ಡೆಲ್ಲಿಡ್ ಹಳ್ಳಿದ ಅಟ್ಟಿಲ್..

ಬುಡ್ನಾರು ಸುಬ್ರಹ್ಮಣ್ಯ ಆಚಾರ್ಯರೆಡ್ದ್ ತಯಾರಾಯಿನ
ಅಟ್ಟಿಲು ಬಿಜೆಪ ಸಂಸದೀಯ ಮಂಡಳಿ ಸಭೆಟ್ ಕಮ್ಮೆನ ಬತ್ತಿನ ಉಡುಪಿ ಅಟ್ಟಿಲು..

ಸೋಮವಾರ ನವದೆಹಲಿದ ಬಿಜೆಪಿ ಪ್ರಧಾನ ಕಚೇರಿಡ್ ನಡತಿನ ಸಂಸದೀಯ ಮಂಡಳಿ ಸಭೆಟ್ ಜಗತ್ಪ್ರಸಿದ್ಧ ಉಡುಪಿ ಅಟ್ಟಿಲುದ ರುಚಿ ಬಿಜೆಪಿ ಅಧ್ಯಕ್ಷ ಜೆಪಿ ನಡ್ಡಾ , ಕೇಂದ್ರ ಮಂತ್ರಿ ಅಮಿತ್ ಶಾ ಸೇರಿನಂಚ ದೇಶಾದ್ಯಂತ ಬತ್ತಿನ 200 ಕ್ ಲಾ ಜಾಸ್ತಿ ಗಣ್ಯೆರೆನ ಮನಗೆಂದಾರೆಗ್ ಯಶಸ್ವಿಯಾತುಂಡ್.

ಈ ಕಾರ್ಯಕ್ರಮಡ್ ಪಾಲ್ ಪಡೆಪಿನಕ್ಲೆಗ್ ಲೋಕಪ್ರಸಿದ್ಧ ಉಡುಪಿ ಅಟ್ಟಿಲ್ ತಯಾರು ಮಲ್ಪೊಡ್ ಪನ್ಪಿನ ಮನವಿದ ಮೇರೆಗ್ ಉಡುಪಿದ ಪ್ರಸಿದ್ಧ ಬಾಣಸಿಗ ಬುಡ್ನಾರು ಸುಬ್ರಹ್ಮಣ್ಯ ಆಚಾರ್ಯೆರು ಐತಾರ ರಾತ್ರೆಗ್ ನವದೆಹಲಿಗ್ ಪೋದ್ ಸೋಮವಾರ ಅಟ್ಟಿಲ್ ತಯಾರ್ ಮಲ್ತುದೆರ್. ಪಾಲ್ ಪಡೆಯಿನ ಮಾತೆರ್ಲಾ ಉಡುಪಿದ ಅಟ್ಟಿಲುದ ರುಚಿಕ್ ಬಾಯಿ ಚಪ್ಪರಿಸಾದ್ ಬಹುತ್ ಅಚ್ಚಾ ಥಾ ಪಂಡುದ್ ಸುಬ್ಬಣ್ಣ ( ಸುಬ್ರಹ್ಮಣ್ಯ ಆಚಾರ್ಯ) ಅರೆನ್ ಪುಗಾರ್ದೆರ್. .

ಈ ಮೂಲಕ ರಾಜಧಾನಿಡ್ ಅವ್ಲಾ ಅಮಿತ್ ಶಾ ನಡ್ಡಾ ರಂಚಿನ ಗಣ್ಯಾತಿಗಣ್ಯರೆಗ್ ಉಡುಪಿ ಅಟ್ಟಿಲುದ ರುಚಿ ತಿನ್ಪಾಯಿನ ಕುಷಿಟುಲ್ಲೆರ್ ಸುಬ್ಬಣ್ಣೆ .
ಪ್ರಧಾನಿ ಮೋದಲಾ ಈ ಸಭೆಟ್ ಬಯ್ಯಡ್ ಪಾಲ್ ಪಡೆದಿತ್ತೆರ್.. ಆಂಡ ಮಧ್ಯಾಹ್ನದ ವನಸುಗ್ ಬೈದುಜೆರ್.
ಜೆಪಿ ನಡ್ಡಾ ಆರು ಅಟ್ಟಿಲುದ ರುಚಿ ದೆತೊಂದ್ ಖುದ್ದು ಸುಬ್ಬಣ್ಣ ಅಟ್ಟಿಲ್ ಮಲ್ತೊಂದಿನ ಜಾಗೆಗ್ ಬತ್ತುದ್ ಪಾತೆರ್ದ್ ಶಹಬ್ಬಾಸ್ ಪಂಡುದ್ ಮೆಚ್ಚಿಯೆರ್ .

ಬಿಜೆಪಿ ರಾ.‌ಸಂಘಟನಾ ಕಾರ್ಯದರ್ಶಿ ಬಿ ಎಲ್ ಸಂತೋಷ್ ಭೇಟಿಯಾದ್ ಅಟ್ಟಿಲ್ ಬಾರೀ ಶೋಕಾತುಂಡ್ ಪಂಡೆರ್ .

ಕಾಂಡೆದ ಉಪಾಹಾರಗ್ ಇಡ್ಲಿ ಸಾಂಬಾರ್ , ಚಟ್ನಿ
ಮಧ್ಯಾಹ್ನದ ವನಸುಗ್ ಉಪ್ಪಿನಕಾಯಿ , ಹುರುಳಿ ಚಟ್ನಿ , ಕೋಸುಂಬರಿ ಎರಡು ಬಗೆ ಪಲ್ಯ , ಚಿತ್ರಾನ್ನ , ನುಪ್ಪು, ಹಪ್ಪಳ ಸಂಡಿಗೆ , ಸಂಡಿಗೆ ಮೆಣಸು , ಸಾರು , ಗಟ್ಟಿಬಜೆ , ಪೂರಿ ಕೂರ್ಮ , ಮೆಣಸುಕಾಯಿ , ಮಟ್ಟುಗುಳ್ಳದ ಹುಳಿ , ಹಯಗ್ರೀವ ಮಡ್ಡಿ , ಖರ್ಜೂರ ಪಾಯಸ ಮೊಸರು ಮಜ್ಜಿಗೆ ತಯಾರ್ ಮಲ್ದೆರ್ .ಬೇತೆವ ಕೆಲವು ಸೀಪೆ ಭಕ್ಷ್ಯ ಲೆನ್ ಅಲ್ಪದ ಸ್ಥಳೀಯೆರ್ ತಯಾರ್ ಮಲ್ದೆರ್ .

ಕಾರ್ಯಕ್ರಮ ಮುಗಿತುದ್ ಮಂಗಳವಾರ ವಿಮಾನದ ಮೂಲಕ ಉಡುಪಿಗ್ ಬತ್ತಿನ ಸುಬ್ಬಣ್ಣೆ , ಗುರುಕುಲಾಯಿನ ಶ್ರೀ ಪೇಜಾವರ ಮಠದ ಕೀರ್ತಿಶೇಷ ಶ್ರೀ ವಿಶ್ವೇಶತೀರ್ಥ ಶ್ರೀಪಾದೆರು ಬೊಕ್ಕ ಶ್ರೀ ವಿಶ್ವಪ್ರಸನ್ನ ತೀರ್ಥ ಶ್ರೀಪಾದರ ಕೃಪೆನೇ ನೇಕ್ ಕಾರಣ ; ಆರೇ ಎಂಕಲೆಗ್ ಸ್ಫೂರ್ತಿ ಪಂಡುದ್ ಭಾವುಕರಾದ್ ಪಂಡೆರ್.
✍️ ಜಿ ವಾಸುದೇವ ಭಟ್ ಪೆರಂಪಳ್ಳಿ