ಉಡುಪಿ ಪುತ್ತಿಗೆ ಪರ್ಯಾಯ ಮಹೋತ್ಸವದ ಸಾಂಸ್ಕ್ರತಿಕ ಸಪ್ತೋತ್ಸವದ ಸಮಾರೋಪದಡ್ ಇಂಡಿಯಾಸ್ ಗಾಟ್ ಟ್ಯಾಲೆಂಟ್ ಫೈನಲಿಸ್ಟ್, ಸಚಿವೆರೆನೇ ಮಾಯ ಮಲ್ದಿನ ಖ್ಯಾತಿದ ಅಂತರಾಷ್ಟ್ರೀಯ ಜಾದೂಗಾರೆ ಕುದ್ರೋಳಿ ಗಣೇಶ್ ಬೊಕ್ಕ ಬಳಗ ದಕ್ಲೆಡ್ದ್ ವಿಸ್ಮಯ ಜಾದೂ ಪ್ರದರ್ಶನ ನಡತುಂಡ್.
ಶ್ರೀ ಕ್ರಷ್ಣ ಮಠದ ರಾಜಾಂಗಣಡ್ ಜಾದೂ, ಜಾನಪದ, ರಂಗಭೂಮಿ ಬೊಕ್ಕ ಸಂಗೀತದ ಸಮ್ಮಿಲನದ ವಿಸ್ಮಯ ಜಾದೂ ವಿನೂತನ ಜಾದೂ ತಂತ್ರದೊಟ್ಟುಗ್ ಪ್ರೇಕ್ಷಕೆರೆನ್ ಮಂತ್ರ ಮುಗ್ದರನ್ನಾದ್ ಕುದ್ರೋಳಿ ಮೇರು ನಿರಂತರ ಮೂಜಿ ಗಂಟೆ ರಾಜಾಂಗಣಡ್ ಮಾಯಾಲೋಕನೇ ನಿರ್ಮಾಣ ಮಲ್ದೆರ್. 2000ಕ್ ಲಾ ಜಾಸ್ತಿ ಸೇರಿನ ಪೇಕ್ಷಕೆರು ಗಣೇಶ್ ರೆನ ಚಾಕಚಕ್ಯತೆ ನ್ ಮನಸಾರೆ ಕೊಂಡಾಡಿಯೆರು.
ಇಂಡಿಯಾಸ್ ಗಾಟ್ ಟ್ಯಾಲೆಂಟ್ ರಿಯಾಲಿಟಿ ಶೋ ಮೂಲಕ ವಿಶ್ವದಾದ್ಯಂತ ಪ್ರಸಿದ್ದಿಯಾತಿನ ತುಳುನಾಡುದ ಭೂತಾರಾಧನೆದ ಅಂಶ ಇತ್ತಿನ ಯಕ್ಷಿಣಿ, ಸುಪ್ತ ಮನಸ್ಸುದ ಚಮತ್ಕಾರ, ನವರಸಪೂರ್ಣ ಜಾದೂ, ಸಮಕಾಲೀನ ಬೊಕ್ಕ ಆಧುನಿಕ ಮ್ಯಾಜಿಕ್ ಇಲ್ಯೂಷನ್ ಸಂಗಮದ ಕಾರ್ಯಕ್ರಮ ಪುತ್ತಿಗೆ ಪರ್ಯಾಯ ಕ್ಕಾದ್ ವಿಶೇಷವಾದ್ ಸಿದ್ದ ಮಲ್ದೆರ್..ಪರ್ಯಾಯ ಪುತ್ತಿಗೆ ಶ್ರೀ ಶ್ರೀ ಸುಗುಣೇಂದ್ರ ತೀರ್ಥ ಶ್ರೀಪಾದೆರುಲಾ ತಮ್ಮ ಶಿಷ್ಯೆರೆನೊಟ್ಟುಗ್ ಕುದ್ರೋಳಿ ಮೇರು ನಿರ್ಮಿಸಾಯಿನ ಮಾಯಾ ಜಗತ್ತುನ್ ತೂದ್ ಖುಷಿಟಿತ್ತೆರು.
ಸ್ವತಃ ವೇದಿಕೆಗ್ ಪೋದ್ ಗಣೇಶ್ ಕುದ್ರೋಳಿನ ಸಹಕಾರಡ್ ಜಾದೂ ಮಲ್ತುದ್ , ಕನ್ನಡಿಡ್ ರಾಮಲಲ್ಲನ ಚಿತ್ರನ್ ಶೂನ್ಯಡ್ ಸೃಷ್ಟಿ ಮಲ್ತೆರು. ನೆರೆದಿನ ಜನಸ್ತೋಮ ಮುಗಿಲು ಮುಟ್ಟಿನ ಜೈಶ್ರೀರಾಮ್ ಘೋಷಣೆ. ಬೊಕ್ಕ ಸ್ವಾಮೀಜಿಲು ಪಾತೆರ್ದ್ ಗಣೇಶ್ ರೆನ ಇಂದ್ರಜಾಲ ತೂಪಿನಕ್ಲೆನ ಮನಸ್ಸುಗ್ ಸಂತಸ ಕೊರ್ತುಂಡ್. ವಿದೇಶಡುಪ್ಪುನ ನಮ್ಮ 14ಶಾಖಾ ಮಠಕ್ ಲೆಡ್ ಜಾದೂ ಕಾರ್ಯಕ್ರಮನ್ ಮಲ್ಪರೆಗ್ ಆಮಂತ್ರಣ ಕೊರಿಯೆರು.
by 