ಸದ್ಯೊಡೇ ತುಲುಬಾಸೆಗ್ ರಾಜ್ಯೊಡ್ ಅಧಿಕೃತ ಪಟ್ಟ: ರಾಜ್ಯ ಮಟ್ಟದ ಸಮಿತಿಡ್ ಮಹತ್ವದ ಸಭೆ! – ದಯಾನಂದ ಕತ್ತಲ್ಸಾರ್

ಪಂಚದ್ರಾವಿಡ ಬಾಸೆಲೆಡ್ ಒಂಜಾಯಿನ ತುಲುಬಾಸೆಗ್ ರಾಜ್ಯೊಡ್ ಮಾನಾದಿಗೆ ತಿಕ್ಕುನ ಪೊರ್ತು ಕೈತಲಾತುಂಡ್.ಸಮಸ್ತ ತುಲುವೆರೆನ ಕನ ನಿಜ ಆಪಿನ ದಿನ ಕೈತಲುಡೇ ಉಂಡು.ಪಂಡುದ್ ಕರ್ನಾಟಕ ತುಲುಸಾಹಿತ್ಯ ಅಕಾಡೆಮಿದ ಗುರ್ಕಾರೆರಾಯಿನ ದಯಾನಂದ ಕತ್ತಲ್ಸಾರ್ ತೆರಿಪಾದೆರ್.

ಈ ನಿಟ್ಟುಡ್ ತುಲು ಲಿಪಿನ್ ರಾಜ್ಯೊಡ್ ಅಧಿಕೃತ ಮಲ್ಪರೆಗ್ ಬೆರಿಬುಡಂದೆ ಆಸಕ್ತಿ ತೋಜಾಯಿನ ಸಚಿವರಾಯಿನ ಅರವಿಂದ ಲಿಂಬಾವಳಿನ್ ದುಂಬು ದೀಯೊಂದ್ ಮಹತ್ವದ ಸಭೆ ನಡದುಂಡ್.  ಈ ಸಭೆಟ್ ಕನ್ನಡ ಅಭಿವ್ರದ್ಧಿ ಪ್ರಾಧಿಕಾರದ ಅಧ್ಯಕ್ಷೆರಾಯಿನ ಟಿ.ಎಸ್.ನಾಗಾಭರಣ, ಕುವೆಂಪು ಭಾಷಾ ಭಾರತಿ ಪ್ರಾಧಿಕಾರದ ಅಧ್ಯಕ್ಷೆರಾಯಿನ ಅಜರ್ಕಳ ಗಿರೀಶ್ ಭಟ್,ಕನ್ನಡ ಸಾಹಿತ್ಯ ಅಕಾಡೆಮಿದ ಅಧ್ಯಕ್ಷೆರಾಯಿನ ಡಾ.ಬಿ.ವಿ.ವಸಂತ್ ಕುಮಾರ್, ತುಲುಸಾಹಿತ್ಯ ಅಕಾಡೆಮಿದ ಸುರುತ್ತ ಅಧ್ಯಕ್ಷೆರಾಯಿನ ಪ್ರೊ.ವಿವೇಕ್ ರೈ,ತುಲು ಲಿಪಿ ತಜ್ಞೆರಾಯಿನ ವಿಘ್ನರಾಜ್ ಧರ್ಮಸ್ಥಳ, ತುಲು ಸಾಹಿತ್ಯ ಅಕಾಡೆಮಿದ ಸದಸ್ಯೆರಾಯಿನ ಡಾ| ಆಕಾಶ್ ರಾಜ್ ,ತುಲುಸಾಹಿತ್ಯ ಅಕಾಡೆಮಿದ ಮಾಜಿ ಸದಸ್ಯೆರಾಯಿನ ಮುದ್ದುಮೂಡುಬೆಳ್ಳೆ,ನಾಟಕ ರಂಗದ ವಿಜಯ್ ಕುಮಾರ್ ಕೊಡಿಯಾಲ್ ಬೈಲು,ತುಲುಸಾಹಿತ್ಯ ಅಕಾಡೆಮಿದ ರಿಜಿಸ್ಟ್ರಾರ್ ಕವಿತಾ, ಲೇಖಕಿ ಇಂದಿರಾ ಹೆಗ್ಡೆ, ಮೊಕ್ಲೆನ್ ಮಾತಾ ದುಂಬು ದೀಯೊಂದ್ ಒಂಜಿ ಮಹತ್ವದ ನಿರ್ಣಯೊಗ್ ಬೈದುಂಡ್ .ಆಯಿನ ನಿರ್ಣಯದ ಪ್ರಕಾರ ತುಲುಬಾಸೆನ್ ರಾಜ್ಯೊಡ್ ಅಧಿಕ್ರತ ಬಾಸೆ ಮಲ್ಪೊಡ್ ಪಂಡುದ್  ಸರ್ಕಾರೊಗು  ಮನವಿ ಕೊರ್ತುಂಡ್.  ಉಂದುವೇ ಬರ್ಪಿನ ವಿಧಾನಸಭೆತ್ತ ಅಧಿವೇಶನೊಡ್ ಈ ಬಗೆಟ್ ಚರ್ಚೆ  ಆವರೆಗುಂಡು.ಖಂಡಿತವಾದುಲಾ ಈ ಸರ್ತಿ ಅಧಿವೇಶನೊಡ್ ತುಲುಬಾಸೆಗ್ ರಾಜ್ಯೊಡ್ ಮಾನಾದಿಗೆ ತಿಕ್ಕುಂಡ್ ಪನ್ಪಿನ ನಂಬಿಕೆ ಉಂಡು.ಪಂಡುದ್ ಪಂಡೆರ್.

ಈ ನಿಲೆಟ್ ತುಲುನಾಡ್ದ ತುಲಪರ ಸಂಘಟನೆಲೆನ ಒತ್ತು ಸೇರಿಗೆಡ್ ತುಲು ಅಕಾಡೆಮಿ ಮಸ್ತ್ ಪ್ರಾಮಾಣಿವಾಯಿನ ಪ್ರಯತ್ನ ಮಲ್ತೊಂದುಂಡ್. ತುಲುವೆರೆನ ನಿರೀಕ್ಷೆನ್ ಈ ಸರ್ತಿ ಕನ್ನಡ ಸಂಸ್ಕೃತಿ ಇಲಾಖೆದ ಸಚಿವೆರ್ ನಡಪಾದ್ ಕೊರುವೆರ್ ಪಂಡುದ್ ತುಲುವೆರ್ ನಂಬುದೆರ್.ತುಲುನಾಡ್ದ ಶಕ್ತಿಲು ಈ ಬೇಲೆನ್ ಮಲ್ಪಾದ್ ಕೊರಡ್ ಪಂಡುದ್ ತೆರಿಪಾಯೆರ್.

ವಿದ್ವಾಂಸೆರೆನಕಲೆನ್ ಸೇರ್ಸಾದ್ ಈ  ಸರ್ತಿ  ರಾಜ್ಯಮಟ್ಟೊಡ್ ಸಮಿತಿ ಆದ್ ಸಭೆಲಾ ನಡದುಂಡ್. ತುಲುಬಾಸೆಗ್ ರಾಜ್ಯೊಡ್ ಅಧಿಕೃತವಾಯಿನ ಮಾನಾದಿಗೆ ಕೊರೊಡುಂದ್, ನೆತ್ತ ಸಾಧಕ-ಭಾಧಕದ ಬಗ್ಗೆ ಚರ್ಚೆಲಾ ಕನ್ನಡ ಪ್ರಾಧಿಕಾರದ ಅಧ್ಯಕ್ಷೆರ್ ಇತ್ತುದೇ ಆತುಂಡ್. ಆಯಿನಾತ್ ಬೇಗ ರಾಜ್ಯಬಾಸೆ ಆಪಿನ ನಿರೀಕ್ಷೆ ಉಂಡು.

ಡಾ| ಆಕಾಶ್ ರಾಜ್ ಜೈನ್
ಸದಸ್ಯೆರ್, ಕರ್ನಾಟಕ ತುಲುಸಾಹಿತ್ಯ ಅಕಾಡೆಮಿ