ಓಟು ದಾಯೆ ಪಾಡೊಡು?? ಓಟುದ ದಾದೆ ಮಹತ್ವ

ನಮ್ಮ ದೇಶ ಭಾರತ ವಿಶ್ವಡೇ ಏಳನೇ ಸ್ಥಾನ ಪಡೆಯಿನ ಬಾರಿ ಮಲ್ಲ ದೇಶ. ಸಂಸ್ಕೃತಿ ಸಂಪ್ರದಾಯಡ್ ಬೇತೆಕ್ಲೆಗ್ ಮಾದರಿ ಆಯಿನ ನಮ್ಮ ದೇಶದ ಜನೋಕ್ಲೆನ ಮೂಲಭೂತ ಹಕ್ಕುಲೆಡ್ ವೋಟುಲಾ ಒಂಜಿ ವಿಶಿಷ್ಟವಾಯಿನ ಹಕ್ಕ್.
ವೋಟು ಪಂಡ ನಮ್ಮ ದೇಶನ್ ಆಲೆರೆ ಬೋಡಾಪಿ ನಾಯಕೆರೆನ್ ನಮನೇ ಆಯ್ಕೆ ಮಲ್ಪರೆ ನಂಕ್ ತಿಕ್ಕಿನ ಒಂಜಿ ಮಲ್ಲ ಹಕ್ಕ್.
ಭಾರತ ದೇಶ ಪ್ರಜಾಪ್ರಭುತ್ವ ದೇಶ. ಮುಲ್ಪ ಜನೊಕ್ಲೆ ತಂಕ್ಲೆಗ್ ಬೋಡಾಪಿ ಸರಕಾರನ್ ಆಯ್ಕೆ ಮಲ್ತೊನುವೆರ್.
ದುಂಬು ಓಟು ಪಾಡುನ ಪ್ರಾಯ 21 ಇತ್ತುಂಡ್. ಆಂಡ ಇತ್ತೆ 1989 ಡ್ದ್ ಬೊಕ್ಕ ಅವೆನ್ 18 ಮಲ್ದೆರ್.18 ವರ್ಸ ಪ್ರಾಯದ ಪ್ರತಿ ಒರಿಲಾ ಓಟು ಮಲ್ಪುನ ಹಕ್ಕ್‌ನ್ ಪಡೆವೊಂದೆರ್. ವೋಟ್ ಜನೋಕ್ಲೆನ ಜವಾಬ್ದಾರಿನ್ ತೆರಿಪಾವುಂಡು. ನಮ್ಮ ದೇಶದ ಭದ್ರ ಭವಿಷ್ಯ ರೂಪಣೆ ಮಲ್ಪುನ ಒರಿ ನಾಯಕನ್ ಆಯ್ಕೆ ಮಲ್ಪುನ ಜವಾಬ್ದಾರಿನ್ ನಂಕ್ ಕೊರ್ಪುನ್ಡ್. ದೇಶದ ಅಭಿವೃದ್ಧಿ ಪಂಡ ಜನೋಕ್ಲೆನ ಅಭಿವೃದ್ಧಿ ಆಯಿಲೆಕ್ಕನೆ. ಅಂಚ ಆದಿಪ್ಪುನಗ ನಮ ಓಟು ಮಲ್ಪನಗ ಮಸ್ತ್ ಯೋಚನೆ ಮಲ್ತ್‌ದ್ ಓಟು ಮಲ್ಪೊಡಾಪುಂಡು. ಒವ್ವೆ ಒಂಜಿ ಪಕ್ಷ ಕೊರ್ಪಿನ ಒವ್ವೆ ಒಂಜಿ ಆಸೆ ಆಮಿಷಗ್ ನಮ ಬಲಿ ಆವಾoದೆ ನಮ್ಮ ಮನಸ್ಗ್ ಎಡ್ಡೆ ಆಯಿಲೆಕ್ಕ ನಮ ಓಟು ಮಲ್ತ್‌ದ್ ದೇಶ ಅಭಿವೃದ್ಧಿ ಮಲ್ಪುನ ನಾಯಕನ್ ಆಯ್ಕೆ ಮಲ್ಪೋಡು.
ಆಂಡ ಇತ್ತೆ ಪೂರಾ ಉಲ್ಟಾ ಪಲ್ಟಾ ಆವೊಂದು ಉಂಡು. ದೇಶದ ಭವಿಷ್ಯದ ಬಗ್ಗೆ ಯೋಚನೆ ಮಲ್ಪಂದೆ ತನ್ಕ್ಲೆನ ಪ್ರತಿಷ್ಠೆ ಪದವಿಗಾದ್ ಅವ್ವೆತೋ ಆಸೆಲೆನ್ ಪುಟ್ಟಾದ್ ಮೋಸೊಡು ವೋಟು ಪಡೆದ್ ಗೆಂದ್‌ದ್ ಬರ್ಪಿನ ವಿಷಯ ನಮ ಮಾತೆರೆಗ್ಲಾ ತೆರಿದುಂಡು. ಇಂಚ ಆಂಡ್ ಪಂದಾoಡ ನಮಕ್ ತಿಕ್ಕಿನ ಶ್ರೇಷ್ಠ ಹಕ್ಕ್‌ನ್ ನಮ ದುಡ್ದುದ ಆಸೆಗ್ ಮಾರೋನ್ಯ ಲೆಕ್ಕ. ಕೆಲವೊಂಜಿ ಕೋಡಿಡ್ ಬಲಾತ್ಕಾರವಾದ್ ಜೀವ ಬೆದರಿಕೆದ ಪೋಡಿಗೆ ಕಟ್ಟದ್ ಓಟು ಪಾಡ್ಪಾವೊoಬಿನ ಸಂಗತಿಲುಲಾ ಉಂಡು. ಆಂಚಾದಿಪ್ಪುನಗ ವಿದ್ಯಾವಂತ ಜನೋಕ್ಲು ಉಂದು ಪೂರಾ ಏರೆಗ್ ಬೋಡು ಪಂದ್ ಇಂಚಪ ವೋಟು ಪಾಡುನನೇ ಕಮ್ಮಿ ಮಲ್ದೆರ್. ವಿದ್ಯಾವಂತ ಜನಕ್ಲೆಡ್ದ್ ಬರವು ಸರವು ಬರಂದಿನ ಜನೊಕ್ಲೆ ಹೆಚ್ಚ ವೋಟ್ ಮಲ್ಪುನ ಅಂಕಿ ಸಂಖ್ಯೆ ಇನಿ ಕೋಡೆಡ್ ಜಾಸ್ತಿ ಉಂಡು. ಇಂಚ ಆಂಡ ನಮ್ಮ ದೇಶನ್ ಆಲರೆ ಬೋಡಾಪಿ ಸದೃಢ ನಾಯಕನ ಕೊರತೆ ತೋಜಿದ್ ಬರ್ಪುನ್ಡ್. ಉಂಟಾಯಿ ಸರಕಾರಗ್ ದೇಶದ ಸಮಸ್ಯೆಲೆನ್ ಪರಿಹಾರ ಮಲ್ಪರೆ ಆವಾoದೆ ಸರಕಾರ ತನ್ನ ಕಾರ್ಯಾವಧಿ ಮುಗಿಯೋಡ್ಡನೇ ತನ್ನ ಪದವಿಗ್ ರಾಜೀನಾಮೆ ಕೊರೊಡು ಆಪುಂಡು. ಇಂಚ ಆಂಡ ನಮ್ಮ ದೇಶದ ಏಳಿಗೆ ಕುಂಠಿತ ಆಪುಂಡು.ಆಯಿಕಾಸ್ರ ಅಕ್ಷರ ಜ್ಞಾನ ಇತ್ತಿನಕ್ಲು ವೋಟು ದಾಯೆ ಪಾಡೋಡು ವೋಟುದ ಮಹತ್ವ ದಾದ ಪಂದ್ ತೆರಿಯೋನೊಡು. ವೋಟುದ ಮಹತ್ವನ್ ಜನಕ್ಲೆಗ್ ತೆರಿಪಾರೆಗಾದ್ ಸರಕಾರ ಕೆಲವೊಂಜಿ ಸಭೆ ಲೆತ್ತ್‌ದ್,, ನನ ಕೆಲವು ಮಾಧ್ಯಮದ ಮುಖಾಂತರ ಮಾಹಿತಿನ್ ಕೊರೊಂದು ಉಂಡು.
ಮಾತೆರ್ಲ ನೆತ್ತ ಉಪಯೋಗನ್ ಪಡೆದ್ ನಮ್ಮ ದೇಶದ ಅಭಿವೃದ್ಧಿನ್ ನೆನಪು ದಿವೊಂದು ಒವ್ವೆ ಒಂಜಿ ದುಡ್ದುದ ಆಸೆಗ್ ಬಲಿ ಆವಾoದೆ ನಮ್ಮ ದೇಶನ್ ರಕ್ಷಣೆ ಮಲ್ಪುನ ಮಲ್ಲ ಜವಾಬ್ದಾರಿ ನಮ್ಮ ತರೆತ ಮಿತ್ತ್ ಉಂಡು.

ನಮ್ಮ ಪ್ರಜಾಪ್ರಭುತ್ವ ದೇಶಡ್ ಚುನಾವಣೆ ಬೊಕ್ಕ ಓಟು ಒಂಜಿ ಪೈಸೆದ ರಡ್ಡ್ ಮೋನೆ ಇತ್ತಿನಲ್ಕ. ಓಟು ನಮ್ಮ ರಾಜಕೀಯದ ಮಿತ್ತ್ ರಾಜಕೀಯ ನಾಯಕೆರ್ನಾ ಕೆಲಸದ ಮಿತ್ತ್ ಕಣ್ಣ್ ದೀದ್ ಅಕ್ಲೆನ್ ನಮ್ಮ ಕಂಟ್ರೋಲ್ ದಿವೋನರೆ ನಮ್ಮ ಸಂವಿಧಾನ ನಂಕ್ ಕೊರ್ನ್ಯ ಒಂಜಿ ಆಯುಧ. ಸಂವಿಧಾನ ಪನ್ಪಿನಲ್ಕ ಜನಕ್ಲೆಡ್ದ್ ರಚನೆ ಆಯಿನ ಸರಕಾರ ಜನಕ್ಲೆನ ಆಸೆದಲ್ಕ ನಡತಿಜಿಡಾ ಆ ಸರಕಾರನ್ ಅಯಿತ ಅಧಿಕಾರ ಮುಗಿಯೋಡ್ಡನೇ ಅಧಿಕಾರಡ್ದ್ ತಿರ್ತ್ ಜಪುಡಾವುನಾ ಹಕ್ಕ್ ಓಟುಗುಂಡು..ನಮ್ಮ ಕರ್ನಾಟಕ ರಾಜ್ಯದ ಜನಸಂಖ್ಯೆ ಸುಮಾರ್ 6 ಕೋಟಿ ಉಂಡು.2018 ನೇ ವರ್ಸಡ್ ಚುನಾವಣ ಆಯೋಗ ಮಲ್ತಿನ ಪರೀಕ್ಷೆದ ಪ್ರಕಾರ ಓಟುದ ಹಕ್ಕ್ ಪಡೆಯಿನ ಜನೋಕ್ಲು ಖಾಲಿ 4.9 ಕೋಟಿ ದಾತ್. ಅತ್ತಾವಂದೆ ಬೆಂಗಳೂರುಡ್ 12 ಕೋಟಿ ಜನಸಂಖ್ಯೆ ಉಂಡು ಅಲ್ಪ ಕಾಲಿ 85,92, 815 ಜನಕ್ಲು. ಓಟು ಪಾಡುವೆರ್. ನಮ್ಮ ದೇಶದ ಮಸ್ತ್ ಬೇಜಾರ್ದ ಸಂಗತಿ ದಾದಾ ಪಂಡ ಕಲ್ತಿನಕ್ಲು ಬೊಕ್ಕ ಜವ್ವನೆರ್ ಓಟು ಪಾಡರೆ ಮನಸ್ ಮಲ್ಪುಜೆರ್. ಓಟು ಎಂಚ ಮಲ್ಪುನು.. ಓಟುದ ಅರ್ಜಿನ್ ಎಂಚ ದಿಂಜಾವುನು ನೆತ್ತ ಬಗ್ಗೆ ಜವ್ವನೆರೆಗ್ ಕಮ್ಮಿ ತಿಳುವಳಿಕೆ ನೆಕ್ಕ್ ಕಾರಣ. ಅಂಚೆನೇ ಕೆಲವೊಂಜಿ ಸರ್ತಿ ಅರ್ಜಿ ಫಾರಂ ದಿಂಜಾದ್ ಕೊರಿನಕ್ಲೆನ ಪುದರ್ ಲಿಸ್ಟ್‌ಡ್ ಸೇರ್ಪಡೆ ಆವೊಂದುಲಾ ಇಪ್ಪುಜಿ. ಅಂಚನೇ ಕೆಲವು ಜನೋಕ್ಲೆಡ ವೋಟುದಪಗ ಬೋಡಾಪಿನ ದಾಖಲೆ ಪತ್ರೊಲ್ ಅಕ್ಲೆಡ ಇಪ್ಪಂದಿನಯಿಡ್ದಾವರ ವೋಟು ಚಲಾವಣೆ ಮಲ್ಪರೆ ಆವೊಂದಿಜ್ಜಿ. ಈ ಸಮಸ್ಯೆಲೆನ್ ಪೂರಾ ತೆರಿನ ಸರಕಾರ ಅವೇಕ್ ಬೋಡಾಪಿ ಸರಿತ ಕ್ರಮನ್ ಕಾರ್ಯರೂಪಗ್ ಕನತ್‌ದ್ ಆಯಿನಾತ್ ಜವ್ವನೇರ್ ದುಂಬು ಬತ್ತ್‌ದ್ ಓಟು ಪಾಡುಲೆಕ್ಕ ಪ್ರಯತ್ನ ಬರೊಂದುಂಡು.
ಓಟು ನಂಕ್ ಒಂಜಿ ಮಸ್ತ್ ಪೆರ್ಮೆದ ಮಸ್ತ್ ಬಿಲೆ ಕೊರ್ಪಿನ ಹಕ್ಕ್. ಆ ಹಕ್ಕ್ ನ್ ನಮ ಸರಿಯಾದ್ ಉಪಯೋಗ ಮಲ್ಪೊಡು. ಕಾಲಿ ಓಟುದ ಗುರುತುದ ಚೀಟಿ ನಮಡ ಇತ್ತುಂಡ ಅಯಿಕ್ ದಾಲ ಬಿಲೆ ಇಜ್ಜಿ. ಚುನಾವಣೆ ಆಪಿನ ದಿನ ಆ ಚೀಟಿನ್ ಪಸೊಂದು ಓಟುದ ಬೂತುದಡೆ ಪೋದು ಓಟು ಮಲ್ತ್ oಡ ಮಾತ್ರ ನಮ ಒಂಜಿ ಬಲಿಷ್ಠವಾಯಿನ ಸರಕಾರನ್ ಅಧಿಕಾರಗ್ ಕನವರೆಗ್ ಸಾಧ್ಯ.
ನಮ ಓಟು ಮಲ್ತ್ ದ್ ಗೆಂದಾಯಿನ ಸರಕಾರದ ಗುರ್ಕಾರನ ಯೋಚನೆ ಯೋಜನೆದ ಮಿತ್ತ್ ನಮ್ಮ ಭವಿಷ್ಯ ನಿರ್ಧಾರ ಆಪುಂಡು. ನಮ್ಮ ದೇಶದ ಎಡ್ಡೆ ಪಡ್ಕೆ ಪೂರಾ ಓಟು ಪಾಡುನಕ್ಲೆನ ಕೈಟ್ ಉಂಡು. ಸಧ್ಯದ ದಿನೊಟು ನಮ್ಮ ದೇಶ ಪ್ರತಿಯೊಂಜಿ ಕ್ಷೇತ್ರಡ್‌ಲಾ ಅಭಿವೃದ್ಧಿ‌ದ ಸಾದಿಡೆ ನಡತ್ತೊಂದು ಉಂಡು. ನಮ್ಮ ದೇಶಗ್ ಸ್ವಾತಂತ್ರ ಸಿಕ್ಕ್‌ದ್ 70 ವರ್ಸ ಮುಟ್ಟಲ ಭ್ರಷ್ಟಚಾರ ಪನ್ಪಿ ಸುಳಿಕ್ ಸಿಕ್ಕ್ ತಡ್ಪೊಂದು ಇತ್ತುಂಡ್. ಆಂಡ ಇಂಚಪ ಈ ಭ್ರಷ್ಟಾಚಾರ ಪನ್ಪಿ ಸುಳಿನ್ ಮುದೆಲ್‌ಡ್ದೇ ಕಟ್ತ್ ದಕ್ಕುನ ಕೆಲವೊಂಜಿ ಕಠಿಣ ಕ್ರಮ ನಮ್ಮಲ್ಪ ಸದ್ಯ ನಡತೊಂದು ಉಂಡು.
ಆಂಡ ಉಂದೆನ್ ಪೂರಾ ತೂವರೆ ಆವಂದಿನ ಕೆಲವೊಂಜಿ ಪಕ್ಷದ ಜನಕ್ಲು ಬೋಡ್ಚ್ಯಾವಂದಿನ ಕೆಲಸನ್ ಧರ್ಮದ ಪುದರ್ಡ್ ಮಲ್ತೊoದು ಪಾಪದ ಜನೋಕ್ಲೆನ್ ಬಲಿ ಕೊರೊoದು ಉಲ್ಲೆರ್.ಜಾತಿ,,ದೇಶ, ಧರ್ಮ ಜನೋಕ್ಲೆನ ಬಗ್ಗೆ ಬೊಡ್ಚಾವಂದಿನ ಪನೊoದು, ದ್ವೇಷ ಸಾಧನೆ ಮಲ್ಪುನoಚಿನ ನಾಯಕೆ ನಂಕ್ ಏಪೊಗ್ಲ ಬೊಡ್ಚಿ. ಒಂಜಿ ದೇಶನ್ ಆಳುನ ನಾಯಕೆ ನಿಷ್ಠಾವಂತೆ ಆದಿಪ್ಪೊಡು. ಇಡೀ ವಿಶ್ವನೇ ತನ್ನ ಇಲ್ಲ್, ಆ ಇಲ್ಲಡ್ ಇಪ್ಪುನ ಜನೊಕ್ಲೇ ತನ್ನ ಕುಟುಂಬ, ಅಕಲ್ನ ಏಳಿಗೆನೇ ತನ್ನ ಬದ್ಕ್‌ದ ಮುಖ್ಯ ಉದ್ದೇಶ ಪನ್ಪಿ ಮನೋಭಾವನೆ ಇಪ್ಪುನ ಮುಖoಡೆ ನಂಕ್ ಬೋಡು.ಅಂಚಿನ ಒಂಜಿ ಮುಖಂಡನ ಆಯ್ಕೆ ನಮ್ಮ ಕೈಟ್ ಉಂಡು.
ಅಂಚ ಬಲೆ ಮಾತೆರ್ಲ ಓಟುದ ಮಹತ್ವನ್ ತೆರಿಗ ಬೊಕ್ಕ ವೋಟು ಮಲ್ತ್‌ದ್ ಹಕ್ಕ್‌ಡ್ ನಮ್ಮ ದೇಶದ ಸರಕಾರನ್ ನಮ ರಚನೆ ಮಲ್ಪುಗ.
ನೋಟುಗಾದ್ ವೋಟು ಮಲ್ಪಡೆ
ದೇಶದ ಅಭಿವೃದ್ಧಿದಾ ಮಿತ್ತ್ ಒಂಜಿ ನೋಟ ದಿವೊಂದು ಓಟು ಮಲ್ಪುಲೇ
ಜೈ ಹಿಂದ್

ಪ್ರಫುಲ್ಲ ದಿನೇಶ್ ಶೆಟ್ಟಿ ಡೊಂಬಿವಲಿ
ತುಲುವೆರೆ ಕಲ