ತುಳು ಸಾಹಿತ್ಯ ಬೊಕ್ಕ ಸಂವಾದ

ಯೆನೆಪೋಯ ಕಾಲೇಜು ವಿದ್ಯಾರ್ಥಿಲೆಡ್ದ್  ತುಳು ಸಾಹಿತ್ಯ ಓದು ಬೊಕ್ಕ ಸಂವಾದ
ಮಂಗಳೂರು: ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಆಯೋಜನೆ ಮಲ್ದಿನ  ‘ಬಲೆ ತುಳು ಸಾಹಿತ್ಯ ಓದುಗ’ ಅಭಿಯಾನಡ್  ಕೂಳೂರುದ  ಯೆನೆಪೋಯ ಕಾಲೇಜಿದ ವಿದ್ಯಾರ್ಥಿಲು  ಪಾಲ್ ಪಡೆಯೆರು .
ಕಾರ್ಯಕ್ರಮ  ಉದಿಪನ ಮಲ್ತಿನ ಹಿರಿಯ ತುಳು ಸಾಹಿತಿ, ನಾಟಕಗಾರ ಪರಮಾನಂದ ಸಾಲ್ಯಾನ್ ಮೇರು ಪಾತೆರ್ದ್ , ವಿದ್ಯಾರ್ಥಿಲೆಡ  ತುಳು ಸಾಹಿತ್ಯದ ಬಗ್ಗೆ ಅಭಿರುಚಿ ಮೂಡಿಸಾವರೆಗ್  ‘ಅಕಾಡೆಮಿಡ್ ಒಂಜಿ ದಿನ’ ಅಭಿಯಾನ ಸೂಕ್ತ ಪಂಡುದು ಬಣ್ಣಿಸಾಯೆರು. ತುಳು ಬದುಕುದ  ನಂಬಿಕೆದ  ಒಟ್ಟುಗ್  ಜಿಜ್ಞಾಸೆನ್ ಸಮಚಿತ್ತಡ್  ತೂಪಿನ  ಪ್ರಜ್ಞಾವಂತಿಕೆ ಓದುದ  ಮೂಲಕ ಮೂಡರೆಗುಂಡ್ ಪಂಡುದು ಪರಮಾನಂದ ಸಾಲ್ಯಾನ್ ಮೇರು ಅಭಿಪ್ರಾಯಪಂಡೆರು.‌
ಉಂದುವೇ  ಸಂದರ್ಭಡ್  ಅಕಾಡೆಮಿದ  ತ್ರೈಮಾಸಿಕ ಪತ್ರಿಕೆ ‘ಮದಿಪು’ ಸಂಚಿಕೆನ್  ಹಿರಿಯ ಪತ್ರಕರ್ತ ಬೊಕ್ಕ ಮಂಗಳೂರು ಪ್ರೆಸ್ ಕ್ಲಬ್ ಅಧ್ಯಕ್ಷ ಪಿ.ಬಿ.ಹರೀಶ್ ರೈ ಮೇರು ಬುಡುಗಡೆ ಮಲ್ತೆರು. ಪ್ರತಿ ಸಂದರ್ಭಡುಲಾ ಅಕಾಡೆಮಿಲು  ಸರಕಾರದಂಚಿ  ನಿರೀಕ್ಷೆ ಮಲ್ಪುನೇಡ್ದ್  ಸ್ವಯಂ ಸಂಪನ್ಮೂಲ ಕ್ರೋಢೀಕರಣ ಮಲ್ತುದ್ ಜನಸಹಭಾಗಿತ್ವಡ್  ಕಾರ್ಯಕ್ರಮ ರೂಪಿಸಾವುನ  ನಿಟ್ಟುಡ್  ದೃಷ್ಠೀಕೋನ ಅಗತ್ಯ ಪಂಡುದು ಹರೀಶ್ ರೈ ಅಭಿಪ್ರಾಯಪಂಡೆರು.‌
ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಅಧ್ಯಕ್ಷ ತಾರಾನಾಥ್ ಗಟ್ಟಿ ಕಾಪಿಕಾಡ್ ಅಧ್ಯಕ್ಷತೆ ಡಿತ್ತೆರು.‌ಕಾರ್ಯಕ್ರಮಡ್  ತುಳು ಸಾಹಿತ್ಯ ಅಕಾಡೆಮಿದ ಸದಸ್ಯೆರಾಯಿನ  ನಾಗೇಶ್ ಕುಮಾರ್ ಉದ್ಯಾವರ, ರವಿರಾಜ್ ಸುವರ್ಣ ಮುಂಬಯಿ, ಬೂಬ ಪೂಜಾರಿ, ಯೆನೆಪೋಯ ಕಾಲೇಜಿದ  ಶಿಕ್ಷಕೆರಾಯಿನ ನಿಯಾಝ್.ಪಿ , ಡಾ.ದಿನಕರ ಪಚ್ಚನಾಡಿ, ವಿದ್ಯಾರ್ಥಿನಿ ಶ್ರದ್ಧಾ ಶೆಟ್ಟಿ ಪಾಲ್ ಪಡೆದಿತ್ತೆರು .
ಅಕಾಡೆಮಿ ರಿಜಿಸ್ರ್ಟಾರ್ ಪೂರ್ಣಿಮಾ ಸ್ವಾಗತ ಮಲ್ತೆರು. ಸದಸ್ಯೆ ಅಕ್ಷಯ ಆರ್.ಶೆಟ್ಟಿ ಕಾರ್ಯಕ್ರಮ ನಿರ್ವಹಣೆ ಮಲ್ತೆರು. ಸದಸ್ಯ ಬಾಬು ಕೊರಗ ಪಾಂಗಾಳ ಸೊಲ್ಮೆ ಸಂದಾಯ್ತ ಮಲ್ತೆರು. ಅಕಾಡೆಮಿಡ್ ಒಂಜಿ ದಿನ : ಬಲೆ ತುಳು ಓದುಗ ಕಾರ್ಯಕ್ರಮಡ್  50 ವಿದ್ಯಾರ್ಥಿಲು ದಿನ ಇಡೀ  ಪಾಲ್ ಪಡೆದ್  ಬಯ್ಯದ  ಪೊರ್ತುಡ್  ತಂಕುಲು  ಓದಿನ  ಪುಸ್ತಕದ ಬಗ್ಗೆ ಅಭಿಪ್ರಾಯ ಪಟ್ಟೊಂದ್ ಅತಿಥಿಲೆನೊಟ್ಟುಗ್  ಸಂವಾದ ನಡಪಾಯೆರು.