ತುಳು ಬಾಸೆ ಅಗತ್ಯವಾದ್ 8‌ನೇ ಪರಿಚ್ಛೇದೊಗ್ ಸೇರೊಡ್: ಪೇಜಾವರ ಶ್ರೀ.

ಪಂಚದ್ರಾವಿಡ ಬಾಸೆಲೆಡ್ ಒಂಜಾಯಿನ ತುಳುಬಾಸೆಗ್ ಇದಮುಟ್ಟಲಾ 8‌ನೇ ಪರಿಚ್ಛೇದೊಗ್ ಸೇರಂದಿನವ್ವ್ ಬಾರೀ ಬೇಜಾರುದ ಸಂಗತಿ.ತುಳುನಾಡ್ದ ಆಚಾರ ವಿಚಾರೊಲ್ , ಮುಲ್ಪದ ಸಂಸ್ಕ್ರತಿ ಸಂಪ್ರದಾಯೊಲ್ ಇಡೀ ಜಗತ್ತುಡೇ ಒಲ್ಪಲಾ ತೂವರೆಗ್ ತಿಕ್ಕಂದ್.ಮುಲ್ಪದ ವಿದ್ವಾಂಸೆರ್,ಪಂಡಿತೆರ್ ವಿಶೇಷವಾದ್ ತುಳುನಾಡ್ದ ಬಗ್ಗೆ ಕಾಳಜಿ ದೆತೊಂದ್, ಅಧ್ಯಯನ ಮಲ್ತುದ್ ವಿಶೇಷವಾಯಿನ ಕೊಡುಗೆನ್ ಕೊರ್ತೆರ್.ಈ ನಿಟ್ಟುಡ್ ತುಳುನಾಡುಡುಪ್ಪುನ ತುಳುವೆರ್ ಮಸ್ತ್ ಸಂಖ್ಯೆಡ್ ಉಲ್ಲೆರ್.ಉಂದೆನ್ ಗಮನೊಡ್ ದೀದ್ ಕೇಂದ್ರದ ಸರಕಾರ ತುಳು ಬಾಸೆನ್ 8 ನೇ ಪರಿಚ್ಛೇದೊಗ್ ಸೇರ್ಪಾವರೆಗ್ ವಿಶೇಷ ಕಾಳಜಿ ದೆತೊನೊಡ್ ಪಂಡುದ್ ಪೇಜಾವರ ಮಠಾಧೀಶೆರಾಯಿನ ಶ್ರೀ ಶ್ರೀ ವಿಶ್ವಪ್ರಸನ್ನ ತೀರ್ಥ ಸ್ವಾಮೀಜಿ ಪಂಡೆರ್.

ಪ್ರಧಾನಿ ಮೋದೀಜಿಗ್ ಮನವಿ ಕೊರಿನ ವಿಚಾರೊಡ್ ಹೇಳಿಕೆ ಕೊರಿನ ಆರು ತುಳುನಾಡಧ್ವನಿ ಪತ್ರಿಕೆಗ್ ಹೇಳಿಕೆ ಕೊರಿಯೆರ್. ಪೇಜಾವರ ಮಠತ್ತ ಸ್ವಾಮೀಜಿಲಾದಿತ್ತಿನ ತನ್ನ ಗುರುಕುಲಾಯಿನ ಶ್ರೀ ಶ್ರೀ ವಿಶ್ವೇಶತೀರ್ಥ ಸ್ವಾಮಿಲೆಗ್ ತಿಕ್ಕುದಿನ ಪದ್ಮವಿಭೂಷಣ ಪ್ರಶಸ್ತಿನ್ ದೆತೊನರೆಗ್ ದೆಹಲಿಗ್ ಪೋಯಿನ ಪೊರ್ತುಡ್ ಸ್ವಾಮಿಲು ದೇಶದ ಪ್ರಧಾನಿ ನರೇಂದ್ರ ಮೋದೀಜಿಗ್ ತುಳುಬಾಸೆನ್ 8‌ನೇ ಪರಿಚ್ಛೇದೊಗ್ ಸೇರಾವೊಡ್ ಪನ್ಪಿನ ಮನವಿನ್ ಕೊರ್ದಿತ್ತೆರ್.ಮನವಿಗ್ ಸ್ಪಂದಿಸಾಯಿನ ಮೋದೀಜಿ ಈ ಬಗ್ಗೆ ವಿಶೇಷವಾದ್ ಗಮನ ಕೊರ್ಪೆ ಪನ್ಪಿನ ಭರವಸೆನ್ ಕೊರ್ತೆರ್ ಪಂಡುದ್ ಈ ಪೊರ್ತುಡ್ ಆರು ಪಂಡೆರ್.ತುಳುವೆರೆಗ್ ಆಯಿನಾತ್ ಬೇಗ ನ್ಯಾಯ ತಿಕ್ಕಡ್ ಪಂಡುದ್ ದೇವೆರೆಡ ಪ್ರಾರ್ಥನೆ ಮಲ್ಪುವೆ ಪಂಡುದ್ ಪಂಡೆರ್.