ಬನ್ನಂಜೆ ಬ್ರಹ್ಮ ಕಲಶೋತ್ಸವ

ಬನ್ನಂಜೆ ಶ್ರೀ ಮಹಾಲಿಂಗೇಶ್ವರ ದೇವಸ್ಥಾನದ ಬ್ರಹ್ಮಕಲಶೋತ್ಸವ ಉಂದುವೇ ಬರ್ಪಿನ ಎಪ್ರಿಲ್ 15 ಡ್ದ್ 20 ತಾರೀಕು ಮುಟ್ಟ ನಡಪರೆಗಿತ್ತುದ್ ಆ ಪ್ರಯುಕ್ತ ಇನಿ ದೇವಳಡ್ ಪತ್ರಿಕಾಗೋಷ್ಠಿ ನಡತುಂಡ್.ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರಾಯಿನ ಶ್ರೀ ಮಾಧವ ಬನ್ನಂಜೆ ಪಾತೆರ್ದ್ ಇತಿಹಾಸ ಪ್ರಸಿದ್ದ ಬನ್ನಂಜೆ ಮಹಾಲಿಂಗೇಶ್ವರ ದೇವಸ್ಥಾನದ ಅಷ್ಟಭಂದ ಬ್ರಹ್ಮಕಲಶೋತ್ಸವ ವೈಭವ-2026 ಎ.16ಡ್ದ್ ಎ.20ಮುಟ್ಟ ವಿಜೃಂಭಣೆಡ್  ನಡಪರೆಗುಂಡ್ ಪಂಡುದು ಪಂಡೆರ್., ಎ.20ಗ್ ಕಾಂಡೆ 9.15ಗ್ ಶ್ರೀಮಹಾಲಿಂಗೇಶ್ವರ ದೇವರೆನ ಪರಿಕಲಶ ಅಭಿಷೇಕ, ಬ್ರಹ್ಮ ಕಲಶಾಭಿಷೇಕ, ಕಲಾನ್ಯಾಸ, ಮಹಾಪೂಜೆ, ಪಲ್ಲಪೂಜೆ ನಡಪುಂಡು.. ಮಧ್ಯಾಹ್ನ 12.30ಗ್ ಮಹಾ ಅನ್ನಸಂತರ್ಪಣೆ ಬೊಕ್ಕ ಬಯ್ಯಗ್ 6ಗಂಟೆಗ್ ಉತ್ಸವ ಬಲಿ, ಮಹಾರಂಗ ಪೂಜೆ, ಭೂತ ಬಲಿ ನಡಪುಂಡ್ ಪಂಡೆರು.

ಎ.15ಗ್  ಮಧ್ಯಾಹ್ನ 3ಗಂಟೆಗ್  ಪುದೆಕಾಣಿಕೆ ಮೆರವಣಿಗೆ ಜೋಡುಕಟ್ಟೆಡ್ದ್  ಸರ್ವಿಸ್ ನಿಲ್ದಾಣದ ಮೂಲಕ ಕ್ಷೇತ್ರಗ್ ಬರ್ಪುಂಡ್. ಎ.16ಡ್ದ್  ದಿನೊಲಾ ಬಯ್ಯಗ್ 6.30ಕ್ ಧಾರ್ಮಿಕ ಸಭಾಕಾರ್ಯಕ್ರಮೊಲು ಬೊಕ್ಕ ಸಾಂಸ್ಕೃತಿಕ ಕಾರ್ಯಕ್ರಮೊಲು ನಡಪರೆಗುಂಡ್.

ಸಾಂಸ್ಕೃತಿಕ ಕಾರ್ಯಕ್ರಮಡ್  16ಗ್ ಶಿವಪ್ರೇರಣ ಸಹಸ್ರ ಕಂಠ ಗಾಯನ ಬೊಕ್ಕ ರಾಘು ಮಾಸ್ಟು ತುಳು ನಾಟಕ, ಎ.17ಗ್  ರಾಜ್ಯಮಟ್ಟದ ನೃತ್ಯ ಸ್ಪರ್ಧೆ ಬೊಕ್ಕ ಶಿವದೂತ ಗುಳಿಗ ನಾಟಕ, 18ಗ್ ಶಿವ ಪ್ರೇರಣಾ ಚಿತ್ರಕಲಾ ಸ್ಪರ್ಧೆ ಬೊಕ್ಕ ಸ್ಯಾಕ್ಸ್‌ ಫೋನ್ ವಾದನ, ನೃತ್ಯ ವೈಭವ, 19ಗ್  ಮದರಂಗಿ ಬೊಕ್ಕ ರಂಗೋಲಿ ಸ್ಪರ್ಧೆ, ವೀಣಾ ನಾದೋತ್ಸ ವ, ಜಾನಪದ ವೈಭವ ನಡಪರೆಗುಂಡ್ ಪಂಡುದು ಆರು ಮಾಹಿತಿ ಕೊರಿಯೆರು.

ದೇವಳದಲ್ಪನೇ ಉಪ್ಪುನ 36 ಸೆಂಟ್ಸ್ ಭೂಮಿನ್ ಭಕ್ತೆರೆನ ಸಹಕಾರಡ್ ದೆತೊಂದ್ ದೇವೆರೆಗ್ ಭೂದಾನವಾದ್ ಸಮರ್ಪಣೆ ಮಲ್ಪರೆಗ್ ಉದ್ದೇಶ ಮಲ್ದಿತ್ತುದ್, ಚದರಡಿ ಒಂಜೇತ 2000ರೂ.ದಂಚ ಅತ್ತುಂಡ ದೇವಳಡಿತ್ತಿನ 101ಡ್ದ್  5000ದುಲಾಯಿದ  ಕೂಪನ್ ಸಂಖ್ಯೆ ನ್ ಖರೀದಿ ಮಲ್ತುದ್ ದಿನೊಲಾ ಕಾಣಿಕೆನ್  ಸಂಗ್ರಹ ಮಲ್ತುದ್, ಒಂಜಿ ವರ್ಷದುಲಾಯಿ  ದೇವಳಗ್  ಪಿರ ಕನತುದ್ ಕೊರ್ಪಿನ  ಅವಕಾಶ ಕಲ್ಪಿಸಾದೆರ್.

ಸುದ್ದಿಗೋಷ್ಠಿಡ್  ಬ್ರಹ್ಮ ಕಲಶೋತ್ಸವ ಸಮಿತಿದ ಸಂಚಾಲಕ ರಮೇಶ್ ಕಾಂಚನ್, ದೇವಸ್ಥಾನದ ಪ್ರಧಾನ ತಂತ್ರಿ ಪಿ.ಶಶಿಕಾಂತ ತಂತ್ರಿ, ಪ್ರಧಾನ ಅರ್ಚಕ ಪಿ.ವಾಸುದೇವ ಉಪಾಧ್ಯ, ವ್ಯವಸ್ಥಾಪನಾ ಸಮಿತಿ ಸದಸ್ಯೆರು  ದಿನೇಶ್ ಪುತ್ರನ್, ಎಂ.ಪ್ರಭಾಕರ ಶೆಟ್ಟಿ, ಶೇಖರ ಶೆಟ್ಟಿ, ಯು.ಸುದೇಶ್ ಶೇಟ್, ರಾಜೇಶ್ ಬಿ., ವಿದ್ಯಾಲತಾ ಯು.ಶೆಟ್ಟಿ, ಶಮಿತಾ ಎಸ್.ಭಂಡಾರಿ, ರವಿರಾಜ್ ಭಟ್ ಉಪಸ್ಥಿತರಿತ್ತೆರು.