ಬೆದ್ರದ ಶಿರ್ತಾಡಿಡ್ ಕಾನೂನು ವಿದ್ಯಾಲಯ

ಶಿಕ್ಷಣ ಕಾಶಿ ಮುಕುಟಗ್ ಕುಡೊಂಜಿ ಗರಿ : ತಾಲೂಕುಡೇ ಸುರುತ ಕಾನೂನು ಕಾಲೇಜು ಶನಿವಾರ ಉದಿಪನೆ

ಬೆದ್ರ : ಶಿರ್ತಾಡಿದ ಭುವನ ಜ್ಯೋತಿ ವಿದ್ಯಾ ಸಮಚ್ಚಯಡ್ ಬೆದ್ರಡ್ ಸುರುತ  ಕಾನೂನು ವಿದ್ಯಾಲಯ ಪ್ರಾರಂಭ ಆವೊಂದುಂಡ್. ಆಗಸ್ಟ್ 10 ತಾರೀಕುಗ್  ಸುಪ್ರೀಂ ಕೋರ್ಟ್ ನಿವೃತ್ತ ನ್ಯಾಯಾಧೀಶೆರು ಬೊಕ್ಕ ಆಂಧ್ರಪ್ರದೇಶದ ರಾಜ್ಯಪಾಲರಾದುಪ್ಪುನ ಬೆಳುವಾಯಿ ಎಸ್. ಅಬ್ದುಲ್ ನಜೀರ್ ಮೇರು ಪೊಸ ಕಾನೂನು ವಿದ್ಯಾಲಯನ್  ಉದಿಪನ ಮಲ್ಪರೆಗುಲ್ಲೆರ್.

ಪೊಸ ವಿದ್ಯಾಲಯಗ್  ಇತ್ತೆನೇ  25 ವಿದ್ಯಾರ್ಥಿಲು ಸೇರ್ಪಡೆ ಆತೆರ್. ಕರ್ನಾಟಕ ರಾಜ್ಯ ಕಾನೂನು ವಿಶ್ವ ವಿದ್ಯಾಲಯ ಹುಬ್ಬಳ್ಳಿ ಬೊಕ್ಕ ಭಾರತೀಯ ಕಾನೂನು ಬಾರ್ ಕೌನ್ಸಿಲ್ ದೆಹಲಿಡ್ದ್  ಒಪ್ಪಿಗೆ ಸಿಕ್ಕುದುಂಡ್. ಪ್ರಸ್ತುತ ಬಿ ಬಿ ಎ ಎಲ್ ಎಲ್ ಬಿ ಕೋರ್ಸಿಗ್  ಅನುಮತಿ ಸಿಕ್ಕುದುಂಡ್.

ಆಗಸ್ಟ್ 10  ಶನಿವಾರ ಕಾಂಡೆ 11 ಗಂಟೆಗ್  ಭುವನ ಜ್ಯೋತಿ ಕಾನೂನು ವಿದ್ಯಾಲಯ ಉದ್ಘಾಟನೆ ಆವರೆಗುಂಡ್  ಪಂಡುದು ಭುವನ ಜ್ಯೋತಿ ಎಜುಕೇಶನ್ ಟ್ರಸ್ಟ್ ಕಾರ್ಯದರ್ಶಿ ಆರ್. ಪ್ರಶಾಂತ ಡಿ ಸೋಜಾ ಪತ್ರಿಕಾಗೋಷ್ಠಿಡ್  ಮಾಯಿತಿ ಕೊರಿಯೆರು.

ಕರ್ನಾಟಕ ಹೈಕೋರ್ಟ್ ನ್ಯಾಯಾಧೀಶೆರಾಯಿನ ಜಸ್ಟಿಸ್ ಕೃಷ್ಣ ಎಸ್. ದೀಕ್ಷಿತ್, ಕರ್ನಾಟಕ ರಾಜ್ಯ ಕಾನೂನು ವಿಶ್ವವಿದ್ಯಾಲಯ ಹುಬ್ಬಳ್ಳಿದ  ಉಪಕುಲಪತಿ ಡಾ.ಸಿ.ಬಸವರಾಜು, ಕರ್ನಾಟಕ ರಾಜ್ಯ ಬಾರ್ ಕೌನ್ಸಿಲ್ ಅಧ್ಯಕ್ಷ ವಿಶಾಲ್ ರಾಜು ಎಚ್ ಎಲ್,
ದಕ್ಷಿಣ ಕನ್ನಡ ಜಿಲ್ಲಾ ಸೆಷನ್ಸ್ ನ್ಯಾಯಾಧೀಶೆರಾಯಿನ ರವೀಂದ್ರ ಎಂ. ಜೋಶಿ ಈ ಕಾರ್ಯಕ್ರಮಡ್  ಪಾಲ್  ಪಡೆಯರೆಗುಲ್ಲೆರ್.ಪಂಡುದ್ ಆರು ಮಾಯಿತಿ ಕೊರಿಯೆರು.

ಮೂಡುಬಿದರೆ ತಾಲೂಕುಡೇ  ಸುರುತ ಕಾನೂನು ಕಾಲೇಜು ಉಂದಾದುಂಡ್.  ಐನ್  ವರ್ಷದ ಕೋರ್ಸ್ ಗ್ ಸ್ಥಳೀಯ ಬೊಕ್ಕ  ಆಸುಪಾಸುದ  25 ವಿದ್ಯಾರ್ಥಿಲೆನ ದಾಖಲಾತಿಯಾದಿತ್ತುದ್, ಆಗಸ್ಟ್ 28 ಡ್ ಬೊಕ್ಕ  ಮೂಜಿ ವರ್ಷದ ಎಲ್ ಎಲ್ ಬಿ ಪ್ರಾರಂಭ ಮಲ್ಪುವಾ  ಪಂಡುದು ಆರು ಮಾಯಿತಿ ಕೊರಿಯೆರು.

ಕಾಲೇಜಿದ  ಪ್ರಾಚಾರ್ಯ ಡಾ. ಪ್ರದೀಪ್ ಎಂ.ಡಿ. ಪಾತೆರ್ದ್ , ಕಾಲೇಜಿಡುಪ್ಪುನ  ಸೌಲಭ್ಯಲು ಬೊಕ್ಕ ದುಂಬುದ  ಯೋಜನೆಲೆನ  ಬಗೆಟ್ ಮಾಯಿತಿ ಕೊರಿಯೆರು.
ದ್ವಿತೀಯ ಪಿಯುಸಿಡ್  ಶೇಕಡಾ 45ದಾತ್  ಅಂಕೊ ಪಡೆತುದ್ ವಿದ್ಯಾರ್ಥಿಲು  ನೇರವಾದ್ ಈ ಕೋರ್ಸ್ ದ ಪ್ರಯೋಜನ ಪಡೆತೊನೊಲಿ ಪಂಡುದು ಆರು ತೆರಿಪಾಯೆರು.

ವಿದ್ಯಾರ್ಥಿಲೆಗ್  ಬೋಡಾಯಿನ ಕಾನೂನು ಪುಸ್ತಕಲು, ಈ ಪುಸ್ತಕಲು, ಇ ಜರ್ನಲ್ಸ್, ವಿಶೇಷ ಕಲಿಕೆದ ರಿಸರ್ಚ್ ಪುಸ್ತಕಲು ಲಭ್ಯ ಇತ್ತುದ್, ಬೋಡಾಯಿನಾತ್ ಪುಸ್ತಕಲು  ಲೈಬ್ರೆರಿಡ್  ಸಂಗ್ರಹ ಉಂಡು. ವಿದ್ಯಾರ್ಥಿಲೆನ ಪ್ರಾಯೋಗಿಕ ಕಲಿಕೆಗ್ ಅಗತ್ಯವಿಪ್ಪುನ  ಮೂಟ್ ಕೋರ್ಟ್ ಸ್ಥಾಪನೆ ಆಪುಂಡ್. ವಿದ್ಯಾರ್ಥಿಲೆನ ಶೈಕ್ಷಣಿಕ ಉನ್ನತಿಗ್  ಬೋಡಾಯಿನ  ಮಾತಾ ಪೂರಕ ಸೌಲಭ್ಯಲೆನ್  ಮುಲ್ಪ  ಅಳವಡಿಸಾದುಂಡ್ ಪಂಡುದು ತೆರಿಪಾಯೆರು.

ವಿದ್ಯಾಲಯದ ಅಧ್ಯಕ್ಷ ರಾಘವೇಂದ್ರ ಪ್ರಭು ಪಾತೆರ್ದ್ , 3 ವರ್ಷದ ಪದವಿಯೋತ್ತರ ಕಾನೂನು ಪದವಿಗ್ ಒಪ್ಪಿಗೆ ತಿಕ್ಕುನ  ಸಾಧ್ಯತೆ ಉಂಡು.ಸದ್ಯಡೇ  ಉಂದುಲಾ ಪ್ರಾರಂಭ ಆವರೆಗುಂಡ್ ಪಂಡೆರು.
ಶಿರ್ತಾಡಿದ  ಮುಖ್ಯ ಪ್ರದೇಶಡ್  ಈ ವಿದ್ಯಾ ಸಂಸ್ಥೆ ಉಂಡು. ಪ್ರಶಾಂತ ವಾತಾವರಣ  ಬೊಕ್ಕ ವಿಶಾಲವಾಯಿನ ಜಾಗೆ  ಉಂಡು. ಶಿರ್ತಾಡಿದ  ಪೊರ್ಲುದ ಪ್ರದೇಶಡ್  ಕಾನೂನು ಕಾಲೇಜು ಇಪ್ಪುನವ್  ಸುತ್ತಮುತ್ತಲ ಜನಕುಲೆಗ್ ಕುಷಿಯಾತುಂಡ್. ಕೋರ್ಸ್ ಗ್  ಸೇರುನ ಆಸಕ್ತ ವಿದ್ಯಾರ್ಥಿಲು  ಕೂಡಲೇ ಸಂಪರ್ಕ ಮಲ್ಪೊಲಿ. ಹೆಚ್ಚಿಗೆ ಮಾಯಿತಿಗ್  ಮೊಬೈಲ್ :
9364899733  ಬೊಕ್ಕ 9364899734  ಸಂಪರ್ಕ ಮಲ್ಪೊಲಿ.

ಸಂಚಾಲಕ ಪ್ರಶಾಂತ ಎನ್, ಖಜಾಂಚಿ ಲತಾ ಎ ಉಪಸ್ಥಿತರಿತ್ತೆರು.