ಉಡುಪಿ ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘದ ಆಶ್ರಯಡ್ ಉಡುಪಿ ಗಿರಿಜಾ ಗ್ರೂಪ್ ಆಫ್ ಕನ್ಸರ್ನ್ ಬೊಕ್ಕ ಉಡುಪಿ ಪತ್ರಿಕಾ ಭವನ ಸಮಿತಿದ ಸಹಯೋಗದೊಟ್ಟುಗ್ ಸಂಘದ ಸ್ಥಾಪನಾ ದಿನಾಚರಣೆನ್ ಎ.12ಗ್ ಕಾಂಡೆ 10.30ಗ್ ಉಡುಪಿ ಪತ್ರಿಕಾ ಭವನಡ್ ಆಯೋಜನೆ ಮಲ್ದುಂಡ್ ಪಂಡುದು ಸಂಘದ ಜಿಲ್ಲಾಧ್ಯಕ್ಷ ರಾಜೇಶ್ ಶೆಟ್ಟಿ ಅಲೆವೂರು ತೆರಿಪಾದೆರ್.
ಉಡುಪಿಡ್ ನಡತಿನ ಸುದ್ದಿಗೋಷ್ಠಿಡ್ ಪಾತೆರಿನ ಆರು, ಉಡುಪಿ ತಾಲೂಕು ಕಾರ್ಯನಿರತ ಪತ್ರಕರ್ತರ ಸಂಘ 1997ಡ್ ಉಡುಪಿ ಪ್ರತ್ಯೇಕ ಜಿಲ್ಲೆಯಾದ್ ರಚನೆ ಆಯಿಬೊಕ್ಕ ಉಡುಪಿ ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘ ರೂಪಾಂತರ ಆತುಂಡ್. ನೆತ್ತ ಉದ್ಘಾಟನೆ 1998ದ ಎ.12ತಾರೀಕುಗ್ ಉಡುಪಿ ಎಂಜಿಎಂ ಕಾಲೇಜಿದ ಸಭಾಂಗಣಡ್ ನಡದಿತ್ತುದ್. ಆ ದಿನನ್ ಕರಿನ ವರ್ಷ ಸಂಘದ ರಜತ ಮಹೋತ್ಸವ ಸಂಭ್ರಮಡ್ ಸ್ಥಾಪನಾ ದಿನವಾದ್ ಆಚರಣೆ ಮಲ್ಪರೆಗ್ ನಿರ್ಧಾರ ಮಲ್ತುದ್ ಚಾಲನೆ ಕೊರ್ತುಂಡ್.ಆ ಪ್ರಕಾರ ಈ ವರ್ಷಲಾ ಸಂಘ ಸ್ಥಾಪನಾ ದಿನನ್ ಆಚರಣೆ ಮಲ್ಪರೆಗ್ ಉದ್ದೇಶ ದೀಯೊಂದ್, ದುಂಬಗ್ ಪ್ರತಿವರ್ಷ ಈ ದಿನನ್ ಸ್ಥಾಪನಾ ದಿನಾಚರಣೆಯಾದ್ ಆಚರಣೆ ಮಲ್ಪುಂಡ್ ಪಂಡೆರು.
ಸ್ಥಾಪನಾ ದಿನಾಚರಣೆನ್ ಉಡುಪಿ ಮಾನವ ಹಕ್ಕುಗಳ ರಕ್ಷಣಾ ಪ್ರತಿಷ್ಠಾನದ ಅಧ್ಯಕ್ಷ ಡಾ.ರವೀಂದ್ರನಾಥ್ ಶ್ಯಾನುಭಾಗ್ ಉದ್ಘಾಟನೆ ಮಲ್ಪುವೆರು. ಅಧ್ಯಕ್ಷತೆಡ್ ಸಂಘದ ಅಧ್ಯಕ್ಷ ರಾಜೇಶ್ ಶೆಟ್ಟಿ ಅಲೆವೂರು ಉಪ್ಪುವೆರು. ಸಂಘದ ಸ್ಥಾಪಕ ಪ್ರಧಾನ ಕಾರ್ಯದರ್ಶಿ ಬೊಕ್ಕ ಕುಂದಪ್ರಭಾ ವಾರಪತ್ರಿಕೆದ ಸಂಪಾದಕ ಯು.ಎಸ್.ಶೆಣೈ ಸ್ಥಾಪನಾ ದಿನದ ಬಗ್ಗೆ ಪಾತೆರುವೆರು.
ಸಂಘ ಸ್ಥಾಪನೆಡ್ದ್ ಇದಮುಟ್ಟ ಸೇವೆ ಸಲ್ಲಿಸಾದಿನ ಸಂಘದ ಅಧ್ಯಕ್ಷೆರು ಬೊಕ್ಕ ಪ್ರಧಾನ ಕಾರ್ಯದರ್ಶಿಲೆನ ನಾಮಫಲಕದ ಅನಾವರಣನ್ ಗಿರಿಜಾ ಗ್ರೂಪ್ ಆಫ್ ಕನ್ಸರ್ನ್ ದ ಆಡಳಿತ ನಿರ್ದೇಶಕ ರವೀಂದ್ರ ಕೆ.ಶೆಟ್ಟಿ ಅನಾವರಣ ಮಲ್ಪುವೆರು. ಈ ಸಂದರ್ಭಡ್ ಹಿರಿಯ ಪತ್ರಕರ್ತ ಸುಭಾಶ್ಚಂದ್ರ ವಾಗ್ಳೆರೆಗ್ ಸ್ಥಾಪನಾ ದಿನದ ಗೌರವ ಸಲ್ಲಿಸಾವೆರ್.
ಸಂಘದ ರಜತ ಮಹೋತ್ಸವ ಸಮಿತಿದ ಸಂಚಾಲಕ ಮುಹಮ್ಮದ್ ಶರೀಫ್, ರಾಷ್ಟ್ರೀಯ ಸಮಿತಿ ಸದಸ್ಯ ಅರುಣ್ ಕುಮಾರ್ ಶಿರೂರು, ರಾಜ್ಯ ಸಮಿತಿ ಸದಸ್ಯ ಕಿರಣ್ ಮಂಜನಬೈಲು, ಪತ್ರಿಕಾ ಭವನ ಸಮಿತಿ ಸಂಚಾಲಕ ಅಜಿತ್ ಆರಾಡಿ, ಸಂಘದ ಪ್ರಧಾನ ಕಾರ್ಯದರ್ಶಿ ನಝೀರ್ ಪೊಲ್ಯ, ಕೋಶಾಧಿಕಾರಿ ಉಮೇಶ್ ಮಾರ್ಪಳ್ಳಿ ಉಪಸ್ಥಿತರಿಪ್ಪುವೆರು ಪಂಡುದು ಆರು ಮಾಹಿತಿ ಕೊರಿಯೆರು.
ಸುದ್ದಿಗೋಷ್ಠಿಡ್ ಪತ್ರಿಕಾ ಭವನ ಸಮಿತಿದ ಸಹಸಂಚಾಲಕ ಅಂಕಿತ್ ಶೆಟ್ಟಿ, ಉಡುಪಿ ಜಿಲ್ಲಾ ಕಾರ್ಯಕಾರಿ ಸಮಿತಿದ ಸದಸ್ಯೆರಾಯಿನ ಮೈಕಲ್ ರೊಡ್ರಿಗಸ್, ಹರೀಶ್ ಕುಂದರ್ ಉಪಸ್ಥಿತರಿತ್ತೆರು
by 