ಬಲೆ ತುಲು ಲಿಪಿ ಕಲ್ಪುಗ

ಜೈ ತುಲುನಾಡ್ (ರಿ.) ಬೆಂಗಳೂರು ಎಗ್ಗೆದಕುಲು ನಡಪಾದ್ ಕೊರ್ಪಿನ ಬಲೆ ತುಲು ಲಿಪಿ ಕಲ್ಪುಗ ಪನ್ಪಿ ಕಜ್ಜ ಕೊಟ್ಯ ಬೆಂಗಳೂರುದ ಮೆಜೆಸ್ಟಿಕ್ ಡ್ ಉಪ್ಪುನ ಸ್ವಾಗತ್ ಹೋಟೆಲ್ ಡ್ 20 ಅಕ್ಟೋಬರ್ 2024 ನೇ ಐತಾರದಾನಿ ನಡತ್ಂಡ್. ಒತ್ತು ಸಂಘಟನಾ ಕಾರ್ಯಂತೆರಾಯಿನ ಕಾಶಿನಾಥ ಬತ್ತಿ ಬಿನ್ನೆರೆನ್ ಎದುಕೊಂಡೆರ್. ಲೇಸ್ ಡ್ ಮಲ್ಲ ಬಿನ್ನೆರಾದ್ ಬತ್ತಿನ ತೇಜಸ್ ಸುಧಾಕರ್ ಲೇಸ್ ನ್ ಉದಿಪನ ಮಲ್ತೆರ್. ಜೈ ತುಲುನಾಡ್ ಬೆಂಗಳೂರು ಎಗ್ಗೆದ ಗುರ್ಕಾರ್ಲಾಯಿನ ಧನಂಜಯ ಆಚಾರ್ಯ ಲೇಸ್ ದ ಗುರ್ಕಾರ್ಮೆ ಒಯಿಸ್ ದಿತ್ತೆರ್. ಅಂಚೆನೆ ತುಳುಕೂಟ ಬೆಂಗಳೂರುದ ಸುಂದರ್ ರಾಜ್ ರೈ, ಬೆಂಗಳೂರುದ ಉದ್ಯಮಿ ಚಂದ್ರಹಾಸ್ ಶೆಟ್ಟಿಗಾರ್, ಜೈ ತುಲುನಾಡ್ ಬೆಂಗಳೂರು ಎಗ್ಗೆದ ಒತ್ತು ಗುರ್ಕಾರ್ಲಾಯಿನ ನಿಧೀಶ್ ಶೆಟ್ಟಿ ಜೈ ತುಲುನಾಡ್ ಬಿನ್ನೆರಾದ್ ಪಾಲ್ ಪಡೆದಿತ್ತೆರ್.
ಬಿನ್ನೆರ್ ತುಲುವಪ್ಪೆಗ್ ಪುರ್ಪ ಸಂದೈತ ಮಲ್ತೆರ್. ಪ್ರಗತಿ ಎಸ್ ತುಲುವಪ್ಪೆನ್ ಸುಗಿತೆರ್. ಕಾರ್ಯಂತೆರಾಯಿನ ಅಕ್ಷಯ್ ಆಚಾರ್ಯ ಪ್ರಾಸ್ಥಾವಿಕ ಭಾಷಣ ಮಲ್ತ್ ದ್ ತುಲು ಲಿಪಿತ ಇತಿಹಾಸ ಬೊಕ್ಕ ಜೈ ತುಲುನಾಡ್ ಕೂಟೊದ ಇತಿಹಾಸ ಅಂಚೆನೆ ಜೈ ತುಲುನಾಡ್ ಕೂಟ ತುಲು ಲಿಪಿತ ಬಗೆಟ್ ಮಲ್ದಿನ ಬೇಲೆಲೆತ ಬಗೆಟ್ ತೆರಿಪಾಯೆರ್. ಕಜ್ಜೊನು ಉದಿಪನ ಮಲ್ತಿನ ಉದ್ಯಮಿ ತೇಜಸ್ ಸುಧಾಕರ್ ತುಲುತ ಅಂಚೆನೆ ತುಲು ಲಿಪಿತ ವಾ ಬೇಲೆಗ್ಲ ಎನ್ನ ಸಂಪೂರ್ಣ ಸಹಕಾರ ಉಂಡು ಪಂಡೆರ್. ಬಿನ್ನೆರಾಯಿನ ಸುಂದರ್ ರಾಜ್ ರೈ ಪಾತೆರ್ದ್ ತುಲುನಾಡ್ ದಕುಲು ಭಾಷಾತೀತವಾದ್ ತುಲುವೆರಾದುಲ್ಲೆರ್, ಉಂದು ಪ್ರತಿ ಒರಿ ತುಲುನಾಡ್ ದಾಯನ ಉಡಲ್ ಡ್ ಉಂಡು ಪಂಡೆರ್. ಕುಡೊರಿ ಬಿನ್ನೆರಾಯಿನ ಸ್ವಾಗತ್ ಹೋಟೆಲ್ ದ ದನಿ, ಚಂದ್ರಹಾಸ ಶೆಟ್ಟಿಗಾರ್ ಕೂಟೊದ ಜವನೆರೆನ ಉಲಯಿಡುಪ್ಪುನ ಉತ್ಸಾಹೊನು ಪುಗರ್ಯೆರ್. ಒತ್ತು ಗುರ್ಕಾರ್ಲಾಯಿನ ನಿಧೀಶ್ ಶೆಟ್ಟಿ ಜೈ ತುಲುನಾಡ್ ಪಾತೆರ್ದ್ ಕೂಟೊದ ಬಗೆಟ್ ತೆರಿಪಾಯೆರ್. ಗುರ್ಕಾರ್ಮೆ ಒಯಿಸ್ ದಿತ್ತಿನ ಧನಂಜಯ ಆಚಾರ್ಯ ಪಾತೆರ್ದ್ ಜೈ ತುಲುನಾಡ್ (ರಿ.) ಕೂಟೊದಕ್ಲು ಮಲ್ಪುನ ಮಾತಾ ಕಜ್ಜೊಲೆಗ್ ನಿಕ್ಲೆನ ಮಾತೆರ್ನ ಬೆರಿ ಬಲ ಬೋಡು ಪಂಡೆರ್.
ಬತ್ತಿ ಬಿನ್ನೆರ್ ತುಲುಲಿಪಿಟ್ ಪುದರ್ ಬರೆಪುನ ಮೂಲಕ ಲಿಪಿ ಕಜ್ಜೊನು ಸುರು ಮಲ್ತೆರ್. ಪೂರ್ಣದಕ್ಷ, ಶರತ್ ಕೊಡವೂರು, ರಂಜನ್ ಎಸ್ ವೈ, ಅಕ್ಷಯ್ ಆಚಾರ್ಯ ತುಲು ಲಿಪಿ ಕಲ್ಪಾದಿಲಾದಿತ್ತೆರ್. ಈ ಲಿಪಿ ಕಜ್ಜೊಡು 75ಡ್ದ್ ಲ ಹೆಚ್ಚ ಜನ ಪಾಲ್ ಪಡೆದಿತ್ತೆರ್.
ತುಳುನಾಡ ಜವನೆರ್ ಬೆಂಗಳೂರು (ರಿ.) ನೆತ್ತ ಕೂಟೊದಕುಲು ಅಂಚೆನೆ SMS ಫ್ಯಾಮಿಲಿ ಬೆಂಗಳೂರು ನೆತ್ತ ಸದಸ್ಯೆರ್ ಪಾಲ್ ಪಡೆದಿತ್ತೆರ್. ಅಂಚೆನೆ “ಲೈಟ್ ಹೌಸ್ ಕ್ರಿಯೇಷನ್ಸ್” ಈ ಲೇಸ್ ಗ್ ಎಡ್ಡೆನೆ ಸಹಕಾರ ಮಲ್ತೆರ್.
ಜೈ ತುಲುನಾಡ್ (ರಿ.) ಬೆಂಗಳೂರು ಎಗ್ಗೆದ ಸಂಘಟನಾ ಕಾರ್ಯಂತೆರಾಯಿನ ಶರತ್ ಕೊಡವೂರು, ಒತ್ತು ಕಾರ್ಯಂತೆರಾಯಿನ ಶಕುಂತಲ, ಪಣವುದ ಪಾಲವೆರಾಯಿನ ಅನುದೀಪ್ ಎಲ್ಲೂರು, ಒತ್ತು ಪಣವುದ ಪಾಲವೆರ್ ಪ್ರಗತಿ ಎಸ್., ಒತ್ತು ಸಂಘಟನಾ ಕಾರ್ಯಂತೆರಾಯಿನ ಕಾಶಿನಾಥ, ಕಾರ್ಯಕಾರಿ ಸಮಿತಿದ ಮಹೇಶ್ ಕುಲಾಲ್, ರಂಜನ್ ಎಸ್ ವೈ, ಸದಸ್ಯೆರಾಯಿನ ಗುರು ದೇವಾಡಿಗ ಲೇಸ್ ಡ್ ಪಾಲ್ ಪಡೆದಿತ್ತೆರ್.
ಸುಧೀರ್ ದೇವಾಡಿಗ ಲೇಸ್ ನ್ ಸುದಾರ್ತ್ ಕೊರ್ಯೆರ್. ತಾಪಕ ಸಮಿತಿದ ಸದಸ್ಯೆರಾಯಿನ ಸುಮಂತ್ ಹೆಬ್ರಿ ಸೊಲ್ಮೆ ಸಂದಾಯಿತ ಮಲ್ತೆರ್.