ಪರತ್ತಾದಿಪ್ಪು.ಕಾರ್ಣಿಕ ಪೊಟ್ಟಾತಿಜಿ. ಪೆಟ್ಟು ಒಂಜಿ ರಡ್ಡ್ ತುಂಡು ಮಲ್ಪರೆ ಇಪ್ಪುನ ಸತ್ಯ ಯಾನತ್ತ್. ಅಭಯದ ಗಂಧ ಕೊರ್ಪೆ ,ಮಂಡಗು ಪಾಡ್ಪಾಲೆ. ಪೆತ್ತದ ಪಿರಾವು ಕಂಜಿದಲೆಕ ಮಾಯದ ಒರುಟು ಬೆರಿತಾಂಗ್ ಆದ್ ಯಾನಿಪ್ಪುವೆ ಪನ್ಪುಡುಗೆ. ದೆತ್ತ್ ಬಾಯಿಗ್ ಆ ಜವನೆ. ದೈವ ಭೂತ ಗೆ. ಅಭಯದ ಪಾತೆರಗೆ . ನಿಕುಲೆನ ಮರ್ಲ್ ಮರ್ಕೊಲಿಗ್ ಎನನ್ ಲೈದರತೆ. ವಾ ಭೂತ ಬರ್ಪುಂಡು ತೂಪೆ.ಗಂಧ ಪಾಡಯೇ .ವಾರ ಕರಿಯೊಡ ದುಂಬು ಮನೆಮಂಚಾವುನ್ ಬೊಲ್ಲಡ್ ಬುಡ್ಪೆ. ಅಜ್ಜೆರೆಗ್ ಬೇತೆ ಉಪಾಯ ಇಜ್ಜಿಂದ್ ,ಕುಂಬರಿಯರೆ ಉಂತುದೆರ್ ಪಂದ್ ಎಂಕು ಗೊತ್ತಿಜಂದ್ ಪನ್ಪೆ. ಅಪಗ ದೈವ ಪನ್ಪುಡುಗೆ . ವಾರ ಬೊರ್ಚಿ ರಡ್ಡ್ ದಿನತುಲಾಯಿ ಎನ್ನ ನಾಲಾಯಿಡ್ ಬತ್ತಿನ ಮಾನಿನ ಪಾತೆರನ ಮಾಯದ ಪಾತೆರನ ಪಂದು ತೋಜಾವೆ ಪಂಡುದು ಮಾನೆಚ್ಚಿಲು ಮುಗಿಯುಂಡು..
ಮೊನದಾನಿ ಕಾಂಡೆ ಆ ಜವನೆ ಜಾಲ್ ಇಡಿಕ ಪೆರೆಡೊಂದುಲ್ಲೆ . ಬಂಜಿ ಬೇನೆಂದ್. ಏರ್ ಮರ್ದ್ ಕೊರ್ಪುನಕುಲು ತೂಂಡಲ ಸೀಕ್ ಗೋತ್ತಾಪುಜಿ. ಪ್ರಾಯದ ಅಜ್ಜೆರ್ ಬತ್ತೆರ್. ಕೊಡೆದ ದಿನಮಾನಡ್ ದಾದ ಪಾತೆರ್ದ ದೈವದ ನುಡಿ ದಾದ ಪನ್ಪಿನ ನಿನ್ನ ಗೆನಡುಂಡ ಕೇಂಡೆರ್. ಪೋ ಪೊರೆಲೊಂದು ವಾ ಮಂಚಾವುನ್ ದಕ್ಕುವೆ ಪಂತನ ಆ ಮಂಚಾವುದ ತಿರ್ತ್ ಅಡ್ಡ ಬೂರುಲಾ ಪಂದು ಪನ್ಪೆರುಗೆ. ಪೊರೆಲೊಂದು ಪೋಯಿನ ಜವನೆ ಮಂಚವುದ ಕೈತಲ್ ಬತ್ದ್ ಕಡೆ ಕಣ್ಣುಡ್ ಕೊಡಿ ಉಚಿತ ಗೆತ್ತೊಂದು ಪನ್ಪೆ. ಸ್ವಾಮಿ ದೈವ ನಿನ್ನ ಕಾರ್ಣಿಕ ತೆರಿಯಂದೆ ಯಾನ್ ಯಾನ್ ಪಂಡಿನ ಮಂಡೆಗ್ ಅಡರ್ದ್ ಇಜ್ಜಂದಿನ ಪಾತೆರಿಯೇ ಎನ್ನ ತಪ್ಪುನು ಮಾಪಿತೊನ್ಲಾ. ನನ ಪೆರಿಯಕುಲು ಪಂಡಿನ ಕೇನುವೆ ನಟ್ಟೊನುವೆ. ದೆತ್ತಿ ಕನನೀರ್ ಭೂಮಿಗ್ ಬೂರೊಡಾಂಡ. ಪಂಡಿ ನಾಲಾಯಿ ದೊಂಡೆಡಾವೊಡಾಂಡ, ಬಂಜಿ ಬೇನೆ ಮಾಜಾಡುಗೆ. ಉಂದು ಮಾನಿನ ಪಾತೆರಗ್ ಬೆಲೆ ಕೊರದಿನಾಯೆ ಮಾಯದ ಕಾರ್ಣಿಕ ತೆರಿನ ಕಥೆ.

ನಮ್ಮ ನಾಡುದ ಸತ್ಯೊಲೆನ ಕಾರ್ಣಿಕ ದಾದ ಪಂದ್ ಗೊತ್ತಿಜಂದೆ ಪಾತೆರುಂಡ ಆ ಸತ್ಯ ಮಾಯದ ಕಾರ್ಣಿಕನು ತೂವೊಡಾವ್. ಇಂದು ಇನಿತ ದಿನಮಾನೊಡ್ ಮಾತೆರ್ಲಾ ಅರ್ಥ ಮಲ್ತೊನೊಡಾಯಿನ ಇಸಯ. ನಂಬುನಾಯನ ಭಕ್ತಿಗ್ ಕಾಲಗಾನಗ ಇಂಬು ಕೊರೊಂದು ಬೈದ ತುಳುನಾಡ ಸತ್ಯೊಲು.
ಮುಂಡ ಒರಿತುದ್ ಗಂಧ ಪಾಡದ್.ಭೂಮಿಗ್ ದಾನ ಬಾನಗ್ ಪುಗೆ ಆದ್ ಪೋಂಡಲಾ ತಪ್ಪು ಮಲ್ತಿನಾಯನ್ ನಾಡುದು ಕನ್ಪುನ ಸತ್ಯೊಲು ನಮ್ಮ. ಅವುಸೊಗ್ ಪಟ್ಟ ,ಜೀವಗ್ ರೆಂಕೆ ಕೊರ್ದ್ ಯಮನ ಪೂತ ಮಾಲೆನ್ ತುಂಡು ಮಲ್ತು ಕಾಪುವೆ ಪನ್ಪಿ ದೈರ್ಯದ ನುಡಿ ಕೊರ್ದು. ಸೂರ್ಯ ಚಂದ್ರೆ ಕಾಲ ಮುಟ್ಟ ನಂಬಿ ಸಂಸಾರದ ಕೀರ್ತಿ ಬೆಳಗುನ ತುಳುನಾಡ ದೈವೊಲೆನ ಕಾರ್ಣಿಕ ಮಾಯದ ಗಾಳಿ ಆದ್ ಬೀಜೊಂದುಂಡು..