ದ.ಕ.ಮೊಗವೀರ ಮಹಾಜನ ಸಂಘ ಉಚ್ಚಿಲ ಬೊಕ್ಕ ಎಮ್ ಆರ್ ಪಿಎಲ್ ಸಹಯೋಗಡ್ ಉಚ್ಚಿಲೊಡ್ ನಿರ್ಮಾಣ ಆಯಿನ ಮೊಗವೀರ ಭವನನ್ ನವೆಂಬರ್ 21 ತಾರೀಕುದಾನಿ ಬಿಜೆಪಿ ರಾಜ್ಯಾಧ್ಯಕ್ಷೆರಾಯಿ ನಳಿನ್ ಕುಮಾರ್ ಕಟೀಲ್ ಉದಿಪನ ಮಲ್ತುದ್ ಶುಭಹಾರೈಸಿಯೆರ್.
ಉದಿಪನದ ಸಭಾಕಜ್ಜೊಡ್ ಪ್ರಾಸ್ತಾವಿಕ ವಾದ್ ಪಾತೆರಿನ ಮೊಗವೀರ ಮುಖಂಡೆರಾಯಿನ ಡಾ| ಜಿ.ಶಂಕರ್ ಪಾತೆರ್ದ್ ಉಚ್ಚಿಲ ಮಹಾಲಕ್ಷ್ಮಿ ದೇವಸ್ಥಾನದ ಜೀರ್ಣೋದ್ಧಾರದೊಟ್ಡುಗ್ ಮೊಗವೀರ ಸಮುದಾಯ ಭವನನ್ ದ.ಕ.ಮೊಗವೀರ ಮಹಾಜನ ಸಂಘ ಸಮಾಜೊಗ್ ಕೊಡುಗೆಯಾದ್ ಕೊರ್ತುಂಡ್.14ಕೋಟಿ ರೂ.ಖರ್ಚಿಡ್ ನಿರ್ಮಾಣ ಆಯಿನ ಈ ಭವನಡ್ದ್ ಬರ್ಪಿನ ಆದಾಯನ್ ಸಮಾಜದ ಬಡವಿದ್ಯಾರ್ಥಿಲೆನ ವಿದ್ಯಾರ್ಥಿವೇತನ ಬೊಕ್ಕ ಸಮಾಜ ಬಂಧುಲೆನ ಆರೋಗ್ಯದ ಖರ್ಚಿಗಾದ್ ಉಪಯೋಗ ಮಲ್ಪುಂಡ್.ಇತ್ತೆನೇ 24 ಮದಿಮೆ ಈ ಹಾಲ್ ಡ್ ಬುಕ್ ಆತುಂಡ್ ಪಂಡುದ್ ಪಂಡೆರ್.ಈ ಸಮುದಾಯ ಭವನಗ್ ಸಹಕಾರ ಮಲ್ತಿನ ಮಾತಾ ದಾನಿಲೆಗ್ ಈ ಪೊರ್ತುಡ್ ಧನ್ಯವಾದ ಪಂಡೆರ್.
ವೇದಿಕೆಡ್ ಶಾಸಕೆರಾಯಿನ ಲಾಲಾಜಿ ಆರ್.ಮೆಂಡನ್,ಕೆ.ರಘುಪತಿ ಭಟ್,ಮಾಜಿ ಸಚಿವೆರಾಯಿನ ವಿನಯ್ ಕುಮಾರ್ ಸೊರಕೆ,ಪ್ರಮೋದ್ ಮಧ್ವರಾಜ್ ಮೆಚ್ಚುಗೆದ ಪಾತೆರ ಪಾತೆರಿಯೆರ್.
ಸಭಾ ವೇದಿಕೆಡ್ ಮೊಗವೀರ ಭವನದ ನಿರ್ಮಾಣದ ಕಲ್ಪನೆ, ಕನಸುನ್ ಕಟ್ಟೊಂದ್ ಅವ್ವೆನ್ ಕಾರ್ಯರೂಪೊಗ್ ಕನತಿನ ನಾಡೋಜ ಡಾ| ಜಿ.ಶಂಕರ್ ಬೊಕ್ಕ ಶ್ರೀಮತಿ ಶಾಲಿನಿ ಶಂಕರ್ ದಂಪತಿಲೆಗ್ ಮಾನಾದಿಗೆ ಮಲ್ತೆರ್.
ಅಂಚೆನೇ ಮೊಗವೀರ ಭವನಗ್ ಮಲ್ಲ ಕೊಡುಗೆ ಕೊರ್ತಿನ ಗೀತಾ ಫೌಂಡೇಶನ್ ದ ಅಧ್ಯಕ್ಷೆರಾಯಿನ ಆನಂದ ಸಿ.ಕುಂದರ್ ಬೊಕ್ಕ ಗೀತಾ ಆನಂದ ಸಿ.ಕುಂದರ್ , ಕಟ್ಟಡದ ಇಂಜಿನಿಯರ್ ಎ.ಜಿ.ಅಸೋಸಿಯೇಟ್ಸ್ ದ ಯೋಗೀಶ್ ಚಂದ್ರಾಧರ್,ದೇವಸ್ಥಾನದ ಕಟ್ಟಡ ನಿರ್ಮಾಣ ಸಮಿತಿದ ಅಧ್ಯಕ್ಷೆರಾಯಿನ ಮಲ್ಪೆ ಮತ್ಸ್ಯೋದ್ಯಮಿ ಹರಿಯಪ್ಪ ಕೋಟ್ಯಾನ್,ಕ್ಷೇತ್ರಾಡಳಿತ ಸಮಿತಿದ ಅಧ್ಯಕ್ಷೆರಾಯಿನ ವಾಸುದೇವ ಸಾಲಿಯಾನ್,ದೇವಸ್ಥಾನದ ಸಿಬ್ಬಂದಿ ಕಿಶೋರ್ ಸಾಲ್ಯಾನ್,ಉಚ್ಚಿಲ ಬಡಾ ಗ್ರಾಮ ಪಂಚಾಯತ್ ಸದಸ್ಯೆರಾಯಿನ ಶಿವಕುಮಾರ್ ಮೆಂಡನ್,ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ ಪುರಸ್ಕೃತೆರಾಯಿನ ಕುಡ್ಲದ ಉದ್ಯಮಿ ರಾಮಚಂದ್ರ ಬೈಕಂಪಾಡಿ ಮೊಕ್ಲೆನ್ ಗೌರವಾರ್ಪಣೆ ಮಲ್ತೆರ್.ಚಂದ್ರೇಶ್ ಪಿತ್ರೋಡಿ ಕಾರ್ಯಕ್ರಮದ ನಿರೂಪಣೆ ಮಲ್ತೆರ್.
by 