ಹುಬ್ಬಳ್ಳಿದ ಬಿವಿಬಿ ಕಾಲೇಜಿಡ್ ನಡತಿನ ನೇಹಾ ಹೀರೆಮಠ ಪನ್ಪಿನ ವಿದ್ಯಾರ್ಥಿನಿ ಲವ್ ಜಿಹಾದ್ ಶಂಕಿತ ಕೊಲೆ ಪ್ರಕರಣನ್ ಬೊಕ್ಕ ಕಾರ್ಕಳಡ್ ಉಂಡು ವಿಷಯದ ಪ್ರತಿಭಟನೆಗ್ ಎಬಿವಿಪಿ ಕಾರ್ಯಕರ್ತೆರೆನ ಮಿತ್ತ್ ಮಲ್ತಿನ ಎಫ್ಐಆರ್ ಖಂಡಿಸಾದ್ ಎಬಿವಿಪಿ ಉಡುಪಿ ಮಲ್ಲ ಸಂಖ್ಯೆಡ್ ಬೃಹತ್ ಪ್ರತಿಭಟನಾ ಜಾಥಾನ್ ನಗರದ ಜೋಡುಕಟ್ಟೆಡ್ಜ್ ಕವಿ ಮುದ್ದಣ್ಣ ಮಾರ್ಗವಾದ್ ಸಾಗುದ್ ಕ್ಲಾಕ್ ಟವರ್ ಡ್ ಸಂಪನ್ನ ಮಲ್ತೆರ್..
ರಾಜ್ಯ ಸಹ-ಕಾರ್ಯದರ್ಶಿ ಹರ್ಶಿತ್ ಕೊಯ್ಲ ಪಾತೆರ್ದ್ ಪ್ರತಿಭಟನೆ ಮಲ್ತಿನೇಕ್ ಪಾಡಿನ ಎಫ್ಐಆರ್ ನ ಬೊಡ್ಡು ಬೆದರಿಕೆಗ್ ಪೋಡುನ ಸಂಘಟನೆ ಎಬಿವಿಪಿಯತ್ತ್ ಮುಲ್ಪ ಹೋರಾಟಡ್ ಪಾಲ್ ಪಡೆಯಿನ ವಿದ್ಯಾರ್ಥಿಲು ಬಿರಿಯಾನಿ ಆಸೆಗಾದ್ ಅತ್ತುಂಡ ಒವ್ವೇ ಆಮಿಷಗ್ ಸೇರಿನಕುಲು ಅತ್ತ್ ಒಂಜಿ ಪೊಣ್ಣು ಮಗಳೆಗಾಯಿನ ಅನ್ಯಾಯನ್ ಖಂಡಿಸಾದ್ ನ್ಯಾಯಗೋಸ್ಕರ ಜತ್ತುದ. ಸರ್ಕಾರ ಈ ಕೂಡಲೇ ಎಚ್ಚರ ಆದ್ ವಿದ್ಯಾರ್ಥಿಲೆನ ಮಿತ್ತ್ ಮಲ್ತಿನ ಎಫ್ಐಆರ್ ನ್ ವಜಾ ಮಲ್ಪೊಡ್. ಇಜ್ಜಾಂಡ ರಾಜ್ಯಾದ್ಯಂತ ಬೃಹತ್ ಮಟ್ಟಡ್ ಪ್ರತಿಭಟನೆ ಮಲ್ಪೊಡಾಪುಂಡ್ ಪಂಡುದ್ ಎಚ್ಚರಿಕೆ ಕೊರಿಯೆರು.
ವಿದ್ಯಾರ್ಥಿನಿ ಮಾಣಿಕ್ಯ ಭಟ್ ಪಾತೆರ್ದ್ ಇಂಚಪ್ಪದ ದಿನಟ್ ಕಾಲೇಜು ಕ್ಯಾಂಪಸ್ ಲೆಡ್ ಭಯದ ವಾತಾವರಣ ಸೃಷ್ಟಿಯಾತುಂಡ್ ಅವ್ವ್ ನೇಹಾ ಹೀರೆಮಠ ಅರೆನ ಕೊಲೆ ಪ್ರಕರಣ ಆದುಪ್ಪು ಅತ್ತುಂಡ ಕಡಬಡ್ ನಡತಿನ ಆಸಿಡ್ ದಾಳಿಯಾದುಪ್ಪು ಅತ್ತುಂಡ ಉಡುಪಿಡ್ ಇದಮುಟ ನಡತಿನ ವಿಡಿಯೋ ಪ್ರಖರಣವಾದುಪ್ಪು ಉಂದೆಟಾದ್ ಎಂಕ್ಲೆಗ್ ಭದ್ರತೆದ ಕೊರತೆ ಲಕ್ಕುದ್ ತೋಜುಂಡ್. ರಾಜ್ಯ ಸರ್ಕಾರ ಈ ಕೂಡಲೇ ಈ ವಿಷಯವಾದ್ ಎಚ್ಚರ ಆವೊಡ್ ಪಂಡುದು ಆಗ್ರಹ ಮಲ್ತೆರು.
ಪ್ರತಿಭಟನೆಡ್ ವಿಭಾಗ ಸಂಘಟನಾ ಕಾರ್ಯದರ್ಶಿ ಶ್ರೀರಾಮ್ ಅಂಗೀರಸ, ಜಿಲ್ಲಾ ಸಂಚಾಲಕ ಗಣೇಶ್ ಪೂಜಾರಿ, ತಾಲೂಕು ಸಂಚಾಲಕೆರಾಯಿನ ಅಜಿತ್ ಜೋಗಿ ಬೊಕ್ಕ ಶ್ರೇಯಸ್ ಅಂಚನ್, ನಗರ ಕಾರ್ಯದರ್ಶಿ ಶ್ರೀವತ್ಸ, ರಾಜ್ಯ ಕಾರ್ಯಕಾರಿಣಿ ಸದಸ್ಯೆ ಸಂಹಿತಾ ಬೊಕ್ಕ ಪ್ರಮುಖೆರಾಯಿನ ಕಾರ್ತಿಕ್, ನವೀನ್, ಸ್ವಸ್ತಿಕ್, ವರುಣ್, ಮನು, ಮಂಗಳಗೌರಿ, ಸುಚಿತ ಬೊಕ್ಕ ಕಾರ್ಯಕರ್ತೆರು ಉಪಸ್ಥಿತರಿತ್ತೆರು.
by 