ತುಳು ಜನಪದ ಕಥೆ..

ಒಂಜಿ ಊರುಡು ಒರಿ ದೈವ ಭಕ್ತೆ ಇತ್ತೆಗೆ. ಏಪ ತೂಂಡಲಾ ದೇವೆರೆನ ಭಜನೆ ಹರಿಕಥೆ ಪಂಡ್ ದಿನ ನೂಕೊಂದಿತ್ತೆ. ಆಯೆ ಬಜೀ ಪಾಪದಾಯೆ. ಪಾಪದಾಯೆ ಮಾತ್ರ ಅತ್. ಒಂತೆ ಪೆದ್ದೆಲಾ ಆದಿತ್ತೆಗೆ. ಒಂಜಿ ಸಲ ಆಯನ ಭಕ್ತಿಗ್ ಮೆಚ್ಚಿದ್ ದೇವೆರ್ ಆಯನ ಎದುರು ಉಂತುದು ಏನ್ ನಿಕ್ ಮೂಜಿ ವರೊನು ಕೊರ್ಪೆ.ಅವೆನ್ ಹಾಳ್ ಮಲ್ಪಡ ಅವೆನ್ ಎಡ್ಡೆ ಕಜ್ಜೊಗು ಗಲಸುಲ ಪಂಡ್ ದ್ ಮೂಜಿ ವರೊನು ಕೊರ್ದು ಆರ್ ಮಾಯೊಕ ಆಪೆರ್ಗೆ. ಈ ದೈವ ಭಕ್ತೆ ಸೀದಾ ಇಲ್ಲಗ್ ಬರ್ಪೆ. ಏನ್ ಏತ್ ಪೊರ್ಲು ಉಲ್ಲೆ ಆಂಡ ಎನ್ನ ಬುಡೆದಿ ಮಾತ್ರ ಕಪ್ಪುದ ಸುರ್ಪದಾಲ್ . ಎಂಚಲ ದೇವೆರ್ ಮೂಜಿ ವರೊ ಕೊರ್ತೆರ್ ಅತ್ತ ಐಟ್ ಒಂಜಿ ವರೊಟ್ ಎನ್ನ ಬೊಡೆದಿನ್ ಪೊರ್ಲು ಮಲ್ಪುವೆ ಪಂಡ್ ಎನ್ನುದು ಅಂಚನೆ ಮಲ್ಪುವೆ. ನನ ರಡ್ ವರ ಒರಿಂಡ್. ಅಂಚನೆ ಮಸ್ತ್ ದಿನ‌ ಕರಿಯುಂಡು. ಒಂಜಿ ದಿನ ಆ ದೇಶದ ರಾಜೆ ತನ್ನ ಸೇನೆದೊಟ್ಟುಡು ಪೋವೊಂದುಪ್ಪನಗ ಈ ದೈವ ಭಕ್ತೆ ಕಂಡೊಡು ಬೆನೊಂದು ಇಪ್ಪನಗ ಆಯನ ಪೊರ್ಲುದ ಬುಡೆದಿ ಅಲ್ಪನೆ ಬದಿಟ್ ಉಂತುದು ಕಂಡನಿ ಆ ಕಂಡೊಡು ದಪ್ಪುನೇನ್ ಅಲ್ಪನೇ ಚೂರು ದೂರೊಡು ಉಂತುದು ತೂವೊಂದುಲ್ಲೊಲು. ದಾಯೆಗ್ ಪಂಡ ಆಲ್ ಮಸ್ತ್ ಪೊರ್ಲು ಅತ. ಐಕಾದ್ ಕಂಡೊಗು ಜತ್ತುಂಡ ಕಾರ್ ಗ್ ಕೆಸರ್ ಆಪುಂಡತ್ತ? ಇಂಚಿದ ಬರಿಟ್ ರಾಜೆ ತನ್ನ ಸೇನೆದೊಟ್ಟು ಸವಾರಿ ಪೋನಗ ಆಯನ ದಿಟ್ಟಿಗ್ ದೈವ ಭಕ್ತನ ಬುಡೆದಿ ತೋಜುವೊಲು. ರಾಜೆ ಆ ದೈವ ಭಕ್ತಗ್ ಗೊತ್ತಾವಂದಿನಲಕ ಅಲೆನ್ ರಟ್ಟದ್ ಪತೊಂದು ಪೋಪೆ. ಉಂದು ವಿಷಯೊನು ತೆರಿನ ದೈವ ಭಕ್ತ ಗ್ ಬಾರೀ ಬೇಜಾರ್ ಆಪುಂಡು. ಯೋಚನೆ ಮಲ್ಪುವೆ. ಎಂಚಲಾ ಆಯಡ ದೇವೆರ್ ಕೊರ್ತಿನ ರಡ್ ವರೊ ಉಂಡತ್ತ? ಆಯೆ ಉಂತುದಿನಲ್ಲೆ ಇಂಚ ಪನ್ಪೆ. ಎನ್ನ ಬುಡೆದಿ ಎರ್ಮೆ ಆದ್ ಎನನ್ ನಾಡೊಂದು ಬರಡ್ ಪನ್ಪೆ.ಇಂಚಿಡ್ ರಾಜನ ಕೈತಲ್ ಇತ್ತಿನ ದೈವಭಕ್ತನ ಬುಡೆದಿ ಎರ್ಮೆ ಆಪೊಲುಗೆ.ಅಪಗ ಕೈತಲ್ ಉಂತುದಿನ ಎರ್ಮೆನ್ ತೂಯಿನ ರಾಜೆ ಉಂದು ಒವ್ವಾ ಮಾಯೊಕೊದ ರಕ್ಕಸೆ ಆದುಪ್ಪು ಪಂಡ್ ಎನ್ನುದು ಆ ಎರ್ಮೆನ್ ಗಿಡಪ್ಪುವೆಗೆ.ಆ ಎರ್ಮೆ ತನ್ನ ಕಂಡನಿನ್ ನಾಡೊಂದು ನಾಡೊಂದು ಬತ್ ದ್ ಆಯನ ಎದುರು ಆಯನ ಮೋನೆ ತೂವೊಂದು ಉಂತುಂಡುಗೆ .ಕೈತಲ್ ಬತ್ತುದು ಉಂತುದಿನ ಎರ್ಮೆನ್ ತೂದು ದೇವೆರ್ ಕೊರ್ತಿನ ಮೂಜಿನೆದ ವರ ಉಂಡತ್ತ ? ಐಟ್ ಅಲೆನ್ ದುಂಬು ಎಂಚ ಕಪ್ಪು ಸುರ್ಪೊದ ಮೋನೆ ಇತ್ತುಂಡಾ ಅಂಚನೆ ಮಲ್ಪುವೆಗೆ. ಇಂಚ ದೇವೆರ್ ಕೊರ್ತಿನ ಮೂಜಿ ವರೊನುಲ ಒವ್ಲಾ ಪ್ರಯೋಜನ ಇಪ್ಪಂದಿನೇಕ್ ಗಲಸ್ ದ್ ದರ್ಮೊಗು ಹಾಳ್ ಮಲ್ತೊಂಡೆ.
🖋 ವಾಸಂತಿ ಅಂಬಲಪಾಡಿ