ಅಂತರಾಷ್ಟ್ರೀಯ ಮಟ್ಟದ ವರ್ಲ್ಡ್ ಕಪ್ ತ್ರೋಬಾಲ್ ಚಾಂಪಿಯನ್ ಶಿಪ್ ಗ್ ತುಳುನಾಡುದ ಬಾಲೆ ವೈಷ್ಣವಿ ಆಯ್ಕೆ..

ಡಿಸೆಂಬರ್ 15 ಡ್ದ್ 17 ಮುಟ್ಟ ಮಲೇಶಿಯಾಡ್ ನಡಪರೆಗುಪ್ಪುನ ಅಂತರಾಷ್ಟ್ರೀಯ ವರ್ಲ್ಡ್ ಕಪ್ ತ್ರೋಬಾಲ್ ಚಾಂಪಿಯನ್ ಶಿಪ್ ಗ್ ಭಾರತ ತಂಡೊಡ್ ಕರ್ನಾಟಕ ಉಡುಪಿ ತಾಲೂಕುದ ಕೋಡಿಬೆಂಗ್ರೆದ ವೈಷ್ಣವಿ ಜಿ.ಸುವರ್ಣ ಆಯ್ಕೆ ಆತೆರ್ ಪನ್ಪಿನವ್ ಖುಷಿತ್ತ ಸಂಗತಿಯಾತುಂಡ್.ಆಂಡ ಇಲ್ಲದ ಆರ್ಥಿಕ ಪರಿಸ್ಥಿತಿ ಸರಿ ಉಪ್ಪಂದಿನೆಡ್ದಾವರ ಕ್ರೀಡಾಕೂಟಗ್ ಪೋವರೆಗ್ ಅಸಾಧ್ಯ ಆದಿತ್ತುಂಡ್.ಆಂಡ ಊರುದ ದಾನಿಲೆನ ಸಹಕಾರೊಡಾದ್ ಗೊಬ್ಬರೆಗ್ ಪೋವರೆಗ್ ಅವಕಾಶ ತಿಕ್ಕುದುಂಡ್.
ಭಾರತೊಡ್ ಆಯ್ಕೆ ಆತಿನ 15 ಜನತ್ತ ತಂಡೊಡ್ ತುಳುನಾಡುದ ವೈಷ್ಣವಿಲಾ ಒರ್ತಿ.ಬ್ರಹ್ಮಾವರದ ಎಸ್.ಎಮ್.ಎಸ್.ಕಾಲೇಜಿದ ಸುರುತ್ತ ಬಿ.ಕಾಮ್.ಓದೊಂದುಪ್ಪುನ ವೈಷ್ಣವಿಗ್ ಎಲ್ಯಡಿಂಚಿಲಾ ಗೊಬ್ಬುನೇಟ್ ಆಸಕ್ತಿ ಜಾಸ್ತಿ ಇತ್ತುದ್,ಜಿಲ್ಲಾಮಟ್ಟ,ರಾಜ್ಯ ಮಟ್ಟ ಬೊಕ್ಕ ರಾಷ್ಟ್ರಮಟ್ಟೊಡ್ ಪಾಲ್ ಪಡೆದ್ ಇನಾಮು ದೆತೊಂದೆರ್.
ಛತ್ತೀಸ್ ಗಡಟ್ ನಡತಿನ ರಾಷ್ಟ್ರೀಯ ತ್ರೋಬಾಲ್ ಪಂದ್ಯಾಕೂಟಡ್ ಕರ್ನಾಟಕ ರಾಜ್ಯ ತಂಡೊಡ್ ಇತ್ತುದ್,ಮೈಸೂರುಡ್ ನಡತಿನ ರಾಷ್ಟ್ರಮಟ್ಟದ ತ್ರೋಬಾಲ್ ಪಂದ್ಯಾಟಡ್ ಸುರುತ್ತ ಇನಾಮು ಗೆಂದುದೆರ್.ಮೂಜಿ ಸರ್ತಿ ಕರ್ನಾಟಕ ರಾಜ್ಯಮಟ್ಟದ ತ್ರೋಬಾಲ್ ಡ್ ಸುರುತ್ತ ಇನಾಮು,ಜಾವಲಿನ್,ಗುಂಡು ಎಸೆತ,ಚಕ್ರ ಎಸೆತಡ್ ರಾಜ್ಯಮಟ್ಟಡ್ ಇನಾಮು ಗೆಂದುದೆರ್.ಮೀನುಗಾರ ಕುಟುಂಬದಾರಾಯಿನ ವೈಷ್ಣವಿ ಮೇರ್ ಕೋಡಿಬೆಂಗ್ರೆದ ಗೋವಿಂದ ಮೆಂಡನ್ ಬೊಕ್ಕ ಬೇಬಿ ಸುವರ್ಣ ಮೊಕ್ಲೆನ ಮಗಲ್.ಮೀನುಗಾರಿಕೆಡ್ ತಿಕ್ಕುನ ಪಣವುಡ್ ಇಲ್ಲದ ಖರ್ಚಿ ಪೋಪಿನವ್ವೇ ಕಷ್ಟ ಆತುಂಡಲಾ ರಾಷ್ಟ್ರಮಟ್ಟೊಡ್ ಸಾಧನೆ ಮಲ್ತುದ್,ಅಂತರಾಷ್ಟ್ರೀಯ ಮಟ್ಟಡ್ ಸಾಧನೆ ಮಲ್ಪರೆಗ್ ಪಿದಾಡ್ದಿನ ಮೇರ್ ತುಳುನಾಡುಗೇ ಪೆರ್ಮೆ.ಮೆರೆನ ಸಾಧನೆಗ್ ತುಳುನಾಡುದ ದೈವ-ದೇವೆರ್ ಬೆರಿಬಲ ಕೊರ್ದ್ ಕಾಪಡ್ ಪಂಡುದ್ ನಟ್ಟೊನುಗಾ..