ಉಡುಪಿ ಪತ್ರಕರ್ತೆರೆನ ವಾಹನೊಲೆಗ್ “ಮೀಡಿಯಾ ಸ್ಟಿಕ್ಕರ್”

ನ.23: ಉಡುಪಿ ಜಿಲ್ಲಾ ಕಾರ್ಯನಿರತ ಪತ್ರಕರ್ತರೆನ ಸಂಘದ ವತಿಡ್ದ್ ಸಂಘದ ಸದಸ್ಯರೆನ ವಾಹನೊಲೆಗ್ ಮಿಡಿಯಾ ಸ್ಟಿಕ್ಕರ್ ವಿತರಣಾ ಕಾರ್ಯಕ್ರಮ ಮಂಗಳವಾರ ಉಡುಪಿದ ಪತ್ರಿಕಾ ಭವನಡ್ ನಡತುಂಡ್.

ಸ್ಟಿಕ್ಕರ್ ಬುಡುಗಡೆ ಮಲ್ತಿನ ಜಿಲ್ಲಾ ಪೊಲೀಸ್ ಅಧೀಕ್ಷಕೆರಾಯಿನ ಎನ್.ವಿಷ್ಣುವರ್ಧನ್ ಪಾತೆರ್ದ್ ಜಿಲ್ಲೆಡ್ ನಡಪುನ ಮಸ್ತ್ ಪ್ರಕರಣೊಲೆನ್ ಸರಿ ಮಲ್ಪುನ ದಿಟ್ಟಿಡ್ ಪತ್ರಕರ್ತೆರು ಕೊರಿನ ಮಾಹಿತಿಲು ಪೊಲೀಸ್ ಇಲಾಖೆಗ್ ಮಸ್ತ್ ಸಹಕಾರಿ ಆತುಂಡ್.ಇಂಚೆನೇ ಪೊಲೀಸರೆಗ್ ಸಹಕಾರ ಕೊರ್ಪಿನ ಕಾರ್ಯ ದುಂಬರಿಯೊಡ್ . ಪೊಲೀಸೆರು ಬೊಕ್ಕ ಪತ್ರಕರ್ತೆರು ಒಟ್ಟುಗ್ ಕೆಲಸ ಮಲ್ಪುನ ಮುಖೇನ ಜಿಲ್ಲೆಗ್ ಎಡ್ಡೆ ಪುದರ್ ಕನವೊಡು ಪಂಡೆರ್.

ಮುಖ್ಯ ಅತಿಥಿಯಾದ್ ಜಿಲ್ಲಾ ಹೆಚ್ಚುವರಿ ಪೊಲೀಸ್ ಅಧೀಕ್ಷಕ ಕುಮಾರ ಚಂದ್ರ ಪಾತೆರ್ದ್ ಸಮಾಜದ ಸ್ವಾಸ್ಥ ಕಾಪುನ ವಿಚಾರೊಡ್ ಪೊಲೀಸೆರು ಬೊಕ್ಕ ಪತ್ರಕರ್ತೆರೆನ ಪಾತ್ರ ಪ್ರಮುಖವಾದುಂಡ್. ಈ ಮುಖೇನ ಅಪರಾಧ ಮುಕ್ತ ಸಮಾಜ ನಿರ್ಮಾಣ ಸಾಧ್ಯ ಪಂಡುದ್ ತೆರಿಪಾಯೆರ್.

ಅಧ್ಯಕ್ಷತೆನ್ ಸಂಘದ ಅಧ್ಯಕ್ಷೆರಾಯಿನ ರಾಜೇಶ್ ಶೆಟ್ಟಿ ಅಲೆವೂರು ವಹಿಸಾದಿತ್ತೆರ್. ವಾರ್ತಾಧಿಕಾರಿ ಮಂಜುನಾಥ್ ಉಪಸ್ಥಿತರಿತ್ತೆರ್. ಈ ಸಂದರ್ಭೊಡ್ ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ ಪುರಸ್ಕೃತ ಪತ್ರಕರ್ತೆರಾಯಿನ ಸುಭಾಷ್ಚಂದ್ರ ವಾಗ್ಳೆ ಬೊಕ್ಕ ಹರಿಪ್ರಸಾದ್ ನಂದಳಿಕೆ ಬೊಕ್ಕ ಪಿ.ಆರ್.ರಾಮಯ್ಯ ಪ್ರಶಸ್ತಿ ಪುರಸ್ಕೃತ ಯು.ಎಸ್.ಶೆಣೈ ಮೊಕ್ಲೆನ್ ಮಾನಾದಿಗೆ ಮಲ್ತೆರ್.

ಸಂಘದ ಪ್ರಧಾನ ಕಾರ್ಯದರ್ಶಿ ನಝೀರ್ ಪೊಲ್ಯ ಸ್ವಾಗತ ಮಲ್ತುದ್ ಕೋಶಾಧಿಕಾರಿ ಉಮೇಶ್ ಮಾರ್ಪಳ್ಳಿ ಧನ್ಯವಾದ ಮಲ್ತೆರ್. ಅಂಕಿತ್ ಶೆಟ್ಟಿ ಬೊಕ್ಕ ಚೇತನ್ ಮಟಪಾಡಿ ಸಹಕಾರ ಮಲ್ತೆರ್. ಪತ್ರಕರ್ತೆ ರಾಕೇಶ್ ಕುಂಜೂರು ಕಾರ್ಯಕ್ರಮ ನಿರೂಪಣೆ ಮಲ್ತೆರ್.