ಐತಿಹಾಸಿಕ ಸ್ವರ್ಗ ರಾಣಿಝರಿ..

ಐತಿಹಾಸಿಕ ಸ್ವರ್ಗ ರಾಣಿಝರಿ

ತುಳುನಾಡುದ ಪಡ್ಡಯಿ ಘಟ್ಟದ ತಡಿಟ್ ಐತಿಹಾಸಿಕ ತಾಣವೊಂಜಿ ಪ್ರವಾಸಿಗರೆನ್ ಒಯ್ತೊಂದುಂಡ್. ಪಚ್ಚೆ ಪ್ರಪಾತ, ಕಣಿವೆ, ಇಕ್ಕಟ್ಟಾಯಿನ ರಸ್ತೆ, ತೂವನಗನೇ ಒರ ದಮ್ಮ್ ಉಂತುಂಡ್.

ಉಂದು ನಮ್ಮ ತುಳುವೆರೇ ಹೆಚ್ಚಾದುಪ್ಪುನ ಪಡ್ಡಯಿ ಘಟ್ಟದ ತಪ್ಪಾಲಾಯಿನ ಕಳಸ – ಕೊಟ್ಟಿಗೆಹಾರ ರಸ್ತೆಡುಪ್ಪುನ , ಸುಂಕಸಾಲೆ ಕೈತಲುದ ಐತಿಹಾಸಿಕ ಬಲ್ಲಾಳರಾಯನ ದುರ್ಗಾ ತಪ್ಪಲುಡುಪ್ಪುನ ರಾಣಿಝರಿ ಪ್ರಪಾತ.

ರಾಣಿಝರಿಡ್ದ್ ಕಣ್ಣು ಬುಲೇದ್ ತುಳುನಾಡುದ ಸೊಬಗುದ ಸಿರಿ ಕಣ್ಣು ದಿಂಜಾವುಂಡ್.. ಪಚ್ಚೆ ಸೀರೆದ ಭೂಮಾತೆ, ಪರ್ವತ ಶ್ರೇಣಿಲು, ಮೋಡೊಲು ನಾಚಿಕೆಯಾದ್ ಝರಿಡ್ದ್ ತಿರ್ತ್ ಬರ್ಪಿನವ್ವೆನ್ ವರ್ಣನೆ ಮಲ್ಪರೆಗ್ ಅಸಾಧ್ಯ. ರಾಣಿಝರಿಡ್ದ್ ಬಳ್ಳಾಲರಾಯನ ದುರ್ಗಗ್ ನಡತೊಂದ್ ಪೋವೊಡ್. ಬಲ್ಲಾಳರಾಯನ ಕೋಟೆ ಇತ್ತೆ ವಿನಾಶದ ಒರುಟುಪ್ಪುನವ್ ಪ್ರವಾಸಿಗೆರೆಗ್ ಬೇಜಾರುದ ಸಂಗತಿ. (ಸರಕಾರ ಇಂಚಿ ಕಣ್ಣು ಬುಲೆಪಾವೊಡ್).

ಒಟ್ಟುಡ್ ಮಂಜು, ಮೋಡ, ಅರಣ್ಯ ಸೊಬಗು, ಹಸಿರ ಹೊದಿಕೆ, ಐತಿಹಾಸಿಕ ಜಾಗ, ವಿಹಂಗಮ ನೋಟ ಇಂಚ ಮಾತಾ ಒಂಜೇ ಜಾಗೆಡ್ ಪ್ರವಾಸಿಗೆರೆಗ್ ಸಿಕ್ಕುನಾಂಡ ಅವ್ ರಾಣಿಝರಿಟ್ ಮಾತ್ರ.

ಉಂದೆನ್ ಒರಿಪಾವುನ ಪ್ರವಾಸಿಗೆರೆನ, ಸರಕಾರದ, ಪರಿಸರಪ್ರಿಯೆರೆನ ಜವಾಬ್ದಾರಿಯಾತುಂಡ್..

ಬರವು: ವೈಷ್ಣವಿ ಜಯರಾಂ..