ಬಡಗಬೆಟ್ಟು ಕ್ರೆಡಿಟ್ ಕೋ ಆಪರೇಟಿವ್ ಸೊಸೈಟಿದ ವರ್ಷದ ಮಹಾಸಭೆ.

ಬಡಗಬೆಟ್ಟು ಕ್ರೆಡಿಟ್ ಕೋ-ಆಪರೇಟಿವ್ ಸೊಸಾಟಿ ಲಿ., ಉಡುಪಿ 2025-26ನೇ ಸಾಲುದ ವಾರ್ಷಿಕ ಸಾಮಾನ್ಯ ಸಭೆ

ರೂ. 15.09 ಕೋಟಿ ನಿವ್ವಳ ಲಾಭ – ಶೇ.15 ಡಿವಿಡೆಂಡ್ ಘೋಷಣೆ

ಉಡುಪಿದ  ಬಡಗಬೆಟ್ಟು ಕ್ರೆಡಿಟ್ ಕೋ-ಆಪರೇಟಿವ್ ಸೊಸ್ಯಾಟಿದ 2025-26ನೇ ಸಾಲುದ ವಾರ್ಷಿಕ ಸಾಮಾನ್ಯ ಸಭೆ ಸೆ.13 ಗ್ ಉಡುಪಿದ  ಶ್ರೀಮತಿ ಅಮ್ಮಣ್ಣಿ ರಾಮಣ್ಣ ಶೆಟ್ಟಿ ಸಭಾಭವನಡ್ ಸೊಸಾಟಿದ  ಅಧ್ಯಕ್ಷೆರಾಯಿನ ಸಹಕಾರ ರತ್ನ ಜಯಕರ ಶೆಟ್ಟಿ ಇಂದ್ರಾಳಿ ಅರೆನ ಅಧ್ಯಕ್ಷತೆಡ್  ನಡತುಂಡ್.

ಮಾಜಿಸಚಿವೆರಾಯಿನ ಶ್ರೀ ಪ್ರಮೋದ್ ಮಧ್ವರಾಜ್,ಶಾಸಕೆರಾಯಿನ ಯಶ್ ಪಾಲ್ ಸುವರ್ಣ ಮೊಕುಲು ಗಣ್ಯೆರೆನೊಟ್ಟುಗ್ ಸೇರ್ದ್ ಕಜ್ಜೊದ ಉದಿಪನ ಮಲ್ತೆರ್.

ಸಂಘದ ಪ್ರಧಾನ ವ್ಯವಸ್ಥಾಪಕೆರಾಯಿನ ರಾಜೇಶ್ ವಿ. ಶೇರಿಗಾರ್ ಮೇರು ವಾರ್ಷಿಕ ವರದಿ ಬೊಕ್ಕ ಲೆಕ್ಕಪತ್ರಲೆನ್ ಮಂಡಿಸಾಯೆರು. ವರದಿ ಸಾಲುದ ಅಂತ್ಯೊಗ್  ಸಂಘ 22,869 ಸದಸ್ಯೆರು, ರೂ.4.89 ಕೋಟಿ ಪಾಲು ಬಂಡವಾಳ ಬೊಕ್ಕ ರೂ.658.80 ಕೋಟಿ ಠೇವಣಿ ಇತ್ತುದ್, ರೂ.533.96 ಕೋಟಿ ಪಿದಾಯಿದ ಬಾಕಿ ಸಾಲ ಉಂಡು. 2025-26ನೇ ಸಾಲುಡ್  ಸುಮಾರು ರೂ.4.089 ಕೋಟಿ ವಾರ್ಷಿಕ ವಹಿವಾಟು ಮಲ್ದಿತ್ತುದ್, ಸದಸ್ಯೆರೆನ ಸಹಕಾರಡ್ ರೂ.15.09 ಕೋಟಿ ನಿವ್ವಳ ಲಾಭ ಮಲ್ದುಂಡ್.. ಸದಸ್ಯೆರೆಗ್  ಶೇ.15 ಡಿವಿಡೆಂಡ್ ಘೋಷಣೆ ಮಲ್ತೆರ್..

ಸತತ 2 ಸರ್ತಿ  ರಾಷ್ಟ್ರಮಟ್ಟದ ಪ್ರಶಸ್ತಿ ಬೊಕ್ಕ 9 ಸರ್ತಿ ರಾಜ್ಯಮಟ್ಟದ ಪ್ರಶಸ್ತಿಲೆನ್  ಪಡೆದಿನ ಸಂಘಗ್, 2025-26ನೇ ಸಾಲುದ ಸರ್ವತೋಮುಖ ಅಭಿವೃದ್ಧಿಗಾದ್ ದಕ್ಷಿಣ ಕನ್ನಡ ಜಿಲ್ಲಾ ಕೇಂದ್ರ ಸಹಕಾರಿ ಬ್ಯಾಂಕ್ ದ ವಾರ್ಷಿಕ ಮಹಾಸಭೆಟ್ “ಸಾಧನಾ ಪ್ರಶಸ್ತಿ” ತಿಕ್ಕುದುಂಡ್.. ಉಂದು ಸಂಘಗ್ ಸತತ 20ನೇ ಜಿಲ್ಲಾ ಪ್ರಶಸ್ತಿಯಾದುಂಡ್.

ಅಂಚೆನೇ 72ನೇ ಅಖಿಲ ಭಾರತ ಸಹಕಾರ ಸಪ್ತಾಹದ ರಾಜ್ಯಮಟ್ಟದ ಕಾರ್ಯಕ್ರಮಡ್ ಸಂಘಗ್ “ಸಹಕಾರ ಮಾಣಿಕ್ಯ” ಪ್ರಶಸ್ತಿ ತಿಕ್ಕುದಿತ್ತುದ್ , ಪಣವುದ ಇನಾಮು ಬೊಕ್ಕ  5 ಗ್ರಾಂ ಬಂಗಾರದ ಪದಕೊನ್  ಪಡೆತೊಂದುಂಡ್.. ಉಡುಪಿ ಜಿಲ್ಲೆದ  ಸುರುತ್ತ ಕ್ರೆಡಿಟ್ ಸಹಕಾರ ಸಂಘವಾದ್  ಈ ಪ್ರಶಸ್ತಿಗ್ ಪಾತ್ರವಾದುಪ್ಪುನವ್  ಸಂಘದ ಹೆಗ್ಗಳಿಕೆಯಾದುಂಡ್‌.

ಸಾಧಕೆರೆಗ್ ಸನ್ಮಾನ

ಸಭೆಟ್  ನಾನಾ  ಕ್ಷೇತ್ರಲೆಡ್ ಗಮನಾರ್ಹ ಸಾಧನೆ ಮಲ್ದಿನ ಐನ್ ಜನ  ಸಾಧಕೆರೆನ್  ಸನ್ಮಾನ ಮಲ್ತೆರ್.. ಫ್ಯಾಷನ್ ಕ್ಷೇತ್ರಡ್  ಅಂತರಾಷ್ಟ್ರೀಯ ಮಟ್ಟದ ಸಾಧನೆ ಮಲ್ದಿನ ಬಾಲಪ್ರತಿಭೆ ಸಚಿತ ರಾವ್, ಮಿಸ್ ಯೂನಿವರ್ಸ್ ಇಂಡಿಯಾ ಸ್ಪರ್ಧೆಯ ರಾಷ್ಟ್ರೀಯ ವೇದಿಕೆಡ್ ಉಡುಪಿನ್  ಪ್ರತಿನಿಧಿಸಾಯಿನ ಸುರುತ  ಸ್ಫೂರ್ತಿ ಡಿ. ಶೆಟ್ಟಿ, ಸತತ 25 ಗಂಟೆ ಕಾಲ 200ಗುಲಾ ಜಾಸ್ತಿ  ದಾಸೆರೆನ ಪದಕುಲೆನ್  ಪ್ರಸ್ತುತಪಡಿಸಾದ್ ಗೋಲ್ಡನ್ ಬುಕ್ ಆಫ್ ವರ್ಲ್ಡ್ ರೆಕಾರ್ಡ್ಸ್ ವಿಶ್ವದಾಖಲೆ ಮಲ್ದಿನ ವಿದುಷಿ ಸಂಗೀತ ಬಾಲಚಂದ್ರ, ಸ್ವಾವಲಂಬನೆದ ಮೂಲಕ ಆಹಾರ ಉತ್ಪನ್ನಲೆನ್ ತಯಾರ್ ಮಲ್ತುದ್ ಮಾರಾಟ ಮಲ್ತೊಂದುಪ್ಪುನ ಶ್ರೀಮತಿ ಸುಗುಣಾ ಪೈ ಟಿ., ಬೊಕ್ಕ ಪವರ್‌ಲಿಫ್ಟಿಂಗ್ ಬೊಕ್ಕ ಬೆಂಚ್ ಪ್ರೆಸ್‌ ಡ್ ಜಿಲ್ಲಾ-ರಾಜ್ಯ, ವಿಶ್ವವಿದ್ಯಾಲಯ ಬೊಕ್ಕ ದಕ್ಷಿಣ ಭಾರತ ಮಟ್ಟಡ್ ಸಾಧನೆ ಮಲ್ದಿನ ಆ್ಯನ್ನಿ ಲಿಸಾ ಅಮ್ಮನ ಮೊಕ್ಲೆಗ್ ಮಾನಾದಿಗೆ ನಡತುಂಡ್.ಸಂಘದ ಮಲ್ಪೆ ಶಾಖೆಯಲ್ಲಿ ಸುಮಾರು 11 ವರ್ಷ ಕಾಲ ದೈನಿಕ ಠೇವಣಿ ಸಂಗ್ರಾಹಕೆರಾದ್ ಸೇವೆ ಸಲ್ಲಿಸಾಯಿನ ನಿವೃತ್ತರಾಯಿನ ಶ್ರೀ ಗೋವಿಂದಾಸ್ ಕೆ. ಸುವರ್ಣೆರೆನ್ ಬುಡುದ್ ಕೊರಿಯೆರ್‌.

ಡಿಜಿಟಲೀಕರಣಗ್ ಆದ್ಯತೆ

ಸಂಘದ ಡಿಜಿಟಲೀಕರಣದ ಭಾಗವಾದ್ “ಚೇತನಾ ಮೊಬೈಲ್ ಆ್ಯಪ್ ನ್ ಸುರಕ್ಷಿತ ಮೊಬೈಲ್ ಬ್ಯಾಂಕಿಂಗ್ ಸೇವೆ ಒದಗಿಸಾವುನ ಉದ್ದೇಶಡ್ ಅಗತ್ಯ ಭದ್ರತಾ ಕ್ರಮದೊಟ್ಟುಗ್ ಅಭಿವೃದ್ಧಿಪಡಿಸಾದೆರ್‌. ಸದಸ್ಯೆರು ನೆತ್ತ ಸದುಪಯೋಗ ಪಡೆತೊನೊಡ್ ಮನವಿ ಮಲ್ತೆರು. ದೈನಿಕ ಠೇವಣಿ ಸಂಗ್ರಹಣೆನ್ ಲಾ  ಪಿಗ್ನಿ ಮೊಬೈಲ್ ಆ್ಯಪ್ ಮೂಲಕ ನಡಪಾವೊಲಿ ಪಂಡೆರು.

ಸಂಘ ಬ್ಯಾಂಕಿಂಗ್ ವ್ಯವಹಾರಗ್ ಸೀಮಿತ ಆವಂದೆ ಸಮಾಜಮುಖಿ ಕಾರ್ಯಲೆಗ್  ಆದ್ಯತೆ ಕೊರೊಂದಿತ್ತುದ್ ವಾರ್ಷಿಕವಾದ್  ಸುಮಾರು ರೂ.30 ಲಕ್ಷೊನ್ ಶಿಕ್ಷಣ, ಆರೋಗ್ಯ, ಸಾಂಸ್ಕೃತಿಕ ಬೊಕ್ಕ ಸಾಮಾಜಿಕ ಕಾರ್ಯಕ್ರಮಲೆಗ್ ವಿನಿಯೋಗ ಮಲ್ತೊಂದುಂಡ್ ಪಂಡೆರ್..

ಸದಸ್ಯೆರೆನ ಅನುಕೂಲಕ್ಕಾದ್  QR Code ಸೌಲಭ್ಯ, ಉಚಿತ ಮಿಸ್ಟ್ ಕಾಲ್ ಸೇವೆ, ಉಚಿತ ಎಸ್‌ಎಂಎಸ್ ಸೇವೆ, ಸೇಫ್ ಲಾಕರ್, ಇ-ಸ್ಟಾಂಪಿಂಗ್, ಪಾನ್ ಕಾರ್ಡ್, ವೆಸ್ಟರ್ನ್ ಯೂನಿಯನ್ ಮನಿ ಟ್ರಾನ್ಸ್‌ಫ‌ರ್, ಲಂಬಾರ್ಡ್ ಆರೋಗ್ಯ ಕಾರ್ಡ್, ಮಣಿಪಾಲ ಆರೋಗ್ಯ ಕಾರ್ಡ್ ಬೊಕ್ಕ ಮಾತಾ ರೀತಿದ ವಿಮಾ ಸೌಲಭ್ಯಲೆನ್  ಒದಗಿಸಾವುಂಡ್  ಪಂಡೆರು.

ಸಂಘದ ಆಡಳಿತ ಮಂಡಳಿ ಸದಸ್ಯೆರಾಯಿನ  ಸಂಜೀವ ಕಾಂಚನ್, ಎಲ್. ಉಮಾನಾಥ, ಪುರುಷೋತ್ತಮ ಪಿ. ಶೆಟ್ಟಿ. ಹಾಜಿ ಸಯ್ಯದ್ ಅಬ್ದುಲ್ ರಜಾಕ್, ವಿನಯ ಕುಮಾರ್ ಟಿ.ಎ., ಪದ್ಮನಾಭಕೆ ನಾಯಕ್, ಸದಾಶಿವ ನಾಯ್ಕ, ಮನೋಹರ್ ಎಸ್ ಶೆಟ್ಟಿ, ಸಾಧು ಸಾಲ್ಯಾನ್, ಜಯಾ ಶೆಟ್ಟಿ, ಗಾಯತ್ರಿ ಎಸ್. ಭಟ್ ಸಭೆಟ್  ಉಪಸ್ಥಿತರಿತ್ತೆರು.

ಸಂಘದ ಮಲ್ಪೆ ಶಾಖಾ ವ್ಯವಸ್ಥಾಪಕೆರಾಯಿನ ನವೀನ್ ಕೆ  ಕಾರ್ಯಕ್ರಮ ನಿರೂಪಣೆ ಮಲ್ತೆರು. ಸಹಾಯಕ ಪ್ರಧಾನ ವ್ಯವಸ್ಥಾಪಕೆರಾಯಿನ  ಪ್ರವೀಣ್ ಕುಮಾರ್ ಸೊಲ್ಮೆ ಸಂದಾಯ್ತ ಮಲ್ತೆರು.