ತುಲು ಬರವು ಸರವು ತಂತ್ರಾಂಶ ಬುಡುಗಡೆ..

ಜೈ ತುಲುನಾಡ್(ರಿ) ಸಂಘಟನೆದ ವತಿಡ್ದ್ ತುಲು ಬರವು-ಸರವು ತಂತ್ರಾಂಶ ಬುಡುಗಡೆ ಲೇಸ್ ಮಾ.12 ತಾರೀಕುದಾನಿ ಕಾಪು ಜೆಸಿಐ ಭವನೊಡ್ ನಡತುಂಡ್.

ಮಲ್ಲ ಬಿನ್ನೆರಾದಿತ್ತಿನ ಕರ್ನಾಟಕ ತುಲುಸಾಹಿತ್ಯ ಅಕಾಡೆಮಿದ ಮಾಜಿ ಪದುಕೆರಾಯನ ತಾರಾ ಉಮೇಶ್ ಆಚಾರ್ಯ ಪಾತೆರ್ದ್ ಜೈ ತುಲುನಾಡ್ ಸುರುಡಿಂಚಿಲಾ ದಿಂಜ ಬೇಲೆ ಮಲ್ರೊಂದ್ ಬರೊಂದುಂಡ್..2 ವರ್ಷದ ಅವಧಿಡ್ ಮಸ್ತ್ ಪುಗಾರ್ತೆನ್ ಪಡೆಯೊಂದುಂಡ್.ಅಯಿಕ್ ಸಂಘಟನೆದ ಬೆನ್ಪಾಟಿಗೆನೇ ಕಾರಣ ಪಂಡೆರ್.ಪೊಸ ಕಾಲಘಟ್ಟೊಡ್ ಉಪ್ಪುನ ಇತ್ತೆದ ಜನಕ್ಲೆಗ್ ಪೂರಕವಾದ್ ಪೊಸ ತುಲು ಆ್ಯಪ್ ನ್ ಮಲ್ತುದ್ ತುಲುಬಾಸೆಗ್ ಎಡ್ಡೆ ಕೊಡುಗೆ ಕೊರ್ತೆರ್ ಪಂಡೆರ್.

ಮಿತ್ತರ್ಮೆಡ್ ಬಿನ್ನೆರಾದಿತ್ತಿನ ನಿವ್ರತ್ತ ಶಿಕ್ಷಕೆರಾಯಿನ ಶೇಖರ್ ಕಲ್ಮಾಡಿ ಮೇರ್ ಪಾತೆರ್ದ್ ತುಲುಬಾಸೆದ ಬಗ್ಗೆ ಕೀಳರಿಮೆ ಉಪ್ಪರೆಗ್ ಬಲ್ಲಿ,ಮಾತೆರ್ಲಾ ತುಲುಬಾಸೆನ್ ಬುಲೆಪಾವರೆಗ್ ಬೆರಿತಾಂಗ್ ಕೊರೊಡ್ ಪಂಡೆರ್.ನಮ್ಮ ತುಲುಸಂಪ್ರದಾಯೊನ್ ಇತ್ತೆದ ಕಾಲೊಡ್ ಬದಲ್ ಮಲ್ತೊಂದುಲ್ಲೆರ್.ತೆರಿನಕುಲಾಂಡಲಾ ಸಂಪ್ರದಾಯದ ಬಗ್ಗೆ ಜೋಕುಲೆಗ್ ಪನ್ಪಿನ ಬೇಲೆ ಮಲ್ಪೊಡ್.ದುಂಬುದ ಕಟ್ಟುಪಾಡುಲೆನ್ ಬುಡರೆಗ್ ಬಲ್ಲಿ..ಪಂಡೆರ್.

ಬರವು ಸರವು ತಂತ್ರಾಂಶ ಮಲ್ತಿನ ಬನಶ್ರೀ ಅವಿನಾಶ್,ಚೈತ್ರಾ ಪೂಜಾರಿ,ಹರ್ಷಿತ್ ದೇವಾಡಿಗ ಮೊಕ್ಲೆನ್ ಜೈ ತುಲುನಾಡ್ ದ ವತಿಡ್ದ್ ಮಾನಾದಿಗೆ ನಡತುಂಡ್. ಮೊಬೈಲ್ ಡ್ ತಂತ್ರಾಂಶೊನ್ ಎಂಚ ಗಲಸುನ್ ಪನ್ಪಿನ ಬಗ್ಗೆ ಮೊಕುಲು ಸ್ಕ್ರೀನ್ ಡ್ ತೋಜಾದ್ ಮಾಯಿತಿ ಕೊರಿಯೆರ್.

ಈ ಪೊರ್ತುಡ್ ಮಲ್ಲ ಬಿನ್ನೆರಾದಿತ್ತಿನ ಕರ್ನಾಟಕ ತುಲುಸಾಹಿತ್ಯ ಅಕಾಡೆಮಿದ ಮಾಜಿ ಪದುಕೆರಾಯಿನ ಆಳುಪ ರಾಜವಂಶಸ್ಥೆರಾಯಿನ ಡಾ.ಆಕಾಶ್ ರಾಜ್ ಜೈನ್ ಪಾತೆರ್ದ್ ಇನಿ ತುಲು ಲಿಪಿತ್ತ ಬನ್ನಗ ತುಲುನಾಡಡ್ ಮಲ್ಲ ಜಿಜ್ಞಾಸೆ ಉಂಡು.ಸುರುಕ್ ತುಲು ಲಿಪಿ ದಾಯೆಗ್ ಪಂಡುದ್ ಪನೊಂದಿತ್ತೆರ್.ಆಂಡ ಇತ್ತೆ ಅಕುಲೇ ಬೋಡು ಪನ್ಪಿನಡೆಗ್ ಮುಟ್ಟ ಆತುಂಡ್.ನಾಡುದ ಚರಿತ್ರೆದ ಬಗ್ಗೆ ತೆರಿಯೊಂದ್ ಜಗತ್ತುಗ್ ಪಟ್ಟೊನೊಡಾಂಡ ತುಲು ಲಿಪಿತ್ತ ಅಗತ್ಯಲಾ ಉಂಡು. ತುಲುನಾಡುಗ್ ಇತ್ತಿನ ಇತಿಹಾಸ ಜಗತ್ತುಡ್ ಓಲು ನಾಡುಂಡಲಾ ತಿಕ್ಕಂದ್.ತುಲುಲಿಪಿತ್ತ ಇತಿಹಾಸ ಬಾರೀ ಪಿರಾಕುಡಿಂಚಿಲಾ ಉಂಡು.ಇಂಚಿನ ಲಿಪಿನ್ ದಾಯೆಗ್ ಮದತ್ ಬುಡೊಡ್.ಅವ್ವೆನ್ ನಮ ಕುಡೊರ ಬುಲೆಪಾವೊಡಾಂಡ ಜವನೆರ್ ದುಂಬು ಬತ್ತುಂಡ ಸಾಧ್ಯ.ಆ ನಿಟ್ಟುಡ್ ಜೈ ತುಲುನಾಡುದ ಕೊಡುಗೆ ವಿಶೇಷವಾಯಿನವ್ವ್ ಪಂಡೆರ್. ಪೊಸ ತಂತ್ರಾಂಶ ಇನಿ ದಾದ ಪೊಸತಾದ್ ಬುಡುಗಡೆ ಆತುಂಡ ಅವ್ವೆನ್ ತುಲುನಾಡೊರ್ಮೆ ಪಟ್ಟೊನುನ ಬೇಲೆ ಆವೊಡ್ ಪಂಡೆರ್.ನಮ ಕಜ್ಜೊಲೆನ್ ಮಸ್ತ್ ಮಲ್ಪುವಾ ಆಂಡ ತುಲುವೆರ್ ಬೊಟ್ಟುನ ಡೋಲುನ್ ಒಂತೆ ಗಟ್ಟಿಡೇ ಬೊಟ್ಟೊಡ್ ಪಂಡೆರ್. ತುಲು ಸಂಸ್ಕೃತಿದ ಪ್ರತೀಕವಾಯಿನ ತುಲುವಪ್ಪೆನ ಚಿತ್ರೊಗ್ ಪುರ್ಪ ಪಾಡುದ್ ಕಜ್ಜೊನ್ ಉದಿಪನ ಮಲ್ಪನಗ ನಿಜವಾದುಲಾ ಪೆರ್ಮೆ ಆಪುಂಡ್ ಪಂಡೆರ್.

ಜೆಸಿಐ ದಕುಲು ಮಲ್ಪುನ ಕಜ್ಜೊನ್ ತುಲುಬಾಸೆಡ್ ಮಲ್ಪುನ ಪ್ರಯತ್ನ ಮಲ್ಪುಲೆ ಪಂಡುದ್ ಬಿನ್ನಪ ಈ‌ ಪೊರ್ತುಡ್ ಮಲ್ತೆರ್.

ಜೈ ತುಲುನಾಡ್ ಸಂಘಟನೆದ ಗುರ್ಕಾರೆರಾಯಿನ ವಿಶು ಶ್ರೀಕೆರ ಮೇರ್ ಕಜ್ಜೊದ ಗುರ್ಕಾರ್ಮೆಡಿತ್ತೆರ್ ಮಿತ್ತರ್ಮೆಡ್ ಕಾಪು ಜೆಸಿಐದ ಗುರ್ಕಾರ್ದಿ ದೀಕ್ಷಾ ಕೋಟ್ಯಾನ್, ಒತ್ತು ಗುರ್ಕಾರೆ ಜಗದೀಶ್ ಗೌಡ ಮೊಕುಲು ಉಪಸ್ಥಿತರಿತ್ತೆರ್.ರಾಜೇಶ್ ತುಲುವೆ ಸ್ವಾಗತ ಮಲ್ತುದ್ , ಕಾರ್ಯಂತೆರಾಯಿನ ಅವಿನಾಶ್ ಮುಕ್ಕ ಪ್ರಸ್ತಾವನೆ ಮಲ್ತುದ್,ಪವಿತ್ರ ಕಜ್ಜೊದ ಮದಿಪು ಕೊರಿಯೆರ್. ಒತ್ತು ಸಂಘಟನಾ ಕಾರ್ಯಂತೆರಾಯಿನ ಪ್ರಥ್ವಿ ಮೇರ್ ಸೊಲ್ಮೆ ಸಂದಾಯ್ತ ಮಲ್ತೆರ್. ಲೇಸ್ ದ ಸುರುಟ್ ಧಾರ್ಮಿಕ್ ಸಚಿನ್ ಕುಮಾರ್,ಆದ್ವಿಕ್ ಸಚಿನ್ ಕುಮಾರ್ ಸುಗಿತೆರ್.