ಪೊರಂಬಾಟಗ್ ಪಣಿಯಾಡಿ ಪ್ರಶಸ್ತಿ..

*ರೂಪಕಲಾ ಆಳ್ವ ಅರೆನ ‘ಪಮ್ಮಕ್ಕೆನ ಪೊರುಂಬಾಟ’ ಕೃತಿಕ್  ಉಡುಪಿ ತುಳುಕೂಟದ ಪಣಿಯಾಡಿ ಪ್ರಶಸ್ತಿ-2024
ಉಡುಪಿಃ ತುಳುಕೂಟ ಉಡುಪಿ ವತಿಡ್ದ್ ಪ್ರತಿ ವರ್ಷಲಾ ಕೊರೊಂದುಪ್ಪುನ ದಿ.ಎಸ್. ಯು. ಪಣಿಯಾಡಿ ಪ್ರಶಸ್ತಿಗ್ ಈ ಸಾಲುದ ಮಂಗಳೂರುದ ಕರಂಗಲ್ಪಾಡಿದ  ರೂಪಕಲಾ ಆಳ್ವ ಅರೆನ  ‘ಪಮ್ಮಕ್ಕೆನ ಪೊರುಂಬಾಟ’ ಪನ್ಪಿನ ಹಸ್ತಪ್ರತಿ ಆಯ್ಕೆಯಾತುಂಡ್.
ತುಳುಭಾಷೆಡ್ ಎಡ್ಡೆ ಕಾದಂಬರಿಲು ಪ್ರಕಟ ಆವೊಡ್ ಪನ್ಪಿನ  ಆಶಯದೊಟ್ಟುಗ್ ತುಳು ಚಳವಳಿಗ್  ಚಾಲನೆ ಕೊರಿನ ಬೊಕ್ಕ  ತುಳುಕ್  ಸುರುತ್ತ ಕಾದಂಬರಿಕಾರ ದಿ. ಎಸ್. ಯು. ಪಣಿಯಾಡಿ ಅರೆನ್ ಸದಾ ನೆನಪು ದೀಪಿನ ಉದ್ದೇಶಡಾದ್  ಕರಿನ  29 ವರ್ಷಲೆಡ್ದ್  ತುಳುಕೂಟ ಉಡುಪಿ ಆಶ್ರಯಡ್ ಪಣಿಯಾಡಿ ಪ್ರಶಸ್ತಿನ್ ಕೊರೊಂದುಂಡ್. ಈ ಪ್ರಶಸ್ತಿ  10,000 ರೂಪಾಯಿ ಪಣವು ಬೊಕ್ಕ ಫಲಕ ಸಮೇತ ಪ್ರಶಸ್ತಿ ಪತ್ರ ಉಪ್ಪುಂಡ್.
ಈ ಬಾರಿ ಸ್ಪರ್ಧೆದ ಪ್ರಶಸ್ತಿ ಸಮಿತಿಡ್  ಹಿರಿಯ ಸಾಹಿತಿ ಪ್ರೊ.ಮುರಳೀಧರ ಉಪಾಧ್ಯ ಹಿರಿಯಡಕ, ಸಕು ಪಾಂಗಾಳ ಬೊಕ್ಕ  ಪುತ್ತಿಗೆ ಪದ್ಮನಾಭ ರೈ ತೀರ್ಪು ಗಾರರಾದಿತ್ತೆರು. ಪ್ರಶಸ್ತಿ ಪ್ರದಾನ ಸಮಾರಂಭ  ಆಗಸ್ಟ್ ತಿಂಗೊಲುಡ್  ಉಡುಪಿಡ್ ನಡಪರೆಗುಂಡ್ ಪಂಡುದು ಉಡುಪಿ ತುಳುಕೂಟದ ಅಧ್ಯಕ್ಷ ಜಯಕರ ಶೆಟ್ಟಿ ಇಂದ್ರಾಳಿ,ಕಾರ್ಯದರ್ಶಿ ಗಂಗಾಧರ ಕಿದಿಯೂರ್, ಪಣಿಯಾಡಿ ಪ್ರಶಸ್ತಿದ  ಸಂಚಾಲಕೆರಾಯಿನ ತಾರಾ ಯು.ಆಚಾರ್ಯ ಪತ್ರಿಕಾ ಪ್ರಕಟನೆಡ್  ತೆರಿಪಾದೆರ್. ———————- ಲೇಖಕಿ ರೂಪಕಲಾ ಅರೆನ ಪರಿಚಯ : ರೂಪಕಲಾ ಆಳ್ವ, ಕರಂಗಲ್ಪಾಡಿ ಮೇರು ಕುಡ್ಲ ತುಳು-ಕನ್ನಡ ಬರಹಗಾರ್ತಿ, ಭಾರತ ಸರ್ಕಾರದ ನೆಹರು ಯುವ ಕೇಂದ್ರಡ್ ರಾಷ್ಟ್ರೀಯ ಸೇವಾ ಕಾರ್ಯಕರ್ತೆ ಆದಿತ್ತುದ್ದು, ಮಂಗಳೂರು ಸಂದೇಶ ಪ್ರತಿಷ್ಠಾನ ಜಾನಪದ ಸಂಶೋಧಕಿಯಾದುಲ್ಲೆರ್.
ಮೇರು ನಾಟಿ, ಜೋಳಿಗೆಯಿಂದ ಹೋಳಿಗೆ, ಪಂಪ ಪ್ರಶಸ್ತಿ ಪಡೆಯಿನ ಕಯ್ಯಾರ ಕಿಞ್ಞಣ್ಣ ರೈ, ಪಡಿಪ್ಪಿರೆ, ತುಳು ರಂಗಭೂಮಿದ ಪುಗರ್ತೆದ ಹಾಸ್ಯ ನಟೆ ಆನಂದ ಬೋಳಾರ್  ಫನ್ಪಿನ  5 ಕೃತಿಕುಲೆನ್  ರಚನೆ ಮಲ್ದೆರ್.
ಜೋಳಿಗೆಯಿಂದ ಹೋಳಿಗೆ ಕೃತಿಕ್  ಸಾರಾ ಅಬೂಬಕ‌ರ್ ಸಾಹಿತ್ಯ ಪ್ರಶಸ್ತಿ ಬೊಕ್ಕ  ಪಡಿಪ್ಪಿರೆ ಕೃತಿಕ್  ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಪುಸ್ತಕ ಬಹುಮಾನ ತಿಕ್ಕುದುಂಡ್..
ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಸದಸ್ಯೆರಾದ್,ಮಂಗಳೂರು ನಗರ ಗ್ರಂಥಾಲಯ ಪ್ರಾಧಿಕಾರದ ಸಲಹಾ ಸಮಿತಿ ಸದಸ್ಯೆಯಾದ್, ಲೇಖಕಿಯರ ವಾಚಕಿಯರ ಸಂಘ, ಮಹಿಳಾ ಸಭಾ, ಭಗಿನಿ ಸಮಾಜ, ರಾಗ ತರಂಗ ಸೇರಿನಂಚ ಬೇತೆ ಬೇತೆ ಸಂಸ್ಥೆಲೆಡ್  ಸೇವೆ ಮಲ್ತೊಂದುಲ್ಲೆರ್.