ಪ್ರಯೋಗದ ಜಾಲ್ಡ್ ಐನೆಸಲ್ ಕಬಿತೆ..

ಪ್ರಯೋಗದ ಜಾಲ್ಡ್ ಐನೆಸಲ್ ಕಬಿತೆ

ತುಲು ಬಾರಿ ಪೊರ್ಲುದ ಬಾಸೆ. ಸುಮಾರ್ 3000 ವರ್ಷ ಇತಿಹಾಸ ಉಪ್ಪುನ ಈ ಬಾಸೆಗ್ ಪೊರ್ಲುದ ಲಿಪಿಲಾ ಉಂಡು, ಆಂಡ ಒಂಜಿ ಕಾಲೊಡು ಕಾರಣಾಂತರಡ್ ಈ ಲಿಪಿ ಮದೆಯಾವೊಂದು ಪೋದು ತುಲು ಬಾಸೆ ಲಿಪಿ ಉಪ್ಪಂದಿ ಬಾಸೆ ಪನ್ಪಾವೊಂಡು. ಆಂಡ ಸತ್ಯ ಯೇತ್ ಸಮಯ ಮದೆಟ್ಟುಪ್ಪು ಪನ್ಲೆ….? ಒಂತೆ ವರ್ಸೊರ್ದು ದುಂಬು ಡಾ. ಪುಂಡೂರು ವೆಂಕಟರಾಜ ಪುಣಿಂಚಿತ್ತಾಯೆರ್ ತುಲು ಬಾಸೆಗ್ ಪೊರ್ಲುದ ಲಿಪಿ ಉಂಡು ಪಂದ್ ತೆರಿಪಾಯೆರ್ ಅವ್ವೆ ಅತ್ತಂದೆ14ನೇ ಶತಮಾನದ ಶ್ರೀ ಮಹಾಭಾರತೊ, ಶ್ರೀ ಭಾಗವತೋ, ದೇವಿ ಮಹಾತ್ಮೆ, ಕಾವೇರಿ, ಕರ್ಣ ಪರ್ವ ಕೃತಿಕುಲೆನ್ ಸಂಪೊಲಿತ್ದ್ ಪ್ರಕಟ ಮಲ್ತೆರ್. ಆಯಿಡ್ದ್ ಬೊಕ್ಕ ತುಲು ಲಿಪಿ ಪ್ರಚಾರ ಆವೊಂದು ಬತ್ತ್ಂಡ್. ಮಂದಾರ ರಾಮಾಯಣದಂಚಿನ ಮಹಾ ಕಾವ್ಯ.. ತುಲು ಮಾತ ಪ್ರಕಾರಗ್ ಒಗ್ಗುನಂಚಿನ ಬಾಸೆ ಪಂದ್ ತೆರಿಪಾದ್ ಕೊರ್ಪುಂಡು. ಕತೆ, ಕಬಿತೆ, ಪನಿಕಬಿತೆ, ಸುಗಿಪು, ಕಾದಂಬರಿ, ನಾಟಕ, ಪ್ರಹಸನ ಅವ್ವೆ ಅತ್ತಂದೆ ಪಾಶ್ಚಾತ್ಯ ಸಾಹಿತ್ಯಗ್ಲಾ ಒಂದುಂಡು ಪಂದ್ ಇತ್ತೆದ ತುಲು ಸಾಹಿತಿಲು ಎಚ್ಚಾದ್ ಬರೆಪಿನ ತುಲು ಗಝಲ್ ತೂನಗ ಗೊತ್ತಾಪುಂಡು.

ತುಲು ಸಾಹಿತ್ಯದ ಬುಲೆಚ್ಚಿಲ್ಗ್ ಪಂದೇ ಉಂಡಾಯಿನ ತುಲುವೆರೆ ಕಲ ಕೂಟ ತುಲು ಸಾಹಿತ್ಯದ ಪಿರವು ಒಂಜಾತ್ ಬೆನ್ನಿ ಬೆನೊಂದು ಉಂಡು. ಕಲಟ್ ವಾರ ವಾರ ಬೇತೆ ಬೇತೆ ಪ್ರಕಾರಡ್ ಪಂತೊ ನಡಪುಂಡು. ಇಂಚಪ್ಪ ಚುಟುಕು ಸಾಹಿತ್ಯ ಚಿಟ್ಕಾ ಪುದರ್ಡ್ ಬರವುಗಾರೆರೆನ ಉಡಲ್ ಗೆಂದ್ಂಡ್ . ತುಲುಟ್ ಚುಟುಕು ದುಂಬುಲಾ ಮಸ್ತ್ ಜನ ಬರೆತೆರ್.

ತುಲುವೆರೆ ಕಲ ಈ ವಾರದ ಪಂತೊಡು ಬರವುಗಾರೆರೆನ ಉಮೇದ್ ದೊಟ್ಟುಗು ಲಿಮೆರಿಕ್ ಸಾಹಿತ್ಯ ಪ್ರಕಾರನ್ ತುಲುಕು ಪ್ರಯೋಗಿಕವಾದ್ ಕನಪಿನ ಅಟ್ಟನೆ ಮಲ್ತೊಂದುಂಡು. ಲಿಮೆರಿಕ್ ಸಾಹಿತ್ಯ ಪ್ರಕಾರ ಐನ್ ಸಾಲ್ದ ರಚನೆ . ಈ ಪ್ರಕಾರದ ಮೂಲ ಗೊತ್ತುಜ್ಜಿ ಆಂಡ 18 ನೇ ಸತಮಾನಡ್ ಐರಿಶ್ ಸೈನಿಕೆರ್ ಪನೊಂದು ಇತ್ತಿನ ” ವಿಲ್ ಯು ಕಮ್ ಅಪ್ ಟು ಲಿಮೆರಿಕ್” ಕೋರಸಡ್ದ್ ಬೈದುಂಡು ಪನ್ಪೆರ್. ಇಂಗ್ಲೀಷ್ಡ್ ಲಿಮೆರಿಕ್ ಸಂಗ್ರಹ ಸುಮಾರ್ 1820ನೆ ಇಸವಿಡೇ ಸುರು ಆತ್ಂಡ್. ಸುರುಸುರುಕು ವಿಚಿತ್ರ ಸನ್ನಿವೇಶನ್ ಐತ ಉಲ ಮರ್ಮನ್ ಪನರೆ ಗಲಸೊಂದಿತ್ತಿನ ಸಾಹಿತ್ಯ ಪ್ರಾಸ ಪ್ರಧಾನ ಆದಿತ್ತ್‌ಜಿ ಆಂಡ ಸುಮಾರ್ 20ನೇ ಸತಮಾನಡ್ದ್ ಬೊಕ್ಕ ಈ ಪ್ರಕಾರಡ್ ಸುಮಾರ ಬದಲಾವನೆ ಆದ್ ಇತ್ತೆ ಪ್ರಾಸದ ಮಿತ್ತ್ ಜಾಸ್ತಿ ಗೇನ ದೀದ್ ಬರೆಯೊಂದುಲ್ಲೆರ್. ಈ ಪ್ರಕಾರದ 1ನೇ, 2ನೇ ಬೊಕ್ಕ 5ನೇ ಸಾಲ್ಡ್ ಒಂಜೇ ನಮೂನೆದ ಪ್ರಾಸ ಬತ್ತುಂಡ 3ನೇ ಬೊಕ್ಕ 4ನೇ ಸಾಲ್ಡ್ ಬೇತೆನೆ ಸಮಾನ ಪ್ರಾಸ ಬರ್ಪಿನ ವಿಶೇಷ.ಕನ್ನಡದಂಚಿ ನಿಲ್ಕ್ಂಡ ಪನಿಕಬಿತೆಲೆ ಪೆರ್ಮೆದ ಕಬಿ ಡುಂಡಿರಾಜ್ ಮೇರ್ ಮಸ್ತ್ ಲಿಮರಿಕ್ ಕಬಿತೆಲೆನ್ ಬರೆಯಿನಾರ್.ಆರ್ಲಾ ಮುಲ್ಪ ಉಪ್ಪುನ ಮಾಹಿತಿಗ್ ಹೊಂದುನ ರೀತಿಡೇ ಪ್ರಸ್ಥಾಪನೆ ಮಲ್ತ್‌ದ್ ಈ ಪ್ರಕಾರೊನು ಪಸೆರ್ದ್ ಪುದರ್ ಪಡೆದೆರ್. ತುಲುವೆರೆ ಕಲಟ್ ಐನೆಸಲ್ ಕಬಿತೆ ಪುದರ್ಡ್ ಲಿಮೆರಿಕ್ ಪ್ರಕಾರ ಈ ವಾರ ಪಂತೊದ ಕಲಟುಂಡ್.

ಉದಾರ್ಮೆಗ್ : ಬರವು : ಶ್ಯಾಮ್ ಪ್ರಸಾದ್ ಭಟ್.
೧
ಮಾತೆರ್ಲ ಸೇರೋಂದು ಮಲ್ಪುಗ ಲೇಸ್
ಪಟ್ಟೊಂದು ತಿನ್ಕ ನಮ ತುಳ್ನಾಡ್ದ ತಿನಸ್
ಏತೊಂಜಿ ಪೊರ್ಲು ನಮ್ಮ ತುಳು ಭಾಷೆ
ಕಬಿತೆಲೆನ್ ಕಟ್ಟೊಡು ಪನ್ಪಿ ಅಭಿಲಾಷೆ
ಲಿಮರಿಕ್ ಮುಡೆವರೆ ಮಲ್ಪುಲೇ ಮನಸ್

೨
ಈ ಬದ್ಕ್ ಪಂಡ ಪೂತ್ತ ಹಾಸಿಗೆ ಅತ್ತ್
ಬನ್ನಗ ಕನದಿಜ್ಜ ನಮ ಒವ್ವೇ ಸೊತ್ತ್
ಅಡ್ಡ ಸಾದಿಲೆಡ್ ದಾಯೆ ಪಜ್ಜೆಲೆನ್ ದೀಪ
ಮಿತ್ತಿಪ್ಪಿ ದೇಬೆರೆಗ್ ಬರು ತೂಲ ಕೋಪ
ಉದಾಸಿನ ಬುಡ್ದ್ ಇನಿಯೇ ಕಂಡೊಲೆನ್ ಬಿತ್ತ್

✍️ಗೀತಾ ಲಕ್ಷ್ಮೀಶ್
ತುಲುವೆರೆ ಕಲ