ಸೀತಾ ತುದೆತ್ತ ಮಟ್ಟೆಲುಡ್ ಮಿನ್ಕೊಂದುಪ್ಪುನ ಶಕ್ತಿ ಸ್ವರೂಪಿಣಿ
ಬೆಣ್ಣೆಕುದ್ರು ಶ್ರೀ ಕುಲ ಮಹಾಸ್ತ್ರೀ ಅಮ್ಮನ ಜಾತ್ರಾ ಮಹೋತ್ಸವ ಉಂದುವೇ ಬರ್ಪಿನ ಡಿಸೆಂಬರ್ 15 ತಾರೀಕುಡ್ದ್ ಧನು ಸಂಕ್ರಾಂದಿದ ಗೆಂಡ ಸೇವೆಡ್ದ್ ಸುರುವಾದ್ 19 ತಾರೀಕುಮುಟ್ಟ ಧಾರ್ಮಿಕ,ಸಾಂಸ್ಕೃತಿಕ ಕಾರ್ಯಕ್ರಮದೊಟ್ಟುಗ್ ನಡಪರೆಗುಂಡ್.
ಇತಿಹಾಸೊಡೇ ಪುಗಾರ್ತೆನ್ ಪಡೆದಿನ ಬಾರ್ಕೂರುದ ಕಲ್ಲು ಚಪ್ಪರದ ಪಡ್ಡಾಯಿ ದಿಕ್ಕುಡ್ ಸುಮಾರು ಒಂಜರೆ ಕಿಲೋ ಮೀಟರು ದೂರೊಡ್ ಸುತ್ತಲಾ ಜಲಾವೃತೊಡುಪ್ಪುನ ಕಿನ್ನ ದ್ವೀಪನೇ ಬೆಣ್ಣೆಕುದ್ರು. ಅವಿಭಜಿತ ದಕ್ಷಿಣ ಕನ್ನಡ ಜಿಲ್ಲೆದ ಸಮಸ್ತ ಮೊಗವೀರ ಕುಲಬಾಂದವೆರ್ ನಂಬುದ್ ಆರಾಧನೆ ಮಲ್ತೊಂದ್ ಬರೊಂದುಪ್ಪುನ ಮೂಲ ಸಂಸ್ಥಾನನೇ ಈ ಪುಟ್ಟ ದ್ವೀಪಡ್ ನಿಲೆ ಆಯಿನ ಶ್ರೀಕುಲ ಮಹಾಸ್ತ್ರೀ ಅಮ್ಮನ ದೇವಸ್ಥಾನ. ಸರಿ ಸುಮಾರು ಒಂಜಿ ಸಾವಿರ ವರ್ಷಧ ಇತಿಹಾಸ ಉಪ್ಪುನ ಈ ದೇವಸ್ಥಾನ ಒರುಂಭ ತಲೆಮಾರುದ ಶ್ರೇಷ್ಟವಾಯಿನ ಭವ್ಯ ಗುರು ಪರಂಪರೆದ ನಿಲೆ ಆತುಂಡ್. ಪತ್ತಪ್ಪೆ ಜೋಕುಲ್ ಒಟ್ಟಾದ್ ಸೇರುದ್ ಸಾಮೂಹಿಕ ನಿಲಟ್ ಸಮುದಾಯದ ಎಡ್ಡೆಪ್ಪುಗ್ ಮಲ್ಪುನ ಸಾಮೂಹಿಕ ಪ್ರಾರ್ಥನೆಗ್ ಈ ಕ್ಷೇತ್ರೊಡ್ ವಿಶೇಷ ಪ್ರಾಶಸ್ತ್ಯ ಉಂಡು.
#ಸ್ಥಳ #ಪುರಾಣ : ವಿಜಯನಗರದ ಅರಸೆರೆನ ಕಾಲೊಡ್ದುಲಾ ಪೂರ್ವೊಡ್ ಬೆಣ್ಣೆಕುದ್ರು, ಬಾರ್ಕೂರು ಸಂಸ್ಥಾನದ ಸೇವಾ ಠಾಣೆಯಾದಿತ್ತುಂಡ್. ಅಂಚೆನೇ ಸೇನಾಪತಿನಕುಲ್ ಆರಾಧನೆ ಮಲ್ತೊಂದಿತ್ತಿನ ವೀರಭದ್ರ ದೇವಸ್ಥಾನಲಾ ಮೂಲೊಡಿತ್ತುಂಡ್. ಪನ್ಪಿನ ಮಾಹಿತಿ ಸ್ಥಳ ಪುರಾಣಡ್ದ್ ತೆರಿದ್ ಬೈದುಂಡ್ ..ಬಡಕಾಯಿ ಭಾಗೊಡ್ದ್ ಬತ್ತಿನ ಮೊಗವೀರ ಸಮಾಜದ ತಪಸ್ವಿನಿ ಪೊಂಜೊವ್ ತನ್ನ ದಿವ್ಯ ಶಕ್ತಿಡ್ದ್ ಜನ ಸಾಮಾನ್ಯರ ಬೇನೆ ಬೇಸರುನ್ ಪುಗಾರ್ತೆನ್ ಪಡೆಯೊಲ್. ಮುಖ್ಯವಾದ್ ಸೇನಾಧಿಪತಿ ಗಂಡಾಂತರೊಡ್ ತಿಕ್ಕುದಿತ್ತಿನ ಪೊರ್ತುಡ್ ತನ್ನ ಪವಾಡಡ್ ಆಯನ್ ಪಾರುಮಲ್ತುದ್ ರಾಜಮರ್ಯಾದೆಗೆ ಪಾತ್ರಳಾತೊಲ್ ಪನ್ಪಿನ ಪ್ರತೀತಿ. ಆ ತಪಸ್ವಿನಿನ ಪರಯೆ ಗುರು ದಂಪತಿಲು ತಮ್ಮ ತಪೋಃಶಕ್ತಿಡ್ದ್ ಸಿದ್ಧಿಸಾಯಿನ ಶ್ರೀದೇವಿನ ಅನುಗೃಹದೊಟ್ಟುಗ್ ಇಡೆಗ್ ಬತ್ತಿನಪಗ ಅಕಲೆಗುಲಾ ರಾಜ ರಾಜಮರ್ಯಾದೆಯ ಸ್ವಾಗತ ಮಲ್ತೆರ್. ಈ ಗುರುದಂಪತಿಲು ತಪಸ್ವಿನಿನೊಟ್ಟುಗ್ ನಿಲೆಆಯಿನ ಮೂಲದ ಇಲ್ಲೇ ಗುರುಮಠ. ಅವ್ವೆಡ್ ಬೊಕ್ಕ ಸೇನಾಧಿಪತಿ ಬೊಕ್ಕ ಕರಾವಳಿದ ಕಡಲಪ್ಪೆ ಜೋಕ್ಲೆನ ಬೇಡಿಕೆಗ್ ಗುರುದಂಪತಿಲು ಸ್ವತಃ ಶ್ರೀ ವೀರಭದ್ರ ದೇವೆರೆನ ಕೈತಲುಡ್ ಪೀಠೊಡ್ ಬೊಲ್ಪು ಅರ್ಲಾವುನ ಮುಖೇನ ಪ್ರತಿಷ್ಠಾಪಣೆ ಮಲ್ತಿನ ದೇವಿಯೇ ಪಂಚಾಂಶ ಸಂಭೂತೆಯಾಯಿನ ಶ್ರೀ ಕುಲಮಹಾಸ್ತ್ರೀ ಅಮ್ಮನವರು ಪನ್ಪಿನ ಪ್ರತೀತಿ. ಆ ತಪಸ್ವಿನಿ ಪೊಂಜೋವ್ ಬೇತೆ ಏರ್ಲಾ ಅತ್ತ್ ಇತ್ತೆ ಪೂಜೆ ಮಲ್ತೊಂದುಪ್ಪುನ ಅಜ್ಜಮ್ಮ ದೇವೆರು ಪನ್ಪಿನ ವಿಷಯ ಹೆಚ್ಚಿನಕ್ಲೆಗ್ ತೆರಿದುಜಿ. ಆನಿಡ್ದ್ ಈ ದೇವಸ್ಥಾನಡ್ ಶ್ರೀ ಕುಲ ಮಹಾಸ್ತ್ರೀ ಅಮ್ಮನ್ ಪ್ರಧಾನ ದೇವಿಯಾದ್ ಮೊಗವೀರೆರು ಆರಾಧನೆ ಮಲ್ತೊಂದ್ ಬತ್ತೆರ್ ಪಂಡುದ್ ಸ್ಥಳಪುರಾಣೊಡ್ದ್ ತೆರಿದ್ ಬೈದುಂಡ್. ಶ್ರೀಕುಲ ಮಹಾಸ್ತ್ರೀ ಅಮ್ಮನ್ ಪ್ರತಿಷ್ಠಾಪಣೆ ಮಲ್ತಿನ ಗುರುಕುಲಾಯಿನ ಶ್ರೀ ಮಂಗಳ ಪೂಜಾರ್ಯೆರು ಸಮಾಜದ ಕುಲಗುರುಕುಲಾದಿತ್ತುದ್ ಶ್ರೇಷ್ಠ ಗುರುಪರಂಪರೆಗ್ ಕಾರಣೀಭೂತರಾತೆರ್. ಆನಿ ಪೊತ್ತಾಯಿನ ಶ್ರೀಕುಲಮಹಾಸ್ತ್ರೀ ದೇವಿನ ಜ್ಯೋತಿ ನಂದಾದೀಪವಾದ್ ಬೆಳಗೊಡ್ ಪ್ರತೀ ಗುಡಿಡ್ದ್ ವಾರ್ಷಿಕ ದೀಪ ಕಾಣಿಕೆ ಸಂಗ್ರಹ ಮಲ್ಪುನ ಪರಿಪಾಠ ಮೂಲಗುರುಗಳ ಕಾಲೊಡ್ದುಲಾ ಬತ್ತಿನ ಪದ್ಧತಿ. ಶ್ರೀಕುಲಮಹಾಸ್ತ್ರೀ ಪಂಚ ಶಕ್ತಿಯ ಅಂಶೊಲೆನ ದೈವಸ್ವರೂಪಿಯಾದಿತ್ತುದ್ ಅನ್ನಪೂರ್ಣ, ಭದ್ರಕಾಳಿ, ಮಾರಿಯಮ್ಮ , ದುರ್ಗೆ ಬೊಕ್ಕ ಪ್ರತಿಬಿಂಬ ಸ್ವರೂಪಿಣಿಯೆರೆನ ಸಮಾಗಮ ಆತುಂಡ್. ಅಂಚೆನೇ ವೀರಭದ್ರ ದೇವೆರುಲಾ ನಾಗ, ಬ್ರಹ್ಮ, ರಕ್ತೇಶ್ವರಿ , ನಂದಿ ಬೊಕ್ಕ ಕ್ಷೇತ್ರಪಾಲರೆನ್ ಪಂಚದೈವಿಕ ಸ್ಥಾನವಾದಿತ್ತುದ್ ಬಹುಕಾರಣಿಕ ಆವರೆಗ್ ಕಾರಣವಾದಿಪ್ಪು. ಶ್ರೀಕುಲ ಮಹಾಸ್ತ್ರೀನ್ ಕುಲಗುರುನೊಟ್ಟುಗ್ ಋಷಿಮುನಿಕುಲ್ ಆರಾಧನೆ ಮಲ್ತೊಂದ್ ಮುಲ್ಪ ಸಾನಿಧ್ಯ ಪಡೆಯಿನೈಕ್ ಕುರುಹು ಉಂಡು.ಮುಲ್ಪ ಉಪ್ಪುನ ಪರಿವಾರ ದೈವೊಲ್ ಶ್ರೀಕುಲ ಮಹಾಸ್ತ್ರಿ ನೊಟ್ಟುಗ್ ಪ್ರತಿಷ್ಠಾಪನೆ ಆತುಂಡ್ ಪಂಡುದ್ ತೆರಿದ್ ಬೈದುಂಡ್. ಈ ದೇವಸ್ತಾನದ ಪ್ರತಿಷ್ಠಾ ವಿಧಿ ವಿಶಿಷ್ಠ ಪರಂಪರೆದಾದಿತ್ತುದ್ ಪೀಠ ಬೊಕ್ಕ ಬಿಂಬ ಪ್ರತಿಷ್ಠೆನ್ ತೂವೊಲಿ.ವಿಗ್ರಹಾರಾಧನೆ ಇಂಚಪ್ಪೊದ ಬೆಳವಣಿಗೆ ಪಂಡುದ್ ತೆರಿಯುಂಡ್. ಇತ್ತೆ ಉಪ್ಪುನ ವಿಗ್ರಹದ ಪಿರಾವುಡ್ ಮಲ್ಲ ಆಕಾರದ ಕನ್ನಡಿ ಭಕ್ತನ ಪ್ರತಿಬಿಂಬೊಡ್ ದೇವಿ ಸ್ವರೂಪನ್ ತೋಜಾವುನ ವಿಶಿಷ್ಠ ತೆರನಾದ ಭಕ್ತಿಗಾದ್ ಗುರುಮಠಟ್ ಕುಲಗುರುಕುಲೆನ ಪಟ್ಟದ ದೇವೆರಾಯಿನ ನಂದಿ ಅತ್ತುಂಡ ಹಾಯ್ಗುಳಿ ಪ್ರಧಾನ ದೇವರಾದಿತ್ತುದ್, ಗುರುಪತ್ನಿನ ಪಟ್ಟದ ದೇವೆರಾಯಿನ ನವದುರ್ಗೆ ಪ್ರಧಾನವಾದಿತ್ತುದ್, ಮುಲ್ಪಲಾ ದಿನೋಲಾ ಪೂಜೆ ನಡತೊಂದಿತ್ತುಂಡ್. ಗುರುಪತ್ನಿನ್ ಸರ್ವೇಶ್ರೀ ಪನ್ಪಿನ ಗೌರವ ಸಂಭೋದನೆಡ್ ಲೆತ್ತೊಂದಿತ್ತೆರ್. ನವರಾತ್ರಿದ ಪೊರ್ತುಡ್ ನವದುರ್ಗೆಗ್ ವಿಶಿಷ್ಠವಾಯಿನ ಪೂಜೆ ನಡತೊಂದಿತ್ತುದ್, ಸಮಾಜದ ಪೊಂಜೊವುನಕುಲ್ ಸರ್ವೇಶ್ರೀ ಅಮ್ಮನ ನೇತೃತ್ವಡ್ ಈ ಪೂಜಾ ಕಾರ್ಯೊಲೆಡ್ ಶೃದ್ಧಾ ಭಕ್ತಿಡ್ ಪಾಲ್ ಪಡೆಯೊಂದಿತ್ತೆರ್. ಶ್ರೀಕುಲಮಹಾಸ್ತ್ರೀನ ವಾರ್ಷಿಕ ಉತ್ಸವಡ್ ಬಾಳ ಭಂಡಾರ ಗುರುಮಠಡ್ದ್ ಪಿದಾಡುನ ಸಂಪ್ರದಾಯ ರೂಢಿಡ್ ಇತ್ತುದ್ ಇನಿಕುಲಾ ಅನುಸರಿಸಾವೊಂದುಲ್ಲೆರ್. ವೆಂಕಟರಮಣ ಮೂಲವಿಗ್ರಹ ಪಿರಾಕುಡಿಂಚಿಲಾ ಇತ್ತುದ್ ಗುಡಿ ರಚನೆಯಾತುಂಡ್. ಮಾಧವ ಪೂಜಾರ್ಯೆರೆನ ಪಿರಾವುದ ಗುರುಕುಲೆನ ಕಾಲೊಡ್ ಪನ್ಪಿನವ್ ತೆರಿದ್ ಬೈದುಂಡ್. ಮಲಸಾವಿರ ದೈವೊಲೆನ ಸಾನಿಧ್ಯಡ್ ತ್ರಿಶೂಲ ಉಪ್ಪನೆಡ್ದಾವರ ಮುಲ್ಪದ ವಿಶೇಷ. ಹಸಲ ದೈವ ಪಶ್ಚಿಮ ಕರಾವಳಿಡ್ದ್ ಬತ್ತುದ್ ಅಜ್ಜಮ್ಮನ ರಕ್ಷಣೆಗ್ ಬೆರಿಕಾವಲಾದಿತ್ತೆರ್ ಪನ್ಪಿನ ನಂಬೊಲುಗೆ. ಮಾತಾ ವಿಷಯೊಲ್ ಅಷ್ಠಮಂಗಲ ಪ್ರಶ್ನೆಡುಲಾ ತೆರಿದ್ ಬೈದುಂಡ್. ಪೂರ್ವಜೆರೆನ ಮಾಹಿತಿಗ್ ಪುಷ್ಠಿ ತಿಕ್ಕಿಲೆಕ್ಕಾತುಂಡ್. ಬಾರಕೂರು ಸಂಸ್ಥಾನದ ಮಾತಾ ದೇವಸ್ಥಾನೊಲ್ ಅನ್ಯರ ಆಕ್ರಮಣೊಲೆಗ್ ಬಲಿಯಾದ್ ಮೂಲ ಸ್ವರೂಪ ಕಳೆಯೊಂದುಂಡಲಾ ಈ ದೇವಸ್ಥಾನ ಎರೆನ ದಾಳಿಗುಲಾ ಬಲಿಯಾತುಜಿ ಪನ್ಪಿನವ್ವೇ ಒಂಜಿ ವಿಶೇಷನೇ ಸತ್ಯ .ಗುರುಪರಂಪರೆ ಬೊಕ್ಕ ಪಟ್ಟಾಭಿಷೇಕ : ಅವಿಭಜಿತ ದಕ್ಷಿಣ ಕನ್ನಡ ಜಿಲ್ಲೆಡ್ ಶ್ರೇಷ್ಠ ಗುರು ಪರಂಪರೆ ಉಪ್ಪುನ ಒಂಜೇ ದೇವಸ್ಥಾನ ಪನ್ಪಿನವ್ವೇ ಸಮಾಜೊಗೊಂಜಿ ಪೆರ್ಮೆ. ಗುರುಕುಲೆನ ಮಾರ್ಗದರ್ಶಕನೊಡ್ ದೇವಸ್ಥಾನಡ್ ಮಾತಾ ಧಾರ್ಮಿಕ ಚಟುವಟಿಕೆಲೆಡ್ ಸಂಘಟಿತೆರಾದ್ ಮೊಗವೀರ ಸಮಾಜ ಅನುಸರಿಸಾವೊಂದ್ ಬರೊಂದಿತ್ತುದ್, ಸಾಮರಸ್ಯದ ಜೀವನ ಮಲ್ತೊಂದಿತ್ತೆರ್. ಮಾತಾ ಗುರುಕುಲೆನ ಪುದರುದ ದುಂಬು ಮೂಲ ಕುಲಗುರುಕುಲೆನ ಪುದರಾಯಿನ ಮಂಗಳ ಪೂಜಾರ್ಯ ಪನ್ಪಿನ ಗೌರವ ಸಂಭೋದನೆ ಇಪ್ಪುನವ್ವೆನ್ ತೂವೊಲಿ. ಮೂಲ ಅರ್ಚಕರೆನ್ ಪೂಜಾರಿ ಪಂಡುದ್ ಲೆತ್ತೊಂದಿತ್ತೆರ್ . ಶ್ರೀ ಮಾಧವ ಮಂಗಳ ಪೂಜಾರ್ಯೆರು ಕಡೇತ್ತ ಗುರುಕುಲಾದಿತ್ತುದ್ ಶ್ರೀ ಭದ್ರ ಮಂಗಳ ಪೂಜಾರ್ಯ, ಶ್ರೀ ಕೃಷ್ಣ ಮಂಗಳ ಪೂಜಾರ್ಯ , ಅಣ್ಣಪ್ಪ ಮಂಗಳ ಪೂಜಾರ್ಯ, ಶ್ರೀ ಅಂತಯ್ಯ ಮಂಗಳ ಪೂಜಾರ್ಯ, ಶ್ರೀ ಅಂಗಯ್ಯ ಮಂಗಳ ಪೂಜಾರ್ಯ ಪನ್ಪಿನ ಪುದರುಲೆನ್ ಲಿಖಿತ ದಾಖಲೆಡ್ ತೂವೊಲಿ. ಶ್ರೀ ಮಾಧವ ಮಂಗಳ ಪೂಜಾರ್ಯೆರು 1966 ಡ್ದ್ ತೀರಿನೆಡ್ ಬೊಕ್ಕ ಮೊಗವೀರ ಕುಲಗುರುಕುಲೆನ ಜಾಗೆ ಖಾಲಿಯಾದ್ ಒರಿದುಂಡ್.
ವೀರಭದ್ರ ದೇವೆರೆನ ಅನುಗೃಹದೊಟ್ಟುಗ್ ಗೃಹಸ್ಥಾಶ್ರಮ ಪೂರೈಸಾದ್, ಜೀವನದ ಅನುಭವ ಉಪ್ಪುನ ಗುರುಕುಟುಂಬದ ನಿಷ್ಠಾವಂತೆರೆನ ಜಾತಕ ಫಲೊನ್ ಅಭ್ಯಾಸ ಮಲ್ತುದ್ ಬಾರ್ಕೂರು, ಮಂಗಳೂರು, ಬಗ್ವಾಡಿ ಹೋಬಳಿದ ಒಪ್ಪಿಗೆದೊಟ್ಟುಗ್ ಶಾಸ್ತ್ರೋಕ್ತವಾದ್ ಗುರುಕುಲೆನ ಪಟ್ಟಾಭಿಷೇಕ ಆತುಂಡ್. ಪಟ್ಟ ಏರುನೆಡ್ದ್ ದುಂಬು ಪೂರ್ವೊಡ್ ಮಾತಾ-ಪಿತೃಲೆನ ಉತ್ತರ ಕ್ರಿಯೆ ಮಲ್ತುದ್, ಅಕಲ್ನ ಬಂಧುಲು ಗುರುನ್ ಸಮಾಜೊಗಾದ್ ಬುಡ್ದ್ ಕೊರ್ಪಿನ ಸಂಪ್ರದಾಯ ಇತ್ತುಂಡ್.ಆಂಡ ಅರೆನ ಕುಟುಂಬದಕುಲ್ ಗುರುಕುಲೆನ ಸಾವು ಡ್ ಬೊಕ್ಕ ಸೂತಕ ಆಚರಣೆ ಮಲ್ತೊಂದಿತ್ತೆರ್. ಗುರುಕುಲೆನ ಜೀವಿತಾವಧಿಡ್ ಶಿಷ್ಯರೆನ್ ನೇಮಕಮಲ್ಪುನ ಪರಿಪಾಠ ಇತ್ತುಜಿ. ಗುರುಕುಲ್ ಕುಲದೇವಿನ ಪ್ರಧಾನ ಅರ್ಚಕರಾದಿತ್ತುದ್ ಸಮಾಜದ ಸರ್ವೋತ್ಕೃಷ್ಠಪ ನಾಯಕೆರು, ಸಮಾಜದ ಮಾತಾ ವಿವಾದ ತಕರಾರುಲೆನ್ ನ್ಯಾಯ ತೀರ್ಮಾನ ಮಲ್ಪುನ ಗುರುತರ ಹೊಣೆಗಾರಿಕೆ ಗುರುಕುಲೆನ ಆದಿತ್ತುಂಡ್. ಗುರುಮಠಟ್ ಜಾತಿಯ ಸಭೆ ನಡತೊಂದಿತ್ತುಂಡ್. ದರ್ಬಾರಡ್ ಪ್ರಸಾದ ವಿತರಣೆ ನಡತೊಂದಿತ್ತುಂಡ್. ಗುರುಕುಲ್ ಪ್ರಸಾದ ವಿತರಣೆ ಕಾಲೊಡ್ ರಾಜೆರ್ನ ತುತ್ತೈತೊನ್ ತುತ್ತೊಂದ್ ರಾಜಗಾಂಭಿರ್ಯಡ್ ಇತ್ತೆರ್. ವರ್ಷಂಪ್ರತಿ ಗುರುಕುಲ್ ಸಂಚಾರೊಗ್ ಪೋವೊಂದಿತ್ತುದ್ ಆರು ಪಿರ ಬರ್ಪಿನ ಪೊರ್ತುಡ್ ಮಸ್ತ್ ಮೀನು ತಿಕ್ಕೊಂದಿತ್ತುಂಡ್ ಪನ್ಪಿನ ಹಿರಿಯೆರೆನ ಅನುಭವದ ಪಾತೆರ. ಮೀನುಗಾರಿಕೆ ಸುರು ಮಲ್ಪನಗ ಗುರುಕುಲೆನ ನೇತೃತ್ವಡ್ ಮೀನುಗಾರೆರ್ ಗುರಿಕಾರೆರೆನ ಹೋಬಳಿ ಗುರಿಕಾರೆರೆನ ಸಹಭಾಗಿತ್ವಡ್ ಸಾಮೂಹಿಕ ಪಾರ್ಥನೆ ಮಲ್ತೊಂದಿತ್ತೆರ್. ಇನಿಕುಲಾ ಈ ಸಂಪ್ರದಾಯ ನಡತೊಂದುಂಡ್.
ಕಡಲಪ್ಪೆ ಜೋಕುಲೆನ ಕುಲದೇವತೆಯಾದ್ ಮೆರೆಯೊಂದುಪ್ಪುನ ಬೆಣ್ಣೆಕುದ್ರು ಕುಲಮಹಾಸ್ತ್ರೀ ಅಪ್ಪೆನ ಗೌಜಿದ ಜಾತ್ರೆದುಚ್ಚಯಗ್ ಮಾತೆರ್ಲಾ ಪಾಲ್ ಪಡೆದ್ ಅಪ್ಪೆನ ಅನುಗ್ರಹ ಪಡೆತೊನ್ಲೆ ಪಂಡುದ್ ಬಿನ್ನಪ..
by 