ಎಸ್ ಐ ಆರ್ ಬಗ್ಗೆ ಡಿಸಿ ಸಂವಾದ

*ಎಸ್‌ಐಆರ್ ಬಗ್ಗೆ  ಡಿಸಿ ನೊಟ್ಟುಗ್ ಸಂವಾದ: ಸನ್ಮತಿ ಪತ್ರಿಕೆದ  ಸಂಚಿಕೆ ಬುಡುಗಡೆ*

ಉಡುಪಿ, ಜು.೧೦: ವಿಶೇಷ ಮತದಾರರ ಪಟ್ಟಿ ಪರಿಷ್ಕರಣೆ(ಎಸ್‌ಐಆರ್) ಗ್ ಸಂಬಂಧ ಪಟ್ಟಿನ ಆ.5 ತಾರೀಕುಗ್ ಕರಡು ಪಟ್ಟಿನ್  ಪ್ರಕಟಣೆ ಮಲ್ಪುಂಡ್. ನೆಟ್ಟ್ ಪುದರು ಬುಡುದ್  ಪೋದಿತ್ತುಂಡ ಮಾತ್ರ ಸಂಬಂಧಪಟ್ಟಿನ ದಾಖಲೆಡ್  ಒಂಜೆನ್ ಸಲ್ಲಿಸಾವೊಡ್  ಅತ್ತಾವಂದೆ ಪುದರು ಇತ್ತಿನಕುಲಕ ಒವ್ವೆ  ದಾಖಲೆನ್  ಸಲ್ಲಿಸಾವೊಡಾಯಿನ ಅಗತ್ಯ ಇಪ್ಪುಜಿ  ಪಂಡುದು ಉಡುಪಿ ಜಿಲ್ಲಾಧಿಕಾರಿ ಸ್ವರೂಪ ಟಿ.ಕೆ. ತೆರಿಪಾದೆರ್.

ಉಡುಪಿ ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘದ ವತಿಡ್ದ್  ಉಡುಪಿ ಪತ್ರಿಕಾ ಭವನ ಸಮಿತಿದ  ಸಹಯೋಗದೊಟ್ಟುಗ್ ಉಡುಪಿ ಪತ್ರಿಕಾ ಭವನಡ್  ಶುಕ್ರವಾರ ಆಯೋಜನೆ ಮಲ್ದಿನ ಎಸ್‌ಐಆರ್ (ಸಮಗ್ರ ಮತದಾರರ ಪಟ್ಟಿ ಪರಿಷ್ಕರಣೆ) ಬಗ್ಗೆ ತಿಂಗಳ ಅಂಗಳ ಸಂವಾದ ಕಾರ್ಯಕ್ರಮಡ್  ಆರು ಪಾತೆರಿಯೆರು.

ಇಲ್ಲ ಇಲ್ಲಗ್ ಭೇಟಿ ಕೊರ್ದು ಫಾರ್ಮ್ ಕೊರ್ರೆಗ್ ಬೊಕ್ಕ ಸಂಗ್ರಹ ಮಲ್ಪೊಡ್ ಪಂಡುದು ಬಿಎಲ್‌ಓ ನಕ್ಲೆಗ್  ಕೆಲವು ಸಲ  ಕಟ್ಟುನಿಟ್ಟುದ  ಸೂಚನೆ ಕೊರ್ತುಂಡ್.. ನಿಧನಗತಿಟ್ ಕಾರ್ಯನಿರ್ವಹಿಸಾಯಿನ  ಬಿಎಲ್‌ಓ ನಕ್ಲೆಗ್ ಇತ್ತೆನೇ ನೋಟೀಸ್ ಜಾರಿ ಮಲ್ದುಂಡ್.. ಸರಿಯಾದ್  ಕರ್ತವ್ಯ ನಿರ್ವಹಿಸಾಯಿಜಿಡ  ಬಿಎಲ್‌ಓ ನಕ್ಲೆನ ಬಗ್ಗೆ ಏರಾಂಡಲಾ  ಗಮನಗ್  ಕನತುಂಡ ಸೂಕ್ತ ಕ್ರಮ ದೆತೊಂಬುಂಡ್  ಪಂಡೆರು.

ಫಾರ್ಮ್ ಸಲ್ಲಿಸಾದುಲಾ  ಕರಡು ಪಟ್ಟಿಡ್  ಪುದರು ಬುಡುದ್ ಪೋದಿತ್ತುಂಡ ಅಕುಲು ಅಕ್ಲೆಡ  ಉಪ್ಪುನ ಕುಡೊಂಜಿ ಪ್ರತಿತ ಒಟ್ಟುಗ್  ಅರ್ಜಿ ಸಲ್ಲಿಸಾವೊಲಿ.. ಪುದರುಡ್  ವ್ಯಾತ್ಯಾಸ ಇತ್ತಿನಕ್ಲೆಗ್ ನಮನೇ ನೋಟೀಸ್ ಕೊರ್ಪ. ಅಕುಲು ಅಕ್ಲೆನ ಪ್ರಸ್ತುತ ಪುದರು ಬದಲ್ ಮಲ್ಪರೆಗ್ ಸಂಬಂಧ ಪಟ್ಟಿನ ದಾಖಲೆನ್  ಸಲ್ಲಿಸಾವೊಡ್ . ಕರಡು ಪಟ್ಟಿಡ್  ಇತ್ತಿನಕ್ಲೆನ ಪುದರು ಒವ್ವೇ ಕಾರಣಗುಲಾ ಅಂತಿಮ ಪಟ್ಟಿಡ್  ಬುಡ್ದ್  ಪೋಪುಜಿ.. ಅ.7 ತಾರೀಕ್  ಅಂತಿಮ ಮತದಾರೆರೆನ ಪಟ್ಟಿನ್  ಪ್ರಕಟಣೆ ಮಲ್ಪುಂಡ್ ಪಂಡುದು  ಆರು ತೆರಿಪಾಯೆರು.

ಫಾರ್ಮ್‌ಗ್  ಸಂಬಂಧಿಸಾಯಿನ  ಗೊಂದಲ ನಿವಾರಣೆ ಮಲ್ಪರೆಗ್ ಬೊಕ್ಕ ಸಹಾಯ ಮಲ್ಪರೆಗ್ ತಾಲೂಕು ಮಟ್ಟಡ್ ಅಧಿಕಾರಿಲೆನ್  ನೇಮಕ ಮಲ್ದುಂಡ್.. ಬೂತ್‌ ಡೇ ಸ್ವಯಂ ಸೇವಕೆರೆನ್  ನೇಮಕ ಮಲ್ದುಂಡ್. ಅಕುಲು ಐತಾರಲಾ  ಕಾರ್ಯ ನಿರ್ವಹಣೆ ಮಲ್ಪುವೆರ್.. ಬಿಎಲ್‌ಓ ಲೆನ ಬಗ್ಗೆ ದೂರುಲು ಇತ್ತುಂಡ  ಸೆಕ್ಟರ್ ಅಧಿಕಾರಿಲು ಅತ್ತುಂಡ  ತಹಶೀಲ್ದಾರ್‌ಗ್  ದೂರವಾಣಿ ದ ಮೂಲಕ  ತೆರಿಪಾವೊಲಿ ಪಂಡೆರು.

ಈ  ಸಂದರ್ಭಡ್  ಜಿಲ್ಲಾಧಿಕಾರಿ ಸಂಘದ ‘ಸನ್ಮತಿ’ ಪತ್ರಿಕೆದ ಜೂನ್ ತಿಂಗೊಲ್ದ  ಸಂಚಿಕೆ ಬುಡುಗಡೆ ಮಲ್ತೆರು. ಅಧ್ಯಕ್ಷತೆಡ್  ಸಂಘದ ಅಧ್ಯಕ್ಷ ಸುಬ್ರಹ್ಮಣ್ಯ ಜಿ.ಕುರ್ಯ ಇತ್ತೆರು. ವಾರ್ತಾಧಿಕಾರಿ ಮಂಜುನಾಥ್, ಸಂಘದ ಜಿಲ್ಲಾ ಕೋಶಾಧಿಕಾರಿ ಹರೀಶ್ ಕುಂದರ್, ಪತ್ರಿಕಾ ಭವನ ಸಮಿತಿದ ಸಹಸಂಚಾಲಕ ಗಣೇಶ್ ಕಲ್ಯಾಣಪುರ ಉಪಸ್ಥಿತರಿತ್ತೆರು.

ಜಿಲ್ಲಾ ಸಂಘದ ಪ್ರಧಾನ ಕಾರ್ಯದರ್ಶಿ ನಝೀರ್ ಪೊಲ್ಯ ಸ್ವಾಗತ ಮಲ್ತುದ್ . ರಾಜ್ಯ ಸಮಿತಿ ಸದಸ್ಯ ಆಸ್ಟ್ರೋ ಮೋಹನ್ ವಂದಿಸಾಯೆರು. ಪತ್ರಕರ್ತ ರಹೀಂ ಉಜಿರೆ ಕಾರ್ಯಕ್ರಮ ನಿರೂಪಣೆ ಮಲ್ತೆರು.