ಪೇಜಾವರ ಶ್ರೀಕುಲ್ ಮಾನಾದಿಗೆ ಮಲ್ತಿನ ಪೊರ್ತುಡ್‌ ತುಳುಲಿಪಿತ್ತ ಬಗ್ಗೆ ವಿವರ ಕೇಂಡಿನ ರಾಜ್ಯಪಾಲೆರ್..

ಶ್ರೀ ಕೃಷ್ಣದೇವರೆನ ದರ್ಶನ ಮಲ್ಪರೆಗ್ ಸುರುತ್ತ ಸರ್ತಿ ಉಡುಪಿಗ್ ಬತ್ತಿನ ರಾಜ್ಯಪಾಲ ಶ್ರೀ ತಾವರ್ ಚಂದ್ ಗೆಹ್ಲೋಟ್ ಅರೆನ್ ಪ್ರವಾಸಿ ಬಂಗ್ಲೆಡ್ ಶ್ರೀ ಪೇಜಾವರ ಮಠದ ಪರವಾದ್ ಸ್ವಾಗತ ಮಲ್ತುದ್ ಅಭಿನಂದನೆ ಮಲ್ತೆರ್.

ಮಠದ ದಿವಾನರಾಯಿನ ಎಂ ರಘುರಾಮಾಚಾರ್ಯ , ಸಿ ಇ ಒ ಸುಬ್ರಹ್ಮಣ್ಯ ಭಟ್ , ವಿದ್ವಾನ್ ವೇಣುಗೋಪಾಲ ಸಾಮಗ ಬೊಕ್ಕ ಸಾಮಾಜಿಕ ಕಾರ್ಯಕರ್ತ , ಶ್ರೀಗಳ ಆಪ್ತ ವಾಸುದೇವ ಭಟ್ ಪೆರಂಪಳ್ಳಿ ಮೊಕುಲು ಮಾತಾ ಇತ್ತಿನ ನಿಯೋಗ ರಾಜ್ಯಪಾಲೆರೆನ್ ಭೇಟಿಯಾದ್ ಶ್ರೀಕೃಷ್ಣನ ಪಾವನ ಭೂಮಿ ಉಡುಪಿಗ್ ಸ್ವಾಗತ ಮಲ್ತುದ್ ಝರತಾರಿ ಶಾಲು ಪೂಗುಚ್ಛ , ದಿವಂಗತ ಪಾದೂರು ಗುರುರಾಜ ಭಟ್ಟೆರೆನ ತುಳುನಾಡು ಸಂಸ್ಕೃತಿ ಬೊಕ್ಕ ಇತಿಹಾಸ ಒಂದು ಅಧ್ಯಯನ ಸಂಶೋಧನಾ ಕೃತಿ , ಡಾ ಬನ್ನಂಜೆ ಗೋವಿಂದಾಚಾರ್ಯರೆನ ಕನಕೋಪನಿಷತ್ತು , ಪ್ರಸಿದ್ಧ ಛಾಯಾಗ್ರಾಹಕ ಆಸ್ಟ್ರೋ ಮೋಹನ್ ಅರೆನ ಶ್ರೀ ವಿಶ್ವೇಶತೀರ್ಥ ಶ್ರೀಪಾದೆರೆನೊಟ್ಟುಗ್ ಒಂಜಿ ದಿನ ಛಾಯಾಚಿತ್ರ ಸಂಚಿಕೆ , ಬೊಕ್ಕ ಫಲವಸ್ತು ಕೊರ್ದ್ ಅಭಿನಂದನೆ ಮಲ್ತೆರ್.

ಶ್ರೀ ಸಾಮಗೆರ್ ಬೊಕ್ಕ ವಾಸುದೇವ ಭಟ್ಟೆರು ಈ ಸಂದರ್ಭ ಮಂಗಲಾಷ್ಟಕ ಸ್ತೋತ್ರ ಮಲ್ತೆರ್.

ರಾಜ್ಯಪಾಲೆರೆಗ್ ಕೊರಿನ ಗುರುರಾಜ ಭಟ್ಟೆರೆನ ಕೃತಿತ ಒಳಪುಟಟ್ ಸಂಸ್ಕೃತ ಕನ್ನಡ ಬೊಕ್ಕ ತುಳು ಲಿಪಿಟ್ ರಾಜ್ಯಪಾಲೆರೆನ ಪುದರ್ ಇತ್ತಿನ ಶ್ರೀ ವಿಶ್ವಪ್ರಸನ್ನತೀರ್ಥೆರೆನ ಶುಭ ಸಂದೇಶ ಇತ್ತುಂಡ್. ತುಳು ಲಿಪಿತ್ತ ಪುದರುದ ಬಗ್ಗೆ ಕುತೂಹಲಡ್ ವಿವರ ಕೇಂಡೆರ್.

ಮಂಗಳವಾರದಾನಿ ರಾಜಭವನಡ್ ಪದ್ಮಪ್ರಶಸ್ತಿ ಪುರಸ್ಕೃತರೆಗ್ ಆಯೋಜನೆ ಮಲ್ದಿನ ಅಭಿನಂದನಾ ಕಾರ್ಯಕ್ರಮಡ್ ಶ್ರೀ ಪೇಜಾವರ ಶ್ರೀಕುಲ್ ಪೂರ್ವನಿರ್ಧರಿತ ಕಾರ್ಯ ನಿಮಿತ್ತ ಪಾಲ್ ಪಡೆಯರೆಗ್ ಅನಾನುಕೂಲ ಆಪಿನವ್ವೆನ್ ತೆರಿಪಾಯೆರ್.