“ಯತ್ರ ನಾರ್ಯಸ್ತು ಪೂಜ್ಯಂತೆ ರಮಂತೆ ತತ್ರ ದೇವತಾಃ” ಪಂಡಾ ಓಲು ಪೊನ್ನನ್ ಪೂಜ್ಯ ಬಾಮೊಡು ತೂಪೆರಾ ಅವ್ಲು ದೇವತೆನಕುಲು ನೆಲೆಯಾದುಪ್ಪುವೆರ್ ಪಂದ್ ಆದುಂಡು. ಪ್ರತಿ ಸನಾತನಿ ಏನಿ ಕಾಲೊಡ್ದು ಪನ್ನೊಂದು, ಕೇನೊಂದು, ತೂವೊಂದು ಬೈದಿನ ಸತ್ಯ . ತೂವರೆ ಉಂದು ಒಂಜಿ ಮಂತ್ರ ಆಂಡ ನಮ್ಮ ಹಿಂದೂ ಸಂಸ್ಕೃತಿಡ್ ಒಂಜಿ ಪೊನ್ನನ್ ಯೇತ್ ಎತ್ತರದ ಸ್ತಾನಡ್ ದೀತೆರ್ ಪಂದ್ ಉಂದೆಟ್ ತೆರಿಯುಂಡು. ಸನಾತನ ದರ್ಮೊದ ಪ್ರಕಾರ ಬ್ರಹ್ಮಾಂಡದ ಮೂಲನೇ ಸ್ತ್ರೀ ಆಲ್ ಆದಿಮಾಯೆ. ಸೃಷ್ಟಿ, ಸ್ಥಿತಿ, ಲಯಕ್ಕ್ ಬ್ರಹ್ಮ , ವಿಷ್ಣು, ಈಶ್ವರನ್ ಉಂಡು ಮಲ್ತಿನಾಲ್ . ಲೋಕದ ಮಲ್ಲ ಜಬದಾರಿ ಮೊಕಲ್ನ ಮಿತ್ತ್ ಇತ್ತ್ಂಡಲಾ ಒರಿ ಪುಟುದು ಸೈಪಿನ ಮುಟ್ಟ ಆಯನ್ ಎಡ್ಡೆ ರೀತಿಡ್ ತಾಂಗೊಂದು ಪೋಪಿನಕುಲು ಮೂಜಿ ಮಾತೃ ಸಕ್ತಿಲು ಗೇನದಪ್ಪೆ ಸರಸತಿ, ಐಸಿರೊದಪ್ಪೆ ಲಕ್ಷ್ಮಿ, ತಂಕ ದರ್ಪುಗು ಅಪ್ಪೆ ಉಳ್ಳಾಲ್ತಿ ದುರ್ಗೆ. ಮೊಕಲ್ನ ಆಶೀರ್ವಾದೊಡು ನರಮಾನಿ ಬದ್ಕ್ ಎಡ್ಡೆಡ್ ಕೋಡಿ ಎತ್ತುಂಡು. ಅಂಚೆನೇ ಗಂಗಾ, ಸರಸ್ವತಿ, ಸಿಂಧು, ಗಂದಕೀ, ಕಾವೇರಿ, ರೇವಾ, ನೇತ್ರಾವತಿ, ನರ್ಮದಾ, ಪಾಲ್ಗುಣಿ, ಶಾಂಭವಿ ಇಂಚ ಕೆಲವೊಂಜಾತ್ ಪುಗಾರ್ತೆದ ತುದೆಕುಲು ಭರತ ಬೂಮಿಡ್ ಪೊನ್ನು ಯೇತ್ ಶ್ರೇಷ್ಠ ಸ್ತಾನೊನು ಪಡೆತಲ್ ಪಂದ್ ತೊಜಪಾವುಂಡು. ಅರುಂಧತಿ, ಅನಸೂಯ, ಸಾವಿತ್ರಿ, ಜಾನಕೀ, ದ್ರೌಪದಿ , ಕನ್ನಿಕೆ, ಗಾರ್ಗಿ, ಮೀರಾ, ದುರ್ಗಾವತಿ, ಅಹಲ್ಯಾ ಇಂಚ ನನಲಾತ್ ಪುದರ್ ಪುರಾಣಡ್ ಮೆನ್ಕ್ಂಡ , ರಾಣಿ ಲಕ್ಷ್ಮೀ ಬಾಯಿ, ರಾಣಿ ಚೆನ್ನಮ್ಮ, ರಾಣಿ ಅಬ್ಬಕ್ಕ, ಬೆಳವಡಿ ಮಲ್ಲಮ್ಮ, ರಾಣಿ ಪದ್ಮಿನಿ, ರುದ್ರಮಾಂಬ, ನಿವೇದಿತಾ, ಸಾರದ, ಅಕ್ಕಾ ಮಹಾದೇವಿ, ಸರೋಜಿನಿ ನಾಯ್ಡು, ಗಂಗೂ ಬಾಯಿ ಹಾನಗಲ್ಲ್, ಸಾವಿತ್ರಿಬಾಯಿ ಪುಲೆ , ಉಮಾ ಬಾಯಿ, ಸಾಲ್ ಮರತ ತಿಮ್ಮಕ್ಕ, ಕಲ್ಪನಾ ಚಾವ್ಲಾ ಇಂಚ ಕೆಲವಾತ್ ಪೊಂಜೊವ್ಲು ಇತಿಯಾಸದ ಪನ್ನೆಡ್ ಬೊಲ್ಲಿದಾರಗೆಯಾತೆರ್.
ಗದ್ದುಗೆದ ಸ್ತಾನೊಡು ಇತ್ತ್‌ದ್ಲಾ ಸತಿ ಸಹಗಮನ, ಕೇಶ ಮುಂಡನ, ಬಾಲ್ಯ ವಿವಾಹ, ಪೊನ್ನು ಬ್ರೂನ ಅತ್ಯೆ ಇಂಚಿತ್ತಿನ ಪದ್ದತಿಲು ಪೊಣ್ಣು ಪೊಂಜೊವ್ಲೆನ ಬದ್ಕ್‌ನ್ ನರಕ ಮಲ್ತ್‌ದ್ಂಡ್ ಪನ್ಪಿನಲ ಆತೆ ಸತ್ಯ. ಆಂಡ ಸನಾತನ ದರ್ಮೊದ ಮೂಲ ತತ್ವೊನು ದೆರ್ತ್‌ದ್ ಪತ್‌ದ್ ಅಯ್ಕ್ ಒವ್ವೆ ರೀತಿಡ್ ಕುಂದೆಲ್ ಬರಂದಿಲೆಕ ಒರಿತೊಂದು ಪೋಯಿನ ಒಂಜಿ ಸಂಸ್ಕೃತಿ ಪಂಡ ಅವ್ ನಮ್ಮ ತುಲುವ ಸಂಸ್ಕೃತಿ. ತುಲುನಾಡ್ಡ್ ಪೊನ್ನು ಏಪಲ ಪುದೆ ಅತ್ತ್ ಆಲ್ ಕುಟುಮಗ್ ತುಡರ್. ಏನಿ ಕಾಲೊಡೆ ನಮ್ಮ ಹಿರಿಯೆರ್ ಪೊನ್ನಗ್ ಸಾಮಾಜಿಕ ನ್ಯಾಯ ಬೊಕ್ಕ ಸ್ವತಂತ್ರ ಕೊರ್ದಿತ್ತೆರ್ ಪನ್ಪಿನ ಸಿರಿನ ಚರಿತೆಡ್ ನೆಗತ್ತ್ ತೋಜುಂಡು ತನಕ್ ದಗೆ ಮಲ್ತಿನ ಕಂಡನನ್ ಬುಡ್ದು ರಡ್ಡನೇ ಮದಿಮೆ ಆಪಲ್ ಸಿರಿ, ಅನ್ಯಾಯೊನು ಸಹಿಸೊಂದು ಬದುಕುನ ಅನಿವಾರ್ಯತೆ ಪೊನ್ನಗಿಜ್ಜಿ ಪಂದ್ ಸಮಾಜಗ್ ತೊಜಪಾಯೊಲು, ಆಯ್‌ಡ್ದ್ ದುಂಬು ಬನ್ನಗ ತಿಕ್ಕುನ ಪುದರ್ ರಾಣಿ ಅಬ್ಬಕ್ಕ , ಬರತ ಬೂಮಿಡ್ ತನ್ನಾಲ್ಮೆಗಾದ್ ಸುರು ಪೊರ್ಂಬಾಟ ಮಲ್ದಿನ ಪೊನ್ನು ಮಗಲ್. ಪೋರ್ಚುಗೀಸೆರೆನ ಎದುರು ತಂಕೊಡು ಕಾದ್‌ದಿನ ಬಿರ್ಸೆದಿ ಆಲ್. ತನ್ನ ತಂಕ ದರ್ಪುಡು ಅಕಲ್ನ ತಿಗಲೆದ ಪಸೆ ಆಜಾದಿನಾಲ್. ಇಂಚ ಆನಿಡ್ದ್ ಇನಿ ಮುಟ್ಟಲ ಅವ್ವೆತೋ ಪೊನ್ನು ಪೊಂಜೊವ್ಲು ಸಮಾಜದ ಬೇತೆ ಬೇತೆ ಕಡೆಟ್ ಮಲ್ಲ ಮಲ್ಲ ಸಾಧನೆ ಮಲ್ತೊಂದೇ ಉಲ್ಲೆರ್. ತುಲುನಾಡ್ದ ಮೂಲ ಕಟ್ಟ್ ಅಳಿಯಕಟ್ಟ್ ಅತ್ತ್ಂಡ ಅಪ್ಪೆ ಕಟ್ಟ್. ಕುಟುಮದ ದೈವೊ, ಸತ್ಯೊಲು ಸುರುಕಾದ್ ಲೆತ್ತ್ ಕೊಂಡಾಡುನು ತನ್ನ ಪೊನ್ನ ಸಂಸಾರನ್ . ತುಲುವೆದಿ ಮದಿಮೆ ಆಯಲ್ಡಲಾ ಅಲೆಗ್ ಕಂಡನ ಇಲ್ಲಡ್ದು ಅಪ್ಪೆ ಇಲ್ಲಡೇ ಹಕ್ಕ್ ಮರ್ಯಾದಿ ಜಾಸ್ತಿ. ಬಾಕಿ ಕಡೆಟ್ ಪೊನ್ನು ಪನ್ಪಿನ ಕಾರನಗ್ ಬಾಲೆನ್ ಗರ್ಬೊಡೇ ಕೆರ್ಪಿನ ಅನಾಚಾರ ಅವೊಂದುಪ್ಪುನಗ ತುಲುನಾಡ್ಡ್ ಎಂಕ್ಲೆಗ್ ಪೊನ್ನು ಸಂತಾನ ಕೊರ್ಲೆ ಪಂದ್ ಸಂಸಾರಿಲು ದೈವ ದೇವೆರೆಡ ಪರಕೆ ದೀಪೆರ್. ಮುಲ್ಪದ ಆರಾಧನೆಡ್ಲಾ ಪ್ರಧಾನವಾದ್ ಸ್ತ್ರೀ ಸಕ್ತಿಲೇ ನೆಗತ್ತ್ ತೋಜುವೆರ್. ಕುಡ್ಲದ ಮಂಗಳಾದೇವಿ, ಪುರಲ್ದ ರಾಜರಾಜೇಶ್ವರಿ, ಕಟೀಲ್ ಬೊಕ್ಕ ಬಪ್ಪನಾಡ್ ಕ್ಷೇತ್ರದ ದುರ್ಗಾ ಪರಮೇಶ್ವರಿ, ಸಸಿಬಿತ್ಲ್‌ದ ಭಗವತಿ, ಅತ್ತಂದೇ ಸುಮಾರ್ ಕ್ಷೇತ್ರಡ್ ಸ್ತ್ರೀ ಸಕ್ತಿಯೇ ಪ್ರಧಾನ ಆರಾಧ್ಯ ದೇವೆತೆ ಆದುಲ್ಲೆರ್. ದೈವದ ಕೊಡಿಯಡಿಟ್ ತೂಂಡ ಕಲ್ಲುರ್ಟಿ, ವರ್ತೆ , ತೂಕತ್ತಿರಿ, ಲೆಕ್ಕೆಸಿರಿ, ಮಂತ್ರ ದೇವತೆ, ಪೊಸಪ್ಪೆ, ಚಾಮುಂಡಿ ಇಂಚ ನನಲಾತ್ ಕಾರ್ಣಿಕದ ಪೊನ್ನು ದೈವೊಲು ತುಲುವೆರೆ ಬದ್ಕ್‌ಗ್ ನಂದಲ ಆತೆರ್.
ನಮ್ಮ ಮಾತೃ ಪ್ರಧಾನ ಸಮಾಜ ಆಯಿನೆಡ್ದಾವರ ಮುಲ್ತ ಪೊನ್ನು ಪೊಂಜೊವ್ಲು ಶಿಕ್ಶಣ, ಸಾಮಾಜಿಕ, ಧಾರ್ಮಿಕ ಕ್ಷೇತ್ರಡ್ ಮಲ್ಲ ಮಲ್ಲ ಸಾಧನೆ ಮಲ್ತೊಂದುಲ್ಲೆರ್, ಮೆಡಿಕಲ್, ಇಂಜಿನಿಯರಿಂಗ್, ಬ್ಯಾಂಕಿಂಗ್, ಐಟಿ ಕ್ಷೇತ್ರ, ಕ್ರೀಡೆ, ಆರ್ಮಿ, ಪೊಲೀಸ್, ಅಂಚೆ ಇಲಾಖೆ, ಮನೋರಂಜನೆ ಇಂಚ ಪ್ರತಿ ಕ್ಷೇತ್ರಡ್ ಪೊನ್ನು ಗಟ್ಟಿ ಪಜ್ಜೆ ಊರ್ದಲ್. ಸ್ವಾವಲಂಬಿ ಬದ್ಕ್ ಅಕಲೆಗ್ ಸಾಮಾಜಿಕ ಅಂಚೆನೇ ಆರ್ಥಿಕ ಭದ್ರತೆನ್ ಕೊರ್ತುಂಡು. ಪೊನ್ನಾಲ್ ಸಮಾಜದ ಕಣ್ಣಾದ್ ತನ್ನ ಜಬದಾರಿನ್ ಎಡ್ಡೆಡ್ ನಿಬಾಯಿದೊಂದುಲ್ಲಲ್ ಪನ್ಪಿನವೇ ಪೆರ್ಮೆ. ಆಂಡ ಪೂರ ಎಡ್ಡೆನೇ ಪಂಡ ತಪ್ಪಾವು ಸತ್ಯನ್ ಮದೆ ಮಲ್ತಿಲೆಕ ಆವು. ಪನ್ಪೆರತೆ ಅತಿಯಾಂಡ ಅಮೃತಲಾ ಇಸ ಆಪುಂಡು ಪಂದ್ ಇತ್ತೆ ಮುಲ್ಪದ ಅವಸ್ತೆಲಾ ಅಂಚೆನೇ ಆತುಂಡು ಪೊನ್ನಗ್ ತಿಕಿನ ಸ್ವಾತಂತ್ರ ತರೆ ಕಡಪ ಪೋತಿಲೆಕ್ಕ ತೋಜುಂಡು. ಪೊನ್ನಗ್ ಕೂಡು ಕುಟುಂಬ ಬೊಡ್ಚಿ , ಕೋಲ, ನೇಮ, ಅಗೆಲ್, ಪರ್ವದಾನಿ ಕುಟುಮದಿಲ್ಲಗ್ ಬತ್ತುದು ದೈವ ಚಾಕಿರಿ ಮಲ್ಪರೆ ಬೊಡ್ಚಿ. ಉಂದೆಡ್ದ್‌ಲಾ ಮಲ್ಲ ತಾನ್ ಆನಗ್ ಸಾಮಾನ ಪನ್ಪಿ ಅಂಸನಿಗ್ ಸಿಗರೇಟ್, ಗಂಗರ, ತಡ ರಾತ್ರಿ ಪಾರ್ಟಿ, ಲಿವಿಂಗ್ ಟುಗೆದರ್, ಡ್ರಗ್ಸ್, ಸ್ವೇಚ್ಚೆದ ಬದ್ಕ್, ಹಿರಿಯಕುಲು ಪನ್ನಿನ ಕೇನರೆ ಬೊಡ್ಚಿ, ಸಂಸ್ಕಾರ ಬೊಡ್ಚಿ , ಸಂಸಾರ ಬೊಡ್ಚಿ, ಪಾಡುನ ದುತ್ತೈತಗ್ ಇತಿಮಿತಿ ಇಜ್ಜಿ, ಒಟ್ಟು ವಿಕೃತ ಸಂಸ್ಕೃತಿಗ್ ದಾಸಿ ಆವೊಂದುಲ್ಲಲ್ ಪನ್ಪಿನೆನ್ ಬೇನೆ ಆಂಡಲಾ ಮುಲ್ಪ ಒತ್ತೊಂದು ಪನೊಡಾಯಿನ ಅನಿವಾರ್ಯತೆ ಎನ್ನ. ಪೊನ್ನನ ಎಡ್ಡೆ ಸಂಸ್ಕಾರ ಒಂಜಿ ಎಡ್ಡೆ ಸಮಾಜನ್ ಸೃಷ್ಟಿ ಮಲ್ಪುಂಡು ಅಂಚಾದ್ ಪೊನ್ನು ಪೊಂಜೊವ್ಲೆನ ಇಸೇಸ ದಿನ ಆಯಿನ ಇನಿ ನಮ್ಮ ಪೊನ್ನು ಪೊಂಜೊವ್ಲು ತನ್ನ ಮೂಲ ತತ್ವೊನು ತೆರಿಯೊಂದು , ನಮ್ಮ ಸಂಸ್ಕೃತಿದ ತಿರ್ಲ್‌ನ್ ನೆನೆವರಿಕೆ ಮಲ್ತೊಂದು ಎಡ್ಡೆ ಸಮಾಜನ್ ಕಟ್ಟುನ ಮಲ್ಲ ಜಬದಾರಿನ್ ದೆತೊನಡ್ ಪಂದ್ ಉಡಲ್‌ಡ್ದ್ ಎಡ್ಡೆಪ್ಪುನು ಬಯಕೊಂದುಲ್ಲೆ.
✍️ ಗೀತಾ ಲಕ್ಷ್ಮೀಶ್
by 