ಕರ್ನಾಟಕ ಸಮುದಾಯ ಬಾನುಲಿ ಕೇಂದ್ರೊಲೆನ ಸ್ಥಾಪಕಾಧ್ಯಕ್ಷೆರಾಯಿನ ಡಾ.ರಶ್ಮಿ ಅಮ್ಮೆಂಬಳ ಮೆರೆಗ್ ಒಡಿಪು ತುಳುಕೂಟದ ವತಿಡ್ದ್ ಮಾನಾದಿಗೆ ನಡತುಂಡ್.ಜುಲೈ 16 ತಾರೀಕುದಾನಿ ಒಡಿಪುದ ಜಗನ್ನಾಥ ಸಭಾಭವನೊಡ್ ನಡತಿನ ತುಳುಕೂಟದ ಮದರೆಂಗಿದರಂಗ್ ಲೇಸ್ ಡ್ ಮೆರೆಗ್ ಈ ಮಾನಾದಿಗೆ ಕೊರಿಯೆರ್.
ಮಾಸ್ಟ್ರೆನ ಮಗಲಾಯಿನ ಡಾ.ರಶ್ಮಿ ಅಮ್ಮೆಂಬಳ ಮೇರ್ ಮಾಧ್ಯಮ, ಶಿಕ್ಷಣ, ಸಮಾಜಸೇವೆ ಬೊಕ್ಕ ಸಂಶೋಧನಾ ಕ್ಷೇತ್ರೊಲೆಡ್ ಸುಮಾರು 22 ವರ್ಸೊದಿಂಚಿ ಬೇಲೆಮಲ್ತೊಂದುಲ್ಲೆರ್. ತುಳು ಎಂ.ಎ ಪದವಿ, ಸಮೂಹ ಸಂವಹನ ಬೊಕ್ಕ ಮಾಧ್ಯಮಡ್ ಎಂ.ಎ ಪದವಿ, ಸಮಾಜಶಾಸ್ತ್ರಡ್ ಎಂ.ಎ ಪದವಿ, ‘ಮಾಧ್ಯಮ ಮತ್ತು ಮಹಿಳೆ’ ಪನ್ಪಿ ವಿಷಯದ ಮಹಾಪ್ರಬಂಧಗ್ ಎಂ.ಫಿಲ್ ಪದವಿ, ‘ದಿ ಇಂಪಾಕ್ಟ್ ಆಫ್ ಕಮ್ಯುನಿಟಿ ರೇಡಿಯೊ ಇನ್ ಸೋಶಿಯೋ ಕಲ್ಚರಲ್ ಟ್ರಾನ್ಸಿಶನ್ ಇನ್ ಕರ್ನಾಟಕ” ಪನ್ಪಿ ಮಹಾ ಪ್ರೌಢ ಪ್ರಬಂಧಗ್ ಪಿ.ಹೆಚ್ ಡಿ ಪದವಿ ಪಡೆತೆರ್.ಸಮುದಾಯ ಬಾನುಲಿಡೇ ಕೆಲಸ ಮಲ್ತೊಂದು ಸಂಶೋಧನೆ ಮಲ್ತ್ ದ್ ಪಿ.ಹೆಚ್ ಡಿ ಪದವಿ ಮಲ್ತಿನೆಟ್ ಬಾರತ ದೇಸೊಡು ಮೇರೇ ಸುರುತಾರಾದುಲ್ಲೆರ್.ಮೇರ್ ಬರೆಯಿನ ಸುಮಾರ್ 25ಡ್ದ್ ಎಚ್ಚ ಸಂಶೋಧನಾ ಬರವುಲು ರಾಷ್ಟ್ರೀಯ, ಅಂತರಾಷ್ಟ್ರೀಯ ಗ್ರಂಥೊಲೆಡ್ ಪ್ರಕಟ ಆತ್ಂಡ್ ಮಾತ್ರ ಅತ್ತಂದೆ ದೇಸೊದ ಬೇತೆ ಬೇತೆ ಊರುಡು ಅಯಿನ ವಿಚಾರಸಂಕಿರಣೊಲೆಡ್ಲಾ ಪಾಲ್ ಪಡೆಯಿನ ಕೀರ್ತಿ ಮೆರೆನವು.ಸದ್ಯೊಡೆ ಮೇರ್ ಬರೆಯಿನ 3 ಬೂಕುಲು ಪ್ರಕಟ ಆಯೆರೆಗುಂಡು. ಮೇರ್ ಮಣಿಪಾಲ ಮಾಹೆದ ಮಣಿಪಾಲ್ ಇನ್ಸ್ಟಿಟ್ಯೂಟ್ ಆಫ್ ಕಮ್ಯುನಿಕೇಶನ್ ಕ್ಯಾಂಪಸ್ಡುಪ್ಪುನ ‘ರೇಡಿಯೊ ಮಣಿಪಾಲ್’ ಸಮುದಾಯ ಬಾನುಲಿ ಕೇಂದ್ರಡ್ ಸಹಾಯಕ ಪ್ರಾಧ್ಯಾಪಕೆರ್ ಬೊಕ್ಕ ಸಂಯೋಜಕೆರಾದ್, ಕರ್ನಾಟಕ ಸಮುದಾಯ ಬಾನುಲಿ ಕೇದ್ರೊಲೆನ ಸಂಘದ ಸ್ಥಾಪಕಾಧ್ಕ್ಷೆರಾದುಲ್ಲೆರ್.
ಈ ಪೊರ್ತುಡ್ ತುಳುಕೂಟದ ಗುರ್ಕಾರೆರಾಯಿನ ಬಿ.ಜಯಕರ ಶೆಟ್ಟಿ ಇಂದ್ರಾಳಿ,ಶ್ರೀಮತಿ ಶ್ವೇತಾ ಜಯಕರ ಶೆಟ್ಟಿ ಇಂದ್ರಾಳಿ,ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆ ಉಡುಪಿದ ಸಹಾಯಕ ನಿರ್ದೇಶಕಿಯಾಯಾಯಿನ ಶ್ರೀಮತಿ ಪೂರ್ಣಿಮಾ,ಉದ್ಯಾವರ ಎಮ್ಈಟಿ ಆಂಗ್ಲಮಾಧ್ಯಮ ಶಾಲೆದ ಆಡಳಿತಾಧಿಕಾರಿ ಡಾ.ಜುನೇದಾ ಸುಲ್ತಾನ್, ತುಳುಕೂಟದ ಕಾರ್ಯಂತೆರಾಯಿನ ಗಂಗಾಧರ ಕಿದಿಯೂರು,ಪಣವುದ ಪಾಲವೆರಾಯಿನ ಚೈತನ್ಯ ಎಮ್.ಜಿ.,ಒತ್ತು ಗುರ್ಕಾರ್ಲು ಮನೋರಮ ಸುಂದರ್ ಶೆಟ್ಟಿ, ಸದಾಶಿವ ಭಟ್,ದಿವಾಕರ್ ಸನಿಲ್, ಮೊಹಮ್ಮದ್ ಮೌಲಾ, ಭುವನಪ್ರಸಾದ್ ಹೆಗ್ಡೆ,ಮದರಂಗಿದರಂಗ್ ದ ಸಂಚಾಲಕಿ ಯಾಯಿನ ಯಶೋದ ಕೇಶವ್ ಉಪಸ್ಥಿತರಿತ್ತೆರ್.ವಿದ್ಯಾ ಸರಸ್ವತಿ ಕಜ್ಜೊದ ನಿರೂಪಣೆ ಮಲ್ತುದ್ ರಶ್ಮಿ ಶೆಣೈ ಡಾ.ರಶ್ಮಿ ಅಮ್ಮೆಂಬಳ ಮೆರೆನ ಪರಿಚಯ ಮಲ್ತೆರ್.
by 