ದೇವೆರೆನ ಪಾದ ಸೇರಿನ ಚಂದ್ರ ಸಾಲ್ಯಾನ್

ಮಲ್ಪೆದ ಮತ್ಸ್ಯೋದ್ಯಮಿ, ಸಮಾಜಸೇವಕೆರಾಯಿನ ಚಂದ್ರ ಸಾಲ್ಯಾನ್ ಮೇರು ಕೋಡೆ ಮಲ್ಪೆಡ್ ನಡತಿನ ರಸ್ತೆ ಅಪಘಾತೊಡ್ ತೀವ್ರವಾಯಿನ ಪೆಟ್ಟಾದ್ ಇನಿ ದೇವೆರೆನ ಪಾದ ಸೇರಿನ ಘಟನೆ ನಡದುಂಡ್.ಬಡಾನಿಡಿಯೂರು ಪೌಂಜಿಗುಡ್ಡೆದ ನಿವಾಸಿ ಆಯಿನ ಮೇರು ಕೋಡೆ ಮದ್ಯಾನದ ಪೊರ್ತುಡ್  ಮಲ್ಪೆಡ್ ತನ್ನ ಗಾಡಿನ್ ಬರಿಟ್ ಉಂತಾದ್ ಅಂಗಡಿಗ್ ಪೊವರೆಗ್ ರಸ್ತೆ ದಾಂಟುನ ಪೊರ್ತುಗ್ ಪಿರಾವುಡ್ ಬತ್ತಿನ ಸ್ಕೂಟಿ ಮೆರೆಗ್ ಗುದ್ದುದ್ ಆರ್ ರಸ್ತೆಗ್ ಬೂರಿಯೆರ್. ಅಪಗ ಅರೆನ ಮಂಡೆಗ್ ಬಲವಾಯಿನ ಪೆಟ್ಟು ಬೂರ್ದುಂಡ್. ಕೂಡಲೇ ಅರೆನ್ ಮಣಿಪಾಲ ಆಸ್ಪತ್ರೆಗ್ ಅಡ್ಮಿಟ್ ಮಲ್ತುಂಡಲಾ ಚಿಕಿತ್ಸೆ ಫಲಕಾರಿಯಾವಂದೆ ಆರ್ ಇನಿ ವಿಷ್ಣುಪಾದ ಸೇರಿಯೆರ್.ಗುದ್ದಯಿನ ಸ್ಕೂಟಿದ ಜನ ಅಲ್ಪಡ್ದ್ ಪರಾರಿಯಾದ್ ಆಯನ ಪತ್ತೆಗಾದ್ ಪೋಲೀಸ್ ದಕುಲು ತನಿಖೆ ಮಲ್ತೊಂದುಲ್ಲೆರ್.

ಚಂದ್ರ ಸಾಲ್ಯಾನ್ ಮೇರು ಕರಿನ ಕೆಲವು ವರ್ಷಡಿಂಚಿ ಮಲ್ಪೆಡ್ ಮತ್ಸ್ಯೋದ್ಯಮಿಯಾದಿತ್ತುದ್, ಪರ್ಸೀನ್ ಮೀನುಗಾರರ ಸಂಘಡ್ ಕೆಲವು ವರ್ಷ ಉಪಾಧ್ಯಕ್ಷೆರಾದಿತ್ತೆರ್. ಮಲ್ಪೆದ ಧಾರ್ಮಿಕ, ಸಾಮಾಜಿಕ ಸಂಸ್ಥೆಲೆಡ್ ನಿರಂತರವಾದ್ ತೊಡಗಿಸಾವೊಂದ್, ಊರುಡ್ ನಡಪುನಂಚಿನ ಧಾರ್ಮಿಕ, ಸಾಮಾಜಿಕ ಕಾರ್ಯಕ್ರಮಲೆಗ್ ನೀರಂತರವಾದ್ ಬೆರಿಸಾಯ ಕೊರೊಂದಿತ್ತೆರ್.