ಯಾನ್ ಒರಿ ಒಂಜಿ ಮಲ್ಲ ವಿದ್ಯಾಸಂಸ್ಥೆದ ಮುಖ್ಯಸ್ಥೆಯಾದ್ ಕಾಲೆಜಿದ ಜೋಕ್ಲೆಡ 70% ತುಳುಟೇ ಪಾತೆರುವೆ ಪಂಡುದ್ ಉಡುಪಿ ತೆಂಕನಿಡಿಯೂರು ಪ್ರಥಮ ದರ್ಜೆ ಕಾಲೇಜಿದ ಪ್ರಾಂಶುಪಾಲೆರಾಯಿನ ಪ್ರೊ. ಸುರೇಶ್ ರೈ. ಕೆ ತೆರಿಪಾಯೆರ್. ಆರು ತೆಂಕನಿಡಿಯೂರು ಕಾಲೇಜಿಡ್ ಉಡುಪಿ ತುಳುಕೂಟದ ಮುತಾಲಿಕೆಡ್ ನಡತಿನ “ತುಳುವೆರೆ ಕೂಟ”ದ ಉದಿಪನದ ಲೇಸ್ ಡ್ ಗುರ್ಕಾರೆರಾದ್ ಪಾತೆರಿಯೆರ್.ಬಾಸೆ ಬೊಕ್ಕ ಪ್ರದೇಶಗ್ ಸಂಬಂಧ ಇಜ್ಜಿ. ತುಳುಬಾಸೆ ಪಾತೆರುನಕುಲು ಮಾತ್ರ ತುಳುವೆರ್ ಅತ್ತ್, ತುಳುನಾಡುಡ್ ಇತ್ತಿನ ಮಾತೆರ್ಲ ತುಳುವೆರ್ ಪಂಡುದ್ ಜೋಕುಲೆಗ್ ತುಳುಬಾಸೆದ ಬಗೆಟ್ ತೆರಿಯುಲೆಕ್ಕ ಬಾರೀ ಪೊರ್ಲುಡ್ ತೆರಿಪಾದ್ ಕೊರಿಯೆರ್. ತುಳುಬಾಸೆ ಒವ್ವೇ ಜಾತಿಗ್ ಸಂಬಂಧಪಟ್ಟಿನ ಅತ್ತ್, ಒವ್ವೇ ಒಂಜಿ ಧರ್ಮಗ್ ಸಂಬಂಧಪಟ್ಟಿನ ಅತ್ತ್, ಮಾತೆರ್ಲ ತುಳು ಪಾತೆರುವೆರ್. ಉಂದೊಂಜಿ ಜಾತ್ಯಾತೀತ ಕೂಟ. ಅಂಚಾದ್ ಪ್ರತಿಯೊಂಜಿ ಶಿಕ್ಷಣ ಸಂಸ್ಥೆಲೆಡ್ ತುಳುವೆರೆಕೂಟ ಮಲ್ಪುನ ಅಗತ್ಯ ಉಂಡು ಪಂಡೆರ್.
ಕಾಲೇಜಿದ 150 ಜೋಕುಲು ಒಟ್ಟಾದ್ ಮಲ್ತಿನ ತುಳುವೆರೆ ಕೂಟೊನ್ ಉಡುಪಿ ತುಳುಕೂಟದ ಗುರ್ಕಾರೆರಾಯಿನ ಬಿ.ಜಯಕರ ಶೆಟ್ಟಿ ಇಂದ್ರಾಳಿ ಮೇರು ಉದಿಪನ ಮಲ್ತುದ್ ಜೋಕ್ಲೆಗ್ ತುಳುಬಾಸೆ,ತುಳುಸಂಸ್ಕ್ರತಿ ದ ಬಗೆಟ್ ಪೊಲಬು ಕೊರ್ದ್ ಪೊಸತಾದ್ ಜೋಕುಲೇ ಒಟ್ಟಾದ್ ಉಮೇದುಡ್ ಮಲ್ತಿನ ತುಳುವೆರೆ ಕೂಟೊಗ್ ಎಡ್ಡೆಪ್ಪು ಬಯಕಿಯೆರ್.
ಲೇಸ್ ಡ್ ಮಲ್ಲಬಿನ್ನೆರಾದ್ ತುಳುಕೂಟದ ಕಾರ್ಯಂತೆರಾಯಿನ ಗಂಗಾಧರ ಕಿದಿಯೂರು,ತುಳುಕೂಟದ ಆಟಿಕೂಟದ ಸಂಚಾಲಕಿ ವಿದ್ಯಾ ಸರಸ್ವತಿ,ಕಾಲೇಜಿದ ಸಾಂಸ್ಕ್ರತಿಕ ಸಮಿತಿದ ಸಂಚಾಲಕೆರಾಯಿನ ಕೃಷ್ಣ ಸಾಸ್ತಾನ ಬೊಕ್ಕ ರತ್ನಮಾಲಾ,ಉಡುಪಿ ತುಳುಕೂಟದ ಪದಾಧಿಕಾರಿಲು,ಕಾಲೇಜಿದ ಕಲ್ಪಾದಿಲು, ಬೊಕ್ಕ ತುಳುವೆರೆ ಕೂಟದ ಮಾತಾ ಜೋಕುಲು ಉಪಸ್ಥಿತರಿತ್ತೆರ್.
ಕೂಟದ ಜೋಕ್ಲೆಗ್ ಸೆಬಿಸವಾಲ್ ಮಲ್ತುದ್ ಇನಾಮು ಪಟ್ಟಿಯೆರ್. ಕಲ್ಪಾದಿ ರತ್ನಮಾಲಾ ಮೇರ್ ಬತ್ತಿ ಬಿನ್ನೆರೆನ್ ಮೋಕೆದ ಪಾತೆರೊಡ್ ಎದ್ಕೊನ್ನಗ, ಗುರ್ಕಾರೆರಾದಿತ್ತಿನ ಪ್ರೊ. ಸುರೇಶ್ ರೈ ಬಚ್ಚಿರೆ ಬಜ್ಜಾಯಿ ಕೊರ್ದ್ ಎದ್ಕೊಂಡೆರ್. ಕೂಟದ ಬಿರ್ಸೆ ಪ್ರಕಾಶ್ ಮೇರ್ ಅಜೆ ತತ್ತುದ ಪೋಪಿನ ತುಳುನಾಡ್ದ ಸಂಸ್ಕ್ರತಿ ಬಾಸೆದ ಬಗೆಟ್ ಕೆಲವ್ ಬೇಜಾರುದ ಸಂಗತಿಲೆನ್ ತೆರಿಪಾದ್, ನಮ ಮಾತೆರ್ ಒಟ್ಟಾದ್ ಅವ್ವೆನ್ ಒರಿಪಾವುನ ಬೇಲೆ ಮಲ್ಪುಗ ಪಂಡೆರ್. ಕು. ಶರಣ್ಯ ಅಕೇರಿಗ್ ಸೊಲ್ಮೆ ಸಂದಾಯ್ತ ಮಲ್ತೆರ್. ಲೇಸ್ ದ ಸುರುಟ್ ಪ್ಲತೀಕ್ ಸುಗಿತೆರ್.
by 