ಗಾದೆಲು ಬೊಕ್ಕ ಅಯಿತ್ತ ತಿರ್ಲ್

ಗಾದೆಲು
•××××ו××××ו×××××ו

1. ಕಿನ್ಕಿನೆನೆ ಕಿನ್ಕುಂಡ ದೈ ತೆಗ್ಲೆರೆ ಉಂಡ…
   ಕೆಲವೊಂಜಿ ವಿಚಾರೊಲೆಡ್ ನರಮಾನಿ ತಪ್ಪು ಮಲ್ಪುನ ಸಹಜ. ಅವೆಕ್ ಒರೊಗು ದಂಡಿಸಾವುನಲ ಅಗತ್ಯ. ಆಂಡ ಆ ತಪ್ಪುನೇ ತೋಜಾದ್ ಗಡಿಗಡಿ ಅವೆಕ್ ದಂಡಿಸಾವೊಂದೆ ಅತ್ತ ಅಪಮಾನ ಮಲ್ತೊಂದೆ ಇತ್ತುಂಡ ಆ ವ್ಯಕ್ತಿಗ್ ತನ್ನ ತಪ್ಪು ಸರಿ ಮಲ್ಪೆರೆ ಅವಕಾಶ ದಾಂತೆ ಪೋವು. ಪೊಸ ಬದ್ಕ್ ಕಟ್ಟೆರೆ, ತೆಗ್ಲೆ ಬುಲೆವೊಂದು ಬನ್ನಗ ಐತ ಕೊಡಿ ಕಿನ್ಕೆರೆ ಪೋಂಡ ಆ ದೈ ಪೆರಪ್ಪ ಬುಲೆವರೆ ಉಂಡ. ಅಂಚಾದ್ ಕಾಲಡ್ ಎಂಚಿನ ನಡತುಂಡಲ ಅವೆಕಾಪಿ ಶಿಕ್ಷೆ ಒರ ಕೊರಿಬೊಕ್ಕಲ ಕಡೆಮುಟ್ಟಲ ದಂಡನೇ ಕೊರ್ಪುನತ್ತಂದೆ ಪೊಸ ಬದ್ಕ್ ಗ್ ಅವಕಾಶ ಕೊರ್ದು ತೂವೊಡು ಪಂದ್ ಈ ಗಾದೆದ ತಿರ್ಲ್.
2. ಪಿಜಿನ ಬೇಲೆ, ಆನೆ ದರ್ಪ..
   ನರಮಾನಿ ಬೆನ್ಪುನಾಂಡ ಪಿಜಿನ್ ದಂಚ ಬಂಗ ಬತ್ತ್ದ್ ಬೆನೊಡುಗೆ. ತನ್ಕುಲೆ ಜೀವದ ಇರ್ವ ಪಟ್ಟ್ ಎಚ್ಚ ದಿನ್ನದ ಪುದೆನ್ ಕಲ್ತೆ ಬಯ್ಯ ಪಂದೆನ್ನಂದೆ ಕನತ್ ಪಾಡೊಂದು, ಬಂಗದಕಾಲೊಗ್ಲ ಒರಿಪಾವೊಂದು, ಸರ್ವೆರೊಟ್ಟಿಗೆಲ ಕೂಡೊಂದು ಬೆನ್ಪುನ ಗುಣ ನರಮಾನಿ ಕಲ್ಪೊಡು. ಅಂಚೆನೆ ನಡಕೆ ಬದ್ಕ್ ದ ರೀತಿಡ್ ಗಜ ಗಾಂಭೀರ್ಯ ಉಪ್ಪೊಡು. ಏರೆ ನಂಜಿ ಕುಚ್ಚನದ ಪಾತೆರೊಲೆಗ್ ಬಗ್ಗಂದೆ, ತನ್ನ ಬೆಗರ ಪಡಿಟೆ, ಆನೆ ಪೋಯಿನನೇ ಸಾದಿ ಪನ್ನಲೆಕ ತನ್ನ ಬದ್ಕ್ ನ್ ನಡಪಾವೊಡು ಪಂದ್ ಈ ಗಾದೆದ ತಿರ್ಲ್. (ಆಳಾಗಿ ದುಡಿ, ಅರಸನಾಗಿ ಉಣ್ಣು)
3. ಅರಿ ಪೋದು ನುಪ್ಪು ಆವು..
   ಕೆಲವೊಂಜಿ ವಿಚಾರೊಲು ಕೊಡಿಪು ಬನ್ನಗನೆ ಉಂತಾಂಡ ಒರಿವು ಅತ್ತಾಂದೆ, ಬುಲೆದ್ ನೆಗತ್ದ್ ಉಂತಿಬೊಕ್ಕ ಅತ್ತ ಪೊರ್ತು ಮೀರಿಬೊಕ್ಕ ಅವೆನ್ ಉಂತಾವೆರೆ ಸಾಧ್ಯ ಇಜ್ಜಿ. ಕೆಲವು ದುಶ್ಚಟೊಲು, ಗಂಗಸರ – ಸಿಗರೇಟು ದಂಚಿನ ಸೊತ್ತುಲು ಗಲಸಿನ ಪ್ರಾರಂಭೊಡೇ ಉಂತಾವೆರೆ ಸಾಧ್ಯ, ಆಂಡ ಇನೆದಾಂತೆ ದೆತೊಂದಿಬೊಕ್ಕ, ಮಲ್ಲ ಸೀಕುಲು ಬುಲೆಯಿಬೊಕ್ಕ, ಚಟ ಉಂತಾಂಡಲ ಕಾಲ ಮೀರ್ದಾದಿಪ್ಪುಂಡು. ಗೊತ್ತಾನಗ ಪೊರ್ತಾಂಡ್ ಪನ್ಪಿನ ಪಾತೆರದಲೆಕನೆ, ಪರಿಸ್ಥಿತಿ ಕೈಮೀರ್ದ್ ಪೋಂಡ ಬೊಕ್ಕ ಪಿರದುಂಬುದಂಚ ಮಲ್ಪರೆ ಸಾಧ್ಯ ಇಜ್ಜಿ ಪನ್ಪುನನೇ ಈ ಗಾದೆದ ತಿರ್ಲ್.
4. ಒರಿ ನುಪ್ಪು ಹಾಲ್ ಮಲ್ಪುವೆಂಡ ನುಪ್ಪು ಬೈಪಾವುನನೆ ಉಂತಾವೊಡ ..
   ಒವ್ವ ಕಜ್ಜನ್ ಮಲ್ಪುವೆ ಒರಿ ತಪ್ಪು ಮಲ್ಪುವೆ ಅತ್ತ ಹಾಲ್ ಪಂದಾಂಡ ನನ ದುಂಬಗ್ ಆ ಕೆಲಸನೇ ಮಲ್ಪರೆ ಬಲ್ಲಿ ಪನ್ಪುನ ಸನ್ನಿವೇಶ ಬನ್ನಗ ಈ ಗಾದೆ ಪ್ರಯೋಗ ಮಲ್ಪೊಲಿ
5. ಸಾರ ಪುದೆಗಂಟ್ ತೂದು, ಎನ್ನನೆ ಆವು ಪಂಡೆಗೆ..
   ಒರಿ ತನ್ನ ಕಷ್ಟದ ಪುದೆನ್ ತುಂಬೊಂದು ಸಭೆಕ್ ಪೋನಗ ಅಲ್ಪ ಬಾಕಿದಕ್ಲೆನ ಮಲ್ಲ ಮಲ್ಲ ಪುದೆಗಂಟ್ ತೂದು, ಅವೆರ್ದ್ ಎನ್ನ ಕಟ್ಟನೇ ಆವು ಪಂದ್ ಪಿರ ಬತ್ತೆಗೆ. ಅಂಚ ನರಮನಿ ತನ್ನನೇ ಕಷ್ಟ ಮಲ್ಲೆ ಪಂದ್ ಎನ್ನಿಯೆಂಡ ಅವೇರ್ದ್ ಮಲ್ಲ ಬಂಗ ಕುಡೊರಿಯಗ್ ಉಪ್ಪುಂಡು ಪನ್ಪುನ ತೆರಿದ್, ಎತೆ ದೆಪ್ಪುನ ಬುಡ್ದು ಕಷ್ಟನ್ ಎದುರಿಸಾವೊಡು ಪನ್ಪುನ ಈ ಗಾದೆದ ತಿರ್ಲ್.
6. ಬರಿತಾಯನ ಕಿದೆನ್ ತೂಪುನ ದುಂಬು,ನಮ್ಮ ಇಲ್ಲನ್ ಸುರು ತೂವೊಡುಗೆ..
   ಅಯ್ಯೊಲುನು ದೀದ್ ಮುಯ್ಯೊಲುಗ್ ಕೈ ಪಾಡೆರೆ ಬಲ್ಲಿ ಪನ್ಪುನ ಗಾದೆದಂಚ ನಮ್ಮ ಪರಿಸ್ಥಿತಿ ಗತಿಕೆಟ್ಟ್ದ್ ಉಪ್ಪುನಗ ನನೊರ್ಯನ್ ತೂದು ಮಸ್ಕಿರಿ ಮಲ್ಪರೆ ಬಲ್ಲಿ ಪನ್ಪುನ ಈ ಗಾದೆದ ತಿರ್ಲ್.

✍️ವಿಜೇತ್ ಎಂ‌. ಶೆಟ್ಟಿ ಮಂಜನಾಡಿ.
ತುಲುವೆರೆ ಕಲ