ಆಟಿಡ್ ಮದರಂಗಿ ಪಾಡಡೆ ಐತ ಮಿತ್ ಕುಲೆಕುಲು ಕುಲ್ಲುವ

ಅಂದ್ ಅಜ್ಜಿ ಪಂತಿನ ಈ ಪಾತೆರ ನೆನಪಾವರೆ ಕಾರಣ ಉಡುಪಿದ ತುಳು ಕೂಟ ದಕುಲು ಆಯೋಜನೆ ಮಲ್ದಿನ ಮದರಂಗಿದ ಲೇಸ್ . ವಿದ್ಯಕ್ಕ ಒಂಜಿ ಮೆಸೇಜ್ ಪಾಡುದಿತ್ತೆರ್. ಮದರಂಗಿ ಕಡೆದ್ ರಡ್ ಕೈಕ್ ಲ ದುಂಬುದಕುಲು ದೀಪಿನಲಕ ಮದರಂಗಿ ದೀಲೆ.ಅಂಚನೆ ಪತ್ ಬಿರೆಲ್ ದ ತುದಿಕ್ ಐತಾನೆ ಟೊಪ್ಪಿ ಪಾಡುಲೆ . ಅಂಚನೆ ನಿಕುಲು ದೀತಿನ ಫೋಟೋಲ ಕಡಪುಡ್ಲೆ ಪಂಡ್. ಎಂಕು ತೆಲಿಪರೆ ಬತ್ತುಂಡಲ ಆವ್ ಆವ್ ಪಂಡೆ. ಬಯ್ಯದನ ಏರೆ ಪುರುಸೊತ್ತುಂಡು? ಅಟಿಲ್ ಮಲ್ಪುನಾನೇ ಅಂಡ್ ಪಂಡ್ ಎನ್ನುದು ತೂಕ ಬೇತೆ ಬೇಲೆ ಇಪ್ಪರೆ ಪೋದು ಮದೆತ್ ಲ ಪೋಂಡು.ಒಂತೆ ಪೊರ್ತುಡು ತೂಪೆ.ತುಳು ಕೂಟದ ಅಕ್ಕನಕಲೆನ ಒಂಜಿಯೊಂಜೇ ಫೋಟೋ ಗ್ರೂಪ್ ಡ್ ಬರ್ನಗ ಅಯ್ಯೋ ಏನ್ ಏಪ ಪಾಡುನು ? ಮದರಂಗಿ ಲ ಇಜ್ಜಿ. ದಾದ ಮಲ್ಪುನು? ಒಯ್ಕುಲ ಎಲ್ಲೆ ಆವಡ್. ಎಂಚಲ ಆರೇ ಪಂತೆರ್. ಕಾಂಡೆ ಪತ್ ಗಂಟೆದುಲಯಿ ಪಾಡುಲೆ ಪಂಡ್. ಎಂಚಲ ಪೊರ್ತು ಉಂಡು ಪಂಡ್ ಎನ್ನುದಿನಾಲ್ ಕಾಂಡೆ ಬೇಗ ಲಕುದು ಕಾಂಡೆದ ತಿಂಡಿ ತಿನಿಸ್ ಮಲ್ತ್ ಮಲ್ಲ ಮಗೆ ಬೊಕ್ಕ ಎನ್ನಾರ್ ಪೋಯಿನೇಟ್ ಬೊಕ್ಕ ಮದರಂಗಿ ಪತಾರೆ ಅಂಗಡಿಗ್ ಬಲಿತೆ. ಬತ್ತುದು ಪೊರ್ಲುದ ಸೀರೆ ಪಾಡೊಂಡೆ.ದಾಯೆಗ್ ಪಂಡ ಅಕ್ಕೆನಕುಲು ಪೊರ್ಲು ಪೊರ್ಲುದ ಸೀರೆ ಸುತ್ತೊಂದು ಪಟ ಕಲೆವನಗ ಯಾನೊಂಜಿ ಕುರೆ ಕಟ್ಟುನ ದಾಯೆಗ್ ಪಂಡ್. ಕನತಿನ ಮದರಂಗಿ ಕೋನ್ ಬುಡ್ಪಾದ್ ತಟ್ಟೆಗ್ ಪಾಡ್ದ್ ದಮ್ಮ ಕೈಟ್ ದತ್ತ ಕೈತ ನಡುಟು ಮಲ್ಲ ದೋಸೆದಲಕ ಉರುಂಟು ದೀದ್ ಸುತ್ತ ಏಳು ಇಡ್ಲಿ ದೀತಿನಲಕ ಉರುಂಟು ಬುಡ್ಪಾವೊಂದು ಕುಲ್ಲಿಯೆ. ರಡ್ ಕೈಟ್ ಲ ಮದರಂಗಿ ಇಪ್ಪನಗ ಫೋಟೋ ದೆಪ್ಪುಡತ್ತಾ? ದಾದ ಮಲ್ಪುನು? ಎಲ್ಯ ಮಗಕ್ ಲ ರಜೆ ಇಪ್ಪರೆ ಪೋದು ಟಿವಿ ತೂವೋಂದಿತ್ತಿನಾಯನ್ ಮೆಲ್ಲ ಲೆತ್ತೆ.
” ಇಸ್ಸಿ ಮೆಹಂದಿಯಾ? ದಾಯೆಗ್ ದೀಯರ್ ಯೇ? ಎಂಕು ವಾಸನೆ ಬರ್ಪುಂಡು ” ಪಂಡ್ ಮೋನೆನ್ ಪೀಂಟಾವೊಂದು ಒಂಜಿ ಕೈಟ್ ಮೂಕ್ ಪತೊಂದು ನಾಟಕ ಮಲ್ಪುನಾಯನ್ ತೂದು ಗರ್ವ ಬತ್ತುಂಡಲಾ ಕೆಲಸ ಆವೊಡ್ಡಾ ಕತ್ತೆದ ಕಾರ್ ಆಂಡಲ ಪತ್ತೊಡು ಗೆ ಪನ್ಪಿನ ಪಿರಿಯಾಕ್ಲೆನ ಪಾತೆರೊದಲಕ ಮನಿಪಂದೆ ಪೋಸ್ ಕೊರಿಯೆ.
ಈ ಉರುಂಟುದ ಕಮ್ಮೆನ ಬರ್ಪಿನ ಮದರಂಗಿ ಬುಡ್ಪಾದಿನ ತೂದು ಎನ್ನ ಮನಸ್ ಮಾತ್ರ ಪಿರ ಪಿರ ಯಾನ್ ಪ್ರೈಮರಿ ಕಲ್ತೊಂದುಪ್ಪುನ ಆ ಎಲ್ಯ ಪ್ರಾಯೊಡು ಕರಿದ್ ಪೋಯಿನ ಪೊರ್ಲು ಕಂಟ್ ದ ನೆನಪು ಮನಸ್ ದ ಎದುರು ಸಾಲ್ ಡ್ ಬರ್ರೆ ಸುರು ಮಲ್ತುಂಡು.
ಅಂದ್ . ಅವ್ ಬಹುಶಃ ಮದರಂಗಿ ದೀಪುನ ಪೊರ್ಲುದ ಮರ್ಲ್ ರಡ್ಡನೇ ಮೂಜಿನೇ ಕ್ಲಾಸ್ಡ್ ಇಪ್ಪುನಗನೇ ಸುರುವಾದಿತ್ತುಂಡು. ಅಪಗ ಇತ್ತೆದಂಚಿನ ಮದರಂಗಿ ಕೋನ್ ಆವಡ್ ಅವೆನ್ ಬುಡ್ಪಾವುನ ಸುಲಭ ವಿಧಾನದ ಚಿತ್ರೊಲು ಆವಡ್. ಎಂಚ ಬುಡ್ಪಾವೊಡು ಪಂಡ್ ಕಲ್ಪಾದ್ ಕೊರ್ಪಿನ ಯೂಟ್ಯೂಬ್ ಆವಡ್ ಓಲು ಇತ್ತುಂಡು? ಅಪಗ ಇಂಚಿನ ಲೇಸಾಂಡಲ ಒಲ್ಪ ಇತ್ತುಂಡು ?
ಸಾಲೆಡ್ ಬತ್ತಿ ಕೂಡ್ಲೆ ಒಂಜಿ ಲಕೋಟೆ ಪತೊಂದು ” ಅಮ್ಮಾ ಯಾನ್ ಬಾಯಮ್ಮನ ಇಲ್ಲಗ್ ಮದರಂಗಿದ ತಪ್ಪು ಕನರೆ ಪೋಪೆ ಆವೆ ” ಪಂಡ್ ಅರೆನ ಉತ್ತರ ಬರೊಡ್ ದುಂಬೆ ಬಾಯಮ್ಮನ ಇಲ್ಲಗ್ ಬಲ್ ತ್ದ್ ಅರೆಡ ಕೇಂಡ್ದ್ ತಪ್ಪು ಕೊಯಿದ್ ಪಿರ ಪಾರ್ ಬತ್ತುದು ಅಮ್ಮನ ಕೈಟ್ ಕೊರ್ದು ಕಡೆದು ಕೊರ್ಲೆ ಪಂಡ್ ಹಟ ಕಟೊಂದಿತ್ತೆ. ಆರ್ ಕಡೆವೆರೆ ಕುಲ್ಲನಗ ಅಜ್ಜಿನ ಸುಣ್ಣೊನು ಚೂರು ದೆತ್ ದ್ ಪಾಡ್ದಿನ ನೆನಪು ಐತೊಟ್ಟುಡೆ ಕೆಂಪು ಸಬುರು ಪಾಡುಂಡ ಮಸ್ತ್ ಕೆಂಪಾಪುಂಡು ಪಂತಿನ ಪಾತೆರೊನು ನೆನಪು ದೀದ್ ಅಲ್ಪನೆ ಗಿಡೊಟು ಪರಪುನ ಸಬುರುನುಲ ಕಡೆವುನ ಕಲ್ ಗ್ ಪಾಡುದು ಕಡೆದಿನ ನೆನಪು ಬರ್ನಗ ಮಾತ್ರ ಇತ್ತೆ ಪಾಪಲ ತೋಜುಂಡು.
ಕಡೆದ್ ದೀಯಿನ ಮದರಂಗಿ ನ್ ಪಾಡುನ ಬಾಜನ ಆಂಡಲ ಒವ್ ? ತಾರಾಯಿದ ತಿಪ್ಪಿಡ್ ಪಾಡ್ ದೀಯಿನ ಮದರಂಗಿ ನ್ ಸೂತ ಕಡ್ಡಿ ಇಜ್ಜಿ ಮೈಪು ಕಡ್ಡಿಡ್ ಎಡ್ಮ ಇಡ್ಲಿ ಇಜ್ಜಿಡ ನಾಚಿಕೆ ಮುಳ್ಳುದ ಇರೆತಲಕ ಬಳ್ಳಿ ಬುಡ್ಪಾದ್ ಕೈನ್ ಇಂಚ ಪತೊಂದು ಜೆತ್ತುಂಡ ಕಾಂಡೆ ಆ ಮದರಂಗಿ ನುಂಗುದು ಮಂಡೆಡ್ ಇಜ್ಜಿಡ ಕೈತಲ್ ಜೇದಿನ ಅಮ್ಮ,ಅಕ್ಕ ಪಲಾಯಡ್ಲೆನ ಮಂಡೆಡ್ಲ ತೂವಲಿ . ಐತ ಬಗ್ಗೆ ಲಡಾಯಿಲ ಲಕ್ಕಂದ್. ಆ ಕೈನ್ ಪೊರ್ಲು ಡು ನೀರ್ ಪಾಡ್ ದ್ ದೆಕುದು ಆ ಕೈತ ಕಮ್ಮೆನ ಮೂಸುನಾನೆ ಪೊರ್ಲು. ಒಂಜಿ ದಿನ ಅಂತೂ ಏಳನೆ ಕ್ಲಾಸ್ ಡ್ ಇಪ್ಪನಗ ಎನ್ನಂಚೆನೆ ಮದರಂಗಿ ಪಾಡೊಂದು ಬೈದಿನ ದೋಸ್ತಿಯಾಡ್ಲೆನ ಕೈನ್ ತೂವೊಂದಿಪ್ಪನಗ ಪ್ರೇಮ ಪನ್ಪಿನ ದೋಸ್ತಿ ಮೆಲ್ಲೊಡು ಕೆಬಿಟ್ ” ಆಲ್ ಸುನೀತ ಉಲ್ಲೊಲತ ಅಲೆನ ಕಂಡನಿ ಬಾರಿ ಜೋರುಲ್ಲೆಯಾ” ಪನ್ನಗ ಪೂರಾಕುಲ ಮೊಲೆಗ್ ಎಂಚ ಗೊತ್ತಾಂಡು ಪಂಡ್ ಎಂಕುಲು ಚೋದ್ಯೊಡು ಕೇನನಗ ಅಲೆನ ಕೈ ಕೆಂಪಾತುಜಿ ಪಂತಿನ ಆ ಪಾತೆರೊಗು ಆಲ್ ಬುಲ್ ದಿನ ಅಂಚನೆ ಎಂಕುಲು ಪೂರಾ ತೆಲ್ತಿನ ನೆನಪು . ಆನಿಡ್ದಿಂಚಿ ಪಾಪದ ಕಂಡನಿ ಸಿಕ್ಕಡ್ ಪಂಡ್ ಕಡೆವುನ ಮದರಂಗಿ ತಪ್ಪುಗು ಒಂತೆ ಎಚ್ಚನೆ ಸಬುರು ಬೊಕ್ಕ ಸುಣ್ಣ ಪಾಡ್ದಿನ ನೆನಪು . ಇಂಚಿತ್ತಿನ ಏತೋ ನೆನಪುಲು ನಿಕಲೆಡಲ ಇಪ್ಪರೆ ಯಾವು. ಎಂಕುಲು ಇಂಚನೆ ಪದನೈನ್ ದಿನೊಕೊರಾನೋ, ತಿಂಗೊಲುಗೊರಾನೋ ಮದರಂಗಿ ಪಾಡುನ ತೂವೊಂದಿತ್ತಿನ ಎಂಕಲೆನ ಅಜ್ಜಿ ಆಟಿ ಬರ್ ನಗ ಮಾತ್ರ
” ಜೋಕುಲೆ ಆಟಿಡ್ ಮಾತ್ರ ಮದರಂಗಿ ನ್ ತತ್ ದುಲಾ ಪಾಡಡೆ . ದಾಯೆಗ್ ಪಂಡ ಆಟಿಡ್ ಕುಲೆಕುಲು ಮಾತ್ರ ಮದರಂಗಿ ದೀಪಿನಿ. ನಿಕುಲು ಪಿನಿ ದೀಯರ್ ಡ ನಿಕಲೆನ ಕೈಟ್ ಆ ಕುಲೆಕುಲು ಬತ್ತು ಕುಲ್ಲುಂಡು ಗೊತ್ತಾಂಡತ್ತ?
ಪಂಡಿನ ಅಜ್ಜಿನ ಪಾತೆರೊ ಕೇಂದ್ ಅ ಕುಲೆಕುಲು ಎಂಕಲೆನ ಕೈಟು ಕುಲ್ಲುನಾನೆ ಎನ್ನುದು ಪೋಡಿದ್ ಕುಂಬರ್ ದ್ ಆಟಿಡ್ ಮಾತ್ರ ಕೈಟ್ ಮದರಂಗಿ ಇಪ್ಪಂದ್. ಇತ್ತೆ ಮಾತ್ರ ಮರಿಯಾಲೊಡು ಪಿದಯಿಡ್ಲ ಥಂಡಿ ಇಪ್ಪುಂಡು.ಮದರಂಗಿ ಲ ಥಂಡಿ ಯಾದ್ ಸೀಕ್ ಬರ್ರೆ ಬಲ್ಲಿ ಪನ್ಪಿನ ಉದ್ದೇಶ ಲ ಇಪ್ಪು ಪನ್ಪಿನ ಪಾತರೊ ಐತ ಬತ್ತಡಿಡ್ ಇಪ್ಪು.
ದಾದನೇ ಇಪ್ಪಡ್ ಇಂಚ ಮದರಂಗಿದ ಮರ್ಲ್ ಇತ್ತಿನ ಯಾನ್ ಮದಿಮೆದ ದುಂಬಿನಾನಿ ರಡ್ ಕಾರ್ ಗ್ ರಡ್ ಕೈಕ್ ಬುಡ್ಪಾದಿನ ನೆನಪು . ಮದಿಮೆ ಆದ್ ಒಂಜಿ ತಿಂಗೊಲುಡೇ ದೀತಿನ ಮದರಂಗಿ ಪೋನಗ ಮೈತಿದಿನೊಟ್ಟುಡು ಪೊರ್ಲು ಮದಿರಂಗಿ ಪಾಡ್ದಿನೇನ್ ಕಂಡನಿಡ ತೋಜನಗ ಐತ ಕಮ್ಮೆನೊಗು ಮಂಡೆ ಬೇನೆ ಆಪುಂಡು ಪನ್ನಿನೇನ್ ಕೇನ್ ದ್ ಮಾತ್ರ ಒರೊಕು ಬೆಚ್ಚಾದಿತ್ತುಂಡು. ಅಂಚನೆ ಮದರಂಗಿದ ಕಮ್ಮೆನ ಆವಂದಿನ ರಡ್ ಆಣ್ ಜೋಕುಲು ಪುಟಿನೇಡ್ ಬೊಕ್ಕ ಮದರಂಗಿ ದೀಪಿನೇನ್ ಬುಡ್ದೇ ಬುಡಿಯೆ.ಪೈಕಿದಕಲೆನ ದೊಂಪ ಇತ್ತುಂಡಲ ಮದರಂಗಿ ದೀವರೆ ಮಾತ್ರ ಮನಸ್ಸಾವಂದ್. ಅಂಚನೆ ದೀವರೆ ಮನಸ್ಸಾಂಡಲ ಪುರುಸೊತ್ತಾವಂದ್ . ಆಂಡ ವಿದ್ಯಕ್ಕನ ಪಾತೆರ ಅಂಚನೆ ಮದರಂಗಿದ ಲೇಸ್ ದ ಕಾರಣಕರ್ತೆರ್ ಮಾತ್ರ ಪಿರಾಕುದ ನೆನಪುಲೆನ್ ಮಲ್ತ್ ಒರೊಕು ಕರಿದು ಪೋಯಿನ ಕುಸಿನ್ ಕನತು ಕೊರುಂಡು ಪಂಡ ತಪ್ಪಾವಂದ್.
ವಾಸಂತಿ ಅಂಬಲಪಾಡಿ