ಅಖಿಲ ಭಾರತೀಯ ವಿದ್ಯಾರ್ಥಿ ಪರಿಷತ್ ಉಡುಪಿ ನಗರ ವತಿಡ್ದ್ ಕಲ್ಪಾದಿಲೆಗ್ ಹಾಸ್ಟೆಲ್ ಪ್ರವೇಶಾತಿ ಆಯ್ಕೆ ಪ್ರಕ್ರಿಯೆಡ್ ವಿಳಂಬ ಬೊಕ್ಕ ವಿದ್ಯಾರ್ಥಿ ವೇತನನ್ ಕೊರಂದಿನ ರಾಜ್ಯ ಸರ್ಕಾರದ ವಿರುದ್ಧ ಅಜ್ಜರಕಾಡು ಯುದ್ಧ ಸ್ಮಾರಕದ ಕೈತಲುಡ್ ಜುಲೈ ತಾರೀಕುಗ್ ಪ್ರತಿಭಟನೆ ಮಲ್ತುದ್ ತಹಶೀಲ್ದಾರೆರೆನ ಮೂಲಕ ಆಗ್ರಹ ಮಲ್ತುಂಡ್.
ಪ್ರತಿಭಟನೆನ್ ಉದ್ದೇಶಿಸಾದ್ ಪಾತೆರಿನ ಉಡುಪಿ ನಗರ ಕಾರ್ಯದರ್ಶಿ ಶ್ರೀವತ್ಸ ಮೇರು ರಾಜ್ಯಾದ್ಯಂತ ಗ್ರಾಮೀಣ ಭಾಗಲೆಡ್ದ್ ನಗರಗ್ ಬತ್ತುದು ಮಸ್ತ್ ಕಲ್ಪಾದಿಲು ಕಲ್ತೊಂದುಲ್ಲೆರ್ ಅಂಚೆನೇ ಮುಖ್ಯವಾದ್ ಉಡುಪಿದಂಚಿನ ನಗರಗ್ ಶಿಕ್ಷಣಗಾದ್ ಸಾರ ಸಂಖ್ಯೆಡ್ ವಿದ್ಯಾರ್ಥಿಲು ಪರ ಜಿಲ್ಲೆಡ್ದ್ ಬರ್ಪೆರ್. ಹೈಸ್ಕೂಲ್ ಬೊಕ್ಕ ಪಿಯುಸಿದ ಕ್ಲಾಸ್ ಸುರುವಾದ್ 40 ದಿನಾಂಡಲಾ ನನಲಾ ಹಾಸ್ಟೆಲ್ ಸೀಟು ಕೊರ್ಪಿನ ಪ್ರಕ್ರಿಯೆ ಪ್ರಾರಂಭ ಆವಂದೇ ವಿದ್ಯಾರ್ಥಿಲು ಕಷ್ಟ ಬರೊಂದುಲ್ಲೆರ್. ಶಿಕ್ಷಣ ವಂಚಿತರಾವೊಂದುಲ್ಲೆರ್. ಕುಡೊಂಜಿ ಕಡೆ ವಿದ್ಯಾಸಿರಿ, ಕಾರ್ಮಿಕರ ನಿಧಿ ವಿದ್ಯಾರ್ಥಿ ವೇತನಲಾ ಬುಡುಗಡೆಯಾವೊಂದಿಜ್ಜಿ, ರೈತನಿಧಿ ವಿದ್ಯಾರ್ಥಿ ವೇತನ ಕಡಿತ ಮಲ್ದಿನವ್ ಖಂಡನೀಯ ಪಂಡೆರು.
ತಾಲೂಕು ಸಂಚಾಲಕೆರಾಯಿನ ಅಜಿತ್ ಜೋಗಿ ಪಾತೆರ್ದ್ 100 ವಿದ್ಯಾರ್ಥಿಲು ಹಾಸ್ಟೆಲ್ ಗಾದ್ ನೋಂದಣಿ ಮಲ್ತುಂಡ ಕೇವಲ 40 ವಿದ್ಯಾರ್ಥಿಲೆಗ್ ಮಾತ್ರ ವಸತಿ ವ್ಯವಸ್ಥೆ ಆತುಂಡ್, ಬಾಕಿ 60 ವಿದ್ಯಾರ್ಥಿಲು ನಮ್ಮ ರಾಜ್ಯದ ಸಾದಿಡ್ ಜೆಪ್ಪೊಡಾ ಪಂಡುದು ಮುಖ್ಯಮಂತ್ರಿಲೆಗ್ ಬೊಕ್ಕ ಶಿಕ್ಷಣ ಸಚಿವೆರೆಗ್ ಚಾಟಿ ಬೀಸಿಯೆರು.
ಪ್ರಮುಖ ಬೇಡಿಕೆಲು:
- ಹಾಸ್ಟೆಲ್ ಗ್ ಅರ್ಜಿ ಪಾಡ್ದಿನ ವಿದ್ಯಾರ್ಥಿಲೆನ ಆಯ್ಕೆ ಪ್ರಕ್ರಿಯೆನ್ ಕೂಡಲೇ ಪೂರ್ಣಮಲ್ತುದ್ ಹಾಸ್ಟೆಲ್ ಗ್ ಪ್ರವೇಶಾತಿ ಕೊರೊಡು.
- ರಾಜ್ಯಡ್ ಸಮಾಜ ಕಲ್ಯಾಣ ಹಿಂದುಳಿದ ವರ್ಗ ಬೊಕ್ಕ ಅಲ್ಪಸಂಖ್ಯಾತ ಇಲಾಖೆಲೆನ ಹಾಸ್ಟೆಲ್ ದ ಸಂಖ್ಯೆನ್ ಜಾಸ್ತಿ ಮಲ್ಪೊಡ್.
- ಬಾಕಿ ಒರಿದಿನ ಪಿರಾವುದ ವರ್ಷದ ವಿದ್ಯಾರ್ಥಿ ವೇತನನ್ ಕೂಡಲೇ ವಿದ್ಯಾರ್ಥಿಲೆನ ಖಾತೆಗ್ ಜಮೆ ಮಲ್ಪೊಡ್.
ಪ್ರತಿಭಟನೆಡ್ ವಿಭಾಗ ಸಂಚಾಲಕೆರಾಯಿನ ಗಣೇಶ್ ಪೂಜಾರಿ, ಜಿಲ್ಲಾ ಸಂಚಾಲಕೆರಾಯಿನ ಕಾರ್ತಿಕ್ ಎಮ್, ರಾಜ್ಯ ಕಾರ್ಯಕಾರಿಣಿ ಸದಸ್ಯೆರಾಯಿನ ಸಂಹಿತಾ, ನಗರ ಸಹ-ಕಾರ್ಯದರ್ಶಿಲಾಯಿನ ಭಾವನಾ ಸೇರಿನಂಚ ಪ್ರಮುಖೆರಾಯಿನ ಭೂಷಣ್,
ಮನು, ಮಾಣಿಕ್ಯ, ಸ್ವಸ್ತಿಕ್, ನವೀನ್, ಅನಂತಕೃಷ್ಣ ಉಪಸ್ಥಿತರಿತ್ತೆರು.
by 